Cino Tufwile Ukuyela Amuzilo
Cino Tufwile Ukuyela Amuzilo
“Mulinzile ukuya Amuzilo.”—AINA LEVI 11:45.
MUNGAASUKA MUTUULI?
U mulandu ci uno ukusangulula Aloni na ana yakwe cayela i cintu icicindame sana uku yantu yakwe Yeova yonsi?
Uzye icuvwila vyalemana uli nu kuya amuzilo?
Uzye tulinzile ukulola uli isunde lyakwe Yeova ilikalanda pa wazi?
1. Uzye ibuku lya Ina Levi lingatwazwa uli?
UMWIBUKU lya Ina Levi, u mwalumbulwa sana izwi lyakuti umuzilo ukuluta amabuku yonsi aasyala amuli Baibo. Vino aomvi yakwe Yeova yonsi acumi yakalondekwa ukuya amuzilo, ukumanya ningo nu kutemwa ibuku lya Ina Levi, kulatwazwa ukuya amuzilo.
2. I vyani vimwi-vimwi ivyaya umwibuku lya Ina Levi?
2 Mose u walemvile Ibuku lya Ina Levi, nupya lyaya pa “mazwi yonsi amu Malembelo” aakaomviwa umu kusambilizya. (2 Timoti 3:16) Izina lyakwe Yeova lyalumbulwa apiipi ni miku 10 umu cipande conga na conga ica mwibuku kwene lii. Ukumanya ningo ibuku lya Ina Levi kulatwazwa ukukanacita ivintu ivingalenga tusaalule izina lyakwe Leza. (Aina Levi 22:32) Amazwi aalumbulwa amaila aingi akuti ‘Nene indi Yeova’ yalinzile ukutwiusya ukuvwila Leza lyonsi. Umwisambililo lii ni lilondeliilepo, tuli nu kuzana ivintu ivisuma sana ivyaya umwibuku lya Ina Levi, ivili nu kutwazwa ukuya asanguluke lino tukupepa Yeova.
CIKALONDEKA UKUYA AMUZILO
3, 4. Uzye vino Aloni na ana yakwe yafulalanga vimililangako cani? (Lolini icikope cakutandikilapo.)
3 Welengini Aina Levi 8:5, 6. Yeova wasoolwile Aloni ukuya simapepo mukalamba pa ina Izlaeli, alino ya mwana Aloni nayo yaali nu kuya yasimapepo pa mutundu wa ina Izlaeli. Aloni akaimililako Yesu alino ya mwana Aloni nayo yakaimililako alondezi yakwe Yesu apakwe. Lelo, uzye vino Aloni wafulalanga calozyanga uku kusangululwa kwakwe Yesu? Awe, pano Yesu wali umumalilike nupya ‘uwaula indema,’ fwandi atalondekwanga ukusangululwa. (Ayebulai 7:26; 9:14) Lelo, ukusanguluka kwakwe Aloni kukalozya kuli vino Yesu waya umololoke nupya umusanguluke. Nga vino ya mwana Aloni yene yafulalanga vimililangako cani?
4 Vino ya mwana Aloni yafulalanga cimililangako ukusangululwa kwakwe yaayo aasoololwa ukuti yakaye yasimapepo ukwiyulu. Uzye ukuwatiziwa kwakwe yaayo aapakwa nu mupasi kwalemana nu kusangululwa kwakwe ya mwana Aloni? Awe, ukuwatiziwa kusifumyapo maifyo; lelo, kukalangilila ukuti umuntu wataipeela kuli Yeova. Ukusangululwa kwakwe yaayo aapakwa nu mupasi kukacitika ukupitila mu “mazwi yakwe [Leza],” nupya cii cikalondekwa ukuti yaomvya ivisambilizyo vyakwe Klistu umu umi wao. (Efeso 5:25-27) Fwandi yaswefiwa. Nomba, nga “amfwele nazyuze” yene caya uli?—Yoane 10:16.
5. U mulandu ci uno tungalandila ukuti amfwele nazyuze yakasangululwa ukupitila umu kuomvya Izwi Lyakwe Leza?
5 Ya mwana Aloni yatimililangako “iumba likulu cuze” ilya mfwele nazyuze zyakwe Yesu. (Umbwilo 7:9) Uzye tungati na antu kwene yaa awatiziwa yakasangululwa nu kuswefiwa ukuomvya Izwi Lyakwe Leza? Ee, avino cikaya! Lino yaayo aalikala pano nsi yawelenga vino Baibo ikalanda pali vino uwazi wakwe Yesu uwazwile wacindama, yakataila sana mazwi kwene yaayo alino iyatandika nu kuombela Leza ala ya “kumutumikila musanya nu usiku.” (Umbwilo 7:13-15) Ivintu ivisuma ivikacitikila apakwe alino na amfwele nazyuze pa mulandu wakutwalilila ukusangululwa, uusininkizyo wakuti ‘imicitile yao pakasi ka antu atataila Leza ikaya isuma.’ (1 Petulo 2:12) Yeova afwile akazanga cuze ukulola vino apakwe na amfwele nazyuze yaasanguluka na vino yakaombela pamwi alino nu kuvwila Kacema wao Yesu!
6. Uzye u kuiceceta kwa musango ci ukungazwa umuntu?
6 Vino calondekwanga ukuti yasimapepo ya mu Izlaeli yaaya nu usaka, kwaya nu upiliulo uku yantu yakwe Yeova ndakai. Yaayo yano tukasambilila nayo Baibo ilingi yakalola vino ivifulo vitu ivya kupepelapo vikaloleka ivya usaka na vino naswe tukaloleka ausaka nu kuzwala ningo. Lelo, vino yasimapepo yaali nu usaka tukasambililako ukuti umuntu wensi uwatandika ukupepa Yeova alinzile ukuya nu “mwenzo uswepe.” (Welengini Masamu 24:3, 4; Ezaya 2:2, 3.) Tulinzile ukuombela Leza nu mwenzo uswepe alino na melenganyo asuma, nupya imili itu ifwile ukuya iyausaka. Cii cikalondekwa ukuti twaiceceta lyonsi, lyene ndi pali pamwi apakulondekwa ukuzifya ukuti tuye asanguluke, itucita vivyo kwene. (2 Kolinto 13:5) Ndi cakuti umuntu umwi uwawatiziwa akatamba ivikope vya uzelele alinzile ukuyuzya ati, ‘Uzye i cumicumi nene musanguluke?’ Lyene alinzile ukwavwiwa pakuti ate ivicitwa viipe.—Yakobo 5:14.
MWAYA ACUVWILA PAKUTI MWASININKIZYA UKUTI MWEMWE AMUZILO
7. Ukulingana na Ina Levi 8:22-24, i vyani vino Yesu wacisile vino tulinzile ukukolanya?
7 Lino yasoolwile yasimapepo umu Izlaeli, yayapasile uwazi wakwe suuku apa nsongo ya matwi akwilunji, uku vyala vya ku makasa ilunji, nu ku vikando vya kwilunji; yacisile vii kuli Simapepo Mukalamba Aloni nu kuyana yakwe aonsi. (Welengini Aina Levi 8:22-24.) Ukupaka uwazi kwa musango uu kwalanganga ukuti yasimapepo yali nu kuya acuvwila lino yakuomba imilimo ino yaapezilwe. Avino na Simapepo Mukalamba Yesu wacisile, fwandi aapakwe na amfwele nazyuze yalinzile ukumukolanya. Ikutwi lyakwe Yesu lyuvwilanga ukutungulula kwakwe Leza. Yesu waomvyanga makasa yakwe uku kucita ukulonda kwakwe Leza, ni ngazo zyakwe zitatazile izipumbuka ukufuma pa nzila isanguluke.—Yoane 4:31-34.
8. Uzye aomvi yakwe Yeova yonsi yalinzile ukucita uli?
8 Aina Klistu apakwe na amfwele nazyuze yalinzile ukukolanya ucisinka wakwe Simapepo wao Umukalamba. Yonsi ya kapepa yakwe Yeova yalinzile ukuvwila vino Baibo ikasambilizya pakuti yataalenga umupasi wa muzilo ulanda. (Efeso 4:30) Yalinzile ukuvwila mazwi yakuti, “twalililini kupita mu nzila zyololoke.”—Ayebulai 12:13.
9. Uzye aina yatatu aombapo na Amwiumba Likatungulula yaalanzile yatuuli, nupya mazwi yano yaalanzile yangatwalilila uli ukumwazwa ukuisininkizya ukuti mwasanguluka?
9 Lolini vino aina yatatu aaya nu utailo wakwiza ikala pano nsi aomvilepo imyaka iingi pamwi na Amwiumba Likatungulula yalanzile. Uwakutandikilako walanzile ati: “Nanti icakuti lii lyali isyuko iliyiyele, ukuomba apiipi na ina yaa apa nsita itali kukalanga ukuti aonsi kwene yaa nanti icakuti aapakwe yatamalilika. Lelo, icintu conga cino nkalondesya ukucita pa myaka ingi u kuvwila yaayo aakatungulula.” Umwina wakwe ciili walanzile ukuti: “Amalembelo ya muli Baibo, wakwe 2 Kolinto 10:5, aakalanda pa ‘kuyela Klistu,’ yaangavwa ukuya uwacuvwila nu kuombela pamwi na yaayo akutungulula. Icuvwila ca musango uu i cacumi.” Umwina wakwe citatu walanzile ati: “Ukutemwa vino Leza watemwa nu kupata vino wapata, nu kumuuvwila lyonsi alino nu kucita ivikamuzanzya, kukapiliula ukuvwila iuvi lyakwe na antu yano akaomvya ukuti afikilizye ukulonda kwakwe ukwa pano nsi.” Umwina wi wamanyile ukuti ya Nathan Knorr, aizile yaya umwi Umba Likatungulula, yazumiile ivisinka ivyali umu Lupungu Lwa Mulinzi ulwa mu 1925 pa mutwe wakuti “Ukuvyalwa Kwa Luko,” nanti cakuti yamwi yataazumiile. Icuvwila ca musango uwo cavwile sana umwina kwene wii. Ukwelenganya sana pa mazwi yaa aali papela yano aina yaalanzile, kungamwazwa ukuya asanguluke lino mukulanga ukuti mwaya ni cuvwila.
KUVWILA ISUNDE LYAKWE LEZA ILIKALANDA PA WAZI
10. Uzye cacindama uli ukuvwila isunde lyakwe Leza pa wazi?
10 Welengini Aina Levi 17:10, NW. Yeova wapeezile aina Izlaeli isunde lya kuti yataalya “uwazi wa misango yonsi.” Ukusenka uku wazi—kulikuti uwa nyama nanti uwa muntu—ali cino umwina Klistu aliwensi afwile ukucita. (Milimo 15:28, 29) Tukauvwa sana intete nu kwelenganyapo sile ukuti Leza ‘angatukaana’ nu kutuzinga umu cilongano cakwe. Twatemwa sana Leza nupya tukalonda ukumuvwila. Nanti icakuti umi witu waya umu uzanzo, tutalazumila ukukana uvwila Leza nanti icakuti antu yamwi asi yakapepa yatupatikizya ukupondokela Yeova. Twatemwa Yeova nupya tukalonda ukumuvwila. I cumicumi twamanya ukuti antu yalaatuseka pa mulandu wa kusenka uku wazi, nomba cino swemo twasoololapo u kuvwila Leza. (Yuda 17, 18) Uzye i cani icilaatwazwa ukwiusya lyonsi ukuti “cisi cakwezya” ukulya uwazi nanti ukuzumila ukwikwamo uwazi?—Malango 12:23.
11. U mulandu ci uno tungalandila ukuti Wanda wa Kupeela Impolelwa yakwelelwa maifyo lutaali ulutambi sile lwa mipepele ulutacindime?
11 Vino simapepo mukalamba waomvyanga uwazi umuku onga pa mwaka pa Wanda wa Kupeela Impolelwa yakupapata pa maifyo cikatwazwa ukumanya ningo vino Yeova akalola uwazi. Uwazi waomviwanga umu nzila imwi icindame sana. Uwazi waomviwanga pakuti Leza aelele amaifyo yakwe yaayo aalenganga kuli aliwe kuti ayelele. Uwazi wakwe cilume nu wambuzi wali nu kusanswa apiipi ni mbokosi ya upangano alino nu ku ntupiko ya mbokosi iiyo. (Aina Levi 16:14, 15, 19) Cii calenganga ukuti Yeova aelele aina Izlaeli amaifyo. Yeova wapeezile isunde nalyuze ilyakuti umuntu ndi wakoma inyama, walondekwanga ukwitila uwazi wa nyama iiyo pansi nu kuzikapo, “pano umi wa ciumbwa consi ca umi waya mu wazi.” (Aina Levi 17:11-14) Uzye amasunde yaa yaali sile intambi zya mipepele izitacindama? Awe. Ukuomvya uwazi pa Wanda wa Kupeela Impolelwa yakwelelwa maifyo, alino ni sunde lya kwitila uwazi pa nsi, kwalemana ni sunde ilikalanda pa wazi lino Yeova wapeezile Nowa na yaayo amu luko lwakwe. (Utandiko 9:3-6) Yeova walesya ukuomvya uwazi na lino umwi akulonda kuti atantalizye umi wakwe. Uzye cii cacindama uli uku Ina Klistu?
12. Uzye kalata wino Paulo walembiile Aina Klistu Ayebulai ikalemanya uli uwazi nu kwelela maifyo?
12 Lino Paulo walembiile aina Klistu aYebulai pali vino uwazi ukalenga ukusangululwa, walondolwile ati: “Kulingana na Masunde yakwe Mose, vintu vinono sile visiswefiwa nu wazi. Maifyo nayo yasyaelelwa ndu wazi utapongolwilwe.” (Ayebulai 9:22) Paulo nupya walanzile ukuti impolelwa zya nyama, nanti icakuti zyali izicindame, ziusyanga sile aina Izlaeli ukuti yaali aakaifya nu kuti yaalondekwanga icintu cimwi icali nu kulenga ukuti amaifyo yao yeleelwe. I cumicumi, Amasunde ‘Yalanganga umusango uzimantukile uwa vintu visuma vikwiza. Yene yaali sile unkolanya wa vintu vikwiza.’ (Ayebulai 10:1-4) Uzye caali nu kuya uli pakuti amaifyo yaelelwa?
13. Uzye mukauvwa uli pali vino Yesu waile alolekela kuli Yeova pa mulandu wakwe vyonsi vino wafikilizye ukupitila umu wazi wa untunze uno wazwisizye?
13 Welengini Efeso 1:7. Ukuipeela kwakwe Yesu Klistu ukuti afwe, ‘pamulandu witu,’ kwaya nu upiliulo kuli swensi kwene swemuno twatemwa Yesu na Leza. (Galatiya 2:20) Nomba, vino Yesu wacisile pa cisila ca mfwa yakwe nu kutuutuluka, i vyaleenga ukuti tukululwe nu kwelelwa amaifyo itu. Yesu walenzile ukuti ivyacitikanga apa Wanda wa Kupeela Impolelwa yakwelelwa maifyo vifikiliziwe ukulingana na vino vyasoowilwe. Pa wanda uuwa, simapepo mukalamba watwalanga uwazi umwi uwa nyama ino yaali nu kupeelwa impolelwa umu ncende Yamuzilo Ukuluta, umwali imbokosi ya upangano nu kupeela uwazi uwo kuli Leza kwati Leza apanoli, nupya lino papisile insita kwayanga ukucita vivyokwene umu ng’anda yakupepelamo ino Solomoni wakuuzile. (Aina Levi 16:11-15) Viivi kwene avino na Yesu wingile umwiyulu ukuyalolekela kuli Leza pa mulandu wakwe vyonsi vino wafikilizye ukupitila umu wazi wa untunze uno wazwisizye. (Ayebulai 9:6, 7, 11-14, 24-28) Tukataizya sana pa mulandu wakuti amaifyo itu yeelelwa nupya ya kampingu itu yaasangululwa pano twakwata utailo umu wazi wakwe Yesu!
14, 15. U mulandu ci uno cacindamila ukumanya ningo isunde lyakwe Yeova pa wazi nu kulilondela?
14 Uzye lyene mwamanya umulandu uno Yeova walesezya ukulya uwazi wa misango yonsi? (Aina Levi 17:10) Uzye mwamanya ningo umulandu uno Leza akalolela uwazi ukuti uwamuzilo? Yeova akalola uwazi ukuti icilicimwi nu umi. (Utandiko 9:4) Uzye mukuzumilizya ukuti tulinzile ukucindika vino Leza akalola uwazi nu kuvwila isunde ilikati twasenka uku wazi? Icingalenga sile ukuti swensi cila-muntu tuye pa mutende na Leza, u kutaila umu mfwa yakwe Yesu nu kumanya ukuti uwazi wacindama sana kuli Kaumba witu.—Kolose 1:19, 20.
15 Swensi kwene cila-muntu tungazanwa ukuti tukulondekwa ukupingulapo pa mulandu wa wazi. Nanti limwi lupwa witu nanti cuza angalondekwa ukupingulapo ukuzumila ukwikwa uwazi nanti ukukana. Ivya musango uuwo ndi vyacitika, cikalondekwa ukupingula na pa tuntu utunono utukafuma umu vintu 4 ivikapanga uwazi alino na pa nzila zimwi zino ya dokota yakaomvya pa yalwale. Fwandi, cacindama sana ukulondelezya ivyeo ivingatwazwa nu kuipekanyizya calimwi pali vino vingacitika insita iliyonsi. Ndi tukucita vivyo alino nu kupepa kuli Yeova, cilatwazwa ukuomba ningo nu kukanafilwa ukupingula ningo pa mulandu wa wazi. Tusilonda ukusosya Yeova ukupitila umu kucita cimwi cino Baibo yalesya! Ya dokota aingi na antu yauze aakakomelezya ukwikwa uwazi, yakaomvya amazwi asuma pakuti yaakomelezya antu ukusangwilako uwazi ala yakuti kuli kupususya umi. Nomba, antu yakwe Yeova aasanguluka yamanya ukuti Kaumba u wakwata insambu zyakutuneena vino uwazi ulinzile ukuomviwa. Wene akalola ukuti, “uwazi wa misango yonsi” u wamuzilo. Tulinzile ukwezya na maka pakuti twauvwila isunde lyakwe Leza pa wazi. Ukupitila umu micitile itu iya vintu isanguluke, tukasininkizya kuli Leza ukuti tukataizya sana pa wazi wakwe Yesu uukapususya umi, pano ali wazi sile ukalenga twelelwe maifyo nu kupeelwa umi wa pe.—Yoane 3:16.
MULANDU UNO YEOVA AKALONDELA UKUTI TUYE AMUZILO
16. U mulandu ci uno antu yakwe Yeova yalinzile ukuya amuzilo?
16 Lino Leza wakulwile aina Izlaeli ukufuma umu Eguputo, wayanenyile ukuti: ‘Nene Yeova, wino wamufumizye mu Eguputo, pakuti ningaya Leza winu. Mulinzile ukuya amuzilo pano nene wamuzilo.’ (Aina Levi 11:45) Aina Izlaeli yalondekwanga ukuya amuzilo pano Yeova u wamuzilo. Swe Nte Zyakwe Yeova naswe tulinzile ukuya amuzilo. Ibuku lya Ina Levi likalenga kuti tutatwisika icisinka cii.
17. Uzye lyene mukuvwa uli apibuku lya muli Baibo ilya Ina Levi?
17 Ukusambilila pali vimwi-vimwi ivyaya umwibuku lya Ina Levi kwatwazwa sana. I cumicumi, isambililo lii lyati-limwazwa ukutemwa sana ibuku kwene lii ilya muli Baibo ilya fuma kuli Leza. Ukwelenganya sana pa vyeo ivyaya umu Ina Levi vyati-vilenga ukuti mumanye ningo cino cacindamila ukuya asanguluke. Lelo, uzye i vyani vyuze ivisuma sana ivyaya umwibuku kwene lii ilyafuma kuli Leza? I vyani vyuze vino tungasambililamo ivikalanda pa kuomba imilimo yakwe Yeova isanguluke? Tuli nu kusambilila pa milandu kwene ii umwilyasi ililondeliilepo.
[Mauzyo ya Masambililo]
[Cikope api’fwa 15]
Uzye lyene mukulondesya ukuvwila isunde lyakwe Yeova apa wazi? (Lolini palagalafu 14, 15)
