1, 2. (1) ?Jehova i wantem se ol man blong hem oli stap olsem wanem? (2) ?Stadi ya bambae i ansa long wanem kwestin?

TABU spirit i lidim aposol Pita blong i talem bakegen tok blong Levitikas, blong soemaot se ol Kristin oli mas tabu olsem ol man Isrel bifo. (Ridim 1 Pita 1:14-16.) Jehova, ‘God ya we i tabu,’ i wantem se ol man we tabu spirit i makemaot mo “ol narafala sipsip,” oli stap tabu long olgeta samting we oli mekem.—Jon 10:16.

² Long stadi ya, bambae yumi luk sam moa tok blong Levitikas we i givhan long yumi blong yumi kasem save long tabu fasin blong God, mo blong yumi folem long laef blong yumi. Mo tu, bambae yumi ansa long ol kwestin ya: ?I oraet blong brekem loa blong God taem narafala i fosem yumi no i pulum yumi? ?Yumi lanem wanem long Levitikas, we i givhan long yumi blong yumi obei long hae rul blong Jehova? ?Ol sakrefaes we ol man Isrel oli givim, oli tijim yumi long wanem samting?

3, 4. (1) ?From wanem yumi no mas gowe long loa blong God? (2) ?From wanem yumi no mas givimbak nogud fasin we narafala i mekem long yumi, mo yumi no mas lukluk nogud long man ya?

³ Sipos yumi wantem mekem Jehova i glad, yumi mas obei oltaem long loa blong hem. Mo yumi neva mas ting se i oraet  blong letem wan samting i pulum yumi blong yumi gowe long loa ya, olsem we i no tabu. Tede, yumi no stap aninit long loa we God i givim long Moses. Be Loa ya i save givhan long yumi yet, blong yumi kasem save long samting we Jehova i laekem mo samting we hem i no laekem. Yu traem tingbaot tok ya we hem i talem long ol man Isrel, se: “Sipos wan man i mekem i nogud long yufala, yufala i no mas mekem wan samting long hem blong givimbak fasin ya, mo yufala i no mas lukluk nogud long man olsem. Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo. Mi mi Hae God, mi God blong yufala.”—Levitikas 19:18.

⁴ Jehova i no wantem we yumi givimbak nogud fasin we narafala i mekem long yumi, mo i no wantem we yumi lukluk nogud long man ya. (Rom 12:19) Sipos yumi gowe long loa blong God, Setan bambae i glad, mo tu, yumi daonem nem blong God. Sipos narafala i spolem yumi, yumi no mas pulum kros longtaem. Baebol i talem se yumi olsem “graonpot” we i fulap long gudfala samting. Gudfala samting ya hemia wok blong God. (2 Korin 4:1, 7) Yumi no save miksim posen wetem gudfala samting long wan graonpot. Long sem fasin, yumi no save miksim kros wetem gudfala wok we God i givim long yumi.

5. ?Stori blong Eron mo tufala pikinini blong hem i tijim yumi long wanem? (Yu luk pija long stat blong stadi.)

⁵ Levitikas 10:1-11 i tokbaot trabol we i kasem famle blong Eron. Jehova i sanem faea i kam, i bonem tufala pikinini blong Eron i ded, nem blong tufala, Nadab mo Abihu. Afta, God i talem long Eron mo famle blong hem se oli no mas mekem enikaen fasin blong soemaot sore. !Samting ya i had we i had! !Hemia i mas traem bilif blong Eron mo famle blong hem bigwan! ?Be olsem wanem sipos kongregesen i putumaot wan famle blong yu? ?Bambae yu yu joen wetem hem yet no yu stop? Sipos yu yu tabu long olgeta samting, bambae yu no moa joen wetem hem.—Ridim 1 Korin 5:11.

6, 7. (1) ?Yu mas tingbaot wanem, taem yu mekem desisen se bambae yu tekpat long wan mared long jos no nogat? (Yu luk futnot.) (2) ?Yu save eksplenem olsem wanem se bambae yu no tekpat long mared ya?

⁶ Maet trabol we i kasem Eron mo famle blong hem i no kasem yu. ?Be olsem wanem sipos wan famle blong yu we i no wan Witnes, i singaot yu blong yu go mo tekpat long mared blong hem long wan jos? I no gat wan loa long Baebol we i talem se yu no save go. Be i gat sam tingting blong God we oli save givhan long yu blong yu mekem wan gudfala desisen. *

⁷ Taem yu mekem desisen we Jehova i  glad long hem mo yu stap tabu, maet famle blong yu i no kasem save. (1 Pita 4:3, 4) I tru, yu no wantem mekem famle i harem nogud. Taswe, i moa gud yu storian wetem olgeta longtaem lelebet bifo long mared ya. Yu toktok kaen be yu tok tru. Yu talem tangkiu long olgeta from we oli singaot yu blong yu tekpat long mared ya. Maet yu talem se yu wantem we oli hapi long spesel dei ya, be yu no wantem we oli sem from we yu no joen long ol fasin blong wosip we oli mekem. Long rod ya, bambae yu holemtaet bilif blong yu, yu no gowe long hem.

8. ?Buk blong Levitikas i leftemap hae rul blong Jehova olsem wanem?

⁸ Buk blong Levitikas i leftemap hae rul blong Jehova. Bitim 30 taem, buk ya i talem se ol loa oli kamaot long God. Moses i save samting ya, mo hem i mekem stret olsem Jehova i talem. (Levitikas 8:4, 5) Yumi mas mekem sem mak. Oltaem yumi mas mekem samting we Hae King Jehova i wantem. Ogenaesesen blong God bambae i givhan long yumi. Be samtaem, taem man i stap hem wan, wan samting i save traem bilif blong hem, olsem we Setan i traem Jisas long draeples. (Luk 4:1-13) Sipos yumi trastem God mo yumi obei long hae rul blong hem, i no gat wan man we i save pulum yumi blong yumi brekem loa blong God. Bambae yumi no fraet long man.—Ol Proveb 29:25.

9. ?From wanem plante man oli no laekem yumi?

⁹ Yumi save se long olgeta ples long wol, ol man bambae oli mekem nogud long ol man blong God. Jisas i talem se: “Bambae sam man oli holem yufala, oli mekem i nogud long yufala, gogo oli kilim yufala i ded. Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 24:9) Nating se ol man oli no laekem yumi, be yumi gohed nomo blong prij, mo yumi stap tabu long olgeta samting we yumi mekem. Yumi no giaman, yumi no stil, yumi klin long bodi mo fasin blong yumi, mo yumi folem loa blong kantri. Taswe, ?from wanem plante man oli no laekem yumi? (Rom 13:1-7) From we yumi obei long Jehova nomo olsem Hae King blong yumi. Yumi mekem wosip long “hem nomo,” mo yumi neva letem wan samting i pulum yumi blong brekem loa blong hem.—Matiu 4:10.

10. ?Wanem i hapen long wan brata we i lego bilif blong hem nao i joen long ami?

¹⁰ Yumi “no man blong wol ya,” taswe yumi no joen long faet mo politik. (Ridim Jon 15:18-21; Aesea 2:4.) Be i gat sam Kristin we oli bin lego gudfala fasin ya taem narafala i fosem olgeta. Biaen, bighaf blong olgeta oli tanem tingting blong olgeta mo oli kambak long Jehova. (Ol Sam 51:17) Be smol haf oli no tanem tingting blong olgeta. Yu traem tingbaot samting we i hapen long Wol Wo Tu. Long Hangari, oli sakem plante brata long kalabus. Ol haeman oli tekem 160 long ol brata ya we oli no gat 45 yia yet, oli go long wan taon, nao oli traem fosem olgeta blong oli joen long ami. Bighaf blong ol brata ya oli talem ‘no,’ be 9 long olgeta oli mekem promes mo oli putum klos blong ami. Tu yia afta, wan long ol 9 man ya i stap long grup blong ol soldia we oli kasem oda se oli mas sutum ol narafala Witnes oli ded. !Wan long ol Witnes ya  we hem i mas sutum, hem i stret brata blong hem! Biaen, oli jenisim oda ya, nao oli no moa sutum ol Witnes ya.

11, 12. ?Ol sakrefaes we ol man Isrel oli mekem, oli tijim yumi long wanem?

¹¹ Loa i talem stret wanem ol sakrefaes we ol man Isrel oli mas mekem. (Levitikas 9:1-4, 15-21) I no mas gat wan samting i rong long ol sakrefaes ya, from we oli pija blong sakrefaes blong Jisas we i stret gud olgeta. Mo tu, i gat ol spesel rod we ol man Isrel oli mas folem, blong mekem ol sakrefaes ya. Levitikas 12:6 i tokbaot samting we woman i mas mekem afta we hem i bonem pikinini, i se: “Sipos woman i bonem wan pikinini boe no wan pikinini gel, nao stret taem ya blong hem [we hem i no klin] i finis, bambae hem i mas tekem wan smol sipsip we i gat wan yia blong hem, i kam givim long pris long doa blong yad blong Haos Tapolen blong mi. Smol sipsip ya i blong mekem sakrefaes ya we i blong bonem i bon evriwan blong mekem wosip long mi. Mo hem i mas tekem wan nawimba no wan sotleg blong mekem spesel sakrefaes ya we i blong tekemaot sin blong hem.” Loa blong Jehova i klia. Be Jehova i lavem ol man blong hem mo i no mekem i strong tumas long olgeta. Loa i talem se sipos mama ya i pua tumas we i no save pem wan sipsip, hem i save givim tu sotleg no tu nawimba. (Levitikas 12:8) Nating se hem i pua, Jehova i lavem hem mo i glad long presen we hem i givim, olsem we hem i glad long man we i givim sipsip. ?Yumi lanem wanem?

¹² Aposol Pol i talem long ol Kristin se oli mas ‘leftemap nem blong God, olsem we oli mekem sakrefaes blong givim long hem.’ (Hibrus 13:15) Yumi mekem sakrefaes olsem, taem yumi talemaot nem blong Jehova long ol man. Ol brata mo sista we sora blong olgeta i fas, oli mekem saen long han blong olgeta blong presem God. Ol Kristin we oli no save aot long haos from we oli sik no oli olfala, oli presem Jehova taem oli yusum telefon blong prij, mo oli raetem leta, mo oli prij long ol man we oli kam visitim olgeta. Maet sakrefaes we yumi mekem blong presem Jehova i bigwan no i smol, i dipen long helt mo save blong yumi. Nating se i olsem wanem, be oltaem yumi givim beswan blong yumi.—Rom 12:1; 2 Timoti 2:15.

13. ?From wanem yumi mas putum ripot blong prij?

¹³ Yumi glad blong presem Jehova olsem wan sakrefaes, from we yumi lavem hem. (Matiu 22:37, 38) ?Be olsem wanem? ?Yumi glad blong putum ripot blong prij long en blong manis? Yumi mas glad, from we hemia wan samting we God i wantem. (2 Pita 1:7) Be i nogud yumi prij blong raetem plante aoa long ripot blong yumi nomo. Nating se wan pablisa we i sik no i olfala i prij 15 minit nomo long wan manis, be hem i save raetem ol minit ya long ripot blong hem. Jehova bambae i glad we hem i givim beswan blong hem. Jehova i save se ol brata mo sista ya oli lavem hem, mo oli wantem talem tangkiu long hem from we oli stap olsem ol Witnes blong hem. Oli save glad long smol aoa we oli raetem long ripot blong olgeta, olsem we ol puaman long Isrel oli glad long smol presen we oli givim long God. Ripot blong yumi i wan smol haf  blong ripot blong fulwol. Ol ripot ya oli givhan long ogenaesesen blong Jehova blong i save weples i gat nid. From samting ya nao, yumi stap putum ripot blong prij.

14. ?From wanem i gud yu jekem fasin blong yu blong stadi?

¹⁴ Afta long stadi ya long ol impoten poen long buk blong Levitikas, ?yu yu kasem save moa nao from wanem buk ya i stap long Baebol? (2 Timoti 3:16) ?Tingting blong yu i strong moa blong stap tabu? Maet yu wantem stadi dip long ol narafala buk blong Baebol tu. (Ridim Ol Proveb 2:1-5.) Jehova i wantem se yu givim beswan blong yu long hem, mo i stret nomo we yu mekem olsem. I gud yu prea mo yu jekem fasin blong yu blong stadi. Yu save askem se: ‘?Mi mi stap givim beswan blong mi long Jehova? ?No mi stap spenem tumas taem blong lukluk televisin, plei video gem, plei spot, mo mekem ol narafala samting we mi laekem, nao mi no moa gohed gud long trutok?’ Sipos samting olsem i stap hapen, i gud yu tingting dip long tok blong Pol long buk blong Hibrus.

15, 16. ?From wanem Pol i tok strong long ol Hibru Kristin?

¹⁵ Long leta blong Hibrus, Pol i tok strong long ol Kristin. (Ridim Hibrus 5:7, 11-14.) Hem i talem long olgeta se: “Tingting blong yufala i slo tumas blong haremsave.” ?From wanem Pol i tok strong olsem? Hem i lavem olgeta olsem we Jehova i lavem olgeta. Mo Pol i wari long olgeta, from we oli stap dring melek nomo, i min se oli save ol stamba tijing blong Baebol nomo. I tru, ol stamba tijing ya oli impoten, be sipos yumi wantem kam strong long trutok, yumi mas tekem “strong kakae,” hemia ol dip save long ol tijing blong Baebol.

 ¹⁶ Ol Hibru Kristin ya oli no naf blong tijim narafala, oli nidim yet we narafala i tijim olgeta. ?From wanem? From we oli no stap tekem “strong kakae.” I gud yu askem se: ‘?Mi mi wantem tumas blong stadi long ol tijing blong Baebol we oli had? ?No mi mi gat tingting se i strong tumas blong mekem dip stadi mo prea? ?Tingting ya i stret? ?Mi mas jenisim fasin blong mi blong stadi?’ Yumi no prij nomo, be yumi mas kam naf blong tijim ol man tu, mo blong pulum olgeta oli kam disaepol blong Kraes.—Matiu 28:19, 20.

17, 18. (1) ?From wanem yumi mas tekem “strong kakae” oltaem? (2) ?I stret blong tekem smol dring bifo we yumi go long miting?

¹⁷ Jehova i wantem se yumi glad blong stadi Baebol, hem i no fosem yumi. I tru, plante long yumi oli luk se i no isi blong stadi Baebol. Be yumi nidim “strong kakae,” nomata sipos yumi stap longtaem long trutok no nogat. Yumi mas mekem olsem blong yumi stap tabu.

¹⁸ Sipos yumi wantem stap tabu, yumi mas stadi gud long Baebol, mo yumi mas mekem stret olsem God i askem. God i kilim Nadab mo Abihu i ded from we tufala i ‘leftemap faea blong givim i go long Hae God be God i no talem long tufala, blong tufala i mekem olsem.’ Maet tufala i bin tekem strong dring tu, bifo we tufala i mekem samting ya. (Levitikas 10:1, 2) I gud yumi ridim wanem we God i talem long Eron biaen. (Ridim Levitikas 10:8-11.) ?Olsem wanem? ?Ol vas ya oli soemaot se yumi no mas tekem strong dring nating, bifo we yumi go long wan Kristin miting? Blong faenem ansa, yu traem tingbaot ol samting ya: Yumi no moa stap aninit long Loa we God i givim long Moses. (Rom 10:4) Tede, long sam kantri, ol brata oli tekem smol dring wetem kakae, bifo we oli go long miting. Long lafet blong Pasova bifo, oli yusum fo kap waen. Mo tu, taem Jisas i stanemap Kakae blong Masta, hem mo ol aposol blong hem oli dring waen we i saen blong blad blong hem. (Matiu 26:27) Be Baebol i talem klia se yumi no mas dring tumas mo yumi no mas drong. (1 Korin 6:10; 1 Timoti 3:8) Plante Kristin oli no save tekem strong dring nating, bifo we oli mekem wosip long Jehova, from we tingting blong olgeta i blokem olgeta. Be ol kantri oli defdefren. Bigfala samting, se yumi mas ‘waes gud blong makem ol samting we i blong God mo ol samting we yumi save yusum olbaot,’ i min se yumi naf blong save wanem fasin i tabu mo wanem fasin i no soemaot respek long God. Olsem nao, bambae yumi stap tabu mo yumi mekem Jehova i glad.

19. (1) ?Yu save mekem wanem long famle wosip mo prapa stadi blong yu? (2) Sipos yu gat strong tingting blong stap tabu, ?yu mas mekem wanem?

¹⁹ I gat plante gudgudfala samting long Baebol we yu save faenem taem yu stadi dip. Mo i gat plante rod blong mekem risej we yu save yusum long famle wosip mo long prapa stadi blong yu. Bambae yu kasem save moa long Jehova mo ol plan blong hem. Bambae yu fren moa wetem hem. (Jemes 4:8) I gud yu prea olsem man blong raetem Sam we i singsing se: “Plis yu openem ae blong mi blong mi save luk ol gudgudfala samting long Loa blong yu.” (Ol Sam 119:18) Yu no mas letem wan samting i pulum yu blong yu brekem loa blong God, no yu gowe long ol tok blong Baebol. Yu mas glad blong obei long loa blong Jehova, ‘God ya we i tabu, i klin gud.’ Mo yu mas strong long tabu wok ya blong “talemaot gud nius blong God.” (1 Pita 1:15; Rom 15:16) I impoten we yumi stap tabu long ol las dei blong rabis wol ya. Yes, yumi evriwan i mas tabu long olgeta samting we yumi mekem, mo yumi mas obei long hae rul blong Jehova.