1, 2. (1) Ta eo Jeova ekõn̦aan bwe armej ro doon ren kõm̦m̦ane? (2) Ta kajjitõk ko jenaaj uwaaki ilo katak in?

 JEOVA ear kõm̦akũt rijjilõk Piter ñan je jet naan jãn bokin Livitikõs ñan kõmel̦el̦e bwe Kũrjin ro rej aikuj kwõjarjar ãinwõt kar RiIsrael ro. (Riit 1 Piter 1:14-16, UBS.) Jeova, ‘Eo Eokkwõjarjar,’ ej kõtmãne ak kõn̦aan bwe rũkkapit ro kab “jiip” ro jet ren kate er bwe ren kwõjarjar ilo men otemjej rej kõm̦m̦ani.​—Jon 10:16.

² Ilo katak in, jenaaj bwebwenato kõn jet iaan naanin kakapilõk ko me rej pãd ilo bokin Livitikõs. Naanin kakapilõk kein renaaj jipañ kõj bwe jen kwõjarjar ilo men otemjej jej kõm̦m̦ani. Jenaaj bar uwaaki kajjitõk kein: Jenaaj ta ñe jej iioone juon men me emaroñ tõll̦o̦k kõj ñan ad rupe kien ko an Jeova im naanin kakapilõk ko an? Ta eo bokin Livitikõs ej katakin kõj kõn wãween ad rejetake Jeova bwe ej Irooj Bõtata eo ad? Im ta eo jemaroñ katak jãn menin katok ko me RiIsrael ro rar katok kaki?

3, 4. (1) Etke Kũrjin ro rej aikuj kõjparok jãn aer l̦õmn̦ak bwe ejjel̦o̦k jorrããn ñe rej rupe kien im kõjekdo̦o̦n naanin kakapilõk ko ilo Baibõl̦? (2) Etke jen jab idenon̦e ak dãpij ad illu n̦ae bar juon?

³ Bwe jen maroñ kam̦õn̦õn̦õik Jeova, jej aikuj pokake kien ko an im l̦oori naanin kakapilõk ko an. Jej aikuj kõjparok jãn ad  l̦õmn̦ak bwe ejjel̦o̦k jorrããn ñe jej rupe kien im kõjekdo̦o̦n naanin kakapilõk kein. Ilo raan kein jejjab pãd ium̦win Kien Moses, bõtab kien kein remaroñ jipañ kõj ñan jel̦ã ta ko rem̦m̦an im renana ippãn Jeova. Ñan waanjoñak, kar jiroñ RiIsrael ro im ba: “Kwõn jab idenon̦e, im kwõn jab dãpij n̦otaan nejin armej ro am̦, a kwõn yokwe rũturum̦ ãinwõt kwe. Ña Jeova.”​—Livitikõs 19:18.

⁴ Jeova ejjab kõn̦aan bwe jen idenon̦e im ejjab kõn̦aan bwe jen dãpij ad illu n̦ae bar juon. (Rom 12:19) El̦aññe jej kõjekdo̦o̦n kien ko an Anij kab naanin kakapilõk ko an, Setan enaaj lukkuun m̦õn̦õn̦õ im jenaaj ko̦kkure etan Anij. Ak ta ñe juon ej kallu kõj? Eokwe, jen jab illu wõt kake bõd eo ear kõm̦m̦ane ñan kõj. Baibõl̦ ej ba bwe jej ãinwõt “jãpe bwidej ko” ak kõnno̦ ko me ewõr juon men eaorõk ie ilowaaer. Men in eaorõk ej jitõñl̦o̦k ñan jerbal in kwal̦o̦k naan. (2 Korint 4:1, 7) Bõtab, ñe juon armej ej illu wõt n̦ae bar juon, an illu ej ãinwõt juon ajet (acid). Kõn men in, jen kõjparok bwe jen jab illu wõt im ilo kõkkar kanne kobbad kõn ajet in.

5. Ta eo jemaroñ katak jãn kar joñak eo an Aron, im ke l̦õm̦aro nejin rar mej? (Lale pija eo ilo jinoin katak in.)

⁵ Ilo Livitikõs 10:1-11, ej kwal̦o̦k kõn juon men me ear wal̦o̦k im el̦ap an kar kabũrom̦õj baam̦le eo an Aron. Jeova ear jilkintok kijeek jãn lañ im m̦an l̦õm̦aro nejin Aron, etaer Nedab im Ebaihu. Tokãlik, Anij ear ba ñan Aron im baam̦le eo an bwe ren jab kwal̦o̦k aer bũrom̦õj. Men in emaroñ kar mãlejjoñe aer tiljek ñan Anij! Kwõj ke kaalikkar bwe kwõj kwõjarjar ilo am̦ jab kõnnaan ak aetõl ro rebukwel̦o̦k meñe rej uwaan baam̦le eo am̦ ak ro nukum̦?​—Riit 1 Korint 5:11, UBS.

6, 7. (1) Ta ko kwõj aikuj l̦õmn̦ak kaki ñe kwõj pepe in etal ak jab etal ñan juon kõm̦are ej wal̦o̦k ilo juon m̦õn jar? (Lale kõmel̦el̦e eo itulal̦.) (2) Ta ko jemaroñ ba ñan kõmel̦el̦eik etke jejjab maroñ bõk kun̦aad ilo juon kõm̦are ej wal̦o̦k ilo juon m̦õn jar?

⁶ Bõlen jeban iioone men eo ear mãlejjoñe Aron im baam̦le eo an. Ak, ta ñe juon nukũd ejjab juon iaan Ri Kõnnaan ro an Jeova ej kajjitõk bwe jen etal im bõk kun̦aad ilo iien m̦are eo an ilo juon m̦õn jar? Ejjel̦o̦k kien ilo Baibõl̦ ej kamo ad etal. Bõtab, ewõr naanin kakapilõk ko me remaroñ jipañ kõj ñan jel̦ã ta eo jen kõm̦m̦ane. *​—Lale kõmel̦el̦e eo itulal̦.

⁷ Bõlen ro ilo baam̦le ko ad rejjab mel̦el̦e kõn pepe ko jej kõm̦m̦ani ñan kam̦õn̦õn̦õik Jeova im kõjparok bwe jen kwõjarjar wõt. (1 Piter 4:3, 4, UBS) Em̦ool bwe jejjab kõn̦aan kainepataik er, bõtab jej aikuj kwal̦o̦k m̦ool im kwal̦o̦k jouj ñe jej kõmel̦el̦eik er. Em̦m̦anl̦o̦k ñe jej kõmel̦el̦eik er m̦okta wõt jãn an epaaktok raanin kõm̦are eo. Innem, jemaroñ ba bwe kõn an nãj wõr m̦akũtkũt ko an kabuñ ilo iien in, jejjab kõn̦aan nãj kajook er im ro jet kõnke jejjab bõk kun̦aad ilo m̦akũtkũt kein. Ak, jemaroñ wõnm̦aanl̦o̦k wõt im kam̦m̦oolol er kõn aer kile kõj ilo iien m̦are eo aer. Ilo ad kõm̦m̦ane men in, jej kõjparok kõj jãn jabdewõt men me enaaj tõll̦o̦k kõj ñan kõm̦m̦ane men ko me rej n̦ae tõmak eo ad.

8. Ewi wãween an bokin Livitikõs kaalikkar bwe Jeova ej Irooj Bõtata?

⁸ El̦ap an bokin Livitikõs kaalikkar bwe Jeova ej Irooj Bõtata. Elõñl̦o̦k jãn 30 alen an bokin Livitikõs kwal̦o̦k bwe kien ko ie rej itok jãn Anij. Moses ear jel̦ã men in im ear pokake aolep men ko Jeova ear kakien e ñan kõm̦m̦ani. (Livitikõs 8:4, 5) Jej aikuj l̦oor joñak eo an Moses im pokake aolep men ko Jeova ad Irooj Bõtata ekõn̦aan bwe jen kõm̦m̦ani. Doulul in an Anij ej jipañ kõj ilo men in. Bõtab, jet iien jenaaj iioon mãlejjoñ ko ñe jej make iaad. Men in ear wal̦o̦k ñan Jijej ke ear pãd ilo ãne jem̦aden. (Luk 4:1-13) Jej aikuj lõke wõt Anij im rejetake bwe ej Irooj  Bõtata eo ad. El̦aññe jej kõm̦m̦ane men kein, jeban mijak ro jet im ejjel̦o̦k juon enaaj kõm̦m̦an bwe jen rupe kien ko an Anij im kõjekdo̦o̦n naanin kakapilõk ko an.​—Jabõn Kõnnaan 29:25.

9. Etke jet armej rej dike armej ro an Anij ilo pel̦aakin lal̦ in?

⁹ Jejjab bwilõñ ñe armej ro rej jum̦ae im kaeñtaan armej ro an Anij ipel̦aakin lal̦ kõnke Jijej ear ba ñan rũkal̦oor ro an im ba: “Renaaj ketak kom̦ ñan eñtaan, im renaaj m̦an kom̦, im riaelõñ otemjel̦o̦k renaaj kõjdate kom̦ kõn Eta.” (Matu 24:9) Meñe armej ro rej kõjdate kõj, ak jej wõnm̦aanl̦o̦k wõt im kwal̦o̦k naan, im kwõjarjar ilo men otemjej jej kõm̦m̦ani. Jej m̦ool ilo ad jerbal, jerreo, im jejjab kõm̦m̦ani men ko renana. Bareinwõt, jej pokake kien ko an aelõñ ko jej pãd ie. Meñe jej ãindein, ak etke jet armej rej dike kõj? (Rom 13:1-7, UBS) Kõnke em̦õj ad kããlõt Jeova bwe en Irooj Bõtata eo ad! Jej kabuñ ñan “E wõt” im jeban rupe kien ko an kab kõjekdo̦o̦n naanin kakapilõk ko an.​—Matu 4:10.

10. Ta eo ear wal̦o̦k ñan juon iaan ro jeid im jatid me ear oktak im bõk kun̦aan ilo tarin̦ae?

¹⁰ Jejjab tarin̦ae im bõk kun̦aad ilo m̦akũtkũt ko an kien ko an lal̦ in kõnke ‘jejjab an lal̦.’ (Riit Jon 15:18-21; Aiseia 2:4, UBS.) Jet iaan ro me em̦õj aer ajel̦o̦k mour ko aer ñan Anij rar jab tiljek wõt ñane kõnke rar bõk kun̦aaer ilo tarin̦ae. Elõñ iaaer rar ukel̦o̦k tokãlik im em̦õj aer jepl̦aak ñan Jeova. (Sam 51:17) Bõtab, jet iaaer rar jab ukel̦o̦k. Ñan waanjoñak, ilo Pata eo an Lal̦ Kein Karuo, ilo aelõñ in Hungary, rar kalbuuji elõñ jeid im jatid em̦m̦aan meñe ejjel̦o̦k rueer. Ruutiej ro rar aintok 160 ro jeid im jatid me 45 aer iiõ ak dikl̦o̦k im kakien er bwe ren bõk kun̦aaer ilo tarin̦ae. Enañin aolepeer rar m̦akoko, ak 9 iaaer rar kallim̦ur bwe renaaj bõk kun̦aaer, im rar ebbõk aer nuknuk in tarin̦ae. Ruo iiõ tokãlik, juon iaan ro me rar oktak im rũttarin̦ae rar lel̦o̦k juon jerbal ñane. Rar kajjitõk ippãn ñan kobal̦o̦k ippãn rũttarin̦ae ro jet bwe ren buuki Ri Kõnnaan ro an Jeova me rar tiljek wõt. Em̦m̦aan eo lukkuun jein ear pãd ibwiljin rein me rej pojen buuki er! Bõtab, rar jab buuki er.

11, 12. Ta eo jemaroñ katak jãn menin katok ko RiIsrael ro rar katok kaki?

¹¹ Kien Moses ear kwal̦o̦k kõn menin katok ko RiIsrael ro rar aikuj katok kaki. (Livitikõs 9:1-4, 15-21) Menninmour ko rar katok kaki rar aikuj weeppãn kõnke rar jitõñl̦o̦k ñan katok in mour eo an Jijej eweeppãn. Bareinwõt, RiIsrael ro rar aikuj l̦oore elõñ kakien ko el̦aññe rej lel̦o̦k menin katok ko rekajjo wãweer. Bokin Livitikõs 12:6 (UBS) ej kwal̦o̦k kõn kakien ko juon kõrã ear aikuj kõm̦m̦ani ãlikin an kar kõl̦l̦otak. Ej ba: “El̦aññe ejem̦l̦o̦k iien karreo eo an kõn l̦adik eo nejin ak ledik eo nejin, innem en bõkl̦o̦k ñan bũrij eo ilo kõjãmin Em̦ Nuknuk eo im̦õn Irooj juon jiip juon iiõ dettan bwe en menin katok eo rej tile, im juon bao pigeon ak juon m̦ul̦e bwe en menin katok kõn jerawiwi.” Meñe elõñ tipdikin kien ko an Jeova im rekajju, ak kien kein rar bareinwõt kaalikkar bwe el̦ap an Jeova yokwe im mel̦el̦e kõn joñan maroñ ko an armej. Ñan waanjoñak, el̦aññe kõrã eo ear jab maroñ lel̦o̦k juon jiip, ear maroñ lel̦o̦k 2 bao m̦ul̦e ak 2 bao pigeon. (Livitikõs 12:8, UBS) Meñe kõrã in ear jeram̦õl, ak an Jeova yokwe im kaorõke ear joñan wõt an kar yokwe im kaorõke ro me rar maroñ lel̦o̦k menin katok ko el̦ap on̦ãer. Ta eo jemaroñ katak jãn men in?

¹² Rijjilõk Paul ear rõjañ Kũrjin ro bwe ren “katok ñan Anij kõn wũjtak.” (Hibru 13:15) Jej kõm̦m̦ane men in ñe jej kwal̦o̦k kõn etan Jeova ñan ro jet. Ro jeid im jatid me rejarroñroñ remaroñ nõbar Anij ilo aer jeknõl̦ kõn peier. Ak ta kõn Kũrjin ro renañinmej im rej pãdwõt m̦õko im̦weer? Remaroñ bar nõbar Jeova ñe rej kwal̦o̦k naan ilo aer jeje  lõta, kõjerbal talboon, im kõnnaan ippãn ro rej lol̦o̦k er. Joñan ad maroñ nõbar Jeova ilo ad kwal̦o̦k naan ej wawa ioon joñan maroñ im ãjmour eo ad. Ak men eo el̦aptata an aorõk ej bwe jen nõbar Jeova joñan wõt ad maroñ.​—Rom 12:1; 2 Timote 2:15.

13. Taunin ad kõm̦m̦an ripoot in kwal̦o̦k naan?

¹³ Jej m̦õn̦õn̦õ in nõbar Jeova kõnke jej yokwe e. (Matu 22:37, 38) Innem, en ewi wãween ad l̦õmn̦ak ñe rej kajjitõk bwe jen kõm̦m̦an ad ripoot in kwal̦o̦k naan kajjojo allõñ? Eokwe, jen m̦õn̦õn̦õ in kõm̦m̦ane men in kõnke ej bar juon iaan wãween ko jej kwal̦o̦k ad tiljek ñan Anij. (2 Piter 1:7) Jen jab l̦õmn̦ak bwe jej aikuj jol̦o̦k el̦ap awa ilo kwal̦o̦k naan kõnke en l̦ap awa eo jej likũti ilo ripoot eo ad. El̦aññe juon rukwal̦o̦k naan ebwijwol̦ã ak elukkuun nañinmej, im 15 wõt minit in an maroñ kwal̦o̦k naan ilo juon allõñ, emaroñ bar ripoote. Jeova em̦õn̦õn̦õ ippãn kõnke ejel̦ã bwe ej lel̦o̦k joñan wõt an maroñ. Jeova ebar jel̦ã bwe armej in ej yokwe E im em̦õn̦õn̦õ bwe ej juon iaan Ri Kõnnaan ro An. Meñe RiIsrael ro rar jeram̦õl ak rar wõnm̦aanl̦o̦k wõt im lel̦o̦k menin katok ko aer ñan Anij ekkar ñan joñan maroñ ko aer. Ãindein ro ilo raan kein, meñe ewõr joñan aer maroñ, ak remaroñ wõnm̦aanl̦o̦k wõt im kõm̦m̦an aer ripoot meñe ejjab l̦ap aer awa. Ñe jej lel̦o̦k ripoot ko ad, rej kobaiki ippãn ripoot ko kajjojo an ro jeid im jatid ipel̦aakin lal̦. Ripoot kein rej jipañ doulul in ad ñan karõkl̦o̦k im̦aan kõn men ko jenaaj aikuji ilo jerbal in kwal̦o̦k naan. Eñin unin eaorõk bwe jen kõm̦m̦an ad ripoot in kwal̦o̦k naan.

14. Etke jej aikuj etale kõj make kõn wãween ad katak ippãd make?

¹⁴ Ãlikin ad katak kõn katak kein raorõk ilo bokin Livitikõs, el̦apl̦o̦k ke am̦ kile unin an Anij kobaiki bok in ilo Naan eo An ak Baibõl̦? (2 Timote 3:16) El̦apl̦o̦k ke am̦ kõn̦aan kate eok bwe kwõn kwõjarjar wõt? Jeova ekõn̦aan bwe jen kate kõj im karejar ñane joñan wõt ad maroñ, im ekkar bwe jen kõm̦m̦ane men in ñane. Bõlen men ko kwaar katak kaki rej kõm̦akũt eok ñan kam̦wilal̦l̦o̦k am̦ katak Baibõl̦. (Riit Jabõn Kõnnaan 2:1-5, UBS.) Jar ñan Jeova bwe en jipañ eok ilo men in. Kwõmaroñ kajjitõk ippam̦ make: ‘Ij ke kate eõ joñan wõt aõ maroñ bwe en em̦m̦an aõ katak? Ak ij ke m̦ad kõn tipi, mijjin, im iukkure ko jet, ak men ko ij itoklimo kaki? Ij ke kõtl̦o̦k bwe men kein ren bõbrae eõ jãn aõ wõnm̦aanl̦o̦k ilo m̦ool eo?’ El̦aññe aet, eokwe em̦m̦an ñe kwõj kõl̦mãnl̦o̦kjen̦ kõn naan ko an Paul ilo bokin Hibru.

15, 16. Etke Paul ear lukkuun kajju ke ear jejel̦o̦k ñan RiHibru ro me rar Kũrjin?

¹⁵ Paul ear kwal̦o̦k naan ko rekajju ke ear jejel̦o̦k ñan RiHibru ro me rar Kũrjin. (Riit Hibru 5:7, 11-14.) Ear ba ñan er bwe rej “jowan in roñjake.” Etke Paul ear lukkuun kajju an jejel̦o̦k ñan er? Kõnke ear yokwe er ãinwõt an Jeova yokwe er. Ear inepata ke rar l̦õmn̦ak bwe ejjel̦o̦k jorrããn ñe rej idaak wõt milik, ak katak wõt kõn men ko repidodo ilo Baibõl̦. Eaorõk bwe jen mel̦el̦e kõn men kein. Bõtab, bwe jen rũttol̦o̦k wõt ilo tõmak, jej aikuj kam̦wilal̦l̦o̦k ad katak Baibõl̦ ak bõk “ekkan ko reppen.”

 ¹⁶ RiHibru ro ren kar katakin ro jet, ak rar jab maroñ. Ro jet rar aikuj katakin er. Etke? Kõnke RiHibru rein rar kajettokjãn “ekkan ko reppen” ak katak ko rem̦wilal̦. Kõn men in, kwõn kajjitõk ippam̦ make: ‘Em̦m̦an ke ippa katak kõn katak ko rem̦wilal̦ ilo Baibõl̦? Ilukkuun kõn̦aan ke katak kõn men kein? Ak ij ke kajettokjãn aõ kam̦wilal̦l̦o̦k aõ katak Baibõl̦ im jar? El̦aññe ãindein aõ l̦õmn̦ak, emaroñ ke kõn an jab kanooj em̦m̦an wãween aõ katak ippa make?’ Em̦ool bwe jej aikuj kwal̦o̦k naan ñan armej ro, bõtab jej aikuj bar katakin er bwe ren erom rũkal̦oor.​—Matu 28:19, 20.

17, 18. (1) Etke jej aikuj wõnm̦aanl̦o̦k wõt im bõk “ekkan ko reppen”? (2) En ewi wãween ad l̦õmn̦ak kõn idaak dãnnin arkool̦ m̦okta jãn ad etal im kweilo̦k?

¹⁷ Jeova ekõn̦aan bwe unin ad kam̦wilal̦l̦o̦k ad katak Baibõl̦ ej kõnke jekõn̦aan. Im ejjab kõm̦m̦an bwe en nana ad mour ñe jejjab katak. Meñe emaroñ pen ippãd ñan katak Baibõl̦, ak jej aikuj wõnm̦aanl̦o̦k wõt im bõk “ekkan ko reppen.” Jej aikuj kõm̦m̦ane men in jekdo̦o̦n ewi toon ad pãd ilo m̦ool eo. Men in eaorõk el̦aññe jekõn̦aan bwe jen pãdwõt ilo ad kwõjarjar.

¹⁸ Jej aikuj kanooj etale eoon ko im pokake aolep men ko Anij ekõn̦aan bwe jen kõm̦m̦ani bwe jen maroñ kwõjarjar. L̦õmn̦ak m̦õk kõn l̦õm̦aro nejin Aron etaer Nedab im Ebaihu. Rar mej kõn aerro kar katok kõn kijeek eo ‘ejjab kwõjarjar.’ Bõlen remaroñ kar kadek ke rar kõm̦m̦ane men in. (Livitikõs 10:1, 2, UBS) Lale m̦õk ta eo Anij ear ba ñan Aron. (Riit Livitikõs 10:8-11, UBS.) Ekkar ñan eoon kein, mel̦el̦ein ke bwe enana ñe jej idaak dãnnin arkool̦ m̦okta jãn kweilo̦k? Eokwe, jen kõl̦mãnl̦o̦kjen̦ kõn men kein: Jejjab pãd ium̦win Kien Moses. (Rom 10:4, UBS) Im ilo jet jikin, ñe rũttõmak ro m̦õttad rej m̦õñã m̦okta jãn aer etal im kweilo̦k, rej bar idaak dãnnin arkool̦ ak ejjab l̦e jãn joñan. Bareinwõt, ke kar kõm̦m̦ane Kwõjkwõj in Kijoone eo, rar kõjerbal 4 kab in wain. Im ke Jijej ear jinoe Kwõjkwõj in Kõjota eo, ear lel̦o̦k ñan rijjilõk ro limeer wain eo me ear kõkkar kake bõtõktõkin. (Matu 26:27) Baibõl̦ ej kamo ad kadek im idaak l̦e jãn joñan. (1 Korint 6:10; 1 Timote 3:8, UBS) Im elõñ Kũrjin ro remaroñ make peek bwe ren jab idaak arkool̦ m̦okta jãn aer kõm̦m̦ani jerbal ko ñan Jeova. Bõtab, jej aikuj keememej bwe jet aelõñ eoktak jãn bar jet aelõñ. Men eo eaorõk in ej bwe jen maroñ kile oktak eo ikõtaan “men ko an Anij”, ak men ko rekkwõjarjar, jãn men ko rettoon. Ilo wãween in, jenaaj maroñ kwõjarjar wõt im kabuñbũruon Jeova.

19. (1) Ta eo jemaroñ kõm̦m̦ane bwe en em̦m̦anl̦o̦k im m̦wilal̦l̦o̦k ad katak ilo iien kabuñ an baam̦le eo ad, kab ilo iien ad katak ippãd make? (2) Ta ko kwõmaroñ kõm̦m̦ani ñan kaalikkar bwe kwõj kwõjarjar wõt?

¹⁹ El̦aññe jej lukkuun etale Naanin Anij, jenaaj loe elõñ naanin kakapilõk ko rekanooj em̦m̦an. Ta eo kwõmaroñ kõm̦m̦ane bwe en em̦m̦anl̦o̦k im m̦wilal̦l̦o̦k am̦ katak ilo iien kabuñ an baam̦le eo am̦ kab ilo iien am̦ katak ippam̦ make? Eokwe, kwõn kortokjãn kein jipañ ko jej kõjerbali ñan kappok mel̦el̦e ko rem̦wilal̦l̦o̦k. Kal̦apl̦o̦k am̦ jel̦ã kajjien Jeova im kam̦wilal̦l̦o̦k am̦ mel̦el̦e kõn ankilaan. Kõm̦m̦an bwe kwõn epaakel̦o̦k E. (Jemes 4:8) Jar ñan Anij ãinwõt an kar juon iaan ro rar je bokin Sam al im ba: “Kwõn kõpel̦l̦o̦k meja, bwe in lo menin bwilõñ ko ilo kien ko Am̦.” (Sam 119:18) Aolep iien jen pokake kien ko an Anij im l̦oore wõt naanin kakapilõk ko an ilo Baibõl̦. Jen m̦õn̦õn̦õ in pokake kien ko an Jeova, eo “Eokkwõjarjar.” Im jen kijejeto ilo ad kõm̦m̦ane jerbal eo eokkwõjarjar ñan “kwal̦o̦k Naan ko Rem̦m̦an jãn Anij.” (1 Piter 1:15, UBS; Rom 15:16, UBS) Jej aikuj kaalikkar bwe jej kwõjarjar wõt ilo raan kein ãliktata me renana. Kõn men in, jen kwõjarjar ilo men otemjej jej kõm̦m̦ani im rejetake Jeova bwe ej ad Irooj Bõtata.