1, 2. (a) Yehova asaka vatu jenyi valingenga vyuma muka? (b) Chihande chino nachikumbulula vihula muka?

YEHOVA ahwiminyinyine kaposetolo Petulu asoneke mazu ajila aze atwama mumukanda waVyavaLevi akutulweza tupwenga vajila ngana muze valwezele vaIsalele. (Tangenu WaPetulu 1, 1:14-16.) Yehova uze apwa “Wajila” asaka vaze vawavisa “namikoko veka” vazate nangolo mangana vapwenga vajila mutwamiso yavo yosena, keshi nge mujijila jimwe kahako.—Yowa. 10:16.

² Muchihande chino natushimutwila havikota vyajishimbi jize jatwama mumukanda waVyavaLevi jize najitukafwa tupwenga vajila mutwamiso yetu. Kaha nawa nachikumbulula vihula vyakufwana nge: Mwomwo ika katwatela kumbila lufwelelo lwetuko? Mukanda waVyavaLevi watunangula vyuma muka kutalisa kukukundwiza wata waYehova? Vyuma muka natulinangula kuwana wakulisakila?

3, 4. (a) Mwomwo ika vaka-Kulishitu vatela kulihenda kuvyuma vize vinahase kuvalingisa vahone kwononoka kujishimbi navikota vyajishimbi jamuMbimbiliya? (b) Mwomwo ika katwatela kulinga sambanjinga chipwe kulamanga kokoko?

³ Hakusaka twalise Yehova twatela kwononoka jishimbi jamuMbimbiliya navikota vyajishimbi, katwatela kulinga vyuma vize navitulingisa tuhokole jishimbi jenyiko. Numba tuhu makumbi  ano katweshi muJishimbi jaMoseko, oloze jishimbi kana jatukafwa tutachikize vyuma vize Yehova asaka navize kasakako. Chakutalilaho, vaIsalele vavalwezele nge: “Kanda mukalitendako, kaha kanda mukalama koko navana vavatu vakwenuko. Zangenunga vakwenu nganomu mwalizangilenu vavene. Ami yami Yehova.”—Levi 19:18.

⁴ Yehova kasaka tulingenga sambanjinga chipwe kulaminanga vakwetu kokoko. (Loma 12:19) Nge natuhona kukavangiza jishimbi navikota vyajishimbi jaYehova, kaha Satana mwevwa kuwaha nakutulingisa tusaule lijina lyaYehova. Numba nge mukwetu natuvulumuna, katwatela kupihilila nakumulamina kokoko. Mbimbiliya yatulweza nge twapwa ‘tumilondo yauma’ muze mwatwama luheto. Luheto kana shina kwambulula mujimbu wamwaza. (Koli. 2, 4:1, 7) Katwatela kulamanga kokoko, mwomwo kulama koko chinafwane nge munahake ulembe mumulondo wenu wakunwina meya.

5. Vyuma muka natulinangula kumujimbu waAlone wakufwa chavana venyi? (Talenu muvwimbimbi wakulivanga.)

⁵ Hamukanda waVyavaLevi 10:1-11, hatwama vyuma vize vyalingishile tanga yaAlone yipwenga muukalu. Yehova atumine kakahya kuya nakujiha vana vaAlone Natave naAvihu hatavanaku. Kufumaho Kalunga alwezele Alone natanga yenyi kuhona kulishona kufwa chavaka-tanga yavo, kaha valingile vene ngocho. Echi chapwile cheseko chachinene. Kutala mweji kupwanga vajila hakuhona kulikata namuka-tanga yenu chipwe kausoko kenu uze vanafumisa muchikungulwilo tahi?—Tangenu Wavaka-Kolinde 1, 5:11.

6, 7. (a) Vishina muka twatela kukekesa nge tuli nakusaka kwazana muchiwanyino chakulimbata? (Talenu kwinyikila chamwishi.) (b) Vyuma muka twatela kulweza vausoko wetu vaze kavapwa Vinjihoko kutalisa kuchiwanyino chakulimbata chize chili muchachi?

⁶ Pamo kaveshi kuhasa kutweseka ngana muze chapwile kuli Alone natanga yenyiko. Nyi ngachilihi nge vanatusanyika kuya kuchiwanyino chakulimbata chakausoko ketu uze kapwa Chinjihoko, chize nachipwila kuchachi yavo? MuMbimbiliya kamwatwama lushimbi luze vakanyisa kuhona kuya kuchiwanyino kanako, oloze mwatwama jindongi jize najitukafwa kusakula kanawa vyakulinga. *

⁷ Muchima wetu wakusaka tupwenga vajila kuli Yehova muvyuma tunahanjika lyehi, unahase kulingisa vausoko wetu vaze kavapwa Vinjihoko vahone kutachikiza ovyo tunalingila ngocho. (Petu. 1, 4:3, 4) Katwatela kuvahukanyisako, oloze twatela kuhanjika navo mulikoji. Twatela kuvalweza chimweza shimbu kanda chilika kana. Twatela nawa kuvasakwilila hakutusanyika kuchilika chavo. Kufumaho tunahase kuvalweza ngwetu tuli nakusaka mukalivwise kuwaha chilika chenu, kaha nawa katweshi nakusaka kukamivwisa sonyi hakuhona kwazana muchilika chamu-kwitavako. Nge natulinga ngocho kana natulama vyuma twafwelela nakulama nawa lufwelelo lwetu.

8. Mukanda waVyavaLevi washindakanya ngachilihi wata waYehova?

⁸ Mukanda waVyavaLevi washindakanya hawata waYehova. Jishimbi jize jatwama mumukanda waVyavaLevi mapapa akuhambakana 30 jafuma kuli Yehova. Mose atachikijile ngwenyi jishimbi kana jinafumu kuli Yehova, ngachize akavangijilenga jishimbi kana. (Levi 8:4, 5) Ngana mwaMose, nayetu twatela kulinganga vyuma vize mwatulwezanga Mwata wetu Yehova. Numba tuhu liuka lyaYehova nalitukafwa, oloze lwola lumwe lufwelelo lwetu veji kulwesekanga nge tuli uka wetu ngana muze chapwile kuli Yesu omu apwile mupambo. (Luka 4:1-13) Nge natufwelela muli Yehova nakukundwiza wata wenyi, kaha naumwe  wauchi nahase kutulingisa tuhokole jishimbi jaYehova. Katwatela kwivwa womako.—Vishi. 29:25

9. Mwomwo ika vangamba jaKalunga vavahungila mukaye kosena?

⁹ Twatela kutachikiza ngwetu vangamba jaKalunga mukaye kosena vanahase kuvayanjisa mwomwo Yesu alwezele tumbaji twenyi ngwenyi: “Vatu navakamimwenesanga malwa nakumijihajiha, kaha namukapwanga muvatu vaze navakahunganga kuli vaka-mafuchi osena mwomwo yalijina lyami.” (Mateu 24:9) Numba nge navatuhunga, oloze natutwalaho lika kwambulula mujimbu nakupwa vajila mutwamiso yetu yosena. Hakuwana nge twapwa vakushishika, vatoma mutwamiso yetu, kaha nawa tweji kukavangizanga jishimbi jafulumende, kaha mwomwo ika veji kutuhungilanga? (Loma 13:1-7) Mwomwo tweji kwononokanga Yehova kupwa Mwata wetu. Tweji kumulemesanga “ikiye kaha,” ngachize katweshi kukahokola jishimbi navikota vyajishimbi jenyi jakwolokako.—Mateu 4:10.

10. Vyuma muka vyasolokele omu ndumbwetu umwe etavilile kwazana muvihande vyalifuchi nachiyulo?

¹⁰ Etu ‘katweshi tuvaka-kayeko.’ Ngachize, katwazana mujijita namuvihande vyalifuchi nachiyuloko. (Tangenu Yowano 15:18-21; Isaya 2:4.) Oloze Vinjiho vamwe vanazananga muvihande vyalifuchi nachiyulo. Kaha vavavulu vanapihililanga nakwalumuka nakukinduluka kuli Yehova. (Samu 51:17) Oloze vamwe vanahononga kupihilila nakwalumuka. Chakutalilaho, muJita yaKaye yamuchivali, vandumbwetu vavavulu vamulifuchi lyaHungary vavahakile mukamenga. Kaha vakulwane vafulumende vakungulwile vandumbwetu vakuheta ku 160 vamyaka yakusemuka kafwe 45 vaze vapwile mukamenga nakuvalweza vengile mulimo wauswalale. Vandumbwetu vavavulu vakanyine oloze vandumbwetu vakuheta ku 9 vetavililile mulimo kana nakutambula uvwalo wauswalale. Omu mwahichile myaka yivali, ndumbwetu umwe havandumbwetu vaze vetavilile mulimo wauswalale, vamulwezele ajihe vandumbwetu vaze vakanyine uswalale. Havandumbwetu vaze atelele kujiha hapwile nandumbwenyi wakusemuka nenyi mujimo limwe. Oloze vandumbwetu kana kavavajihileko.

11, 12. Vyuma muka natulinangula kuwana uze vahanyinenga vaIsalele?

¹¹ Kweseka naJishimbi jaMose, vaIsalele vatelelenga kuhana wana. (Levi 9:1-4, 15-21) Wana kana kawatelele kupwa nakatengako mwomwo wemanyinyineko wana waYesu wakukupuka mwosena. Kaha nawa vaIsalele vatelele kukavangiza jindongi hakala wana uze vapwile nakuhana. Mukanda waVyavaLevi 12:6 walumbununa vyuma vize chisemi wapwevo uze ali nakemba atela kulinga hakuhana wana. Mbimbiliya ngwayo: “Kahomu nawatamo makumbi akumutomesa, chipwe hali mwana walunga, chipwe hali mwana wapwevo, akanehe mwanamukoko wamwaka umwe kupwa wana wakulumba, namwanaliyembe, mokomoko katela, kupwa wana wahashili, kuchikolo chambalaka yakuliwanyina, kuli kapilishitu.” (Levi 12:6) Numba tuhu Yehova avahanyine jindongi kana, oloze Jishimbi jenyi jasolwele hatoma nge atwama namuchima wazangi kaha nawa wamuvwovu. Chakutalilaho, nge chisemi wapwevo keshi kuhasa kuhana mukokoko, kaha vamulwezele kuhana tutela vavali chipwe mayembe vavandende vavali. (Levi 12:8) Numba tuhu chisemi wapwevo apwile wakuhutwa, oloze Yehova amwene wana wenyi kupwa waulemu chochimwe navaze vahanyinenga wana wandando yayinene. Vyuma muka natulinangula kumujimbu kanou?

¹² Kaposetolo Paulu akolezezele vaka-Kulishitu vahanenga Kalunga “chimuna wakuvatula wakumwalisa.” (Hepe. 13:15) Tweji kuhananga chimuna wakuvatula wakumwalisa nge  natwambulila vatu vyalijina lyaYehova. Vandumbwetu vatuveveve veji kuzachisanga lilimi lyatuveveve hakwalisa Kalunga. Kaha vandumbwetu vaze vatwama mutuhela mwomwo yakuviza, veji kwalisanga Yehova hakuzachisa mikanda, jishinga, nakwambulila vaze naveza nakuvamenekela. Numba tuhu tweji kwalisanga Kalunga kweseka noho hakumina ngolo jetu, oloze twatela kumwalisanga lwola lwosena namuchima wetu wosena.—Loma 12:1; Chimo. 2, 2:15.

13. Mwomwo ika twatela kuhanyina milimo yetu yamuwande?

¹³ Kuzanga Yehova cheji kutulingisanga tumwalise namuchima wetu wosena. (Mateu 22:37, 38) Muchima muka tweji kusololanga nge vanatulweze tuhane milimo yetu twazatanga muwande? Twatela kulisuula kuhana milimo kana mwomwo echi nachisolola nge twononoka Yehova. (Petu. 2, 1:7) Chipwe ngocho, katwatela kushinganyeka ngwetu kuvanga tuzate jola jajivulu mumulimo wamuwande numba jino tuhane milimo yetu yamuwandeko. Nge muka-kwambulula keshi kuhasa kuzata chikuma mumulimo wamuwandeko mwomwo yaushinakaji chipwe misongo, kaha nahase kwambulula jiminyutu 15 mwomwo aha hakiko hakumina ngolo jenyi. Yehova mwamona jize jiminyutu 15 kupwa jajilemu. Yehova atachikiza nawa ngwenyi vandumbwetu vamuzanga, ngachize vasaka kupwa Vinjiho jenyi. Ngana muze vaIsalele vahanyinenga wana kuli Kalunga numba tuhu vapwile vakuhutwa, namakumbi ano vandumbwetu vaze vanashinakajiwa chipwe vali mumisongo vanahase kuhana milimo yavo yamuwande kweseka noho hakumina ngolo javo. Milimo yetu yamuwande veji kuyisonekanga kulipoti lyamilimo yamuwande yamukaye kosena mangana liuka litachikize omu uli nakutambuka mulimo wakwambulula. Evi vikiko tweji kuhanyinanga milimo yetu yamuwande.

14. Lumbununenu ovyo twatela kukekesela kanawa kunoneka chetu chakulinangula Mbimbiliya.

¹⁴ Omu tunalinangula vishina vyavilemu vyamumukanda waVyavaLevi, kutala munamono ovyo vasonekelele mukanda kanou muMbimbiliya tahi? (Chimo. 2, 3:16) Kutala muli nakufwila kutwalaho lika kupwa vajila tahi? Yehova asaka tumuzachile namuchima wetu wosena. Fwilenu nawa kulinangula chikuma mikanda yamuMbimbiliya yikwavo yosena. (Tangenu Vishimo 2:1-5.) Lombenu kuli Kalunga nakukekesa kanawa kunoneka chenu chakulinangula Mbimbiliya nakulihulisa ngwenu: ‘Kutala nguli nakuzachila Yehova namuchima wami wosena tahi? Nyi kutala chisaji chamivwimbimbi, jivindiyo chipwe kuhema chakulitapa vyeji kungutangulanga tahi?’ nge mukiko kaha mwatela kushinganyeka kanawa havyuma vize ahanjikile Paulu mumukanda WavaHepeleu.

15, 16. Mwomwo ika Paulu ahanjikilile hatoma omu asonekelele mukanda vandumbwenyi vavaHepeleu?

¹⁵ Paulu ahanjikile hatoma omu asonekelele mukanda vandumbwenyi vavaHepeleu. (Tangenu WavaHepeleu 5:7, 11-14.) Avalwezele ngwenyi: “Munapu vakuhona kwivwa.” Mwomwo ika ahanjikilile ngocho? Mwomwo asolwele muchima waYehova wazangi nakulizakamina  ngwenyi vapwile nakulinangula chinyingi chamuMbimbiliya chahelu. Numba tuhu kulinangula chinyingi chamuMbimbiliya chahelu chapwa chachilemu, oloze nge tuli nakusaka kuzovoloka kushipilitu, kaha twatela kulya “kulya chakutafunya” chipwe ngwetu kulinangula chinyingi chamuMbimbiliya chakujiminyina.

¹⁶ Muchishishisa chakunangula vakwavo, oloze vaHepeleu vasakiwilenga mutu wakuvanangula. Mwomwo ika? Mwomwo kavapwile namuchima wakufwila ‘kulya chakutafunyako.’ Mutu himutu alihulise ngwenyi: ‘Kutala ngwatwama namuchima wamwaza kutalisa kuchinyingi chamuMbimbiliya chakujiminyina tahi? Kutala ngweji kufwilanga kulinangula chinyingi kana tahi? Kutala ngweji kuhonanga kupwa namuchima kana nakuhona kulomba kuli Kalunga tahi? Nge mukiko, kaha kutala echi cheji kunguhonesanga kulinangula Mbimbiliya tahi?’ Katwatela kwambulila vatu kahako, oloze twatela nawa kuvanangula, nakutunga tumbaji.—Mateu 28:19, 20.

17, 18. (a) Mwomwo ika twatela kulyanga vyakulya vyakushipilitu vyakutafunya? (b) Twatela kumona ngachilihi wala shimbu kanda tuyenga nakukunguluka?

¹⁷ Etu vavavulu kulinangula Mbimbiliya chinahase kutukaluhwila. Yehova kazanga vatu jenyi valinangule Mbimbiliya nakuvalingisa valivwe nge vali namulongako. Twatela kutwalaho lika kulya “kulya chakutafunya” chamokomoko namyaka tunashimbula mumuchano. Echi nachitukafwa tutwaleho lika kupwa vajila.

¹⁸ Hakusaka tupwenga vajila, twatela kukekesanga kanawa muVisoneka nakulinga vyuma vize mwatulweza Kalunga. Vana vaAlone, Natave naAvihu vavajihile hakulumba vyalivumba lyamwaza ‘hakakahya keka kaze [Yehova] azenekele kuvalweza,’ pamo mwomwo yakupenda wala. (Levi 10:1, 2) Talenu vyuma vize Kalunga alwezele Alone. (Tangenu VyavaLevi 10:8-11.) Kutala ou mujimbu uli nakulumbununa nge katwatela kunwa walako nge tuli nakuya nakukunguluka tahi? Achishinganyekenu havishina vino: Katwatwama muJishimbi jaMoseko. (Loma 10:4) Mumafuchi amwe, vandumbwetu veji kunwanga wala wamweseke nge vali nakulya vyakulya shimbu kanda vayenga nakukunguluka. Hachilika chaPaseka vazachishile jipasa javinyo jiwana. Omu Yesu alingile chilika chaKwanuka Kufwa chenyi, alwezele vaposetolo jenyi vanwenga vinyo vize vyemanyinyineko manyinga enyi. (Mateu 26:27) Oloze Mbimbiliya yakanyisa kupenda wala. (Koli. 1, 6:10; Chimo. 1, 3:8) Ngachize, chivezu chavandumbwetu vamwe chinahase kuvakanyisa kunwa wala shimbu kanda vayenga nakulemesa Yehova. Chipwe ngocho, mafuchi alisezaseza, chuma chachilemu kuli muka-Kulishitu shina ‘kuhandununa vyajila navyasanga’ mangana tupwenga lika vajila nakwivwisa Yehova kuwaha.

19. (a) Tunahase kulingisa ngachilihi kulemesa Kalunga mwatanga chipwe chilongesa chetu chahauka chitunganyalise? (b) Vyuma muka tuli nakufwila kulinga hakusaka tupwenganga vajila?

¹⁹ Mbimbiliya yatwama najindongi jajivulu jize tunahase kuwana nge natuyitanga kanawa. Zachisenunga vinoma vyakuzachisa hakuhehwojola vize mwatwama navyo mangana Kulemesa Kalunga mwaTanga chipwe chilongesa chenu chahauka chiminganyalise. Fwilenu kutachikiza kanawa Yehova navyuma ajina. Pandamenu kuli ikiye. (Yako. 4:8) Lombenunga kuli Kalunga ngana muze alombele muka-kwimba jisamu ngwenyi: “Ngufwikunwine meso ami, mangana ngumone vyuma vyakukomwesa mujishimbi jove.” (Samu 119:18) Kanda kuhokola jishimbi najindongi jamuMbimbiliyako. Ononokenunga jishimbi jaYehova uze apwa “Wajila” nakuzata natwima “mulimo wajila wamujimbu wamwaza waKalunga.” (Petu. 1, 1:15; Loma 15:16) Twatela kutwalaho lika kupwa vajila mumakumbi ano akukuminyina. Tuvosena tutwalenuho lika kupwa vajila mutwamiso yetu nakukundwiza wata waYehova.