1, 2. (a) Kico algun lider religioso kier a haya sa, y kico Pedro a contesta nan? (Wak e prome plachi.) (b) Dicon Pedro por a papia cu asina tanto curashi?

ALGUN siman despues cu Hesus a muri, apostel Pedro a enfrenta un grupo di lider religioso poderoso. Nan tabata e mesun grupo di lider hudiu cu a traha complot pa mata Hesus. Awor nan tabata rabia cu Pedro y a exigi un splicacion di dje pasobra el a cura un homber cu a nace lam. Nan kier a haya sa ta cu ki autoridad of den nomber di ken Pedro a haci esaki. Cu curashi Pedro a contesta: “Ta den nomber di Hesucristo, e Nazareo, esun cu boso a claba na staca, ma cu Dios a lanta for di morto, si, ta pa medio di dje e homber aki ta para bon di salud boso dilanti.”—Echo. 4:5-10.

² Mas prome, Pedro tabatin asina tanto miedo cu el a nenga Hesus tres biaha. (Mar. 14:66-72) Dicon awor e tabatin asina tanto curashi dilanti di e lidernan religioso? Spirito santo sin duda a hunga un papel importante den esey, pero tambe Pedro tabatin sigur cu Hesus a ser resucita. Dicon Pedro tabata asina sigur cu Hesus ta na bida? Y dicon nos tambe por tin e mesun confianza ey?

3, 4. (a) Menciona e resureccionnan cu a tuma luga prome cu e apostelnan di Hesus a nace. (b) Ken Hesus a resucita?

 ³ Pa e apostelnan di Hesus, e idea cu e mortonan por biba atrobe no tabata algo nobo; resureccion a yega di tuma luga prome cu nan a nace. Nan tabata sa cu Dios a duna e profetanan Elias cu Eliseo autoridad pa haci e tipo di milagernan ey. (1 Rey. 17:17-24; 2 Rey. 4:32-37) Tabatin hasta e caso di un homber morto cu a biba bek ora cu nan a benta su curpa den un graf y su curpa a touch cu e wesonan di Eliseo. (2 Rey. 13:20, 21) Mescos cu nos ta kere cu e Palabra di Dios ta berdad, e prome cristiannan tambe a kere cu e relatonan biblico aki ta berdad.

⁴ Muy probablemente, e relatonan di e hendenan cu Hesus a resucita ta conmove nos hopi ora nos lesa nan. Por ehempel, nos por imagina con sorprendi e viuda a keda ora Hesus a resucita su unico yiu. (Luc. 7:11-15) Na un otro ocasion, Hesus a resucita un mucha muher di 12 aña. Nos por imagina con e tristeza profundo di e mayornan a cambia den alegria y asombro ora cu Hesus a lanta nan yiu muher for di morto. (Luc. 8:49-56) Anto imagina con emociona e hendenan lo mester tabata ora nan a mira Lazaro cana sali for di e graf sano y salvo.—Juan 11:38-44.

5. Den ki manera e resureccion di Hesus tabata diferente for di esnan prome cu ne?

⁵ E apostelnan tabata sa cu e resureccion di Hesus tabata diferente for di tur e resureccionnan prome cu ne. E hendenan cu a resucita anteriormente a lanta bek cu curpa fisico y cu tempo a bolbe muri. Pero Dios a resucita Hesus cu un curpa spiritual cu nunca por caba na nada den graf. (Lesa Echonan 13:34.) Pedro a skirbi cu Hesus “a ser mata den carni, ma a haya bida bek den spirito.” Ademas, “el a bay cielo y awor e ta na man drechi di Dios, kende a somete angel, autoridad y poder na dje.” (1 Ped. 3:18-22) E resureccionnan anterior tabata extraordinario, pero e resureccion di Hesus tabata e milager di mas grandi den historia.

6. Ki efecto e resureccion di Hesus tabatin riba su discipelnan?

⁶ E resureccion di Hesus tabatin un impacto profundo riba su discipelnan. E no tabata morto mas manera su enemigonan tabata kere. Al contrario, e tabata un spirito cu ningun hende lo no por haci daño. Ademas, su resureccion a confirma cu e ta e Yiu di Dios, y unabes e discipelnan tabata sa esaki, nan tristeza profundo a cambia den gran alegria. Ademas, en bes di miedo nan a haya curashi. Nan por a proclama e bon noticia cu conviccion ya cu Hesus tabata bibo y e proposito di Jehova lo a cumpli sin falta.

7. Kico Hesus ta haciendo actualmente, y ki preguntanan ta lanta?

⁷ Como sirbidornan di Jehova, nos sa cu Hesus no tabata djis un bon hende cu a haci cosnan grandi. E ta bibo awe y ta dirigi e trabou di predica cu ta tumando luga rond mundo. Como e Rey di e Reino celestial di Dios, Hesucristo pronto lo elimina tur maldad for di riba Tera y transforma nos planeta den un paradijs caminda hende lo biba pa semper. (Luc. 23:43) Nada di esaki lo no por ta posibel si Hesus no a ser resucita. Pues, dicon nos por ta sigur cu el a ser lanta for di morto? En realidad, kico su resureccion ta nifica pa nos?

8, 9. (a) Dicon e lidernan religioso hudiu a pidi pa vigila e graf di Hesus? (b) Kico a sosode ora e muhernan a bay na e graf?

⁸ Despues cu Hesus a ser ehecuta, e sacerdotenan principal y e fariseonan a  bay cerca Pilato y a bis’e: “Señor, nos ta corda cu ora e gañado ey tabata na bida, el a bisa: ‘Despues di tres dia lo mi lanta for di morto.’ Pesey, duna ordo pa tuma medida di siguridad na e graf te cu e di tres dia, pa su discipelnan no bin horta su curpa y bisa e pueblo: ‘El a lanta for di morto!’ E ultimo engaño aki lo ta pio cu esun prome.” Pilato a contesta nan: “Ata un trupa di soldaat pa boso. Bay y vigil’e lo mihor cu boso por.” Y esey ta exactamente loke nan a haci.—Mat. 27:62-66.

⁹ Hesus a ser dera den un graf coba den baranca, y nan a lora un piedra grandi pone na entrada di e graf. E lidernan religioso hudiu tabata kier pa Hesus keda pa semper eyden: morto den graf. Pero Jehova tabatin otro cos na mente. Ora Maria Magdalena y e otro Maria a bin na e graf riba e di tres dia, nan a haya e piedra hala un banda y un angel sinta riba dje. E angel a bisa e muhernan pa wak den e graf pa nan mira pa nan mes cu e ta bashi. E angel di: “E no ta akinan, pasobra el a ser lanta for di morto.” (Mat. 28:1-6) Hesus tabata bibo!

10. Ki prueba Pablo a duna cu Hesus a ser resucita?

¹⁰ Loke a tuma luga durante e siguiente 40 dianan a comproba fuera di tur duda cu Hesus a ser resucita. Den apostel Pablo su prome carta na e Corintionan, el a duna un resumen di e evidencia ey. El a skirbi: “Un di e prome cosnan cu mi a pasa pa boso ta loke mi tambe a ricibi, esta, cu Cristo a muri pa nos picanan, segun e Scritura, cu nan a der’e, cu el a ser lanta for di morto riba e di tres dia, segun e Scritura, cu el a aparece na Cefas y despues na e 12 apostelnan. Despues di esey el a aparece na mas cu 500 ruman pareu; algun di nan a bay sosega, ma mayoria di nan t’ey hunto cu nos ainda. Despues di esey el a aparece na Santiago, caba na tur e apostelnan; ma por ultimo, el a aparece na mi tambe, manera na un cu a nace prome cu tempo.”—1 Cor. 15:3-8.

11. Den ki sentido e resureccion di Hesus a tuma luga “segun e Scritura”?

¹¹ E resureccion di Hesus a tuma luga “segun e Scritura.” E Palabra di Dios a profetisa e resureccion. Por ehempel, David a skirbi cu Dios lo no a laga su “fiel sirbidor” keda den Graf. (Lesa Echonan 13:35.) Na ken David a referi? Wel, riba e dia di Pentecoste di aña 33, apostel Pedro a aplica e versiculo profetico ey na Hesus, bisando: “[David] a mira e resureccion di Cristo di antemano y a papia tocante esey, esta, cu Dios lo no a lag’e keda den Graf y cu su curpa lo no a putri.”—Echo. 2:23-27, 31.

12. Ken a mira Hesus despues di su resureccion?

¹² Hopi hende a mira Hesus despues cu el a resucita. Durante e 40 dianan despues cu Hesus a resucita, el a aparece na su discipelnan den e hofi caminda su graf tabata, tambe riba caminda pa Emaus y na otro luganan. (Luc. 24:13-15) Algun biaha el a papia cu personanan individual—un di nan tabata Pedro—y na otro ocasion el a papia cu un grupo di hende. Y como cu un biaha, Hesus a aparece hasta na un grupo di mas cu 500 hende, no tin duda cu esey a tuma luga.

13. Con e discipelnan a demostra cu nan tabatin sigur cu Hesus a ser resucita?

¹³ E discipelnan a predica cu conviccion  tocante e resureccion di Hesus. Nan a ser persigui, nan a sufri y algun a ser mata pa motibo di e testimonio cu nan tabata duna di e resureccion di Cristo. Pensa un rato: Pedro a predica tocante e resureccion di Cristo na e mesun hendenan cu a odia Hesus y cu a traha complot pa mat’e. Lo el a risca su bida pa un mentira? No. Tanto Pedro como e otro discipelnan tabatin sigur cu Hesus ta na bida y tabata dirigiendo e trabou di predica. Ademas, e resureccion di Hesus a duna su discipelnan e garantia cu nan tambe lo ser resucita. Pues, Esteban a muri convenci cu lo bay tin un resureccion di e mortonan.—Echo. 7:55-60.

14. Kico ta convence bo cu Hesus ta bibo?

¹⁴ Nos tin prueba cu Hesus ta gobernando awor como Rey y ta Cabes di e congregacion cristian. Cristianismo berdadero ta sigui crece. Esaki lo a sosode si Hesus no tabata bibo? Kisas nunca nos lo no a tende di Hesus si e no a ser resucita. Pero nos tin prueba convencente cu Hesus ta bibo y ta guia y dirigi nos awe segun cu nos ta predica e bon noticia rond mundo.

15. Dicon e resureccion di Hesus ta duna nos curashi pa predica?

¹⁵ E resureccion di Cristo ta duna nos curashi pa predica. E ultimo 2.000 añanan, enemigonan di Dios a haci tur loke ta posibel pa para e predicacion di e bon noticia di Reino y e trabou di haci discipel. Nan a uza tur sorto di arma contra nos: apostasia, bofon, atakenan violento, prohibicion, tortura y ehecucion. Pero Bijbel a profetisa: “Ningun arma cu wordo forma contra bo lo no prospera.” (Isa. 54:17) Nos no tin miedo di e compinchinan di Satanas. Hesus ta cu nos y ta apoya nos, manera el a priminti cu lo e haci. (Mat. 28:20) Nos no mester tin miedo, pasobra ni maske kico nos enemigonan haci, nunca nan lo no por silencia nos.

16, 17. (a) Kico e resureccion di Hesus ta confirma? (b) Segun Juan 11:25, ki poder Dios a duna Hesus?

¹⁶ E resureccion di Hesus ta confirma cu tur loke el a siña hende ta berdad. Pablo a skirbi cu si Cristo no a ser lanta for di morto, e fe y predicacion cristian lo no tabatin niun sentido. Un comentarista biblico a skirbi: “Si Cristo no a ser lanta, ... cristiannan ta victimanan digno di lastima, engaña pa un enorme mentira.” Sin e resureccion di Hesus, e relatonan di Evangelio ta bira simplemente un historia tristo di un homber sabi y di bon curason cu a ser asesina pa su enemigonan. Pero Hesus a resucita. Y esey ta confirma cu tur loke el a siña hende tabata berdad, incluso loke el a bisa tocante futuro.—Lesa 1 Corintionan 15:14, 15, 20.

¹⁷ Hesus a bisa: “Ami ta e resureccion y e bida. Esun cu pone fe den mi, maske e muri, lo bolbe biba.” (Juan 11:25) E declaracion maraviyoso ey lo keda realisa sin falta. Jehova a duna Hesus e poder pa resucita no solamente e hendenan cu lo goberna como spirito den cielo sino tambe miles di miyones di hende cu lo lanta cu e speransa di biba pa semper riba Tera. E sacrificio di rescate y resureccion di Hesus ta un garantia cu morto lo no existi mas. Esaki no ta duna bo e fortaleza pa wanta prueba y hasta enfrenta morto cu curashi?

18. E resureccion di Hesus ta un garantia di kico?

¹⁸ E resureccion di Hesus ta duna nos e garantia cu hende lo ser husga a base di e normanan amoroso di Jehova. Pablo a bisa un grupo di homber y muher den  Atenas di antiguedad cu Dios “ta bay husga henter mundo den husticia pa medio di un homber cu el a nombra. Y el a duna tur hende un garantia di esaki ya cu el a lant’e for di morto.” (Echo. 17:31) Si, Dios a apunta Hesus como Hues, y nos por tin sigur cu su huicio lo ta husto y amoroso.—Lesa Isaias 11:2-4.

19. E echo cu nos ta kere den e resureccion di Cristo tin ki efecto riba nos?

¹⁹ Nos kier haci e boluntad di Dios pasobra nos ta kere den e resureccion di Hesus. Si no ta pasobra Hesus a duna su bida como sacrificio y a ser resucita despues, nos lo no tabatin niun posibilidad di haya liberacion for di pica y morto. (Rom. 5:12; 6:23) Si Hesus no a ser resucita, nos lo no tabatin speransa y nos tambe lo por a bisa manera otro hende: “Laga nos come y bebe, pasobra mañan nos ta muri.” (1 Cor. 15:32) Pero nos no ta concentra riba e placernan di bida. Mas bien, nos ta aprecia e speransa di resureccion y ta semper ansioso pa obedece Jehova den tur cos.

20. Con e resureccion di Hesus ta demostra e grandeza di Jehova?

²⁰ Cristo su resureccion ta demostra e grandeza di Jehova, kende “ta recompensa esnan cu ta haci esfuerso pa busc’e.” (Heb. 11:6) Bo a yega di para keto un rato y pensa riba e gran poder y sabiduria cu Jehova a uza pa resucita Hesus como un spirito inmortal? E resureccion di Hesus a mustra bon cla cu Dios tin e capacidad di cumpli cu tur loke e priminti. Jehova a profetisa cu lo bin un “simia”, of descendiente, cu lo a hunga un papel clave den resolve e cuestion di soberania universal. Pa cumpli cu e profecia ey, Hesus, e “simia”, mester a muri y ser resucita.—Gen. 3:15.

21. Kico e speransa di resureccion ta nifica pa bo?

²¹ Nos ta masha agradecido na Jehova pa e speransa di resureccion. Apostel Juan a scucha e promesa maraviyoso aki: “Tende! E tent di Dios lo ta cu humanidad, y lo e biba hunto cu nan, y nan lo ta su pueblo. Y Dios mes lo ta hunto cu nan. Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas. Y Esun sinta riba e trono a bisa: ... ‘Skirbi, pasobra e palabranan aki ta digno di confianza y berdad.’” Ken a duna Juan e revelacion inspira aki? Hesucristo resucita!—Rev. 1:1; 21:3-5.