1, 2. (a) Aw Gɔd want lɛ in pipul dɛn biev? (b) Us kwɛstyɔn dɛn wi go ansa insay dis atikul?

JIOVA bin ɛp di apɔsul Pita fɔ kot frɔm Lɛvitikɔs ɛn ɛksplen se jɔs lɛk aw Jiova bin tɛl di Izrɛlayt dɛn fɔ oli na so Kristian dɛnsɛf fɔ oli pan ɛnitin we dɛn de du. (Rid Pita In Fɔs Lɛta 1:14-16.) Jiova we na “di Oli Wan,” want lɛ anɔyntɛd Kristian dɛn ɛn di “ɔda ship dɛn” du dɛn bɛst fɔ biev oli we pan ɛnitin we dɛn de du, nɔto fɔ jɔs biev fayn pan sɔm tin dɛn.—Jɔn 10:16.

² Insay dis atikul, wi go lan ɔda fayn fayn tin dɛn na Lɛvitikɔs we go bɛnifit wi. Ɛn if wi du dɛn tin ya we wi de lan, i go ɛp wi fɔ bi oli pan ɔl wetin wi de du. Wi go ansa kwɛstyɔn dɛn lɛk: Wetin mek wi nɔ fɔ du wetin Jiova nɔ want ivin we ɔda pipul dɛn want lɛ wi du dat? Aw di Baybul buk we na Lɛvitikɔs tich wi bɔt aw wi go sho se na Jiova gɛt di rayt fɔ rul? Wetin wi go lan frɔm di sakrifays dɛn we di Izrɛlayt dɛn bin de mek?

3, 4. (a) Wetin mek Kristian dɛn nɔ fɔ pwɛl Gɔd in lɔ ɛn advays dɛn jɔs bikɔs ɔda pipul dɛn want lɛ dɛn du dat? (b) Wetin mek wi nɔ fɔ kip grɔj na wi at ɔ du bad to pɔsin we dɔn du wi bad?

³ If wi want fɔ mek Jiova gladi fɔ wi, wi fɔ tray tranga wan fɔ fala in lɔ ɛn advays dɛn. Lɛ wi nɔ ɛva pwɛl Jiova in lɔ bikɔs  ɔda pipul dɛn want lɛ wi du dat. Na tru se wi nɔ de ɔnda di Lɔ we Gɔd bin gi Mozis, bɔt di tin dɛn we bin de insay di Lɔ de mek wi no wetin rayt ɛn wetin nɔ rayt na Gɔd in yay. Fɔ ɛgzampul, Gɔd bin tɛl di Izrɛlayt dɛn se: “Una nɔ fɔ du bad to pɔsin we du una bad, ɛn una nɔ fɔ kip grɔj fɔ una kɔmpin, bɔt una fɔ lɛk una kɔmpin mɔtalman lɛk aw una lɛk unasɛf. Mi na Jiova.”—Lɛv. 19:18.

⁴ Jiova nɔ want lɛ wi du bad to pɔsin we dɔn du wi bad, ɛn i nɔ want lɛ wi kip grɔj na wi at. (Rom 12:19) If wi nɔ fala Jiova in lɔ ɛn advays dɛn, Setan go gladi, ɛn wi go briŋ badnem pan Jiova. Ilɛksɛf sɔmbɔdi dɔn du wi bad bay wilful, lɛ wi nɔ kip grɔj na wi at fɔ am. Di Baybul se wi tan lɛk “kɔntri pɔt” we gɛt jɛntri insay. Dis jɛntri na di prichin wok. (2 Kɔr. 4:1, 7) Grɔj tan lɛk asid, so wi nɔ fɔ put am na di sem ples we wi jɛntri de!

5. Wetin wi kin lan frɔm Erɔn we in pikin dɛn bin day? (Luk di pikchɔ nia dis atikul in taytul.)

⁵ Insay Lɛvitikɔs 10:1-11, di Baybul tɛl wi bɔt wan sɔri tin we bin apin na Erɔn in famili. Faya bin kɔmɔt na ɛvin ɛn kil Erɔn in tu bɔy pikin dɛn we na Nedab ɛn Abayu. Dis go dɔn mek ɔlman na di famili in at pwɛl. Jiova bin tɛl Erɔn ɛn in famili se dɛn nɔ fɔ kray fɔ di wan dɛn we dɔn day. Dis na bin rial tɛst fɔ Erɔn ɛn in famili! Yu de sho se yu oli bay we yu nɔ de gɛt ɛnitin fɔ du wit pɔsin na yu famili ɔ ɔda pɔsin we dɛn dɔn disfɛloship?—Rid Fɔs Lɛta Fɔ Kɔrint 5:11.

6, 7. (a) We wi want fɔ disayd if wi fɔ tek pat ɔ wi nɔ fɔ tek pat pan mared we dɛn de du na chɔch, us impɔtant tin dɛn wi fɔ tink bɔt? (Luk di futnot.) (b) Aw wi go ɛksplen to wi fambul dɛn we nɔto Witnɛs, wetin mek wi nɔ de tek pat pan mared we dɛn de du na chɔch?

⁶ Na tru se wi nɔ go gɛt di kayn tɛst we Erɔn ɛn in famili bin gɛt. Bɔt wetin wi go du if wi fambul we nɔto Jiova Witnɛs invayt wi fɔ go in mared ɛn tek pat pan in mared insay chɔch? No lɔ nɔ de na di Baybul we de tɛl wi klia wan se wi nɔ fɔ go. Bɔt sɔm advays dɛn de na di Baybul we go ɛp wi fɔ disayd wetin fɔ du. *

⁷ We wi fambul dɛn we nɔto Jiova Witnɛs kin si se wi dɔn mekɔp wi maynd fɔ bi oli ɛn nɔ de put an pan di tin dɛn we wi jɔs dɔn tɔk bɔt, dɛn kin sɔprayz. (1 Pit. 4:3, 4) Wi fɔ tray lɛ wi nɔ mek dɛn vɛks, so i go fayn fɔ mek wi tɔk to dɛn fayn we wi de tɛl dɛn di tru. I go fayn lɛ wi du dis bifo tɛm, lɛ wi nɔ wet te di tɛm nia. Wi fɔ tɛl dɛn tɛnki ɛn tɛl dɛn se wi gladi we dɛn want mek wi tek pat pan dɛn mared. Dɔn wi kin tɛl dɛn se wi go want lɛ dɛn gladi da spɛshal de de, ɛn wi nɔ go want mek dɛn ɛn di pipul dɛn we dɛn invayt, fil bad we wi nɔ tek pat pan di tin dɛn we dɛn go du na di chɔch. Dis na wan we we wi go sho se wi nɔ de alaw ɔda pipul dɛn fɔ mek wi du sɔntin we wi nɔ biliv.

8. Aw di Baybul buk we nem Lɛvitikɔs ɛp wi fɔ no se na Jiova gɛt di rayt fɔ rul?

⁸ Di Baybul buk we nem Lɛvitikɔs ɛp wi fɔ no se na Jiova gɛt di rayt fɔ rul. Insay Lɛvitikɔs, i pas 30 tɛm we dɛn tɔk se na Jiova gi di lɔ dɛn we de insay de. Mozis bin no dis ɛn i bin de du wetin Jiova tɛl am fɔ du. (Lɛv. 8:4, 5) Semweso, wisɛf fɔ du wetin Jiova want lɛ wi du ɔltɛm. Ɛn Jiova in ɔganayzeshɔn de ɛp wi fɔ du dis. Bɔt Setan kin tray fɔ tɛst wi we wi wangren de, jɔs lɛk aw i bin tɛmpt Jizɔs we in wangren bin de na di ɛmti land we pɔsin nɔ go ebul liv. (Lyuk 4:1-13) If wi de sho ɔltɛm se na Gɔd gɛt di rayt fɔ  rul ɛn wi abop pan am, nɔbɔdi nɔ go mek wi fred ɛn du wetin Gɔd nɔ want.—Prɔv. 29:25.

9. Wetin mek dɛn et Gɔd in pipul dɛn ɔlsay na di wɔl?

⁹ Bikɔs wi de falamakata Krays ɛn wi na Jiova in Witnɛs dɛn, pipul dɛn de mek wi sɔfa ɔlsay na di wɔl. Dis nɔ fɔ mek wi sɔprayz, bikɔs Jizɔs bin tɛl in disaypul dɛn se: “Pipul dɛn go mek una sɔfa ɛn dɛn go kil una, ɛn pipul dɛn na ɔl di neshɔn dɛn go et una fɔseka mi nem.” (Mat. 24:9) Pan ɔl we pipul dɛn et wi, wi stil de prich bɔt di Kiŋdɔm, ɛn wi de kɔntinyu fɔ bi pipul dɛn we oli na Jiova in yay. Ɛn pan ɔl we wi na pipul dɛn we de du tin di rayt we, wi klin, ɛn wi de obe gɔvmɛnt lɔ, dɛn stil et wi, wetin du? (Rom 13:1-7) Na bikɔs wi de obe Jiova ɛn de sho se na in gɛt di rayt fɔ rul wi! “Na in nɔmɔ” wi de wɔship ɛn wi nɔ go ɛva alaw ɛnibɔdi ɔ ɛnitin fɔ mek wi pwɛl Gɔd in lɔ.—Mat. 4:10.

10. Wetin apin wan tɛm we wan brɔda put in an pan wɔ?

¹⁰ Wan ɔda tin bak we mek pipul dɛn et wi, na bikɔs wi “nɔ de du wetin di wɔl de du.” Dat min se wi nɔ de miks pan pɔlitiks ɛn wi nɔ de put an pan wɔ. (Rid Jɔn 15:18-21; Ayzaya 2:4.) Sɔm Kristian dɛn we dɔn gi dɛn layf to Gɔd dɔn put an pan wɔ ɛn pɔlitiks. Bɔku pan dɛn dɔn ripɛnt ɛn dɛn dɔn mek dɛn padi biznɛs tayt bak wit wi Papa we de na ɛvin we de sɔri fɔ wi. (Sam 51:17) Bɔt sɔm dɛn de we nɔ gri fɔ ripɛnt. Fɔ ɛgzampul, insay Wɔl Wɔ Tu, sɔm bigman dɛn tek 160 brɔda dɛn we nɔ bin dɔn rich 45 ia yet, na di difrɛn difrɛn prizin dɛn we de na Ɔŋgari, ɛn dɛn briŋ dɛn kam na wan tɔŋ, usay dɛn tɛl dɛn se dɛn ɔl fɔ jɔyn soja. Dɛn brɔda ya bin fetful; dɛn nɔ bin gri fɔ jɔyn soja, bɔt nayn pan dɛn bin jɔyn ɛn dɛn tek di yunifɔm. Afta tu ia, dɛn bin aks wan pan di brɔda dɛn we bin jɔyn soja, fɔ go kil sɔm Witnɛs dɛn. In yon bɛlɛ-bɔn brɔda sɛf bin de pan di Witnɛs dɛn! Bɔt i kam bi se dɛn nɔ bin gɛt fɔ kil di Witnɛs dɛn igen.

11, 12. Di we aw Jiova bin mek di Izrɛlayt dɛn de mek sakrifays to am trade, us minin dat gɛt fɔ wi tide?

¹¹ Di Lɔ we Jiova bin gi Mozis bin tɛl di Izrɛlayt dɛn fɔ mek difrɛn difrɛn sakrifays dɛn to Jiova. (Lɛv. 9:1-4, 15-21) Di sakrifays dɛn nɔ fɔ gɛt wan bɔt bikɔs dɛn bin de sho di kayn pafɛkt sakrifays we Jizɔs bin gɛt fɔ kam mek. Apat frɔm dat, difrɛn tin dɛn bin de we dɛn fɔ du we dɛn de mek di sakrifays. Fɔ ɛgzampul, we uman bɔn pikin, Lɛvitikɔs 12:6 se: “We i dɔn fɔ klin insɛf fɔ di bɔy pikin ɔ gyal pikin we i bɔn, i fɔ briŋ wan yɔŋ man ship we ol lɛk wan ia, fɔ mek sakrifays we dɛn de bɔn, ɛn i fɔ kam wit wan yɔŋ pijin ɔ wan tɔtuldɔv to di prist fɔ mek sin sakrifays. I fɔ briŋ am to di prist bifo di tɛnt usay dɛn kin go fɔ no wetin Gɔd se.” Gɔd bin tɛl di Izrɛlayt dɛn wetin fɔ du, bɔt i nɔ bin se pawpa na dat ɔlman fɔ du. If di mama nɔ ebul fɔ bay ship, Gɔd bin se i kin stil sakrifays tu tɔtuldɔv ɔ tu yɔŋ pijin. (Lɛv. 12:8) Pan ɔl we di uman po, Gɔd bin stil lɛk ɛn valyu am jɔs lɛk aw i bin lɛk ɛn valyu di wan dɛn we de sakrifays dia dia tin dɛn to am. Us lɛsin wi kin lan frɔm dis?

¹² Di apɔsul Pɔl bin ɛnkɔrej in kɔmpin Kristian dɛn fɔ “mek sakrifays fɔ prez Gɔd.” (Ibru 13:15) Wi fɔ yuz wi mɔt fɔ tɔk bɔt Jiova in oli nem. Wi mumu brɔda ɛn sista dɛn kin yuz sayn langwej fɔ prez Gɔd. Wi brɔda dɛn we sik ɔ we nɔ kin  ebul fɔ kɔmɔt na dɛn os, kin stil prez Jiova. Dɛn kin rayt lɛta, yuz dɛn fon fɔ prich, ɛn prich to di wan dɛn we kin kam wok fɔ dɛn ɛn di wan dɛn we kin kam fɛn dɛn. Di kayn wɛlbɔdi we wi gɛt na in go sho ɔmɔs tɛm wi go yuz fɔ prez Jiova, tɔk bɔt in nem, ɛn prich di gud nyus. Bɔt wan tin we wi fɔ mɛmba na dat, wi fɔ du wi bɛst.—Rom 12:1; 2 Tim. 2:15.

13. Wetin mek wi fɔ gi wi fil savis ripɔt?

¹³ Wi de prez Gɔd bikɔs wi lɛk am, nɔto bikɔs dɛn de fos wi. (Mat. 22:37, 38) Bɔt stil, dɛn kin tɛl wi fɔ gi wi fil savis ripɔt. So aw wi fil we dɛn se wi fɔ gi wi fil savis ripɔt ɛni mɔnt? Di fil savis ripɔt we wi de gi gɛt sɔntin fɔ du wit wi wɔship. (2 Pit. 1:7) Stil, pɔsin nɔ fɔ fil se i fɔ spɛn bɔku bɔku tɛm de prich jɔs fɔ lɛ i ebul gi bɔku bɔku awa. Na dis mek brɔda ɛn sista dɛn we de na say we dɛn de kia fɔ dɛn ol pipul dɛn ɔ we nɔ gɛt wɛlbɔdi kin ivin prich fɔ jɔs 15 minit. Jiova kin gladi fɔ dɛn minit ya, ɛn i kin si am as di bɛst tin we dis wi brɔda ɔ sista ya go ebul fɔ du fɔ sho se i lɛk am. Dis de sho bak se dis brɔda ɔ sista gladi fɔ di spɛshal wok we i gɛt fɔ bi Jiova Witnɛs. Jiova bin alaw sɔm Izrɛlayt dɛn we nɔ bin ebul fɔ sakrifays dia dia tin dɛn, fɔ sakrifays ɔda tin dɛn to am. Semweso, Jiova de alaw in savant dɛn we nɔ ebul fɔ prich bɛtɛ fɔ stil ripɔt wetin dɛn ebul fɔ du. Di ripɔt dɛn we wi de gi na in dɛn kin jɔyn wit di ɔda ripɔt dɛn we wi brɔda dɛn de gi na di wɔl, ɛn na dis de ɛp di ɔganayzeshɔn fɔ plan wetin fɔ du fɔ mek di prichin wok go bifo. So, naw, yu tink se dɛn de aks wi fɔ du wetin wi nɔ ebul fɔ du we dɛn de tɛl wi fɔ gi wi fil savis ripɔt?

14. Ɛksplen wetin mek wi fɔ de tink gud wan bɔt di we aw wi de stɔdi Gɔd in Wɔd.

¹⁴ Afta wi dɔn stɔdi sɔm impɔtant tin dɛn we de insay di Baybul buk we na Lɛvitikɔs, sɔntɛm yu go de tink se, ‘A dɔn ɔndastand gud wan naw wetin mek dɛn put dis buk insay Gɔd in Wɔd.’ (2 Tim. 3:16) Yu go dɔn mekɔp yu maynd fɔ sho se yu oli. Yu nɔ du am jɔs bikɔs Jiova se wi fɔ oli, bɔt yu du am bikɔs Jiova gɛt di rayt fɔ tɛl yu wetin fɔ du. Sɔntɛm wetin yu dɔn lan na Lɛvitikɔs insay dɛn tu atikul ya go dɔn mek yu want fɔ lan mɔ bɔt ɔda Baybul buk dɛn. (Rid Prɔvabs 2:1-5.) Pre ɛn tink gud wan bɔt aw yu kin stɔdi. Yu go mɔs want lɛ Jiova gladi fɔ di prez we yu de prez am. So i go fayn lɛ yu aks yusɛf dis kwɛstyɔn, A kin alaw tɛlivishɔn program, vidio gem, spɔt, ɔ tin dɛn we a lɛk, fɔ ambɔg mi lɛ a nɔ go bifo pan Gɔd biznɛs? If na so i bi, i go fayn lɛ yu de tink bɔt wetin di apɔsul Pɔl bin se insay di Baybul buk we dɛn kɔl Di Ibru Pipul Dɛn.

15, 16. Wetin mek Pɔl nɔ bin fred fɔ tɛl di Ibru Kristian dɛn di tru?

¹⁵ We Pɔl bin de rayt to di Ibru Kristian dɛn, i bin tɛl dɛn di tru. (Rid Di Ibru Pipul Dɛn 5:7, 11-14.) I nɔ bin bɛn bɛn di tɔk atɔl! I bin tɛl dɛn se dɛn “nɔ de yɛri fa igen,” we min se dɛn slo fɔ ɔndastand.  Wetin mek Pɔl bin tɛl dɛn so? Na bikɔs i bin lɛk dɛn ɛn bisin bɔt dɛn jɔs lɛk aw Jiova bin lɛk ɛn bisin bɔt dɛn. Dɛn Kristian ya bin jɔs no di simpul simpul tin dɛn na di Baybul we jɔs tan lɛk milk, ɛn dɛn nɔ bin de tray fɔ lan di dip tin dɛn na di Baybul. Na tru se, wi fɔ no di simpul simpul tin dɛn na di Baybul, bɔt wi nid fɔ no bak bɔt di dip tin dɛn, we tan lɛk “tin we big pɔsin fɔ it.” Dis go ɛp wi fɔ bi machɔ Kristian dɛn.

¹⁶ Di Ibru Kristian dɛn bin nid pɔsin fɔ tich dɛn, pan ɔl we na dɛn fɔ de tich ɔda pipul dɛn. Dis na bikɔs dɛn nɔ bin de “it tin we big pɔsin fɔ it.” So lɛ wi aks wisɛf dɛn kwɛstyɔn ya: ‘A lɛk di dip tin dɛn na di Baybul? A kin tray fɔ no dɛn? A kin pre ɛn stɔdi di dip tin dɛn na di Baybul? If di ansa na nɔ, fɔ se na di we aw a de stɔdi gɛt di prɔblɛm?’ Wi wok nɔto fɔ jɔs prich to pipul dɛn, bɔt wi fɔ tich dɛn ɛn mek dɛn bi Jizɔs in disaypul.—Mat. 28:19, 20.

17, 18. (a) Wetin mek wi fɔ stɔdi di dip tin dɛn na di Baybul ɔltɛm? (b) I fayn fɔ drink rɔm bifo wi go mitin?

¹⁷ I nɔ kin izi fɔ lɛ bɔku pan wi stɔdi di Baybul. Na tru se Jiova nɔ de fos wi fɔ stɔdi di Baybul. Bɔt ilɛksɛf i dɔn te we wi baptayz ɔ i nɔ tu te yet, wi fɔ kɔntinyu fɔ stɔdi di dip tin dɛn na Gɔd in Wɔd. Dis rili impɔtant if wi want fɔ bi pipul dɛn we oli.

¹⁸ If wi want fɔ bi oli, wi fɔ tek tɛm fɔ rid di Baybul fayn fayn wan, ɛn du ɔl wetin Gɔd se. Tink bɔt wetin bin apin to Erɔn in tu bɔy pikin dɛn, Nedab ɛn Abayu. Jiova bin kil dɛn bikɔs dɛn “gi faya we Jiova nɔ sɛn dɛn fɔ gi.” Sɔntɛm dɛn bin du dis bikɔs dɛn bin dɔn drink rɔm. (Lɛv. 10:1, 2) Lɛ wi si wetin Gɔd bin tɛl Erɔn insay di Baybul. (Rid Lɛvitikɔs 10:8-11.) Fɔ se dis skripchɔ min se wi nɔ fɔ drink ɛnitin we gɛt rɔm bifo wi go mitin? Tink bɔt dɛn tin ya: Wi nɔ de ɔnda di Lɔ igen. (Rom 10:4) Insay sɔm kɔntri dɛn, wi brɔda dɛn kin drink smɔl rɔm we dɛn de it bifo dɛn go mitin. Dɔn Jizɔs ɛn in apɔsul dɛn bin yuz 4 kɔp wayn pan di Pasova. Ɛn we Jizɔs bin de bigin di Ivintɛm It fɔ mɛmba in day, i bin mek in apɔsul dɛn drink wayn we bin min in blɔd. (Mat. 26:27) Di Baybul se i bad fɔ drink pasmak ɛn i bad fɔ drɔnk. (1 Kɔr. 6:10; 1 Tim. 3:8) Bɔku Kristian dɛn kɔnshɛns nɔ kin alaw dɛn fɔ drink ɛnitin we gɛt rɔm bifo dɛn go wɔship Jiova. Bɔt ɔl kɔntri nɔ bi di sem. Di tin we impɔtant na dat Kristian dɛn fɔ ebul fɔ no “tin we oli ɛn tin we nɔ oli” so dat dɛn go ebul fɔ bi oli pipul dɛn ɛn mek Gɔd gladi.

19. (a) Wetin wi fɔ yuz we wi de du wi famili wɔship ɛn we wi de stɔdi wi wan? (b) Wetin yu dɔn mekɔp yu maynd fɔ du fɔ sho se yu oli?

¹⁹ Wi go si bɔku fayn fayn advays dɛn na Gɔd in Wɔd if wi tek tɛm fɔ luk fɔ dɛn. Yuz di difrɛn difrɛn buk dɛn, magazin dɛn, ɛn ɔda tin dɛn we di ɔganayzeshɔn de mek so dat yu famili wɔship ɛn di stɔdi we yu de stɔdi yu wan go go bifo. Lan mɔ bɔt Jiova ɛn di tin dɛn we i want so dat yu go kam nia am mɔ ɛn mɔ. (Jems 4:8) Pre to Gɔd lɛk aw wan pan di man dɛn we rayt di Sam buk bin du. I bin se: “Opin mi yay so dat a go si di wɔndaful tin dɛn we de na yu lɔ klia wan.” (Sam 119:18) Nɔ ɛva lɛf fɔ fala di advays dɛn we de na di Baybul. Du wetin Jiova, “di Oli Wan,” se wit ɔl yu at ɛn du “di oli wok” wit zil. Dis oli wok “na fɔ prich di gud nyus bɔt Gɔd.” (1 Pit. 1:15; Rom 15:16) Na naw wi fɔ sho se wi oli bikɔs wi de liv na di tɛm we di wɔl de kam dɔn. Lɛ wi ɔl kɔntinyu fɔ bi pipul dɛn we oli ɛn sho se na Jiova, wi oli Gɔd, gɛt di rayt fɔ rul.