1, 2. (a) Antu jaNzambi atela kwikala nayililu yamuchidinyi? (b) Chinu chibaaba chikwakula malwihwinyi?

 HAKWILA atuleji etu akwaKristu chitwatela kwikala ajila muyililu yetu, Yehova wamoneneni kapostolu Petulu kukunjika iyi nsañu nakujila kwakonkomwenawu mumukanda waAlevi. (Tañenu 1 Petulu 1:14-16.) Yehova “Wajila” wakeñaña nindi awayishewa ‘nianyikoku acheñi’ azateña nañovu jawu jejima kulonda ekali ajila muyililu yawu yejima, bayi muyililu yawu yikwawuku.—Yow. 10:16.

² Neyi tushinshika cheñi yuma yalema yakuspiritu yekala mumukanda waAlevi yikutukwasha chikupu nawa kuzatisha yuma yitwadizaña kukutukwasha kwikala ajila muyililu yetu yejima. Tukushinshika cheñi hamalwihu adi neyi awa: Twatela kumona ñahi yuma yinateli kutuluwañesha? Indi mukanda waAlevi watudizishañadi hakuhakwilaku wanta waYehova? Yumanyi yitunateli kudizila kunyilambu yahanineñawu?

3, 4. (a) Muloñadi akwaKristu chatelelawu kutondolwela yuma yinateli kuluwañesha nshimbi niyishina yamuBayibolu? (b) Muloñadi wutukubulila kuditenda nikudishila nkunyi?

³ Neyi tunakukeña kumuzañalesha Yehova, twatela kukakela chikupu kunshimbi niyishina yindi nawa bayi twikala nayililu  yamajilu yinateli kutuluwañeshaku. Hela chakwila hitwalondelaña Nshimbi yamwinkeluwu Mosuku, yuma yakeñekeleña munshimbi yatukwashaña kwiluka yuma yamonañayi Nzambi nindi yayiwahi hela yatama. Chakutalilahu, aIsarela ayilejeli nawu: “Kuditenda chinjila; kushila anyana kawantaña jeyi nkunyi kumuchima chinjila, chiña wakakeñaña mukwenu neyi chiwadikeñaña eyi aweni; yami Yehova.”—Lev. 19:18.

⁴ Yehova hakeñaña nindi tuditendeña nikudishila nkunyuku. (Rom. 12:19) Neyi tudiwula nshimbi niyishina yaNzambi, tukumuzañalesha Diyabolu nawa tukuleta kasawuntu hadi Yehova. Hela chakwila muntu natuvulumuni mumushikila, bayi tumushila nkunyuku. Nzambi watwinka kukooleka kwakwikala ‘nsaba jamawumba’ jikweti maheta, awa maheta himudimu wakushimwina. (2 Kor. 4:1, 7) Nkunyi yidi neyi wulembi wafwana hiyekalaña munsaba jamuchidiwuku.

5. Chumanyi chitunateli kudizila kunsañu yahosha hadi Aroni nichafwili anyanindi? (Talenu mwevulu wakutachikilahu.)

⁵ Chuma chomisha mbaña chamwekeni muchisaka chaAroni achisoneka mumukanda waAlevi 10:1-11. Atela aneñeli chikupu chelili kesi kafumi mwiwulu nakunoñesha anyana kaAroni aNadabi niAbihu hatabanaka. Chikuhwelelu chaAroni nichachisaka chindi chadiña mukweseka muloña ayikaanishili kudila ataña jawu. Anenu nawa mwamwekeshaña nenu mwajila hansañu yakubula kudikunda nawantaña jenu hela akwenu ahañawu muchipompelu?—Tañenu 1 Akorinda 5:11.

6, 7. (a) Neyi chakwila tunakufuukula kuya kuchawija chikwikala muchechi, yikumanyi yitwatela kutoñojokahu chikupu? (Talenu tumazu twaheshina.) (b) Tunateli kuhanjeka ñahi nawantaña jetu abula kwikala aYinsahu kutalisha hansañu yachawija chikwikala muchechi?

⁶ Hitunateli kumona kukala kukuletesha chikuhwelelu chetu chikali mukweseka neyi chamweniyi Aroni nichisaka chinduku. Chumanyi chitunateli kwila neyi anatutambiki kuchawija chantaña yetu wabula kwikala Chinsahu chikwikala muchechi? Kwosi Nsona yatukaanisha chikupu kubula kuyaku, hanu dinu kwekalahu yishina yamuBayibolu yinateli kutukwasha kufuukulahu hayuma yamuchidiwu? *

⁷ Chitwafuukulahu kwikala ajila kudi Yehova muyuma yitunateni chinateli kuyihayamisha antaña jetu abula kwikala aYinsahu. (1 Pet. 4:3, 4) Hela chochu, hitwakeñaña kuyineñeshaku, dichi chikuwaha neyi tukuhosha nawu mumesu awunda chakubula kuhita mumbadi. Tunateli kuhanjeka nawu henohu kuchidi mafuku. Twatela kuyisakilila nakuyileja netu tunatiyi kuwaha hakututambika kuchawija. Kuhiñahu tunateli kuyileja netu hamuloña wakubula kwila yuma yamukwitiya kwawu, neyi tuya kuchawija chawu tukuyineñesha chatela azañalali hefuku dawu dalema nikuyitisha nsonyi hamu niantu amakwawu akwinza kuchawija. Iyi diyi njila yimu yikutukwasha kubula kwila yuma yinateli kuluwañesha chikuhwelelu chetu.

8. Indi mukanda waAlevi wakonkomwenaña ñahi hawanta waYehova?

⁸ Mukanda waAlevi wakonkomwenaña hawanta waYehova. Nshimbi yekala mumukanda waAlevi yahoshaña hadi Yehova kubadika hadi mapampa 30. Mosi welukili chumichi nawa welili mwejima mwamulejeliyi Yehova. (Lev. 8:4, 5) Munjila yoyimu, twatela kwila yuma yejima yakeñañayi Mwanta wetu Yehova nindi twileña. Nawa kuloñesha kwaNzambi kwatukwashaña kwila mwenimu. Ilaña neyi tudi nkawetu tunateli kumona yuma yinateli kweseka chikuhwelelu chetu, neyi chamwesekeluwu Yesu muchinkalampata. (Luka 4:1-13) Neyi tushindamena hawanta waNzambi nikumukuhwelela,  kwosi muntu wunateli kutuletesha kwila yuma yikutuluwañesha hela kututiyisha womaku.—Yish. 29:25.

9. Muloñadi antu jaNzambi chayihelelawu munyunza yejima?

⁹ Chineli twekala atumbanji twaKristu nawa aYinsahu jaYehova, atwikabishaña kudi antu amunyunza yamukaayi kejima. Twamonaña chumichi muloña Yesu walejeli atumbanji twindi nindi: ‘Akayihanahana mwakamoni yihuñu, akayijahola, akayihela kudi nyunza yejima kukoola ijina dami.’ (Mat. 24:9) Hela chochu, neyi atuhela muniyi njila, twatatakenaña mumudimu wakushimwina Wanta nikutwalekahu kwikala ajila kumesu aYehova. Muloñadi chatuhelelawu hela chakwila twekala ashinshika, awunyoji nawa twovwahilaña nshimbi? (Rom. 13:1-7) Muloña twamwovwahilaña Yehova neyi Mwanta wetu Wabadika. Twamuzatilaña mudimu wajila “yena hohu kanka windi” nawa hitwamba kela yuma yatela kutukojeja kumotoka nshimbi jindi jaloña niyishina yinduku.—Mat. 4:10.

10. Chumanyi chamwekeni hampinji yelili mana kwetu wumu yeñili muwushidika?

¹⁰ Hitwekala cheñi ‘akwampata yamunu mwishinaku.’ Dichi hitwadiñijaña munsañu yajipolitiki nimajita amukaayuku. (Tañenu Yowanu 15:18-21; Isaya 2:4.) Antu amakwawu adihanini kudi Nzambi adiñija munsañu yajipolitiki. Amavulu hakachi kawu abalumuka munyichima nawa ekala cheñi nawubwambu wawuwahi naTata yetu wamwiwulu wukweti luwi. (Mas. 51:17) Antesha abalumuka wanyi munyichima. Chakutalilahu, hampinji yikwadiña Njita Yakaayi Yamuchiyedi, amashidika apompesheli amana kwetu 160 ashiluwu mukaleya chakadi muloña abulili kushikija yaaka 45 yakusemuka. Ayifumishili mutuleya twejima twamuHangary nakuyipompeshela mumbaka yimu. Ayikanjikijili kwiñili mudimu wawushidika. Amana kwetu ashinshika akaanini kwiñila wushidika, ilaña amakwawu atanu nawana etejeli nawa ayinkeli mayunifomu. Chimwahitili yaaka yiyedi, wumu weñilili wushidika wadiña hakachi kawamashidika enkeluwu mudimu wakujaha aYinsahu ashinshika. Oku kuhalwa, nimana kwindi asemukayi nindi wadiña hakachi kawaYinsahu! Ilaña yuma yahimpikili nawa ayijahili wanyi.

11, 12. Indi makonu akwaKristu anateli kudizila kwodi chayitejeliyi Yehova aIsarela akushankulu kumulambula nyilambu?

¹¹ Kwesekeja naNshimbi jamwinkeluwu Mosi, aIsarela ateleleli kuhana nyilambu yakeñekeleña. (Lev. 9:1-4, 15-21) Nyilambu yahanineñawu yateleleli kwikala yakadi hiyatamina muloña yemeneneñaku mulambu wawanina waYesu. Hela chochu, hakuhana nyilambu yejima ateleleli kulondela nshimbi chikupu. Chakutalilahu, shinshikenu chuma chakeñekeleña neyi chakwila mama yawantu navwali nkemba. Mukanda waAlevi 12:6 wahosha nawu: “Neyi mafuku akuditookesha nachu, hela amwana weyala, hela amwana wamumbanda anawanini, akaleti kudi kapristu kuchisu chetenti dakubulakena, mwana kamukoku wamwaka wumu wamulambu wakushita, nimwana kakapompa, indi kwiji katela, kamulambu wahanshidi.” Nshimbi yaNzambi yashimwini jiika, hela chochu, iyi Nshimbi yamwekesheleña chikupu nawu wukweti kukeña. Neyi mama yawantu hakutwesha kuhana mukokuku, wateleleli kuhana tutela tuyedi hela anyana katupompa ayedi. (Lev. 12:8) Hela chakwila, iwu mukwakudifukula hikazweñi amukeñeli nikumulemesha neyi muntu wahanineña mulambu walema wuseya. Chumanyi chitukudizila kunichi chakutalilahu?

¹² Kapostolu Pawulu wayikonkomweneni akwawu akwakwitiya kumulambula Nzambi “mulambu wakumuhameka.” (Heb. 13:15) Nyivumbu yetu yatela kushimwina hatooka ijina daYehova dajila. Amana kwetu niahela  anjika matu amuhamekaña Nzambi kuhitila mukuzatisha idimi dawatumama. AkwaKristu abulaña kufuma mumutala amuhamekaña Nzambi kuhitila mukusoneka nyikanda, kutemesha nshiña, nikushimwina kudi antu ayihembaña nienyi. Nyilambu yetu yakuhameka, dikwila nawu kumuhameka Yehova kuhitila mukushimwina ijina dindi ninsañu yayiwahi, yatela kwesekana nawuswa wutukweti nikukola kumujimba. Twatela kumuhameka namuchima wumu.—Rom. 12:1; 2 Tim. 2:15.

13. Muloñadi chitwatelela kuhana chileji chamudimu wakushimwina?

¹³ Twamulambulaña Nzambi nyilambu yakuhameka mukudikeñela muloña twamukeña. (Mat. 22:37, 38) Ilaña atulejaña kuhana chileji chamudimu wutwazataña hakushimwina. Twatela kumona ñahi iyi ntanjikilu? Chileji chitwahanaña kakweji nikakweji chamwekeshaña nawu twamwakamaña Nzambi. (2 Pet. 1:7) Kafwampi, kwosi muntu watela kudikanjikija nindi chiña yazateña maora amavulu mumudimu wakushimwina kulonda yaheni chileji chinakumwekesha nawu wazataña chikupu mumudimu wakushimwina. Dichi chetejelawu mukwakushimwina wekala mwiitala dakuhembela akata hela wakata yikatu yikwawu kuhana jiminiti 15 nakuya hewulu chatela yahaneña maora amukuma. Yehova walemesha iji jiminiti nindi himulambu wasweja kuwaha wahanaña mukwakushimwina waWanta hakumwekesha kukeña kwamukeñayi Nzambi nikukooleka kwabadika kwakumukalakela neyi Chinsahu Chindi. Neyi chochadiña aIsarela akañenyeña kulambula nyilambu yalema wuseya, ambuña Yehova alemeshayi akatakataña niwena atela kuhana chileji chawu. Nawa yileji yitwahanaña hamuntu hamuntu ayibombaña nayileji yamukaayi kejima yakwashaña kuloñesha kwetu kufuukulahu chadimu chakuzata mudimu wakushimwina Wanta kumbidi. Komana chatulejañawu nawu tuhaneña chileji chamudimu wakushimwina hichuma chakala?

14. Lumbululenu muloña wutwatelela kushinshika chachiwahi chitwadizaña.

¹⁴ Hanyima yakudiza yuma yalema yakuspiritu mumukanda waAlevi munateli kutoñojoka nenu, ‘Ichi dinu neluki chiwahi muloña waletesha iwu mukanda wikali hakachi Kezu daNzambi donenawu.’ (2 Tim. 3:16) Munafuukuluhu chikupu kumwekesha nenu mwajila bayi neyi hansañu yakwila Yehova wakeñaña nindi mwikali ajilaku, ilaña mwatela kuzata nañovu kulonda mumuzañalesheña. Hekwawu nsañu yimunadizi mumukanda waAlevi muniyi yibaaba yiyedi yinayileñeli mwikali nampwila yakusandujola chikupu Nyikanda yikwawu yajila yamuBayibolu. (Tañenu Yishimu 2:1-5.) Shinshikenu chachiwahi chimwadizaña nawa lombenu chikupu. Chakadi nikujina, mwakeñaña Yehova yeteji nyilambu yenu yakuhameka. Komana mpinji yikwawu maprogiramu aha TV, yisela yahavidiyo, ngunja niyisela yikwawu yayikañeshaña kuyilaku hambidi kuspiritu? Neyi dimu, chikuyikwasha hama neyi mutoñojoka chikupu hansañu yasonekeliyi kapostolu Pawulu mumukanda waAheberu.

15, 16. Muloñadi Pawulu chabuliliyi kuhita mumbadi hakuyisonekela akwaKristu Aheberu?

 ¹⁵ Pawulu washimwini hatooka to-o hampinji yayisonekeleliyi akwawu akwaKristu Aheberu. (Tañenu Aheberu 5:7, 11-14.) Kapostolu hadiña nakubuubeka munhoshelu yinduku. Wayilejeli nindi ‘ekalili [akwakutiya] nakuhuwañesha.’ Muloñadi Pawulu chahosheleliyi chakubula kuhita mumbadi? Wayikeñeli neyi chayikeñeliyi Yehova nawa wadiña nakwakamena ana akwaKristu akeñeleña kuhanda namayeli akuspiritu. Kwiluka ntañishilu yakunama yawakwaKristu hichuma chalema nankashi. Hela chochu, “kudya kwakola” kwakeñekaña hakwila nawu muntu yakuli kuspiritu nakwikala mukwaKristu wapama.

¹⁶ Chatela ayileñaku hambidi kulonda atañisheña akwawu, Aheberu akeñeleña muntu wakuyidizisha. Muloñadi? Muloña adiileña wanyi “kudya kwakola.” Dihulenu nenu: ‘Komana nakeña kudya kwakola kwakuspiritu? Nadyaña kudya kwakola? Tahindi nalombaña wanyi nikudiza yuma yakunama yamuBayibolu? Neyi dimu, komana nikweti chaaku chatama chakudiza?’ Hitwatela kushimwina antu hohuku, ilaña twatela cheñi kuyitañisha nikuyilisha atumbanji.—Mat. 28:19, 20.

17, 18. (a) Muloñadi wutwatela kudya yakudya yakola yakuspiritu mpinji yejima? (b) Twatela kumona ñahi kunwa walwa henohu kanda tuyi kukupompa kwawakwaKristu?

¹⁷ Etu amavulu chatukalilaña kudiza Bayibolu. Kafwampi, Yehova hafwilaña kusañumuna antu jindi kwikala nampwila yakudiza kuhitila mukuyileñela adimoneña neyi adi namuloñaku. Twatela kutwalekahu kudya yakudya yakola yakuspiritu hela chakwila tunashakami yaaka yayivulu hela yantesha mukuloñesha kwaNzambi. Chumichi chalema neyi tunakukeña kwikala ajila.

¹⁸ Hakwila twikali ajila, twatela kutañaña Nyikanda yajila nakanañachima nikwila yuma yakeñañayi Nzambi. Shinshikenu anyana kaAroni aNadabi niAbihu ajahiluwu muloña alambwili “kesi kacheñi,” hadaha asheteli. (Lev. 10:1, 2) Talenu Nzambi chamulejeliyi Aroni. (Tañenu Alevi 10:8-11.) Komana iyi nsañu yinatalishi mukwila nawu hitwatela kunwa walwa henohu kanda tuyi kukupompa kwawakwaKristuku? Toñojokenu haniyi yikuma: Hitwalondelaña Nshimbi jaMosuku. (Rom. 10:4) Mumatuña amakwawu, amana kwetu anwaña walwa wantesha hakudya yakudya henohu kanda ayi nakupompa. HaChipandakenu azatishileña mpasa jiwana javinyu. Hampinji yatachikiliyi Chanukishu, Yesu wayilejeli apostolu indi nindi anwi vinyu yemeneneñaku mashi indi. (Mat. 26:27) Bayibolu yakaanisha kunwa walwa wawuvulu nikusheta. (1 Kor. 6:10; 1 Tim. 3:8) Chinleji chawakwaKristu amavulu chinateli kuyikaanisha kunwa walwa henohu kanda atachiki kuzata mudimu wajila. Hela chochu, yihandilu yawantu yashiyashana kwesekeja namatuña awu nawa chuma chalemeshawu akwaKristu ‘hikwambula yajila nayabula kujila’ kulonda ekali ajila hakumuzañalesha Nzambi.

19. (a) Yumanyi yitwatela kwanuka hampinji yakudifukula kwachisaka nihakudiza kwankawetu? (b) Yumanyi yimunakufwila kwila kulonda mwikali ajila?

¹⁹ Mukawana maheta amavulu akuspiritu neyi muyikeñakeña Mwizu daNzambi. Zatishenuña yozelu yimukweti kulonda mudizeña chiwahi hakudifukula kwachisaka nikudiza nkawenu. Swejenu kumwiluka Yehova ninkeñelu yindi. Kundamenu kwakwihi nayena. (Yak. 4:8) Lombenu kudi Nzambi neyi cheliliyi ñimbi yamasamu wembili nindi: ‘Ntoneshi mesu ami, nimoni yuma yakuhayamisha munshimbi jeyi.’ (Mas. 119:18) Bayi mudiwula nshimbi niyishina yamuBayiboluku. Ovwahilenuña nshimbi yabadika ‘yaWajila,’ Yehova, nawa dikitenuña “mudimu wajila wakushimuna nsañu yaNzambi yayiwahi.” (1 Pet. 1:15; Rom. 15:16) Ikalenu ajila munanu mafuku akala akukuminina. Wejima wetu twatela kwikala ajila muyililu yetu kulonda tuhakwileñaku wanta waNzambi yetu wajila, Yehova.