1, 2. (a) Ania ti namnamaen ni Jehova iti ilina? (b) Ania dagiti saludsod a masungbatan iti daytoy nga artikulo?

PINALTIINGAN ni Jehova ni apostol Pedro a mangadaw iti kinasanto a naipaganetget iti libro a Levitico, sa inaigna dayta iti nasantuan a kababalin a makalikaguman kadagiti Kristiano. (Basaen ti 1 Pedro 1:14-16.) Ni Jehova, “Daydiay Santo,” namnamaenna nga aramiden dagiti napulotan ken ti “sabsabali a karnero” ti amin a kabaelanda nga agbalin a nasantuan iti isuamin a kababalinda—saan laeng nga iti dadduma a kababalinda.—Juan 10:16.

² Iti daytoy nga artikulo, usigentayo dagiti naespirituan a gameng iti libro a Levitico a makatulong kadatayo a mangammo iti pagalagadan ti Dios mainaig iti kinasanto ken no kasano a mayaplikartayo dagita iti biagtayo. Usigentayo met dagiti sumaganad a saludsod: Ania ti aramidentayo kadagiti situasion a mabalin a pakaikompromisuan ti pammatitayo? Ania ti isuro kadatayo ti Levitico maipapan iti panangitandudo ti kinasoberano ni Jehova? Ania ti maadaltayo iti panagdaton dagiti Israelita?

3, 4. (a) Apay a masapul a saan nga ikompromiso dagiti Kristiano dagiti linteg ken prinsipio ti Biblia? (b) Apay a ditay koma agibales wenno agipempen iti sakit ti nakem?

³ Tapno maay-ayotayo ni Jehova, masapul a salimetmetantayo  dagiti linteg ken prinsipiona, a liklikantayo ti di nasantuan a kababalin ken pannakikompromiso. Awantayon iti Mosaiko a Linteg, ngem tumulong dayta kadatayo a mangtarus no ania ti awaten wenno di awaten ni Jehova. Kas pagarigan, naibilin kadagiti Israelita: “Dika agibales wenno maaddaan iti sakit ti nakem iti annak dagiti kailiam; ket masapul nga ayatem ti padam a tao a kas iti bagim. Siak ni Jehova.”—Lev. 19:18.

⁴ Namnamaen ni Jehova a saantayo nga agibales ken agipempen iti sakit ti nakem. (Roma 12:19) No ditay ikankano dagiti linteg ken prinsipio ti Dios, maragsakan ti Diablo, ken mabalin a makaaramidtayo iti pakaumsian ni Jehova. Uray adda nangigagara a mangpasakit kadatayo, ditay koma ipalubos nga agbalintayo a kasla basbasehas a pagipempenan iti sakit ti nakem. Impaayannatayo ti Dios iti pribilehio nga agbalin a ‘damili a basbasehas’ a naglaon iti gameng nga isu ti ministerio. (2 Cor. 4:1, 7) Ditay kayat nga ikabil kadagita a basehas ti kasla asido a sakit ti nakem.

5. Ania ti maadaltayo iti salaysay maipapan ken Aaron ken iti ipapatay dagiti annakna? (Kitaen ti ladawan iti rugi ti artikulo.)

⁵ Ti maysa a nagsaem a pasamak iti pamilia ni Aaron ket nairekord iti Levitico 10:1-11. Naladingitanda la ketdi idi bimmaba ti apuy manipud langit a nanguram kadagiti annak ni Aaron a da Nadab ken Abihu bayat nga addada iti tabernakulo. Anian a pannakasuot ti pammati ni Aaron ken ti pamiliana idi naibilin kadakuada a saanda nga agladingit iti ipapatay ti dua nga annakna! Ipakpakitam kadi a nasantuanka babaen ti saanmo a pannakilangen iti maysa a miembro ti pamiliam wenno iti dadduma pay a nailaksid?—Basaen ti 1 Corinto 5:11.

6, 7. (a) Ania dagiti rumbeng nga usigentayo no maawistayo iti maysa a kasar iti simbaan? (Kitaen ti footnote.) (b) Kasanotayo nga ilawlawag kadagiti saan a Saksi a kakabagiantayo ti takdertayo maipapan iti iyaatender iti kasar iti simbaan?

⁶ Mabalin a ditay met ketdi mapasaran ti nakaro a suot a kas iti naipasango ken Aaron ken ti pamiliana. Ngem kasanon no naawistayo nga umatendar ken makipartisipar iti kasar ti maysa a saan a Saksi a kabagiantayo a maangay iti simbaan? Awan ti direkta a bilin iti Kasuratan a mangiparparit kadatayo a mapan iti kasta a kasar, ngem adda kadi dagiti prinsipio ti Biblia a nainaig iti dayta? *

⁷ Gapu iti determinasiontayo nga agtalinaed a nasantuan iti imatang ni Jehova kadagiti nadakamat a kasasaad, mabalin a saandatayo a maawatan dagiti saan a Saksi a kakabagiantayo. (1 Ped. 4:3, 4) Siempre, ditay kayat a masaktan ti riknada, isu a nasaysayaat no kasaritatayo ida iti direkta ngem naalumamay a pamay-an. Nasayaat nga aramiden dayta a nasaksakbay. Mabalin a pagyamanantay ti panangawisda kadatayo a makipartisipar iti kasar. Kalpasanna, mabalin nga ibagatayo a gapu iti pammatitayo, baka masingatayo laeng ti ragsak ti espesial nga aldawda ken mabalin a mapabainantay ida ken ti dadduma pay a bisitada. Maysa daytoy a pamay-an tapno saantay a maikompromiso ti pammatitayo.

8. Kasano nga intampok ti libro a Levitico ti kinasoberano ni Jehova?

⁸ Itampok ti libro a Levitico ti kinasoberano ni Jehova. Nasurok a 30 a daras a mabasatayo a dagiti linteg iti Levitico ket naggapu ken Jehova. Binigbig dayta ni Moises ken inaramidna ti imbilin ni Jehova. (Lev. 8:4, 5) Kas ken Moises, masapul met a kanayon nga aramidentayo no ania ti ibilin ti Soberanotayo, ni Jehova. Nupay tultulongannatayo ti organisasion ti Dios, adda dagiti gundaway a masuot ti pammatitayo bayat nga agmaymaysatayo, kas idi ken Jesus bayat nga adda idiay let-ang. (Luc. 4:1-13) No itandudotayo ti kinasoberano ti Dios ken agtalektayo kenkuana, awanto ti asinoman a makaimpluensia  kadatayo a mangikompromiso iti pammatitayo ken ditayto tumulok iti buteng.—Prov. 29:25.

9. Apay a magurgura dagiti adipen ti Dios iti intero a lubong?

⁹ Namnamaen dagiti adipen ti Dios iti intero a lubong a maidadanesda agsipud ta imbaga ni Jesus kadagiti adalanna: “Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko.” (Mat. 24:9) Iti laksid dayta, itultuloytayo latta nga ikasaba ti Pagarian ken agtaltalinaedtayo a nasantuan iti sanguanan ni Jehova. Apay a gurguraendatayo dagiti tattao uray no mapagtalkantayo, nadalus ti panagbiagtayo, ken agtungtungpaltayo kadagiti linteg? (Roma 13:1-7) Gapu ta ni Jehova ti bigbigbigentayo a Soberano nga Apo! “Kenkuana laeng” nga ipapaaytayo ti sagrado a panagserbi ken saantayto a pulos ikompromiso dagiti linteg ken prinsipiona.—Mat. 4:10.

10. Ania ti napasamak idi inkompromiso ti maysa a kabsat ti neutral a takderna?

¹⁰ Maysa pay, ‘saantayo a paset ti lubong’ isu a neutraltayo no maipapan iti gubgubat ken napolitikaan nga ar-aramid ti lubong. (Basaen ti Juan 15:18-21; Isaias 2:4.) Adda sumagmamano a nagdedikar iti Dios a nangikompromiso iti neutral a takderda. Adu kadagitoy ti nagbabawi ket napasublida ti relasionda iti naasi a nailangitan nga Amatayo. (Sal. 51:17) Ngem sumagmamano ti saan a nagbabawi. Kas pagarigan, idi Gubat Sangalubongan II, adu a kakabsat ti di nainkalintegan a naibalud idiay Hungary ket 160 kadakuada nga agedad iti 45 nga agpababa ti naipan iti maysa nga ili sa napilitda nga agsoldado. Nagtalinaed a natibker dagiti matalek a kakabsat ngem siam kadakuada ti nagsapata ken immawat iti uniporme. Dua a tawen kalpasanna, maysa kadakuada ti napili nga agbalin a paset ti firing squad a mangpaltog kadagiti matalek a Saksi. Anian a nagkas-ang ta maysa kadagiti mapaltogan ket ti bukodna a kabsat! Imbag laengen ta saan a natuloy dayta.

11, 12. Ania ti maadaltayo kadagiti sakripisio nga indaton dagiti Israelita?

¹¹ Imbilin ti Mosaiko a Linteg no ania a daton ti ipaay dagiti Israelita. (Lev. 9:1-4, 15-21) Masapul nga awan pakapilawan dagiti idatonda ta dagita ti mangiladawan iti perpekto a daton ni Jesus. Kasta met, adda espesipiko a pamay-an ti pannakaidatag ti tunggal kita ti daton, wenno sakripisio. Kas pagarigan, usigentayo ti makalikaguman iti nagpasngay nga ina. Kuna ti Levitico 12:6: “Kalpasanna iti panagngudo ti al-aldaw ti panaggugorna maipaay iti anak a lalaki wenno maipaay iti anak a babai isu mangipanto iti maysa nga urbon a kalakian a karnero a tumawenen a maipaay a daton a mapuoran ken maysa nga urbon nga atap a kalapati wenno maysa a pagaw a maipaay a daton gapu iti basol iti pagserkan ti tolda ti gimong iti padi.” Nupay adda dagiti espesipiko a kalikaguman ti Dios, ipakpakita ti Linteg a ti Dios ket naayat ken nainkalintegan. No saan a kabaelan ti ina ti agidaton iti maysa a karnero, mapalubosan a mangidaton iti dua a pagaw wenno dua nga urbon nga atap a kalapati. (Lev. 12:8) Nupay napanglaw daytoy nga ina, ay-ayaten ken tagtagipatgen isuna ni Jehova a kas met laeng kadagidiay mangipapaay iti nangina a daton. Ania ti maadaltayo?

¹² Pinaregta ni apostol Pablo dagiti kapammatianna a mangidatonda iti Dios iti “sakripisio ti panagdaydayaw.” (Heb. 13:15) Ar-aramidentayo dayta no isarsaritatayo iti sabsabali ti maipapan iti nasantuan a nagan ni Jehova. Us-usaren dagiti tuleng a kakabsat ti sign language tapno maidaydayawda ti Dios. Dagiti Kristiano a saanen a makaruar iti pagtaenganda idaydayawda ti Dios babaen ti panangasabada iti surat, telepono, ken  kadagiti mangay-aywan wenno sumarungkar kadakuada. Idaydayawtayo ni Jehova babaen ti panangipakaammotayo iti naganna ken iti naimbag a damag. Ngem ipaaytay koma ti kasayaatan sigun iti ipalubos ti salun-at ken kabaelantayo.—Roma 12:1; 2 Tim. 2:15.

13. Apay a rumbeng nga ireporttayo ti maar-aramidantayo iti ministerio?

¹³ Dagiti sakripisiotayo a pangidaydayaw ket personal a daton a siboboluntario nga ipaaytayo iti Dios gapu iti ayattayo kenkuana. (Mat. 22:37, 38) Ngem makalikaguman nga ireporttayo ti maar-aramidantayo iti ministerio. Ania koma ti rumbeng a panangmatmattayo iti daytoy nga urnos? Ti binulan a panagreporttayo ket panangipakita iti nadiosan a debosiontayo. (2 Ped. 1:7) Siempre, saantay koma a mapilpilit a mangbusbos iti adu nga oras iti ministerio tapno laeng ad-adu ti maireporttayo. Dayta ti makagapu a ti maysa nga agibumbunannag iti Pagarian nga adda iti nursing home wenno maysa a baldado mabalinna latta nga ireport uray 15 a minuto laeng. Ibilang ni Jehova dagita a minuto kas kasayaatan a sakripisio ti maysa nga agibumbunannag ken kas ebkas ti ayatna iti Dios ken apresasionna iti pribilehio a panagserbi kas Saksina. No kasano a mabalin latta idi dagiti napanglaw nga Israelita ti agdaton iti Dios, makapag-report latta uray dagiti adipen ni Jehova ita a limitado ti maaramidanda. Ti indibidual a reporttayo ket mairaman iti sangalubongan a report, a makatulong iti organisasion nga agplano no ania pay ti kasapulan para iti pannakaikasaba ti Pagarian. Isu a nadagsen kadi a banag no ireporttayo ti maaramidantayo iti ministerio?

14. Ilawlawagmo no apay a rumbeng nga usigentayo ti kalidad ti personal a panagadaltayo.

¹⁴ Kalpasan a nausigtayo ti sumagmamano a naespirituan a gameng manipud iti Levitico, mabalin a maibagam, ‘Ad-adda itan a maawatak no apay a karaman daytoy a libro iti naipaltiing a Sao ti Dios.’ (2 Tim. 3:16) Mabalin a mas determinadoka itan nga agbalin a nasantuan, saan laeng a gapu ta kalikaguman dayta ni Jehova no di ket maikari isuna iti dayta. Nalabit rimmayray ti tarigagaymo nga ad-adda pay a mangsukimat iti Kasuratan gapu iti naadalmo maipapan iti Levitico kadagitoy a dua nga artikulo. (Basaen ti Proverbio 2:1-5.) Usigem a naimbag ti kalidad ti personal a panagadalmo. Kayatmo la ketdi nga awaten ni Jehova dagiti sakripisiom a pangidaydayaw kenkuana. Palpalubosam kadi a ti TV, video games, sports, wenno dagiti paggugustom nga aramiden ti mangsinga ken manglapped iti naespirituan a panagrang-aymo? No kasta, nasayaat no panunotem a naimbag ti kinuna ni apostol Pablo a nailanad iti libro a Hebreo.

15, 16. Apay a nagbalin a prangka ni Pablo iti suratna kadagiti Hebreo a Kristiano?

¹⁵ Prangka ni Pablo iti suratna kadagiti padana a Hebreo a Kristiano. (Basaen ti Hebreo 5:7, 11-14.) Saanna nga impalpalikaw ti puntona! Kinunana a ‘nagbalin a ngelngel’ ti panagdengngegda. Apay a kasta la unay ti kinaprangka ni Pablo? Kas ken Jehova, ay-ayaten ni Pablo dagidiay a Kristiano  a kontento lattan iti naespirituan a gatas ken maseknan kadakuada. Pudno a napateg ti panangammo kadagiti pamunganayan a Nakristianuan a sursuro. Ngem kasapulan ti “nakired a taraon” tapno rumang-ay iti naespirituan ti maysa a Kristiano.

¹⁶ Imbes a mannursuroda koman, kasapulan pay laeng idi dagiti Hebreo ti mangisuro kadakuada. Apay? Agsipud ta dida kayat ti mangan iti “nakired a taraon.” Saludsodam ti bagim: ‘Bigbigek kadi a kasapulak ti nakired a naespirituan a taraon? Ipapaunegko kadi dayta? Wenno saanak nga agkarkararag ken diak ad-adalen a naimbag ti Biblia? No kasta, saan ngata a ti ayan ti parikut ket ti kalidad ti panagadalko?’ Saan laeng a panangasaba kadagiti tattao ti annongentayo no di pay ket ti panangisuro ken panamagbalin kadakuada kas ad-adalan.—Mat. 28:19, 20.

17, 18. (a) Apay a nasken a kanayon a mangipaunegtayo iti nakired a naespirituan a taraon? (b) Ania koma ti panangmatmattayo iti iyiinum ti arak sakbay ti gimong?

¹⁷ Mabalin a saan a nalaka para iti kaaduan kadatayo ti agadal iti Biblia. Siempre, saan a kayat ni Jehova nga agadaltayo gapu laeng ta makonkonsiensiatayo. Dedikadotayo man iti Dios iti adun a tawen wenno nabiittayo pay, masapul nga itultuloytayo ti mangipauneg iti nakired a naespirituan a taraon. Napateg dayta tapno makapagtalinaedtayo a nasantuan.

¹⁸ Tapno agbalintayo a nasantuan, masapul a sukimatentayo a naimbag ti Kasuratan ken aramidentayo ti kalikaguman ti Dios kadatayo. Usigentayo dagiti annak ni Aaron a da Nadab ken Abihu, a napapatay gapu iti panagidatonda iti “di mayalubog nga apuy,” nalabit bayat a nabartekda. (Lev. 10:1, 2) Panunotentayo ti kinuna ti Dios ken Aaron. (Basaen ti Levitico 10:8-11.) Kayat kadi a sawen dayta a teksto a masapul a saantay nga uminum iti aniaman nga inumen a de-alkohol sakbay a mapantay makigimong? Panunotem daytoy a punto: Awantayon iti sidong ti Linteg. (Roma 10:4) Iti dadduma a pagilian, adda dagiti kapammatiantayo nga uminum iti kalkalainganna a kaadu ti arak sakbay a mapanda makigimong. Adda idi uppat a kopa ti arak a nausar iti Paskua. Idi inrugi ni Jesus ti Memorial, imminum iti arak agraman dagiti apostolna, a dayta nga arak ti mangirepresentar iti darana. (Mat. 26:27) Kondenaren ti Biblia ti panaginum iti adu nga arak ken panagbartek. (1 Cor. 6:10; 1 Tim. 3:8) Saan met a kayat ti adu a Kristiano ti uminum iti arak sakbay nga aramidenda ti aniaman a kita ti sagrado a panagserbi gapu ta saan nga ipalubos ti konsiensiada. Nupay kasta, nagduduma ti kasasaad iti tunggal pagilian. Ti napateg ket mapagduma koma dagiti Kristiano ti “nasantuan a banag ken ti natabbaaw” tapno agtalinaedda a nasantuan ken makaay-ayo iti Dios.

19. (a) Kasanotayo a mapasayaat ti panagdaydayaw ti pamilia ken ti personal a panagadaltayo? (b) Kasanom a maipakita a determinadoka nga agtalinaed a nasantuan?

¹⁹ Adu pay a naespirituan a gameng ti masarakam iti Sao ti Dios no ikagumaam a sapulen dagita. Agusarka kadagiti katulongan iti panagsukimat tapno mapasayaatmo ti panagdaydayaw ti pamiliam ken ti personal a panagadalmo. Paunegem ti pannakaammom ken Jehova ken iti pangpanggepna. Umadanika kenkuana. (Sant. 4:8) Agkararagka iti Dios kas iti salmista, a nangikanta: “Luktam dagiti matak, tapno kumitaak koma iti nakaskasdaaw a bambanag manipud lintegmo.” (Sal. 119:18) Dimo koma pulos ikompromiso dagiti linteg ken prinsipio ti Biblia. Situtulokka koma nga agtulnog iti katan-okan a linteg “Daydiay Santo,” ni Jehova, ken sireregtaka a makiraman iti “nasantuan a trabaho iti naimbag a damag ti Dios.” (1 Ped. 1:15; Roma 15:16) Agtalinaedka a nasantuan kadagitoy a nariribuk a maudi nga al-aldaw. Sapay koma ta agbalintayo amin a nasantuan iti kababalintayo, iti kasta maitandudotayo ti kinasoberano ti nasantuan a Diostayo a ni Jehova.