1, 2. (a) Ngai erĩgagĩrĩra andũ ake makorũo na mĩthiĩre ĩtariĩ atĩa? (b) Nĩ ciũria irĩkũ igũcokio thĩinĩ wa gĩcunjĩ gĩkĩ?

ATONGORETIO nĩ Jehova, mũtũmwo Petero nĩ aagwetire ũhoro ũrĩa ũrĩ ibuku-inĩ rĩa Maũndũ ma Alawii. Onanirie atĩ tũrĩ Akristiano tũrabatara gũkorũo tũrĩ atheru mĩthiĩre-inĩ itũ o ta ũrĩa Aisiraeli maabataraga gũkorũo marĩ atheru mĩthiĩre-inĩ yao. (Thoma 1 Petero 1:14-16.) Tondũ Jehova “nĩ mũtheru,” erĩgagĩrĩra Akristiano aitĩrĩrie maguta na arĩa a “ng’ondu ingĩ,” mekage o ũrĩa wothe mangĩhota nĩguo maikarage marĩ atheru mĩthiĩre-inĩ yao yothe, no ti mĩthiĩre-inĩ ĩmwe.—Joh. 10:16.

² Nĩ tũkũgunĩka mũno twathuthuria makĩria maũndũ ma bata ma kĩĩroho marĩa marĩ thĩinĩ wa Maũndũ ma Alawii. Ningĩ kũhũthĩra maũndũ marĩa tũkwĩruta nĩ gũgũtũteithia tũikarage tũrĩ atheru mĩthiĩre-inĩ itũ yothe. Tũkwarĩrĩria ciũria ta ici: Twagĩrĩirũo gũkorũo na mawoni marĩkũ harĩ kũrũmia wĩkindĩru witũ? Ibuku rĩa Maũndũ ma Alawii rĩtũrutaga atĩa igũrũ rĩgiĩ kũnyita mbaru ũnene wa Jehova? Tũngĩĩruta atĩa kuumana na magongona marĩa maarutagwo?

3, 4. (a) Akristiano magĩrĩirũo kũrũmia mawatho na motaaro ma Bibilia nĩkĩ? (b) Nĩkĩ tũtiagĩrĩirũo kwĩrĩhĩria kana kũiga muku ngoro-inĩ?

³ Angĩkorũo nĩ tũrĩkenagia Jehova, no mũhaka tũrũmagie biũ maathani na motaaro make, na tũgethemaga mwerekera ũtarĩ mũtheru  na ũtaratwarana namo. O na gũtuĩka tũtirĩ rungu rwa Watho wa Musa, maũndũ marĩa marĩ thĩinĩ waguo no matũteithie kũmenya maũndũ marĩa maagĩrĩru na marĩa matarĩ maagĩrĩru maitho-inĩ ma Ngai. Kwa ngerekano, Aisiraeli maathĩtwo ũũ: “Ndũkanerĩhĩrie o na atĩa, kana ũikare ũrakaire nĩ ũndũ wa ciana cia andũ anyu; no rĩrĩ, nĩ kaba wende mũndũ ũrĩa ũngĩ o ta ũrĩa wĩendete wee mwene; niĩ nĩ niĩ Jehova.”—Alaw. 19:18.

⁴ Jehova ndendaga twĩrĩhĩrie kana tũige marakara ngoro-inĩ. (Rom. 12:19) Tũngĩhũthia mawatho na motaaro ma Ngai, Mũcukani no akene mũno, na ũndũ ũcio no ũcambithie rĩĩtwa rĩa Jehova. O na mũndũ angĩtũtuuria akĩendaga, tũtiagĩrĩirũo gwĩtĩkĩra gũtuĩka indo cia kũigaga muku. Ngai atũheete gĩtĩo gĩa gũkorũo tũrĩ indo ithondeketwo na “rĩũmba” cia kũiga kĩgĩĩna kĩa maũndũ ma ũtungata. (2 Kor. 4:1, 7) Indo icio itiagĩrĩire kũhũthĩrũo kũiga muku!

5. Tũngĩĩruta atĩa kuumana na ũhoro wa Haruni na gĩkuũ kĩa ariũ ake? (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Maũndũ maritũ mũno marĩa maakorire famĩlĩ ya Haruni nĩ maandĩkĩtwo thĩinĩ wa Maũndũ ma Alawii 10:1-11. No mũhaka akorũo Haruni na famĩlĩ yake nĩ maaiguire ihooru mũno rĩrĩa ariũ ake, Nadabu na Abihu, mooragirũo nĩ mwaki ũrĩa woimĩte igũrũ marĩ hema-inĩ ya gũtũnganwo. No mũhaka akorũo rĩarĩ igerio inene rĩa wĩtĩkio harĩ o rĩrĩa meerirũo matigacakaĩre ciana icio ciao! Hihi wee nĩ wonanagia atĩ wĩ mũtheru na njĩra ya gwĩthema kũnyitanĩra na andũ a famĩlĩ kana andũ angĩ arĩa meheretio thĩinĩ wa kĩũngano?—Thoma 1 Akorintho 5:11.

6, 7. (a) Rĩrĩa tũratua kana nĩ tũgwĩtĩkĩra gũkorũo na itemi ũhiki-inĩ ũratongorio nĩ kanitha-rĩ, nĩ maũndũ marĩkũ tũrabatara gwĩciria ũhoro wamo? (Rora kohoro ka magũrũ-inĩ.) (b) Tũngĩteithia atĩa andũ a famĩlĩ matarĩ Aira a Jehova mataũkĩrũo nĩ mũrũgamo witũ wĩgiĩ ũhiki ũratongorio nĩ kanitha?

⁶ No twage gũcemania na igerio iritũ ta rĩrĩa rĩakorire Haruni na famĩlĩ yake. O na kũrĩ ũguo-rĩ, ũngĩka atĩa ũngĩtwo na ũheo wĩra mũna ũhiki-inĩ wa mũndũ wa famĩlĩ yanyu, na ũkorũo ũratongorio nĩ kanitha? Thĩinĩ wa Maandĩko hatirĩ watho ũgirĩtie mũndũ gũthiĩ, no hihi nĩ kũrĩ motaaro ma Bibilia mangĩgũteithia ũgĩtua itua ta rĩu? *

⁷ Rĩrĩa tũrerutanĩria gũikara tũrĩ atheru harĩ Jehova maũndũ-inĩ ta macio maagwetwo, andũ a famĩlĩ ciitũ arĩa matarĩ Aira a Jehova no magegio nĩ mũrũgamo ũcio. (1 Pet. 4:3, 4) Ma nĩ atĩ, tũtingĩenda kũmarakaria, ona kũrĩ ũguo-rĩ, nĩ wega kwaria nao na njĩra ya ũhooreri, ĩndĩ ya ĩmwe kwa ĩmwe. Kũngĩhoteka nĩ wega kwaria nao o gatene mũthenya ũcio ũtanakinya. No tũmacokerie ngatho na tũmeere atĩ nĩ twakena nĩ ũndũ wa gũtwĩta na gũtũhe wĩra ũhiki-inĩ. No tũcoke tũmeere atĩ, tondũ tũtikaahota kũnyitanĩra maũndũ-inĩ ma kĩĩndini marĩa mageekwo ũhiki-inĩ ũcio, tũtingĩenda gũkaamathũkĩria mũthenya wao kana tũmaiguithie ũũru marĩ na ageni ao. Ĩyo nĩ njĩra ĩmwe ĩngĩtũteithia twĩtheme gũthũkia wĩtĩkio na wĩkindĩru witũ.

8. Ibuku rĩa Maũndũ ma Alawii rĩtĩtĩrithĩtie atĩa ũhoro wa ũnene wa Jehova?

⁸ Ibuku rĩa Maũndũ ma Alawii nĩ rĩtĩtĩrithĩtie mũno ũhoro wa ũnene wa Jehova. Rĩgwetete makĩria ma maita 30 atĩ mawatho marĩa marĩ thĩinĩ wa rĩo moimĩte kũrĩ Jehova. Ũguo nĩguo Musa eetĩkĩtie, na nĩ ũndũ ũcio nĩ ekire ũrĩa Jehova amwathĩte eke. (Alaw. 8:4, 5) O na ithuĩ hingo ciothe twagĩrĩirũo gwĩkaga ũrĩa Mwathani-Witũ-Mũnene, Jehova, endaga twĩke. Nĩguo tũhote gwĩka ũguo, ithondeka rĩa Jehova nĩ rĩtũteithagia. O na kũrĩ ũguo, wĩtĩkio witũ no ũgerio hĩndĩ ĩrĩa tũrĩ ithuiki, ta ũrĩa Jesu aageririo arĩ werũ-inĩ. (Luk. 4:1-13) Tũngĩiga meciria maitũ biũ harĩ ũnene wa Jehova na tũmwĩhoke, gũtirĩ mũndũ ũngĩhota gũthũkia wĩkindĩru witũ kana atũme tũingĩre mũtego-inĩ nĩ ũndũ wa gwĩtigĩra andũ.—Thim. 29:25.

9. Nĩ kĩĩ gĩtũmaga andũ a Jehova mathũũrũo mabũrũri-inĩ mothe?

 ⁹ Nĩ ũndũ wa gũkorũo tũrĩ arũmĩrĩri a Kristo na Aira a Jehova, nĩ tũnyariragwo mabũrũri-inĩ maingĩ thĩinĩ wa thĩ. Ũcio ti ũndũ wa gũtũgegia tondũ Jesu eerĩte arutwo ake ũũ: “Hĩndĩ ĩo nĩyo andũ makamũneana mũnyarirũo, na mamũũrage: na nĩmũkamenwo nĩ ndũrĩrĩ ciothe nĩ ũndũ wa rĩĩtwa rĩakwa.” (Mat. 24:9) Ĩndĩ o na kũrĩ na rũmena rũnene ũguo, no tũkiragĩrĩria wĩra-inĩ wa kũhunjia na tũgathiĩ na mbere kuonania atĩ tũrĩ atheru maitho-inĩ ma Jehova. Nĩ kĩĩ gĩtũmaga tũthũũrũo ũguo na tũrĩ andũ ehokeku, maikaraga mũtũũrĩre mũtheru, na mathĩkagĩra thirikari? (Rom. 13:1-7) Nĩ tondũ nĩ tũtuĩte Jehova Mwathani-Witũ-Ũrĩa-Mũnene! No “we wiki” tu tũrutagĩra ũtungata mũtheru na tũtingĩtĩkĩra kwagarara mawatho na motaaro make ma ũthingu.—Mat. 4:10.

10. Gwathiire atĩa rĩrĩa mũrũ wa Ithe witũ ũmwe aagire kũrũmia wĩkindĩru wake?

¹⁰ Ningĩ, ithuĩ ‘tũtirĩ a gũkũ thĩ.’ Nĩ ũndũ ũcio, tũtinyitaga mbaru mwena o na ũrĩkũ maũndũ-inĩ ma gĩũteti na ma mbaara iria ikoragwo thĩinĩ wa thĩ. (Thoma Johana 15:18-21; Isaia 2:4.) Nĩ kũrĩ andũ amwe meeyamũrĩire Jehova magĩcoka makĩĩingĩria maũndũ-inĩ ma gĩũteti na ma mbaara. Aingĩ ao nĩ macokete makerira na magacokia ũkuruhanu mwega na Ithe witũ wa igũrũ ũrĩ tha. (Thab. 51:17) Amwe matiigana kwĩrira. Kwa ngerekano, hĩndĩ ya Mbaara ya Kerĩ ya Thĩ, ariũ a Ithe witũ aingĩ nĩ moohetwo njera hatarĩ kĩhooto kũndũ guothe bũrũri-inĩ wa Hungary. Ariũ a Ithe witũ 160 arĩa mataakĩrĩtie mĩaka 45 kuuma harĩ acio maarĩ njera, nĩ maacokanĩrĩirio nĩ thirikari taũni-inĩ ĩmwe na makĩrũo maingĩre thĩinĩ wa njeshi. Arĩa maarĩ ehokeku nĩ maaregire biũ, ĩndĩ ariũ a Ithe witũ kenda nĩ meetĩkĩrire kwĩhĩtithio na makĩheo nguo cia njeshi. Mĩaka ĩĩrĩ thutha ũcio, ũmwe wa arĩa meetĩkĩrire kũingĩra njeshi-inĩ eekorire thĩinĩ wa gĩkundi kĩa njeshi kĩrĩa kĩerĩtwo gĩkorage Aira a Jehova arĩa maarĩ ehokeku. Mũrũ wa nyina aarĩ ũmwe wa arĩa maarĩ moragwo! O na kũrĩ ũguo, kũringana na ũrĩa maũndũ macokire gũthiĩ, andũ acio matioragirũo.

11, 12. Tũngĩĩruta atĩa kuumana na magongona marĩa maarutagwo hĩndĩ ya Isiraeli?

¹¹ Hĩndĩ ya Watho wa Musa, kũrĩ magongona marĩa Aisiraeli maagĩrĩirũo kũrutĩra Jehova. (Alaw. 9:1-4, 15-21) Magongona macio maagĩrĩirũo gũkorũo matarĩ na kaũgũ tondũ moonanagia igongona ikinyanĩru rĩrĩa Jesu aarutire. Makĩria ma ũguo, harĩ mũtaratara ũrĩa waagĩrĩirũo nĩ kũrũmĩrĩrũo mũthemba o wothe wa igongona ũkĩrutwo. Kwa ngerekano, ta wĩcirie igongona rĩrĩa mũtumia aagĩrĩirũo nĩ kũruta thutha wa kũgĩa kaana. Maũndũ ma Alawii 12:6 yugaga ũũ: ‘Hĩndĩ ĩrĩa matukũ make ma gũtherio makaahinga, ma kahĩĩ, kana ma kairĩtu, agaatwara gatũrũme ka mwaka ũmwe, gagatuĩke ihaki rĩa njino, na ndutura ĩtarĩ ngũrũ, kana ndirahũgĩ, ĩtuĩke igongona rĩa mehia, acitware mũromo-inĩ wa hema-ya-gũtũnganwo, harĩ mũthĩnjĩri-Ngai.’ O na gũtuĩka Ngai nĩ oigĩte mĩthemba ya magongona marĩa aagĩrĩirũo nĩ kũrutagĩrũo, Watho wa Musa nĩ wonanagia wega atĩ nĩ arĩ wendo na ũcayanĩri. Kwa ngerekano, mũtumia angĩagire ũhoti wa kũruta gatũrũme, nĩ eetĩkĩrĩtio arute ndutura igĩrĩ kana ndirahũgĩ igĩrĩ. (Alaw. 12:8) Jehova nĩ onanagia nĩ eendete mũndũ ũcio o na arĩ mũthĩni, na akamuona arĩ wa bata o ta mũndũ ũrĩa ũngĩahotire kũruta igongona rĩa goro. Tũngĩĩruta atĩa kuumana na ũndũ ũcio?

¹² Mũtũmwo Paulo eerire Akristiano ‘magoocage Ngai ta arĩ igongona maramũrutĩra.’ (Ahib. 13:15) Twagĩrĩirũo kũhũthagĩra tũnua twitũ kũhunjĩria andũ ũhoro wa rĩĩtwa itheru rĩa Jehova. Aarĩ na ariũ a Ithe witũ arĩa matakoragwo na ũhoti wa kũigua, mahũthagĩra rũthiomi rwa kwaria na ciĩko kũhunjia ũhoro wa rĩĩtwa rĩa Jehova. Akristiano arĩa matahotaga kuuma mũciĩ no magoocaga Jehova. Mahunjagia na njĩra ya kwandĩka marũa,  kũhũũra thimũ, na kũhunjĩria arĩa maramatumberia o hamwe na arĩa maramaceerera. Igongona rĩrĩa tũkũrutĩra Jehova harĩ kũhunjia ũhoro ũrĩa mwega na kũmenyithania rĩĩtwa rĩake, rĩĩhocetie harĩ ũgima witũ wa mwĩrĩ. O na kũrĩ ũguo, twagĩrĩirũo kũmũrutĩra kĩndũ kĩrĩa kĩega biũ.—Rom. 12:1; 2 Tim. 2:15.

13. Twagĩrĩirũo kũruta riboti itũ ya ũtungata nĩkĩ?

¹³ Tũrutagĩra Jehova magongona ma kũmũgooca twĩyendeire tondũ nĩ tũmwendete. (Mat. 22:37, 38) O na kũrĩ ũguo, nĩ twĩrĩtwo tũrutage riboti ĩgiĩ wĩra witũ wa kũhunjia. Gũkĩrĩ ũguo-rĩ, twagĩrĩirũo gũkorũo na mawoni marĩkũ kwerekera mũbango ũcio? Riboti ĩrĩa tũrutaga o mweri nĩ ĩhutanĩtie mũno na wĩyamũrĩri witũ harĩ Ngai. (2 Pet. 1:6) Ĩndĩ, gũtirĩ mũndũ wagĩrĩirũo kwĩhatĩrĩria kũhunjia mathaa maingĩ atĩ no getha tu arute riboti ĩrĩ na mathaa maingĩ. Nĩkĩo gũkoragwo na mũbango atĩ mũhunjia angĩkorũo aremereirũo biũ nĩ ũndũ wa kũrũara kana gũkũra, no arute riboti ya ndagĩka itanyihĩire 15. Jehova nĩ akenagio nĩ ndagĩka icio tondũ nĩ amenyaga atĩ mũhunjia ũcio amũrutĩire kĩrĩa kĩega biũ. Ningĩ nĩ amenyaga atĩ mũhunjia ũcio ekĩte ũguo nĩ ũndũ wa wendo, na ngatho ciake nĩ ũndũ wa mweke wa gũkorũo arĩ ndungata yake. Ndungata cia Jehova iria itangĩhota gwĩka maũndũ maingĩ nĩ ũndũ wa mawathe ma mwĩrĩ, o nacio no ihote kũruta riboti o ta ũrĩa Aisiraeli arĩa maarĩ athĩni maahotaga kũruta magongona kũringana na ũhoti wao. Ningĩ riboti ciitũ tũrĩ mũndũ ũmwe ũmwe ciataranĩrio na cia ahunjia arĩa angĩ thĩinĩ wa thĩ yothe, nĩ iteithagia ithondeka rĩa Jehova kũbanga maũndũ mbere nĩ ũndũ wa mabataro ma ihinda rĩũkĩte megiĩ wĩra wa kũhunjia. Gũkĩrĩ ũguo-rĩ, hihi nĩ twagĩrĩirũo kuona ũrĩ ũndũ mũritũ kũruta riboti ya maũndũ marĩa tũhingĩtie ũtungata-inĩ?

14. Wagĩrĩirũo gũthuthuria ũrĩa wĩruti waku ũtariĩ nĩkĩ? Taarĩria.

¹⁴ Thutha wa gũthuthuria maũndũ mamwe ma bata ma kĩĩroho marĩa marĩ thĩinĩ wa ibuku rĩa Maũndũ ma Alawii, no kũhoteke rĩu nĩ ũtaũkĩirũo wega makĩria kĩrĩa gĩatũmire ibuku rĩu rĩĩkĩrũo thĩinĩ wa Kiugo kĩa Ngai kĩrĩa gĩtongoretio nĩ roho. (2 Tim. 3:16) No kũhoteke itua rĩaku rĩa gũthiĩ na mbere gũikara ũrĩ mũtheru nĩ rĩĩkĩrĩtwo hinya makĩria, na ũkamenya atĩ Jehova nĩ aagĩrĩire kũrutĩrũo kĩrĩa kĩega biũ. No gũkorũo maũndũ marĩa weruta thĩinĩ wa icunjĩ ici igĩrĩ megiĩ Maũndũ ma Alawii, nĩ matũma wende mũno kũrikĩra makĩria thĩinĩ wa wĩruti waku wa Bibilia. (Thoma Thimo 2:1-5.) Wĩthuthurie na njĩra ya mahoya wone ũrĩa wĩruti waku ũtariĩ. Ma nĩ atĩ, no wende magongona maku ma kũgooca Jehova metĩkĩrĩkage nĩwe. Hihi wethuthuria nĩ ũrona ta ũrekereirie tabarĩra cia TV, mathako, mĩthako ya kompiuta, kana maũndũ mangĩ marĩa wendete mathũkie maũndũ maku ma kĩĩroho? Angĩkorũo nĩguo-rĩ, no ũgunĩke mũno ũngĩĩcũrania maũndũ mamwe marĩa Paulo aandĩkire thĩinĩ wa ibuku rĩa Ahibirania.

15, 16. Nĩ kĩĩ gĩatũmire Paulo aarie cararũkũ akĩandĩkĩra Akristiano Ahibirania?

¹⁵ Rĩrĩa mũtũmwo Paulo aandĩkĩire Akristiano Ahibirania aamerire maũndũ cararũkũ. (Thoma Ahibirania 5:7, 11-14.) Paulo ndaigana kũmahaka maguta! Aamerire atĩ ‘nĩ maatuĩkĩte aritũ’ harĩ kũigua. Nĩ kĩĩ gĩatũmire Paulo  ahũthĩre ciugo nditũ ũguo na cia ĩmwe kwa ĩmwe? Akristiano acio meerutaga o morutani marĩa ma mũthingi. Nĩ ũndũ ũcio, mũtũmwo Paulo nĩ kũmacaĩra aamacayagĩra na akamonia wendo ta wa Jehova. Kũmenya morutani ma mũthingi ma Bibilia nĩ kwa bata, ĩndĩ “irio iria nyũmũ” nĩ ibataranagia nĩguo mũndũ atuĩke Mũkristiano mũgimaru kĩĩroho.

¹⁶ Handũ ha Akristiano Ahibirania gũkũra kĩĩroho ũndũ mangĩahotire kũruta andũ arĩa angĩ, o ene maabataraga mũndũ wa kũmaruta. Nĩkĩ? Nĩ tondũ matiendaga kũrĩa “irio iria nyũmũ.” Wĩyũrie ũũ: ‘Hihi nĩ ngoragwo na mawoni marĩa magĩrĩire kwerekera morutani marĩa maritũ ma Bibilia? Nĩ ngenagĩra kũmeruta? Hihi nĩ nyendete kũhoya na kũrikĩra thĩinĩ wa wĩruti wakwa wa Bibilia? Angĩkorũo tiguo-rĩ, hihi no kũhoteke mĩbango yakwa ya kwĩruta nĩyo ĩreheete thĩna ũcio?’ Makĩria ma kũhunjĩria andũ nĩ twagĩrĩirũo kũmaruta na kũmatua arutwo.—Mat. 28:19, 20.

17, 18. (a) Twagĩrĩirũo gũthiĩ na mbere kũrĩa irio nyũmũ cia kĩĩroho nĩkĩ? (b) Twagĩrĩirũo gũkorũo na mawoni marĩkũ megiĩ ũhũthĩri wa njohi rĩrĩa mũndũ arathiĩ mĩcemanio ya Gĩkristiano?

¹⁷ Harĩ aingĩ aitũ, no ũkorũo ũtarĩ ũndũ mũhũthũ kwĩruta Bibilia. O na kũrĩ ũguo, Jehova ndendaga tũthome Bibilia nĩgetha tu tũhingie watho. Ĩndĩ o na angĩkorũo tweyamũrĩire Jehova mĩaka mĩingĩ mĩhĩtũku kana no hĩndĩ tũramwĩyamũrĩire, twagĩrĩirũo gũthiĩ na mbere kũrĩa irio nyũmũ cia kĩĩroho. Gwĩka ũguo nĩ kwa bata angĩkorũo nĩ tũgũthiĩ na mbere gũkorũo na mĩthiĩre mĩtheru.

¹⁸ Nĩguo tũkorũo tũrĩ atheru, no mũhaka tũthuthuragie Maandĩko wega na tũgeka ũrĩa Ngai endaga. Ta wĩcirie ũhoro wa ariũ a Haruni Nadabu na Abihu, arĩa mooragirũo nĩ Jehova nĩ ũndũ wa kũmũtwarĩra “mwaki wa handũ hangĩ.” No kũhoteke mekĩte ũguo nĩ ũndũ wa gũtongorio nĩ ũrĩu. (Alaw. 10:1, 2) Ta rora ũrĩa Ngai eerire Haruni hĩndĩ ĩyo. (Thoma Maũndũ ma Alawii 10:8-11.) Hihi mĩhari ĩyo yonanagia atĩ tũtiagĩrĩirũo nĩ kũnyua njohi mbere ya gũthiĩ mĩcemanio ya Gĩkristiano? Ta wĩcirie ũhoro wa maũndũ maya: Ithuĩ tũtirĩ rungu rwa Watho wa Musa. (Rom. 10:4) Thĩinĩ wa mabũrũri mamwe, kũrĩ Akristiano mahũthagĩra gacohi kanini hĩndĩ ĩrĩa mararĩa irio na magacoka magathiĩ mĩcemanio. Hĩndĩ ya Pasaka nĩ kwahũthagĩrũo ndibei ikombe inya. Hĩndĩ ĩrĩa Jesu aambagĩrĩria Kĩririkano gĩa gĩkuũ gĩake, nĩ aaheire arutwo ake ndibei manyue ĩrĩa yarũgamĩrĩire thakame yake. (Mat. 26:27) Bibilia nĩ ĩkananĩtie kũnyua njohi nyingĩ, na ũrĩu. (1 Kor. 6:10; 1 Tim. 3:8) Nĩ ũndũ wa thamiri ciao, Akristiano aingĩ nĩ monaga arĩ wega gwĩthema biũ kũnyua njohi mbere ya gũthiĩ ũtungata-inĩ o wothe wa Gĩkristiano. O na kũrĩ ũguo, maũndũ matihaanaine mabũrũri-inĩ mothe. Nĩ ũndũ ũcio, ũndũ ũrĩa wa bata nĩ Akristiano kũmenya “ngũũrani ya indo iria nyamũre na iria cia ndũire,” nĩguo maikarage marĩ atheru na makenagie Jehova.

19. (a) Tũrabatara gwĩka atĩa nĩguo twagagĩrie ũthathaiya wa famĩlĩ na wĩruti wa mũndũ kĩũmbe? (b) Ũngĩonania atĩa atĩ nĩ wĩhotorete gũikara wĩ mũtheru?

¹⁹ No ũmenye maũndũ maingĩ ma bata ma kĩĩroho ũngĩrikĩra biũ thĩinĩ wa Kiugo kĩa Ngai. Hũthagĩra indo iria irĩ kuo cia gwĩka ũthuthuria nĩguo wagagĩrie ũthathaiya wanyu wa famĩlĩ na wĩruti waku kĩũmbe. Ongerera ũmenyo waku harĩ Jehova na mĩoroto yake. Thiĩ na mbere gũikara hakuhĩ nake. (Jak. 4:8) O ta ũrĩa mwandĩki wa Thaburi aainire, hoyaga Jehova ũũ: ‘Humbũria maitho, ndĩĩonere maũndũ ma magegania ndutĩte kĩrĩra-inĩ gĩaku.’ (Thab. 119:18) Ndũkanetĩkĩre kwagarara motaaro na mawatho ma Bibilia. Athĩkagĩra watho wa Jehova wĩyendeire, o we ũrĩa “mũtheru,” na ũrutage “wĩra ũrĩa mũtheru wa ũhoro mwega wa Ngai na kĩyo.” (1 Pet. 1:15; Rom. 15:16, New World Translation) Onania biũ atĩ wĩ mũtheru mahinda-inĩ maya moru ma kũrigĩrĩria. Rekei ithuothe tũikarage tũrĩ atheru mĩthiĩre-inĩ itũ, na nĩ ũndũ ũcio tũkanyita mbaru ũnene wa Jehova, Ngai witũ mũtheru.