1, 2. (a) Te o hiŋ pɛ a kaa okɔɔ, yɛɛ yeemaŋ yɛ wanaa Mɛlɛkaa o ba? (b) Nyunala kuɛɛ buŋgɛi hei cho yɛ muli?

MI CHƐHOWA dimul kiilanɔɔ Pitɛ le mbo tuu nyɛ yau Lɛfitikɔɔ wo kindila a diondɔɔ okɔɔ wo, a waa o diandaa o kaa naa leKilisiɔŋndo niŋ. (Nuawɔ Pitɛ Tasoo 1:14-16.) Mɛlɛka Diandaa, Chɛhowa, yeema Kilisiɔŋaa pɔyaŋnda a “saa cheleŋnda” le ma kindiŋ o nɛi o nɛi niŋ le waa a diandaa o kaa o kaa niŋ. O cho ko o kaala ndalaŋ la tiŋ niŋ te!—Chɔŋ 10:16.

² Chɔɔloo yaasiaa a sɔɔŋ kɛndɛŋ Mɛlɛkaŋ cho o yau Lɛfitikɔɔ wo niŋndo cho bɔɔ suɛi tɔnɔ bɛndu. Nduyɛ te ŋ tosa pɛ nyɛ naŋ pɛɛku o yau koŋ niŋndo, o mala naa le miŋ wa a diandaa o kaa o kaa niŋ. Ŋ cho nyunalaŋ ndaŋ yaasiaa, Vɛɛ naŋ nɔ yɛ miŋ che nyɛ bɛnda le wo chɛlɔɔ? Vɛɛ yau Lɛfitikɔɔ wo pɛɛku yɛ naa a kpuluŋgumayɛi Chɛhowɛi saa kpiŋ okɔɔ? Yɛɛ salala soliaa laŋ la pɛɛku yɛ naa?

3, 4. (a) Le yɛɛ Kilisiɔŋnda nɔ yɛ ma chɛl sawala cho o Baabuiyo niŋndaŋ? (b) Le yɛɛ ŋ nɔ miŋ miŋgi maa, ɔɔ miŋ kɛsiŋ isɔɔ o kɔl te?

³ Te ŋ yeema pɛ miŋ nɛŋi Chɛhowa kɔl, ŋ nɔ kuee miŋ saa sawala ndɔlaŋ kpiŋ. Ŋ chɛl kposoŋ kaa o kaa nɔɔliaa laŋ ndo le. Mi che bɛɛ ŋ cho o Sawa Muusioo bɛŋgu le, kɛ nyɛm wa o  Sawa koŋ niŋndoŋ ke naa taasioo le sinaa nyɛ Mɛlɛka chɛllo, a nyɛ o kɛɛ wo. Le tamaseliiyo, mi Mɛlɛka dimul Isɔluɛiya aa, “La nɔ mi la miŋgulaŋ lamaa le, ɔɔ mila biinaŋ o lakɔl te. Nduyɛ la nɔ mi la kaala chaaŋaa nyaa waŋnda chieeya mɛɛ nya kaala nyapila yɛ. Ya cho Chɛhowa ni.”—Lɛf. 19:18, NW.

⁴ Chɛhowa yeema miŋ miŋgi maa le, nduyɛ o yeema naa miŋ kɛsiŋ isɔɔ o kɔl te. (Luom. 12:19) Te o wa pɛ miŋ kɛɛ sawala Mɛlɛkalaŋ, mi Nyina Wɔɔŋndo naŋ kɔllo tau. Nduyɛ hei huŋ a tɔɔ wɔɔŋndo Chɛhowa choo. O yɔŋ bɛɛ mi waŋndo tosal naa suɛi wɔɔŋnde a siɛlɛi fuu, ŋ chɛlnuŋ mi hɔɔnei chal o kpɛɛnɛi niŋ te. Mɛlɛka ke naa dioo le miŋ wa “kpɛɛnɛŋ puuloŋ” ŋ nɔ yooŋgu kɛndɔɔ leniŋ ndoŋ. (Kɔl. Diiŋ Ndɔɔ 4:1, 7) Suɛi yɔŋul waŋndo ve biyɔɔ o kɔl nɔ mi i wa o kpɛɛnɛŋ muŋ niŋ te!

5. Yɛɛ naŋ pɛɛku yɛ o tamasi Elɔŋndo a kona dɔunuŋ a piɔm puaa nduaa okɔɔ wo? (Tofa fotueiyo o peele naŋ kandu leŋ choo.)

⁵ Tamasi kɔl tambɛi kuɛɛ cho yɛ a yuŋgu Elɔŋndo okɔɔ o Lɛfitikɔɔ 10:1-11 niŋ? Kɛlɛŋgaa kɔllo ndoo tambu nda bɔɔ mɛɛ yiŋndeŋ le fula o choo choo niŋ mi le luam puaa Elɔŋnda, Nedaabi nda Abaiyu chilikɔ. Nuawɔ se tɔɔndaŋ bɛndu Elɔŋ nda yuŋgu ndɔɔ sɔla le laalaŋ ndaa, maa a chaŋ wanaa sɔla haa piɔmndo wa le! A cho pa chɔmndo maa a cho o diandaa le kiɔɔ chaŋyɛi tosaa a wana cho o yuŋgu numndo niŋ mbo sɔla solioo o kunda leKilisiɔŋndo niŋndo?—Nuawɔ Kɔliŋtiaŋ Tasoo 5:11.

6, 7. (a) Te ŋ wa pɛ kɛɛsiaa tosaa le kɔlaŋ o bɔŋaŋ nɔ kɛsiaa o kaŋnde cheleŋ, sɔɔŋ sɔvɛ kuɛɛ naŋ nɔ yɛ miŋ yaasiaa? (Tofa tɛɛsiaa lebɛŋgu) (b) Vɛɛ naŋ tɛɛsiaa yɛ laalaŋ naa o wanayɛi nɛi cho Chɛhowɛinɔ le wo a bɔŋaŋ nɔ kɛsiaa okɔɔ o kaŋnde cheleŋ?

⁶ Kɛlɛŋgaa tɔɔndaŋ naa fuuluu maa o komal Elɔŋ nda yuŋgu ndɔɔ wo le. Kɛ te o wa yɛ mi wana cho Chɛhowɛinɔ le wo veelu naa le balaŋ lueiyo o bɔŋaŋ nɔ kɛsiaa o kaŋnde cheleŋ? Ŋ nɔ bolle Baabui kuuna naa kɔlaŋndo le. Kɛ Baabuiyo nɔ pa sawala cheleŋ la mala naa miŋ tosa kɛɛsiaa sɔviɔɔ laŋ? *

⁷ Mi kɔndɔfillo bii wanayɛi nɛi cho Chɛhowɛinɔ le wo, te ŋ chɔm pɛ kɔl sikpaa le loo a diandaa Chɛhowa o hɔl o bɔŋaŋ nɔ kɛsiaa naŋ soo hoo a ndu okɔɔ wo. (Pitɛ Tasoo 4:3, 4) A tonya, o bɛnda miŋ tuulu nda kɔllo le. Kɛ ŋ dimul nda tonyaa a lebɛɛ. Kɛlɛŋgaa ŋ tosa keŋ tuupa mi paale leŋ le fuuluu. Ŋ yil nda balikaa le mɛɛ nda veelu naa o bɔŋaŋ nɔ kɛsiaa yɛ. Kɛ ŋ dimul nda maa le mɛɛ sɔɔŋ lekaaŋndoŋ cho leniŋ yɛ, te ŋ wou pɛ balaŋ leniŋ, ŋ cho paale ndale nyaale leŋ tɛɛmbuu, nduyɛ miŋ tuisi nda siɔmbulaŋ, a wanaa nda veelu wa. Nɛiyo opilɛ cho hoo ni le kiɔɔ nyɛ naŋ laalaŋndo tɛɛmbuu wo.

8. Vɛɛ yau Lɛfitikɔɔ wo yaandiaa yɛ kpuluŋgu- mayɛi Chɛhowɛi?

⁸ Yau Lɛfitikɔɔ wo yaandiaa kpuluŋgu-mayɛi Chɛhowɛi. Sawala cho o yau Lɛfitikɔɔ wo niŋndaŋ la hiou le 30. La chɔm maa Chɛhowa yɔŋgu laŋ ni. Muuse ndoo sina hei. Nduyɛ, mbo tosa nyɛ Chɛhowa dimul ndu wo. (Lɛf. 8:4, 5, NW) Lelaŋ, ŋ nɔ miŋ tosa lɔɔlɔɔ nyɛ Chɛhowa yeema naa miŋ tosa wo. Kɔɔna Mɛlɛkaa cho naa malaa le hei tosaa. Kɛ te ŋ wa pɛ doolɛ, miŋ sɔla tɔɔndaŋndo lepum o laalaŋ naa niŋ, mɛɛ Chiisu bɛɛ sɔla tɔɔndaŋndo teleŋ o wa o yondo saafoo niŋndo yɛ. (Luku 4:1-13) Kɛ te o wa pɛ miŋ kɛsiŋ o kɔl maa Mɛlɛka kpou kpou wo cho, nduyɛ miŋ tiindaŋ ndu, wana o wana nɔla mbo nyindu naa le chɛlɔɔ nyɛ Mɛlɛka kɛɛ wo le. Nduyɛ siooŋii idiɔmnde luei naa o leyaŋɔɔ niŋ te.—Tal. 29:25, NW.

9. Le yɛɛ kaalaŋ kpou la tul lɛ wanaa Mɛlɛkaa leyɛ?

⁹ Maa buɛiya le Chiisu, a Seiya le  Chɛhowa, ŋ cho o kotaa bɛŋgu o lɛŋii balu chieeŋndo ve niŋ. Hei nɔ mi i komal naa. Mi Chiisu dimul buɛiyaa nduaa aa, “A boondii keŋ, a bii niŋ nya ma tusi nya nyɛ palaa choo ma dii nya. A cho nya yɛleŋ tul ba o ba fee le mɛɛ nya laalaŋ a ya yɛ.” (Mat. 24:9) Kɛ, a yɛle tulaa leŋ ndeŋ fau, ŋ cho biuwɔŋndo le yooŋgu kɛndɛ leMasa Mɛlɛkaa dimioo, nduyɛ miŋ wa hiouwɔɔ lachi a waa a diandaa Chɛhowa o hɔl. Mi che bɛɛ naa ŋ cho wanaa tonya, ŋ dendu o kaa niŋ, nduyɛ ŋ cho wanaa biyaa sawa, kɛ le yɛɛ waŋnda tul lɛ naa leyɛ? (Luom. 13:1-7) Kanifuule, ŋ chua Chɛhowa maa Masanɔ naa Kpou Kpou wo! “Ndu pilɛ kpe” naŋ cho piɛiyo ni. Nduyɛ ŋ chɛl miŋ tɛɛmbuu sawala ndɔla diandaalaŋ te.—Mat. 4:10.

10. Yɛɛ yɔŋnuŋ yɛ teleŋ pum mɛɛ puaapilɛnɔɔ chɛl le waa le chieeŋndo?

¹⁰ Ŋ “cho lɛ le chieeŋndo le.” Lelaŋ, ŋ choŋnuŋ yuŋyeŋ a niilu lemasa chieeŋndo hoo, vɛlɛ a chɔula ndɔlaŋ. (Nuawɔ Aisaiya 2:4, NW; Chɔŋ 15:18-21.) Mi wanaa yɔŋguŋ o Mɛlɛka lo wa apum chɛl le waa kpeŋgii chieeŋndo. Kɛ apum siaama o nda tɛɛŋ, ma siŋgaŋ, nduyɛ ma miiŋgu vɛlɛ chaŋyɛi tueiyɔɔ yeela a Finya naa inyɛiyo o choo choo niŋ. (Chon. 51:17, NW) Kɛ mi apum kɛɛ le siŋgaŋndo. Le tamaseliiyo, teleŋ chɔu chieeŋ diiŋ ndɔɔ, mi masaa waa sooluu chaaŋaa naa laalaŋnda 160 o chiɛila manyumndaŋ niŋ o lɛŋnde Hɔŋgali leŋ niŋ, a ndaa fuuluu wɔ wɔsioŋ 45 le wa, ma dii nda naapilɛ o chioo pum niŋ. Loŋ nda dimul nda ni le ma simnuŋ puaa chɔuwa. Mi chaaŋaa naa laalaŋaa kaŋ nɔ kɔl sikpaa le hei kiɔɔ. Kɛ mi a ŋɔmahiɔɔlu nda tɛɛŋ chua buŋgaŋ le simnɔŋndo puaa chɔuwa, nduyɛ ma wounuŋ domala chɔulaŋ. Mɛɛ wɔsioŋ hiou ŋmuuŋ, opilɛ simnuŋ puaa chɔuwaa nda hɛli wa tɛɛŋ le Seiyaa Chɛhowaa lo o laalaŋndo choo wa diuwo. Puaapilɛnɔ nda fula kala pilɔɔ wo wa nda tɛɛŋ! Kɛ mi sɔɔŋ siŋgaŋ, a diu lɛ nda le.

11, 12. Vɛɛ Chɛhowa ndoo che yɛ salala soliaalaŋ o Isɔluɛi niŋ sindɛ? Nduyɛ yɛɛ hoo sim yɛ le Kilisiɔŋnda hau?

¹¹ A mɛɛ Sawa Muusioo dimi yɛ, Isɔluɛiya ndaa nɔ ma yɔŋgu salalaŋ yɛyɛ. (Lɛf. 9:1-4, 15-21, NW) Sala laŋ laa nɔ mi la nɔ sɔŋ o sɔŋ te. Kanifuule, la chɔm sala soliaŋ walaŋ Chiisu Kiliti wo. Le handɔɔ lechoo, sala o sala ndaa yɔŋgu pɛ, a nɔ ma tosa nyɛ Mɛlɛka dimul nda wo. Le tamaseliiyo, tofawɔ nyɛ wana velu sɛnɛiyo ndoo nɔ mbo tosa wo. Lɛfitikɔɔ 12:6 (NW) dimi aa, “Te palɛi o nɔ le chumndo le dindioo sɔlaa ve i chuu pɛ, a yɔŋ bɛɛ aa wana pɔnɔɔ, kɛlɛŋgaa wana lanɔɔ komsa koŋ o velu ni, o nɔ mbo hiŋ a saa fɔŋndɔ chii wɔsioo opilɛ wo naa wanaa soliaa salaa cha, o tɛndii chɔm maa Chɛhowa Mɛlɛka cho a nya latulu wo sondoo, le sala luamaa solioo. Okoŋ kɔɔli, mbo hiŋ vɛlɛ a piiŋ fɔŋndɔɔ, ɔɔ kaŋgboo, le sala faŋa yɔŋ wɔɔŋndo wo solioo.” Sawala Mɛlɛkalaŋ la waŋnuŋ kpendekele. Kɛ mi ndoo chɔm kaalaa a sinalapɛŋgoo o sawala ndɔlaŋ niŋ. Te wana lanɔ koŋ ndoo tiuba le saa sɔla le, mi ndaa chɛl ndu mbo yɔŋgu kaŋgbuaa a ŋiɔɔŋ, ɔɔ piiŋaa fɔŋnduaa a ŋiɔɔŋ. (Lɛf. 12:8, NW) O wa bɛɛ mi wana ndoo wa ndu piɛiyo wo wa o tambɛi, kɛ mi ndoo chua nda nyɛpilɛ kpe a wana ndoo soli nyɛm baa kalaŋ sala wo. Yɛɛ naŋ pɛɛku yɛ o hei niŋ?

¹² Mi kiilanɔɔ Pɔɔl dimul chaaŋaa nduaa laalaŋnda maa a yɔŋgu sala saŋgalaa naa Mɛlɛka cha. (Hibu. 13:15) Ŋ nɔ miŋ soo kpendekele a diola walaŋnda Chɛhowalaŋ okɔɔ. Puaapiliaa a ndepiliaa tui le wa cho Mɛlɛka saŋgalaa o suɛi maŋgalɛi nda tuuliaa ve niŋ. Kilisiɔŋaa tiuba le fulaa o bɛɛ le wa cho Mɛlɛka saŋgalaa o yaulaŋ poonyiaa niŋ, o foŋndo choo, a yooŋgu kɛndɔɔ dimioo o wanaa cho nda mandaa  wa lo, a wanaa yilaa. Saŋgala naŋ cho Chɛhowa Mɛlɛka maa sala soliaa wo, miŋ wa waŋnda diola ndɔlaŋ chɔmndo wo, vɛlɛ a yooŋgu kɛndɛ naŋ cho dimioo wo, nɔ mbo chɛlaŋ a kɛndiaa naa, nduyɛ, a nyɛ naŋ tiuba le tosaa wo. O nɔ mbo wa o kɛndɛ kɛndɔɔ.—Luom. 12:1; Tim. Diiŋ Ndɔɔ 2:15.

13. Le yɛɛ naŋ nɔ yɛ miŋ dɔunuŋ kona wali naa pollo?

¹³ Saŋgala naŋ yɔŋgu o Mɛlɛka lo wo cho salala naŋ soli laŋ ni. Kanifuule, ŋ kaala ndu. (Mat. 22:37, 38) Kɛ a dimul naa maa naŋ dɔunuŋ kona wali naa pollo. Mɛɛ, kaa yɛɛ naŋ nɔ yɛ miŋ chɔm a kɛɛsiaa hoo okɔɔ? Kona naŋ duaunuŋ koŋ ipaŋgu o ipaŋgu wo chɔm maa ŋ cho le Mɛlɛka. (Pitɛ Diiŋ Ndɔɔ 1:7) Kɛ, wana o wana nɔ mbo pɛl lebol le havɛilaŋ (lɛɛlɛlaŋ) sɔlaa tau o wali pollo niŋ halikpeŋ mbo dɔunuŋ kona kɛndɔɔ le. Lelaŋ pɛŋ wana dimiaa yooŋgu kɛndɛ cho o mandaa niŋ o chiɛi chiɔwaa niŋndo, o tiuba le nyɛ tosa tau le wo, duaunuŋ kona wali pollo le chemchemndaŋ 15 o paŋgei niŋ ni. Chɛhowa naŋ kɔllo tau a kona o dɔunuŋ koŋndo. Kanifuule sala kɛndɛ kɛndɛ o tiuba le yɔŋgoo wo cho koŋ ni. Nduyɛ, hoo chɔm maa o kaala Chɛhowa, a dikeŋnaŋ wana tuu le wo, le waa waŋndo opilɛ o Seiyaa Nduaa tɛɛŋ. Mɛɛ Isɔluɛiya ndaa nɔ bahawɛila kuuna nda sala baa kalaa solioo yɛ, wanaa Chɛhowaa hau bɛɛ nɔ bahawɛilaŋ. Kɛ a koŋ kpou, ma dɔunuŋ kona wali pollo. Nduyɛ kona naŋ duaunuŋ hoo wo simnuŋ kona lelɛŋndo ni. Ndu mala kɔɔnaa ni mbo sina nyɛ o nɔ le tosaa le wali dimiaa yooŋgu kɛndɔɔ o chilaŋ niŋndo. Lelaŋ, baa dimullo nda cho naa ni maa mɛɛ miŋ pɛl bolleŋ o wali pollo niŋ le kona kɛndɔɔ dɔwɔŋndo?

14. Tɛɛsiaa wɔ le sabu o bɛnda miŋ yaasiaa mɛɛ naŋ pɛɛku yɛ.

¹⁴ Mɛɛ ŋ pɛɛku niŋ naa sɔɔŋ sɔviɔŋ muŋ o yau Lɛfitikɔɔ wo niŋ yɛ, ma dimi dɔɔ aa, ‘I sɔla niko sinalapɛŋgu kpeekpeiyo le sabu nda poonyiaa yau Lɛfitikɔɔ wo hoo o Diom Mɛlɛkaa niŋndo.’ (Tim. Diiŋ Ndɔɔ 3:16) Hei cho num mala ma nɔ yeemɛi tau le waa o diandaa, o cho le mɛɛ Chɛhowa yeema num le waa o diandaa yɛ le, kɛ o yeema mbo che sɛmbɛ ŋ cho dɔuwɔɔ le ndu kɔllo nɛŋioo wo. Kɛlɛŋgaa nyɛ ŋ pɛɛku o Lɛfitikɔɔ niŋ o buŋgaŋ muuŋ ndoŋ niŋndo chɔɔlu num yeemɛi ke le hiouwɔɔ lachi a yaasiaa o yaula cho o Baabuiyo niŋndaŋ kpou. (Nuawɔ Talelaŋ 2:1-5, NW.) Dɔu ndi o piɛileŋ niŋ ma sina mɛɛ ŋ pɛɛku yɛ. A yeema kɛsɛ mi Chɛhowa chɛl saŋgala ŋ yɔŋgu o ndu lo wo maa sala soliaa. Baa a cho pa chɛlɔɔ tilivisiɔŋndo nuaa, pisulta vidueelaŋ, bɔllo lɔɔ, teleŋndo tɛɛmboo o balta fondolaŋ choo, a la cheleŋndaŋ, le hiouwɔɔ lachi numndo kuunaa o Mɛlɛka piɛiyo niŋ? Te o yɔŋ pɛ aa lende icho ni, a sɔla tɔnɔɔ tau te a yiyaŋ pɛ yiŋgoloŋ o sɔɔŋ kiilanɔɔ Pɔɔl dimi woŋ ŋpum choo. Ŋ cho ŋ poonyiaa o yau Hibuluiya niŋ.

15, 16. Le yɛɛ Pɔɔl mɛi isɔɔ o booniŋ te teleŋ o poonyial Kilisiɔŋaa Hibuluiya wo?

¹⁵ Mi kiilanɔɔ Pɔɔl suaa pɛɛpɛɛ nyɛ o wa chaaŋaa nduaa Kilisiɔŋaa Hibuluiya dimullo wo. (Nuawɔ Hibuluiya 5:7, 11-14.) Kiilanɔɔ kuindi kuindi sɔɔŋ o wa dimioo  woŋ te! Mbo dimul nda maa a “kendu isɔɔ pɛɛku bɔɔ.” Le yɛɛ Pɔɔl soo yɛ lende sakpo sakpo? Kaalaa, vɛlɛ a buulaŋ Chɛhowa nɔ le Kilisiɔŋaa wa wɔ kaŋ wɛiyo wa o wa tolɔɔ kɔɔli ni. Sinaa sɔɔŋ sɔviɔŋ a Kilisiɔŋndeŋ okɔɔ cho bɔɔ nyɛ sɔvɛ. Kɛ nyɛdiaa sikpaa yeemaŋ ni le hiouwɔɔ lachi a kaasoŋyɛi sɔlaa o Kilisiɔŋndeŋ niŋ.

¹⁶ Hibuluiya ndaa nɔ niŋ ma tosa hiouwɔɔ lachioo le acheleŋnda pɛɛkoo. Kɛ wana cheleŋ ndoo yeemaŋ ndɔ le nda pɛɛkoo. Le yɛɛ? Kanifuule nyɛdiaa sikpaa nda kɛɛ ni. Nyunaŋndɔ aa, ‘I nɔ pa kaa kɛndɔɔ le nyɛdiaa sikpa iMɛlɛkayaa? I cho ndu pa dioo? Ɔɔ I kpakpala pa piɛileŋ a Baabuiyo pɛɛkoo? Te o wa lende pɛ, baa mɛɛ ya pɛɛku yɛ nɔ bahawɛiyo ni?’ O cho ko waŋnda yooŋgu kɛndɔɔ dimullo le, kɛ ŋ nɔ miŋ pɛɛku nda, nduyɛ miŋ siiŋguu nda buɛiyaa Chiisuaa.—Mat. 28:19, 20.

17, 18. (a) Le yɛɛ naŋ nɔ yɛ miŋ de lɔɔlɔɔ nyɛdiaa sikpa iMɛlɛkayaa? (b) Te o hiŋ pɛ o nɛi bɔŋaŋnda naala leKilisiɔŋndaŋ okɔɔ, vɛɛ naŋ nɔ yɛ miŋ tofa muɛiyaŋ?

¹⁷ Pɛɛku Baabuiyo cho suɛi kpɛdɛ le naa pumnda le. A tonya Chɛhowa beŋ wanaa nduaa le ma pɛɛku, okoŋ ma bii ndu tɔɔyaŋ te. O yɔŋ bɛɛ aa ŋ cho niŋ Chɛhowa piɛiyo le wɔsila bɔɔbɔɔ, ɔɔ ŋ laŋga kandu, ŋ nɔ miŋ hiou lachi a nyɛdiaa sikpaa dioo lɔɔlɔɔ. Hei cho suɛi sɔvɛ le tosaa te ŋ yeema pɛ miŋ wa wanaa diandaa.

¹⁸ Le waa a diandaa, mɛɛ miŋ yaasiaa Baabuiyo nyɛkɛndɛi, nduyɛ miŋ tosa nyɛ Mɛlɛka dimul naa wo. Yiyaŋndɔ a puaa Elɔŋnda, Nedaabi nda Abaiyu. Ma sɔla piɔmndo le nyɛm chuŋ kɛndɛ ndaa nɔ ma lom te woŋ. Kɛlɛŋgaa a wa o muɛiyaŋ niŋ. (Lɛf. 10:1, 2, NW) Tofawɔ nyɛ Mɛlɛka dimul Elɔŋndo. (Nuawɔ Lɛfitikɔɔ 10:8-11, NW.) Baa dimullo bolle Baabuileŋ ndeŋ le cho naa ni maa ŋ nɔ miŋ kol mamuɛi le te ŋ wa pɛ kɔlaŋ o bɔŋaŋnda naala leKilisiɔŋndaŋ? Yiyaŋndɔ a sɔɔŋ muŋ okɔɔ. Ŋ cho lɛ o Sawa koŋ bɛŋgu le. (Luom. 10:4) O lɛŋnde ipum niŋ, mi chaaŋaa naa laalaŋnda soliŋ muɛiyaŋ kpeku nyɛɛmbɔ te a wa pɛ nyɛdiaa dioo le kɔlaŋ o bɔŋaŋndaŋ. Taalalaŋ la hiɔɔlu ndaa soliŋ kpeku ni o bɔŋaŋ Hiou Ya Choo wo. Mɛɛ Chiisu wa bɔŋaŋ Loonuŋ yaa biyɔɔ a buɛiyaa nduaa, mbo dimul nda le ma kol muɛima sim le kooma nduaŋ ndo. (Mat. 26:27, NW) Baabuiyo kuuna kolɔɔ labɛɛlaa. (Kɔl. Diiŋ Ndɔɔ 6:10; Tim. Tasoo 3:8) Kilisiɔŋaa bɔɔbɔɔ mi kɔl iyama ndaa kuuna nda le muɛiyaŋ kolɔɔ tuupa ma tosa wali leKilisiɔŋ kɛ kɛ. Lelɛŋ o lelɛŋ nɔ naamula ndalaŋ, kɛ i kpeekpeiye cho ni, le mi Kilisiɔŋnda “chɔm yɛyiɔɔ nyɛ cho o diandaa wo tɛɛŋ, a nyɛ cho o diandaa le wo.” Le ma wa a diandaa a mɛɛ Mɛlɛka yeema yɛ.

19. (a) Te o hiŋ pɛ a pɛɛku leyuŋgoo, vɛlɛ a pɛɛkɔŋ ipilayaa, yɛɛ naŋ nɔ yɛ miŋ kɛsiŋ o kɔl? (b) Yɛɛ ŋ tuu yɛ le tosaa te o hiŋ pɛ a kɛsiŋndo numpila o diandaa?

¹⁹ Ŋ nɔla miŋ saaluŋ sɔɔŋ kɛndɛŋ yiŋgoloŋndoŋ a Mɛlɛka okɔɔ te ŋ yaasiaa pɛ o Diom Mɛlɛkaa niŋ. Soliŋ nyɛm naŋ nɔ le yaasiaa woŋ kpeku le tɔnɔɔ sɔlaa o Pɛɛku num leYuŋgoo niŋ, a o numpila tosa teleŋndaŋ lapum ndo. Chɔɔlu sina num lapɛŋgoo a Chɛhowa okɔɔ, vɛlɛ a sabula ndɔlaŋ. Naŋnuŋ ndu ikɛi teleŋ o teleŋ. (Chem 4:8) Piɛi o Mɛlɛka lo maa wana ŋchondu pilɛ o dimi aa, “Kumbi ya hɔltaŋ Mɛlɛka, le mi che kpendekele sɔɔŋ kɔndɔfiliŋ cho o sawa numndo niŋndo.” (Chon. 119:18, NW) Chɛl kposoŋ le sawala Baabuiyo tɛɛmbuu wo le. Chɛl sawa filioŋ Mɛlɛka Diandaa a kɔllo kpou. Nduyɛ, ma yɔŋguŋ a dialuŋ fulaa le “wali diandaa yooŋgu kɛndɛ Mɛlɛkaa tosaa.” (Pitɛ Tasoo 1:15 NW; Luom. 15:16) Kindiŋ ma wa o diandaa o palɛi mɛɛlɛi nyɛpalaa hoo niŋ. Maa naa kpou ŋ waŋnuŋ a diandaa o kaa niŋ, nduyɛ miŋ saa kpiŋ kpuluŋgumayɛi Mɛlɛka naa diandaa, Chɛhowa.