Tulinzile Ukuya Amuzilo Umu Vicitwa Vitu Vyonsi
Tulinzile Ukuya Amuzilo Umu Vicitwa Vitu Vyonsi
“Lekini vicitwa vinu vyonsi viye vya muzilo.”—1 PETULO 1:15.
UZYE MUNGASUKA MUTUULI?
U mulandu ci uno ukusenka ukuviipe cayela i cintu cicindame sana uku Ina Klistu ya cumi?
Uzye ukateeka wakwe Yeova vyalemana uli nu kukana yika mu milandu ya mu nsi ukwa Ina Klistu?
Kulingana ni vyalembwa apa Ayebulai 5:7, 11-14, uzye tulinzile ukucita uli pa kusambilila Baibo?
1, 2. (a) Uzye Aina Klistu yalinzile ukuya ni vicitwa vya musango ci? (b) A mauzyo ci aama-asukwa umwi sambililo lii?
YEOVA wavwile umutumwa Petulo ukukolanya ukusanguluka ukwalandwa umwibuku lya Ina Levi kuli vino fwe Ina Klistu tulinzile ukuya asanguluke umu vicitwa vitu. (Welengini 1 Petulo 1:14-16.) Vino Yeova “uwamuzilo,” akalonda ukuti aomvi yakwe apakwe na yaayo aaya umwiumba lya “mfwele nazyuze” yaaombesya ukuti yaye aasanguluke umu vicitwa vyao vyonsi—asi sile muli vimwi.—Yoane 10:16.
2 Ukusambilila pa vyeo navyuze ivisuma sana ivyaya umwibuku lya Ina Levi nu kuomvya vino twasambilila, cilatwazwa ukusininkizya ukuti sweswe yasanguluke umu vicitwa vitu vyonsi. Tumasambilila pa mauzyo wakwe yaa akuti: Uzye tulinzile ukulola uli ukucita iviipe? Uzye ibuku lya Ina Levi likatusambilizya vyani pali vino tungatungilila ukateeka wakwe Yeova? I vyani vino tungasambilila uku mpolelwa izyapeelwanga?
CENJELINI UKUTI MUTAACITA IVIIPE
3, 4. (a) U mulandu ci uno Aina Klistu yatalinzile ukusulila amasunde yakwe Leza ni visinte vya muli Baibo? (b) U mulandu ci uno tutalinzile ukulandula nanti ukupata antu yauze?
3 Ndi tukulonda ukuzanzya Leza, tulinzile ukulondela amasunde yakwe ni visinte vya muli Baibo, tutalinzile ukuya akowele, nanti ukuya ni misuula uku visinte na masunde yakwe. Nanti cakuti swemo tusilondela Amasunde Yakwe Mose, ivyaya umu masunde yaayo vikatwazwa ukumanya vino Leza watemwa na vino wapata. Aina Izlaeli yayanenyile yati: ‘Utalandula uyi wa muntu umwi nanti kutwalilila kupata umuntu umwi. Lelo uwatemwa muzo ndi vino waitemwa. Nene Yeova.’—Aina Levi 19:18.
4 Yeova asilonda ukuti twalandula, nupya akalonda ukuti tutapata antu yauze. (Loma 12:19) Ndi cakuti tutasumvile amano uku masunde yakwe Leza ni visinte vya muli Baibo, Ciwa angatemwa sana, nupya tungaazewanya Yeova. Nanti icakuti umwi watucitila iviipe uku mufulo, tutalinzile ukuya wa nyungu izyazulamo icipyu. Leza watupeela isyuko lya kuya ngati “inyungu” izyayamo icuma ca mulimo wakwe Leza. (2 Kolinto 4:1, 7) Ulupato ulwaya wakwe asidi lutanga lusendelwe umu nyungu zya musango uwo!
5. I vyani vino tungasambilila ukwilyasi lyakwe Aloni ni imfwa ya yana yakwe? (Lolini cikope cakutandikilapo.)
5 Ilyasi lya ulanda pali Aloni na ana yakwe lyaya pa Ina Levi 10:1-11. Ulupwa lwakwe Aloni lufwile lwali sana nu ulanda lino umoto wafumile ukwiyulu nu koca ya mwana aloni yaili kulikuti Nadabu na Abiu apitenti lya kupepelapo. Wali uwezyo ukulu sana kuli Aloni nu lupwa lwakwe ukukana loosya yalupwa yao aafwile! Uzye mwemo palwinu mukaisininkizya ukuti mwasanguluka nu kutaluka kuli yalupwa inu nanti antu yauze aazingwa umu cilongano?—Welengini 1 Kolinto 5:11.
6, 7. (a) A mauzyo ci yano tulinzile ukuyuzya sweineco lino tukupingulapo ndi cakuti tungaya tukazanwe uku winga wa ku calici nanti foo? (Lolini futunoti.) (b) Uzye tungalanzyanya uli na yalupwa pali vino tukalola ukuzanwa uku winga wa ku calici?
6 Limwi swemo tutanga tuye ni vyakwezya wakwe vino cali kuli Aloni nu lupwa lwakwe. Nomba, nga ndi yaatwamile ukuti tuye uku winga wakwe lupwa witu aasi Inte Yakwe Yeova? Kutaaya Ilembelo ilikatunena ukuti tutalinzile ukuyako, nomba uzye kwaya ivisinte vya muli Baibo ivingatwazwa ukupingulapo ningo? a
7 Ukulondesya kwitu ukuti tuye asanguluke kuli Yeova ukulozya ukwilyasi kwene lii ilyati-lilandwapo kungazungusya ya lupwa itu aasi ya Nte Yakwe Yeova. (1 Petulo 4:3, 4) Kwene tukaezya na maka ukuti tutaayasosya, nomba cikazipa sana ukulanzyanya nayo cikuuku-cikuuku, nanti lino tukulanda ukwaula ukuyapita umumbali. Limwi cingazipa ukulanzyanya nayo lino kucili insita. Tungayataizya nu kuyaneena tuti tukutaizya sana pa kutulaalika ukuti tukazanwe uku winga. Lyene limwi tungayaneena tuti nomba pa mulandu ni vya mipepele, ukuzanwako kwitu kungalenga ukuti uwanda wao uwa nsansa utaziipa nupya limwi yanguvwa uyi na yaayo kwene ati yazanwako. Ii iinzila yonga ino tungaomvya pakuti twalanga ukuti tutasuuzile ivizumilo vitu.
MWATUNGILILA UKATEEKA WAKWE YEOVA
8. Uzye ibuku lya Ina Levi likalanda uli pali ukateeka wakwe Yeova?
8 Ibuku lya Ina Levi likalanda sana pali ukateeka wakwe Yeova. Amasunde aakazanwa umwibuku lya Ina Levi yakalanda pa kulumbanya Yeova ukucila maila 30. Mose wazumiile cii nu kucita vino Yeova wamunenyile ukucita. (Aina Levi 8:4, 5) Nafwe tulinzile ukucita vino kateeka witu Yeova akaalonda twacita. Pa vintu vya musango uu, Yeova akatwazwa sana ukupitila umwiuvi lyakwe. Nomba tungeziwa lino tuli swenga, wakwe vino cali lino Yesu weziwe umu lwanga. (Luka 4:1-13) Ndi twasumba amano kuli ukateeka wakwe Leza nu kumutaila sana, kusi angatusomba nu kutuleenga ukuya ni ntete.—Mapinda 29:25.
9. U mulandu ci uno aomvi yakwe Leza yapatilwa uku yantu amu nko zyonsi?
9 Vino sweswe yalondezi yakwe Klistu nupya ya Nte Yakwe Yeova, tukazunyiwa uku yantu amu nko izyatuzinguluka. Twamanya ukuti vikwene avino cifwile ukuya, pano Yesu wanenyile asambi yakwe ati: “Lyene yalamulema, yalamuzunya nu kumukoma. Antu amu nko zyonsi yalamupata pamulandu wane.” (Mateo 24:9) Nanti antu yatupate, tukatwalilila ukuomba umulimo wa Wene nu kutwalilila ukuya asanguluke kuli Yeova. U mulandu ci uno antu yatupatila nanti icakuti sweswe ya cisinka, twaya ni miyele isuma, nupya tukauvwila masunde ya mpanga kuno twikala? (Loma 13:1-7) Pano twasoolola Yeova ukuya Kateeka witu! Awino tukaombela “wenga sile” nupya tutalatala tusuule amasunde yakwe ni visinte vya muli Baibo.—Mateo 4:10.
10. Uzye icani cacitiike apa nsita imwi lino umwina umwi watandike ukuyika umu milandu ya mu nsi?
10 Nupya swemo tuusi “amu nsi.” Acino tusiyikila umu milandu ya mu nsi wa kulwako inkondo nu kuya umuvikanza vya miteekele. (Welengini Yoane 15:18-21; Ezaya 2:4.) Yamwi aipeezile kuli Leza yatandika ukuyika umu milandu ya mu nsi. Aingi pali yaayo yazenzuka nu kuya nupya ya cuza yakwe Tata witu uwa mwiyulu uwaya nu luse. (Masamu 51:17) Yamwi pali yaa aanono sile aataazenzwike. Lino kwali inkondo yakwe ciili iya mu nsi yonsi, aomvi ya mu uteeko aaku mpanga ya Hungary yakolonginye aina itu 160 yano yaayaliile umu cifungo pa mulandu nu lufyengo aali ni myaka yakuvyalwa 45 nu kwiza pansi, nupya yaayatwazile ukwitauni lyonga. Yayanenyile ukuti yatandike ukuomba umulimo wa usilika. Aina itu aali acisinka yaakanyile, lelo aali 9 yaazumiile iyalapa ni milapo ya usilika iyatoola na mayunifomu. Lino papisile imyaka iili, wenga pali yaayo wazumiile imilapo ya usilika wizile aya umwiumba lya asilika aombanga ni mfuti aapezilwe umulimo wakukoma Aina itu acisinka. Pa ina itu acisinka pali na lupwa wa muntu kwene wiyo! Lelo ivintu vyasenwike, aina itu kwene yaayo acisinka yataayakomile.
MWAPEELA YEOVA IVISUMA SANA PALI VINO MWAKWATA
11, 12. Uzye vino Yeova walondolwile ukuti avino aina Izlaeli yaali nu kupeela impolelwa vikaazwa uli Aina Klistu ndakai?
11 Umwisunde Lyakwe Mose, aina Izlaeli yayanenyile vyonsi vino yaalinzile ukupeela impolelwa. (Aina Levi 9:1-4, 15-21) Impolelwa zitaali nu kuya izilemale pano zyalozyanga uku mpolelwa yakwe Yesu imaliilike. Nupya pa musango ulionsi uwa wila, nanti impolelwa, aina Izlaeli yalondekwanga ukucita vino yaayanenyile. Lekini tulande pali vino mama uwakwata umwana walondekanga ukucita. Pa Ina Levi 12:6 pakati: ‘Lino insita yakuswefiwa kwa mpapo yakwe yasila, pa mpapo ya mwana umonsi nanti pa mpapo ya mwana umwanaci, nyina mutuutu alinzile ukuleta kuli simapepo, pa mulyango wi Taalu lya Ukongano umwana wa mfwele wa mwaka onga, kuti aye uwila wakoca. Nupya alinzile ukuleta icipeele conga nanti inkunda yonga ya wila wa kwelela amaifyo.’ Leza walondolwile ivyalondekwanga, lelo ukukana patikizya antu ukucita vino yatanga yakwanisye kwalondololwa ningo sana Umwisunde kwene lii. Ndi cakuti nyina wa mwana ataali nu kukwanisya ukupeela imfwele, wali nu kupeela inkunda ziili nanti twana twa vipeele twili. (Aina Levi 12:8) Nanti icakuti umwi wali umupina, kapepa wiyo wali umutemwikwe, nupya Yeova wataizyanga umuntu wiyo wakwe vino wataizyanga uwapeela uwila wa muteengo sana. I cani cino tungasambilila kuli cii?
12 Paulo wakomeliizye yakapepa yauze ukupeela kuli Leza “impolelwa” ya kulumbanya. (Ayebulai 13:15) Imilomo itu ilinzile ukulumbanya izina lyakwe Yeova ilya muzilo. Aina itu na ya nkazi ya ciulu yakalumbanya Leza ukuomvya ululimi lwa uciulu. Aina Klistu aakaikala sile apa ng’anda pa mulandu nu kulwala yakalumbanya Leza ukupitila umu kulemba makalata, ukuomvya foni pa kusimikila, nu kusimikila aomvi ya muvipatala alino na akuyatandalila. Ukupeela impolelwa ya kulumbanya—ukulumbanya Yeova lino tukusimikila antu apizina lyakwe na pilandwe lisuma—vifwile ukuombwa ukulingana nu umi witu alino na maka itu. Tulinzile ukuombesya.—Loma 12:1; 2 Timoti 2:15.
13. U mulandu ci uno tulinzile ukutumila lipoti wa mulimo wa kusimikila cila-mwezi?
13 Impolelwa zya kulumbanya zino tukapeela kuli Yeova, i zyakuitemelwa sile sweineco pa mulandu wakuti twatemwa sana Leza. (Mateo 22:37, 38) Nomba yaatuneena ukuti tulinzile ukulemba nu kutuma vino tukaomba umu mulimo wa kusimikila. Uzye tulinzile ukulola uli amapekanyo kwene yaa? Kutuma lipoti wa mulimo wa kusimikila cila-mwezi kwalemana sana na vino twaipelesya muli ukapepa. (2 Petulo 1:7) Kusi wino alinzile ukupatikiziwa ukuomba ama awazi aingi pakuti sile cipendo ca ma awazi cikule sana lino twacita lipoti. Ali mulandu uno na yakasimikila aatanga yaye umu kusimikila pa mulandu wakuti aalwale sana yazumiliziwa ukuti yangaatuma lipoti amamineti 15, 30, nanti 45 asi sile ukutandikila apiawala lyonga. Yeova akataizya sana pa mamineti kwene yaayo pano ala kasimikila wiyo watapeela nu kuomba apapezile amaka yakwe, nu kulanga ukuti watemwa sana Leza, nupya akataizya sana apisyuko lya kuya Inte Yakwe Yeova. Wakwe vino aina Izlaeli yamwi yafilwanga ukupeela impolelwa zya mutengo sana, Aomvi yakwe Yeova aatemwikwa sana kuli aliwe nayo yangaatuma lipoti nanti icakuti limwi yangaafilwa ukuombesya pa mulandu nu kulwala. Nupya amalipoti yano cila-muntu akaatuma aakaapanga lipoti ya mu nsi yonsi, na cii cika-azwa iuvi litu ukupekanyizizya limwi vino umulimo wa kusimikila pa Wene ungaombwa ningo ukunkoleelo. Uzye vwilini vino yaatuneena ukuti twatuma lipoti wa mulimo wakusimikila, tungati i cintu icikome sana cino tutanga tukwanisye ukucita?
VINO TUKASAMBILILA BAIBO NU KUPEELA IMPOLELWA ZYA KULUMBANYA
14. Londololini umulandu uno tulinzile ukucecetela vino tukasambilila Baibo.
14 Lyene vino mwasambilila ivintu ivinono sile ivisuma sana ivyaya umwibuku lya Ina Levi, limwi mungaelenganya ukuti, ‘lyene nati-manya ningo umulandu uno ibuku lii nalyo yalikiile Umwizwi Lyakwe Leza.’ (2 Timoti 3:16) Limwi lyene mungaalondesya ukutwalilila ukuya asanguluke, asi sile pa mulandu wakuti avino Yeova akalonda muye, lelo a pa mulandu wakuti wene waliinga ukuti mwamuzanzya lino mukumuombela nu mwenzo onsi. Limwi vino mwati-musambilila umwibuku lya Ina Levi, vyati-vimulenga ukwelenganya pa kutandika ukulondelezya ivyeo ivizike ivyaya muli Baibo. (Welengini Mapinda 2:1-5.) Mwapepa kuli Leza pakuti aamwazwa ukuceceta vino mukasambilila Baibo. I cumicumi mukalonda ukuti Yeova aazumila impolelwa zinu izya kumulumbanya. Uzye insita zimwi mukazana ukuti mukuleka mapulogalamu ya pa TV, vyangalo vya pa vidyo, vyangalo vya kucimvyanya, nanti vyuze vino mwatemwa ukumupumvyanya nu kumulenga ukukana lunduluka muli vyakwe Leza? Ndi cakuti avino cili, mungazana uwavwilizyo lino mukwelenganya sana pa mazwi yamwi-yamwi yano umutumwa Paulo walemvile aaya umwibuku lya Ayebulai.
15, 16. U mulandu ci uno Paulo walembiile Ayebulai kalata ukwaula ukupita umumbali?
15 Paulo walandanga ukwaula ukupita umu mbali lino walembelanga Aina Klistu yauze Ayebulai. (Welengini Ayebulai 5:7, 11-14.) Umutumwa Paulo walandanga na maka ukwaula intete! Wayanenyile ati: “Musyauvwa zuwa.” U mulandu ci uno Paulo walandilanga na maka nupya ukwaula intete? Wakolanyanga ukutemwa kuno Yeova waya nako nu kusakamala sana Aina Klistu aasumbanga sile mano ku visambilizyo ivitatala ukuvwa. Cacindama sana ukumanya ivisambilizyo vya kutandikilako ivya Ina Klistu. Nomba, “Vyakulya vikome” vikalondekwa pakuti umwi alunduluke muli ukapepa nu kuya sana cuza wakwe Leza.
16 Ayebulai yataalundulukanga pakuti nayo yaasambilizya yauze, yalondanga sile umwi uwakuti aayasambilizya lyonsi. U mulandu ci? Pano yatasumbanga amano ku “vyakulya vikome” ivya muli Baibo. Yuzyini mweineco muti: ‘Uzye imyelenganyizizye yane yaya sile ningo pa vyakulya vikome ivya muli Baibo? Uzye nkavisambilila? Nanti uzye nkatiina ukupepelapo nu kupaatula insita ya kusambilila sana Baibo? Ndi cakuti avino cili, uzye limwi vino nkacita pa kusambilila Baibo i vikalenga ciye vivyo?’ Tutalinzile ukupeleela sile pa kusimikila antu lelo tufwile ukuyasambilizya nu kuyapanga ukuya asambi.—Mateo 28:19, 20.
17, 18. (a) U mulandu ci uno tulinzile ukulya lyonsi ivya kulya vikome ivyaya muli Baibo? (b) Uzye tulinzile ukulola uli ukumwa uwengwa lino tukuya uku kulongana?
17 Ukusambilila Baibo asi cintu icangupale sana kuli sweingi. Kuya kwene, Yeova asilonda kuti antu yakwe yaipeela imilandu lino yakusambilila Baibo. Lelo, nanti cakuti limwi twatandike mpiti sana ukuombela Leza nanti alino twatandike likwene, tulinzile ukutwalilila ukulya ivyakulya ivikome ivya muli Baibo. Ukucita vivyo kwacindama ndi tukulonda ukutwalilila ukuya aasanguluke.
18 Pakuti tuye asanguluke, tulinzile ukuomvya ningo Amalembelo nu kucita vino Leza akatuneena. Elenganyini Nadabu na Abiu ya mwana Aloni, aumoozilwe pa mulandu wakuti yaomvizye “umoto utali uwamuzilo,” limwi ala iyakoleka nu kukoleka. (Aina Levi 10:1, 2) Lolini vino Leza wanenyile Aloni. (Welengini Aina Levi 10:8-11.) Uzye cii cikupiliula ukuti tutalinzile ukumwa uwengwa nanti panono sile lino tukuya uku kulongana? Elenganyini pali vii: Tusitungululwa na Masunde yakwe Mose. (Loma 10:4) Umu mpanga zimwi, ya kapepa yanji yakamwa uwengwa panono pa nsita ino yakulya icakulya lino yatatala yaya uku kulongana. Pano na mpiti kwene yaomvyanga yakapu yakwe waini 4 pakuzevya ucilo. Lino Yesu watandiike iciusyo ca mfwa yakwe, walesile asambi yakwe ukumwa waini uwali unkolanya wa wazi wakwe. (Mateo 26:27) Baibo yalesya ukumwa sana uwengwa nu kukoleka. (1 Kolinto 6:10; 1 Timoti 3:8) Nupya kampingu wa Ina Klistu aingi atanga ayazumilizye ukumwa uwengwa nanti panono sile lino yakulondeka ukuomba imilimo imwi yakwe Leza iyamuzilo. Nomba, ivintu vikapusana ukulingana na vino caya uku mpanga izipusane-pusane, nupya icacindama icakuti Aina Klistu yalinzile “kupusanya pakasi ka vintu vyakwe Leza ni vintu vya kuomvya pasilesile” pakuti ivicitwa vyao vyaya ivisanguluke ivikazanzya Leza.
19. (a) I vyani vino tulinzile ukwiusya ukulozya uku kupepa kwa lupwa na lino tukuisambilizya sweineco? (b) I vyani vino mumacitanga pakuti mwaisininkizya ukuti mwemwe yasanguluke?
19 Ndi cakuti mukusambilila sana Baibo, muli nukusambilila ivintu ivisuma ivingi. Mwaomvya ivingamwavwa ukulondelezya ivyeo ivingalenga mwasambilila ningo Baibo pa kupepa kwa lupwa na lino mukuisambilizya mweineco. Mwasambilila sana pali Yeova nu kulonda kwakwe. Lyonsi kwene mwapalama sana kuli Yeova. (Yakobo 4:8) Mwapepa lyonsi kuli Leza ndi vino kalemba wa masamu wacisile, uwimvile ati: “Njulile amanso uleke ndole vizungusyo ivyaya umu masunde yako.” (Masamu 119:18, NW) Mutaezya ukusuula ivisinte na masunde amuli Baibo. Mwaitemelwa ukuvwila amasunde yakwe Yeova “Uwamuzilo,” nu kutwalilila ukuomba umulimo ‘wakukosola ilandwe lisuma kufuma kuli Leza.’ (1 Petulo 1:15; Loma 15:16) Mwaya asanguluke umu manda yaa aakusyalikizya aipe cuze. Si lekini swensi kwene twaya asanguluke umu vicitwa vitu pakuti twatungilila ukateeka wakwe Yeova, Leza witu wa muzilo.
[Futunoti]
a Lolini “Mauzyo yano aakawelenga yakauzya” umu Lupungu Lwa Mulinzi ulwa Ciyemba lwakwe Mei 15, 2002.
[Mauzyo ya Masambililo]
[Cikope api’fwa 20]
Uzye ukuisambilizya Baibo nu Kupepa Kwa Lupwa ivilivyo vyacindama umu umi winu? (Lolini palagalafu 14)
