1. ?Buk blong Levitikas i givhan long yumi olsem wanem?

JEHOVA i wantem se ol man blong hem oli tabu. Buk blong Levitikas i tokbaot fasin ya moa i bitim ol narafala buk long Baebol. I gud yumi kasem save long buk ya mo yumi tinghae long ol tok blong hem. Samting ya bambae i givhan long yumi blong yumi save olsem wanem blong stap tabu.

2. ?Wanem i stap long buk blong Levitikas?

² Moses i raetem buk blong Levitikas. Buk ya i “stret gud blong tijim yumi,” olsem ol narafala buk long Baebol. (2 Timoti 3:16) Long ol olfala hanraet blong Levitikas, nem blong Jehova i stap 10 taem long ol japta wanwan. Sipos yumi kasem save long buk ya, bambae yumi lukaot gud blong yumi no mekem wan samting we i sakem doti long nem blong God. (Levitikas 22:32, NW) Tok ya “mi mi Jehova” we i stap plante taem long buk ya, i mekem yumi tingbaot se yumi mas obei oltaem long God. Long stadi ya mo long nekis stadi, bambae yumi tokbaot plante gudfala save long Levitikas, we bambae i givhan long yumi blong yumi mekem klin wosip.

3, 4. Taem Eron mo ol pikinini blong hem oli swim, ?hemia i pija blong wanem? (Yu luk pija long stat blong stadi.)

³ Ridim Levitikas 8:5, 6. Jehova i putumap Eron i kam hae  pris long neson blong Isrel, mo ol pikinini boe blong hem oli kam pris. Eron i pija blong Jisas, mo ol pikinini blong hem oli pija blong ol Kristin we tabu spirit i makemaot olgeta. Taswe, from we Eron i swim blong kam klin long fes blong God, ?hemia i min se Jisas tu i mas kam klin? Nogat. Jisas i no gat sin, ‘i no gat wan samting nating i rong long hem.’ (Hibrus 7:26; 9:14) Nating se i olsem, afta we Eron i swim, hem i pija blong Jisas we i klin mo i stret. Ale, ?taem ol pikinini blong Eron oli swim, hemia i pija blong wanem?

⁴ Hemia i soemaot se olgeta we God i jusumaot blong oli pris long heven, oli mas kam klin. ?Samting ya i hapen taem oli baptaes long wota? Nogat. Baptaes ya i no tekemaot sin, be hem i wan saen se man i givim laef blong hem i go long God. Ol Kristin we tabu spirit i makemaot olgeta oli mas mekem tijing blong Kraes i wok long laef blong olgeta, nao long fasin ya ‘Tok blong God’ bambae i mekem olgeta oli klin. (Efesas 5:25-27) Olsem nao, oli klin mo oli tabu. ?Be olsem wanem long “ol narafala sipsip”?—Jon 10:16.

5. ?Olsem wanem Tok blong God i save mekem ol narafala sipsip oli klin?

⁵ Ol pikinini blong Eron oli no pija blong ‘bigfala kampani’ blong ol narafala sipsip. (Revelesen 7:9) Nating se i olsem, Tok blong God i mas mekem ol narafala sipsip tu oli kam klin. Taem oli ridim tok blong Baebol se sakrefaes blong Jisas i gat bigfala paoa, oli bilif long tok ya, nao oli mekem wosip long Jehova “long dei mo long naet.” (Revelesen 7:13-15) Ol Kristin we tabu spirit i makemaot olgeta mo ol narafala sipsip oli gohed blong kam klin, mo oli soemaot samting ya long ol gudfala fasin blong olgeta. (1 Pita 2:12) Jehova i glad taem hem i luk se ol man blong hem we oli obei long hem mo oli folem gud Jisas, oli klin mo oli joen gud.

6. ?From wanem yumi mas jekem yumi oltaem?

⁶ ?Yumi lanem wanem long ol pris  blong Isrel we oli mas klin long bodi blong olgeta? Plante man we yumi mekem Baebol stadi long olgeta, oli luk we yumi klin mo yumi jenis gud, mo haos wosip blong yumi i klin. Be sipos yumi wantem wosipim Jehova, ‘tingting blong yumi tu i mas klin.’ (Ridim Ol Sam 24:3, 4; Aesea 2:2, 3.) Taswe, taem yumi mekem wok blong Jehova, tingting mo hat mo bodi blong yumi i mas klin. Oltaem yumi wanwan, yumi mas jekem yumi bakegen. Maet yumi faenemaot se yumi mas mekem sam bigfala jenis blong kam klin mo tabu. (2 Korin 13:5) Olsem nao, sipos wan man we i baptaes i stap lukluk ol rabis pija, i gud hem i askem se: ‘?Fasin ya blong mi i soemaot se mi mi tabu?’ Afta, hem i mas askem long ol elda blong oli givhan long hem blong i sakemaot rabis fasin ya.—Jemes 5:14.

7. ?Wanem gudfala fasin blong Jisas we i sem mak long ol pris long Levitikas 8:22-24?

⁷ Taem Eron i kam hae pris mo ol pikinini blong hem oli kam pris long Isrel, Moses i putum smol blad blong man sipsip long raet sora blong olgeta, mo long bigfala fingga blong raet han blong olgeta, mo long bigfala fingga blong raet leg blong olgeta. (Ridim Levitikas 8:22-24.) Hemia i soemaot se ol pris ya bambae oli obei gud taem oli mekem wok blong olgeta. Hae Pris Jisas tu i letem God i lidim hem, i mekem samting we Jehova i wantem, mo laef blong hem i klin. Long fasin ya, hem i soemaot nambawan eksampol long ol Kristin we tabu spirit i makemaot olgeta mo ol narafala sipsip.—Jon 4:31-34.

8. ?Yumi evriwan i mas mekem wanem?

⁸ Yumi evriwan we yumi wosipim Jehova, yumi mas folem eksampol blong Jisas we i neva lego Jehova. Yumi obei gud long Tok blong God, Baebol, mo yumi no ‘mekem tabu spirit i harem nogud.’ (Efesas 4:30) Yumi mas gat strong tingting blong “wokbaot long gudfala rod nomo.”—Hibrus 12:13.

9. ?Trifala brata we oli wok wetem ol brata long Hed Kampani, oli talem wanem? ?Tok blong trifala i givhan long yumi olsem wanem?

⁹ Hemia tok blong 3 brata we trifala i wok plante yia wetem ol brata long Hed Kampani. Faswan i talem se: “Tru ya, i wan spesel blesing blong wok wetem ol brata ya. Be sam samtaem, samting i save hapen we i soemaot se olgeta oli sinman yet, nating se tabu spirit i makemaot olgeta. Taswe, long ol yia we i pas, samting we mi traehad blong mekem, hemia blong obei oltaem long ol brata ya we oli lidim yumi.” Narafala brata i talem se: “Oltaem mi mi tingbaot 2 Korin 10:5, we i talem se yumi mas ‘ona long Kraes.’ Samting ya i givhan long mi blong mi obei mo wok gud wetem olgeta we oli lidim yumi. Hemia nao fasin blong obei we i kamaot long hat.” Wan narafala brata i talem se: “Yumi mas obei long ogenaesesen blong Jehova mo long olgeta we hem i stap yusum blong mekem wok blong hem i kam bigwan moa long wol. Sipos yumi mekem olsem, yumi soemaot se yumi lavem samting we Jehova i lavem mo yumi agensem samting we Jehova i agensem. Mo oltaem yumi askem long Jehova blong i  lidim yumi, mo yumi mekem samting we hem i glad long hem.” Brata ya i laekem tumas eksampol blong Brata Nathan Knorr, we i kam wan memba blong Hed Kampani. Long yia 1925, Brata Knorr i obei long ol advaes long Wajtaoa ya “Wan Neson i Bon,” nating se sam narafala brata oli no wantem obei. Sipos yumi tingting dip long ol tok blong trifala brata ya, hemia i save givhan long yumi blong yumi obei long God nao yumi stap klin.

10. ?From wanem i impoten blong obei long loa blong God long blad?

¹⁰ Ridim Levitikas 17:10. Jehova i givim loa long ol man Isrel se oli no mas kakae blad. Mo Jehova i talem long ol Kristin tu se oli no mas kakae blad, nating se blad blong anamol no blad blong man. (Ol Wok 15:28, 29) I krangke nomo blong mekem wan samting we Jehova i agensem, nao hem i putumaot yumi long kongregesen blong hem. Yumi lavem Jehova mo yumi wantem obei long hem. Nating sipos yumi mas ded, be bambae yumi no brekem loa blong hem, taem ol man we oli no save hem mo oli no kea long loa blong hem, oli traem fosem yumi blong tekem blad. Yumi save se samfala bambae oli jikim yumi, be yumi obei long God nomo. (Jud 17, 18) ?Wanem i save givhan long yumi blong yumi no kakae blad mo yumi no letem dokta i putum blad long yumi?—Dutronome 12:23.

11. ?Ol man Isrel oli mekem ol samting long Dei blong Stretem Sin blong folem wan kastom nomo?

¹¹ I gud yumi tingbaot samting we hae pris blong Isrel i mekem wan taem long wan yia, long Dei blong Stretem Sin. Olsem nao, bambae yumi kasem save long tingting blong God long blad. Ol man Isrel oli yusum blad blong mekem wan samting nomo. Hemia blong askem long God blong i fogivim sin blong olgeta, nao oli save gat pis wetem God. Hae pris i sakem smol blad blong bul mo nani antap long lid blong bokis blong kontrak. (Levitikas 16:14, 15, 19) Taem hem i mekem olsem, hemia i openem rod blong God i fogivim sin blong ol man Isrel. Jehova i talem tu se sipos wan man i kilim anamol blong kakae, hem i mas letem blad i ronaot, mo i mas berem. Hemia from we “olgeta samting we i gat laef, be laef blong olgeta i stap long blad blong olgeta.” (Levitikas 17:11-14) ?Olsem wanem? ?Ol man Isrel oli mekem ol samting ya blong folem wan kastom nomo? !Nogat! Plante handred yia bifo, God i talem long Noa mo ol pikinini blong hem tu se oli no mas kakae blad. (Jenesis 9:3-6) ?Olsem wanem long ol Kristin?

12. ?Pol i talem wanem, blong soemaot se i mas gat blad i ron blong God i save fogivim man?

¹² Aposol Pol i talem se blad i gat paoa blong mekem man i klin long fes blong God, i se: “Long fasin blong Loa ya, klosap olgeta samting, be pris i mas yusum blad blong anamol no pijin blong mekem olgeta oli klin long fes blong God. Mo sipos i no gat blad i ron, bambae God i no save tekemaot sin blong man.” (Hibrus 9:22) Nating se ol sakrefaes blong anamol oli save givhan, be oli no tekemaot sin blong olwe. Pol i talem se ol sakrefaes ya oli mekem ol man Isrel oli tingbaot nomo  se oli sinman, mo oli nidim wan sakrefaes we i gud moa blong tekemaot sin blong olgeta blong olwe. Yes, Loa i “pija nomo blong ol tru samting we i stap. Hem i no klia gud, i olsem sado nomo blong ol gudgudfala samting, we bambae i kamtru.” (Hibrus 10:1-4) Taswe, ?wanem i save tekemaot sin blong man blong olwe?

13. Taem Jisas i givim blad blong hem i go long Jehova, ?hemia i givhan long yumi olsem wanem?

¹³ Ridim Efesas 1:7. Jisas i ded olsem wan sakrefaes blong pemaot ol man, mo ol man we oli lavem Jisas mo Papa blong hem oli tinghevi long sakrefaes ya. (Galesia 2:20) Be samting we Jisas i mekem afta we hem i laef bakegen, hemia nao samting we i tekemaot sin blong yumi. Taem hae pris i go insaed long Rum ya we i Tabu we i Tabu long Dei blong Stretem Sin, i olsem we hem i stanap long fes blong God. Long ples ya, hem i givim blad blong anamol i go long God. (Levitikas 16:11-15) Long sem fasin, taem Jisas i laef bakegen mo i go antap long heven, hem i go stanap long fes blong God, mo i olsem se hem i givim blad blong hem i go long God. (Hibrus 9:6, 7, 11-14, 24-28) Yumi glad tumas se taem yumi bilif long blad blong Jisas we i gat bigfala paoa, God i save fogivim sin blong yumi, mo yumi save stanap long fes blong God we tingting blong yumi i klin.

14, 15. ?From wanem yumi mas kasem save gud long loa blong Jehova long blad mo obei long hem?

 ¹⁴ Maet yu luksave moa naoia, from wanem Jehova i talem se yumi no mas kakae blad blong anamol mo blad blong man. (Levitikas 17:10) ?Yu yu kasem save from wanem God i talem se blad i tabu? Hemia from we laef i stap long blad. (Jenesis 9:4) Yumi mas gat sem tingting olsem God, mo yumi mas obei long loa blong hem we i talem se yumi no tekem blad. Wan rod nomo blong yumi gat pis wetem God, hemia blong bilif long sakrefaes blong Jisas, mo blong kasem save se God i tinghevi long blad.—Kolosi 1:19, 20.

¹⁵ Enitaem nomo yu save sek se wan sik no wan aksiden i kasem yu. Nao yu mas mekem desisen se bambae yu tekem blad no nogat. Mo long taem ya, maet dokta i wantem givim meresin long yu we oli wokem long wan smol samting insaed long blad, no i wantem yusum wan masin we blad blong yu i pastru long hem. Be yu no mas wet kasem taem ya blong mekem wan desisen. Bifo we trabol i kasem yu, yu prea long Jehova, yu lukaot moa save, mo yu mekem desisen. Nao taem trabol i kasem yu, bambae yu gat strong tingting blong obei long loa blong Jehova long blad. !Bambae yumi neva wantem mekem samting we Jehova i agensem, nao hem i harem nogud tumas! Mo tu, tede plante dokta mo plante narafala man oli traem pulum yumi blong givim blad, we oli ting se bambae i sevem laef blong narafala man. Be ol man blong Jehova we oli tabu, oli save se Jehova i gat raet blong putum loa long blad. Hem i talem se blad i tabu, nomata se i blad blong anamol no blad blong man. Taswe, yumi mas gat strong tingting blong obei long loa blong hem long blad. Ol gudfala fasin blong yumi tu oli soemaot se yumi tinghae long blad blong Jisas we i ron from yumi. Blad blong Jisas nomo i openem rod blong God i save fogivim sin blong yumi, mo blong yumi gat janis blong kasem laef we i no save finis.—Jon 3:16.

16. ?From wanem ol man blong Jehova oli mas tabu?

¹⁶ Taem Jehova i tekemaot ol man Isrel we oli wok slef long Ijip, hem i talem se: “Mi nao mi tekemaot yufala long Ijip, mi tekem yufala i kam long ples ya blong bambae mi nomo mi God blong yufala. Oltaem yufala i mas klin long fes blong mi, from we mi mi tabu, mi klin olgeta.” (Levitikas 11:45) Jehova i wantem se ol man Isrel oli tabu from we hem i tabu. Tede tu, Jehova i wantem se yumi tabu. Buk blong Levitikas i tokbaot samting ya klia nomo.

17. ?Wanem tingting blong yu long buk blong Levitikas?

¹⁷ Ating ol vas blong Levitikas we yumi stadi long olgeta oli givhan long yu blong yu kasem save moa long buk ya, mo yu kasem save from wanem yumi mas klin mo tabu long fes blong God. ?Be yumi save lanem wanem moa long Levitikas? ?Buk ya i save givhan long yumi olsem wanem blong mekem wosip we i klin? Bambae yumi tokbaot tufala kwestin ya long nekis stadi.