1, 2. 1) ¿Toni kichia Jiova maj kichiuakan itekitikauan? 2) ¿Toni netajtanilmej tiknankiliskej itech nejin tamachtilis?

TATITANIL Pedro ika tajtoj amatajkuilol Levítico uan kimelauak ika inepaleuil Dios ke akin kichiuaj kemej Cristo, ijkon kemej israelitas, moneki maj yektikej itech nochi tein kichiuaj itech ininnemilis (xikonixtajtolti 1 Pedro 1:14-16). Jiova, akin “Yolchipauaktsin”, kichia maj tokniuan taixpejpenalmej uan ‘okseki ichkamej’ motelchikauakan moajsiskej yektikej ‘tech nochi ininnemilispan’, tein kijtosneki, itech nochi tein kichiuaskej (Juan 10:16).

² Itech nejin tamachtilis tikitaskej okseki taman tein ijkuiliujtok itech Levítico tein techpaleuis maj tiyektikej itech nochi tein tikchiuaj. Uan no, tiknankiliskej nejin netajtanilmej: ¿Keyej moneki nochipa tiktakamatiskej itanauatiluan Jiova? ¿Toni techmachtia Levítico keman kinextia ke moneki tikitaskej ke sayoj Jiova toUeyi Taixyekankauj? ¿Uan toni techmachtia netetayokolilmej tein kitemakayaj israelitas?

3, 4. 1) ¿Keyej moneki nochipa tiktakamatiskej itanauatiluan uan itayolmajxitilisuan Jiova? 2) ¿Keyej moneki amo timomakepaskej nion tiyolkualantoskej?

³ Komo tiknekij tikyolpaktiskej Dios, moneki nochipa tiktakamatiskej itanauatiluan uan itayolmajxitilisuan, uan maj amo keman  tikitakan ke amo monekij. Maski amo monekiok tiktakamatiskej Tanauatil tein Jiova kimakak Moisés, nejin techpaleuia maj tikitakan toni Jiova kiita ke kuali uan toni amo. Kemej neskayot, Jiova kinnauatij israelitas: “Moneki amo timomakepas nion tiyolkualanis iniuan ikoneuan moxolal, uan moneki tiktasojtas mokniuj kemej tejua timotasojta. Nejua niJiova” (Lev. 19:18).

⁴ Kemej tikitaj, Jiova amo kineki maj timomakepakan nion maj tiyolkualanikan iuan aksa (Rom. 12:19). Komo tiktapanauiliskiaj tein techtajtania, tikchiuaskiaj maj amo kuali ika tajtokan itokay uan tikyolpaktijtoskiaj Satanás. Yejua ika, keman aksa techyolxokolia moneki amo tiyolkualaniskej. Biblia kijtoua ke tejuan titamatij kemej “sokikomit” tein kipia se taman tein kitelpia ipatiuj: tanojnotsalis (2 Cor. 4:1, 7). Amo ueli kemej yeskia tiksentaliaj itech nejon sokikomit se taman tein kitelpia ipatiuj kemej tanojnotsalis uan se taman tein tel taijtakoua kemej yolkualanyot.

5. ¿Toni techmachtia maj Aarón tatakamatini ijkuak momikilijkej ikoneuan? (Xikonita taixkopin ipeujyan tamachtilis.)

⁵ Levítico 10:1-11 ika tajtoua tein kipanokej Aarón uan ichankauan tein semi tetayokoltij. Jiova kiualtitanik tit tein ika kinmiktij Nadab uan Abihú, ome ikoneuan Aarón, uan kiniluij kalyetouanij maj amo kichiuaskiaj nion se taman tein ika kinextiskiaj tayokol. ¡Xa semi kinouijmakak kitakamatiskej nejon tanauatil! ¿Uan tejuan? ¿Tiknextiaj ke tiyektikej iixpan Jiova keman amo tiktemouaj iniuan timouikaskej tochankauan oso totasojikniuan akin kinkalankixtijkej itech nechikol? (Xikonixtajtolti 1 Corintios 5:11.)

6, 7. 1) ¿Toni motelneki tikitaskej keman tikixejekoskej ox titapaleuiskej oso amo keman aksa monamiktis tiopan? (Xikonita nota.) 2) ¿Toni uelis tikiluiskej se tochankauj akin techyoleua maj tikpaleuikan keman monamiktis tiopan?

⁶ Xa axkan amo tikpanoskej se ueyi tayejyekolis kemej tein kipanokej Aarón uan ichankauan. Sayoj ke ¿toni tikchiuaskej komo se tochankauj techyoleua maj tiyakan oso maj tikpaleuikan keman monamiktis tiopan? Maski semi melauak ke itech Biblia amo moajsi se tanauatil tein kijtoua ke amo uelis tiyaskej, kemaj kipia tayolmajxitilis tein techpaleuis maj tikixpejpenakan toni tikchiuaskej. *

⁷ Xa seki tochankauan amo kiajsikamatiskej keyej tiknekij tiktakamatiskej Jiova uan timoajsiskej tiyektikej itech nejin taman (1 Ped. 4:3, 4). Amo tiknekij tikinyolxokoliskej, yejua ika moneki tikinnojnotsaskej ika netasojtalis, sayoj ke motelneki maj tikinyekiluikan tein tikixtalijkej. Uan kuali yeskia maj niman timonojnotsakan iniuan. Yekinika uelis tikintasojkamatiliskej porin techyoleujkej, uan satepan maj tikinmelauilikan ke ijkuak monamiktiskej tiopan mochiuas seki taman tein amo uelis tikchiuaskej uan kemej amo tiknekij maj amo kuali momachilikan oso maj mopinaujmatikan itech nejon tonal tein motelneki, okachi kuali maj amo tikinpaleuikan. Komo ijkon tikiniluiaj techpaleuis maj amo tikpatakan totanemilil uan maj nochipa tiktakamatikan itanauatiluan Jiova.

8. ¿Keniuj kiyeknextia Levítico ke Jiova kinamiki kiixtalis tanauatilmej?

⁸ Amatajkuilol Levítico kiyeknextia ke Jiova, kemej Ueyi Taixyekankej, kinamiki kiixtalis tanauatilmej. Panoua 30 kiyekijtoua ke Jiova kitemakak tanauatilmej tein ompa tikixtajtoltiaj. Moisés kiyekmatia nejon; yejua ika nochipa kichiuak tein Dios kinauatijka (Lev. 8:4, 5). No ijkon, tejuan moneki nochipa tiktakamatiskej sayoj Jiova kemej toUeyi Taixyekankauj. Inechikol techpaleuia maj ueli tikchiuakan nejon. Sayoj ke kemansa monekis tiknextiskej ke titatakamatij keman tiyetoskej toselti, ijkon kemej kipanok  Jesús keman yetoya taluakyan (Luc. 4:1-13). Komo ijkon ¿toni tikchiuaskej? Komo titakuaujtamatij iuan Dios uan tikpoujkaitaj kemej toUeyi Taixyekankauj, amo akin kichiuas maj titelmouikan uan maj amo tiktakamatikan (Prov. 29:25).

9. ¿Keyej techtauelitaj?

⁹ Tiitatojtokakauan Cristo amo moneki tikmoujkaitaskej maj techtajyouiltikan. Yejua kinnejmachtij imomachtijkauan: “Namechtemaktiske para ma namechkojko[ko]kan uan para ma namechmiktikan. Uan nochi in tagayot ten amo taneltokaj, yejuan ne namechtauelitaske porin namejuan nanyektakuautamatij nouan itech notokaytsin” (Mat. 24:9). Maski ijkon, tiksentokaj titanojnotsaj uan tiyektikej iixpan Jiova itech nochi tein tikchiuaj. Sayoj ke, ¿keyej techtauelitaj ta kuali timonejnemiltiaj, timelaujkej uan tichipaujkanemij? (Rom. 13:1-7.) Porin tiktakamatij Jiova kemej toUeyi Taixyekankauj. “Sayo Yejuatsin” tikueyichiuaj, uan amo keman tiktapanauiliskej itanauatiluan tein melaujkej (Mat. 4:10).

10. ¿Toni kipanok se tokniuj akin motemakak tapaleuis itech neteuilis?

¹⁰ Biblia kijtoua ke akin kichiuaj kemej Cristo ‘amo poutinemij ok iuan in taltikpakuani’. Yejua ika amo timokalakiaj itech neteuilis nion itech taltikpaktekiuajyot (xikonixtajtolti Juan 15:18-21 uan Isaías 2:4). Tetayokoltij tikijtoskej ke seki tokniuan motemakanij tapaleuiskej itech neteuilis. Miakej satepan yekmelauj moyolnonotsanij uan mokepanij iuan Jiova (Sal. 51:17). Sayoj ke oksekin amo. Kemej neskayot, itech Ojpatika Neteuilis tein Mochiuak itech Nochi Taltikpak, miakej tokniuan kintsakkaj itech tataman xolalmej ompa Hungría. Seki tajpianij kinsentilijkej itech sayoj se xolal 160 tokniuan akin ayamo kiajxitiayaj 45 xiujmej. Keman ompa yetoyaj, kiniluijkej ke monekia tapaleuiskej itech neteuilis. Maski miakej amo kinekkej kichiuaskej, chiknaui kiselijkej mochiuaskej tateuianij. Ome xiuit satepan, semej akin ijkon kichiuak moajsik itech se ueyi ouijkayot: kinauatijkej maj iniuan pouiskia tateuianij akin kinmiktiskiaj seki nejon tokniuan akin amo kikaujkej Jiova. ¡Yejua xa semi amo kuali momachilij keman kiitak ke iikniuj katka semej akin yayaj kimiktitij! Techyolpaktia tikmatiskej ke nejon tokniuan amo kinmiktijkej.

11, 12. ¿Keniuj kinextia netetayokolilmej tein monekia kitemakaskej israelitas kemej tamati Jiova?

¹¹ Tanauatil tein Dios kimakak Moisés kijtouaya ke israelitas monekia kitemakaskej netetayokolilmej (Lev. 9:1-4, 15-21). Nejon netetayokolilmej monekia kuali moajsiskej, porin kiixnextiayaj inemilis Jesús tein kitemakaskia tein amo kipiaskia tajtakol. Uan no, senkis ixyetoya keniuj kitemakaskiaj. Kemej neskayot, Levítico 12:6 kimelaua tein monekia kichiuas se siuat satepan ke kipiaskia se konetsin: “Keman kiajxitisya tonalmej keman mochipaujtoya porin kiyolitij se okichpil oso se siuapil, kiualkuis se ichkat tein kipia se xiuit kemej nemaktil tachichinol uan se pichón oso se tórtola kemej nemaktil porin tajtakolej, ikalakyampa takenkal kampa monechikouaj, uan kimakas tiopixkat”. Maski senkis ixyetoya keniuj monekia kichiuaskej, Tanauatil kiyeknextia ke Jiova se Dios tetasojtakej uan motemaka kipatas tein ixyetok. Komo temomaj amo uelia kitemakaya se ichkat, ueliskia kitemakas ome tórtolas oso ome pichones (Lev. 12:8). Maski amo teyi semi kipiaya, Jiova kitasojtaya uan kipatiuitaya ijkon kemej siuat akin uelia kitemakaya se tapial tein okachi patiyoj. ¿Toni techmachtia nejin?

¹² Tatitanil Pablo kinyolchikauak akin kichiuaj kemej Cristo maj kitemakakan ‘tataman netetayokolilmej’ tein ika kiueyichiuaskej Dios (Heb. 13:15). Tikchiuaj nejin keman tikteixmatiltiaj itokay Jiova tein yektik. Melauak ke tinochin tataman tein tikpanouaj uan sekin xa timokokouaj, sayoj ke okachi  moneki maj nochipa tikmakakan Jiova tein okachi kuali. Kemej neskayot, akin amo uelij kisaj ininchan porin xiuejkejya oso mokokouaj, tanojnotsaj ika teléfono oso ika amat tein kijkuilouaj, uan no kinnojnotsaj akin kinkalpanotij. Yejuan no kiueyitaliaj Jiova keman ijkon kichiuaj (Rom. 12:1; 2 Tim. 2:15).

13. ¿Keyej moneki tiktemakaskej amat kampa tikijkuilouaj kanachi tiempo titanojnotskej?

¹³ Tikueyichiuaj Jiova ika ‘tataman netetayokolilmej’, amo porin techchikaujkauiaj, ta techolinia ueyi netasojtalis tein tikpialiaj (Mat. 22:37, 38). Komo ijkon ¿keniuj moneki tikitaskej keman techtajtaniaj maj tiktemakakan tiempo tein titanojnotskej itech se metsti? Moneki tikchiuaskej nejin porin ijkon tiknextiaj ke tiktasojtaj Jiova uan tiktakamatij (2 Ped. 1:7). Sayoj ke, amo akin moneki kimachilis ke moneki okachi tanojnotsas sayoj porin ijkon uelis kijkuilos okachi horas. Tein melauj, komo se tokniuj sayoj ueli tanojnotsa quince minutos itech se metsti, xa porin xiuejya oso mokokoua, uelis kijkuilos nejon. Jiova kimati ke nejon tokniuj kitasojta uan yekmelauj kineki yeski itaixpantijkauj. Kimati ke yejua nejon ueli kimaka ika nochi iyolo, uan yejua ika kitelpatiuita. Kemej tikitakej, maski se israelita amo semi teyi kipiaya, ueliskia kimakas netetayokolilmej Jiova. No ijkon, tokniuan akin amo semi uelij tanojnotsaj uelis kimachiliskej yolpakilis keman kitemakaskej tiempo tein tanojnotskej. Tein tikijkuilouaj itech amat kipouaj iuan tein kijkuilojkej nochin tanojnotsanij noyampa taltikpak, tein tapaleuia maj itech inechikol Jiova kiitakan kani moneki okachi nepaleuil. ¿Melauj ke amo semi ouij keman techtajtaniaj maj tiktemakakan itamian metsti tiempo tein titanojnotskej?

14. ¿Keyej moneki tikitaskej keniuj timomachtijtokej Biblia?

¹⁴ Satepan ke tikitakej nejin tamachtilismej tein kitelpiaj ipatiuj, ¿melauj ke okachi kuali tikajsikamatij keyej Jiova kichiuak maj amatajkuilol Levítico moajsi itech iTajtol? (2 Tim. 3:16.) Uan axkan okachi tikixtaliaj tiksentokaskej timoajsiskej tiyektikej, amo sayoj porin Jiova kichia maj ijkon tikchiuakan ta porin yejuatsin kinamiki maj tikmakakan tein okachi kuali. Uan no, nejin tamachtilis techolinia maj timomachtikan Biblia ika okachi nejmachkayot (xikonixtajtolti Proverbios 2:1-5). Moneki tikitaskej ika netataujtil keniuj timomachtijtokej Biblia. Tikyekmatij ke tinochin tiknekij maj Jiova kiseli ‘tataman netetayokolilmej’ tein ika tikueyichiuaj. Yejua ika maj timotajtanikan: “¿Nikmakatok Jiova tein okachi kuali? ¿Oso nikaujtok maj televisión, videojuegos, neauiltilis oso neixpetanilis nechtsakuilikan maj okachi nikchikaua nokuali uikalis iuan?”. Komo ijkon, maj itech titanemilikan tein Pablo kinijkuilouilij tokniuan hebreos.

15, 16. ¿Keyej Pablo kinyekiluij tokniuan hebreos toni amo kuali kichiujtoyaj?

¹⁵ Pablo kinyekiluij tokniuan hebreos toni amo kuali kichiujtoyaj (xikonixtajtolti Hebreos 5:7, 11-14). Yejua kiniluij ke ‘amo kiyolnejnekiajok de momachtiske’, tein kijtosneki ke kintelouijmakaya kiajsikamatiskej tamachtilis tein ouij. ¿Keyej kinyekiluij nejon? Porin ijkon kemej Jiova, Pablo kintasojtaya nejon  tokniuan uan kitekipachouaya maj kitemouanij mochikauaskej sayoj ika “leche” oso tamachtilis tein amo ouij. Maski monekia kiixmatiskej nejon tamachtilis, komo kinekiaj kipiaskej kuali taixejekolis, monekia kemej yeskia kikuaskej “in [“chikauak”, TNM] tapaloltsin”, tein kijtosneki ke monekia momachtiskej ika okachi nejmachkayot.

¹⁶ Yejuan amo mochiujkaj tamachtianij, ta monekia maj aksa kisentokaskia kinmachtiskia. ¿Keyej? Porin amo mochikaujkaj ika “in [“chikauak”, TNM] tapaloltsin”. Uan tejuan, ¿keniuj tikitaj tamachtilis tein ouij tein kipia Biblia? ¿Timochikauaj tikajsikamatiskej? ¿Nochipa tikchiuaj netataujtil uan timomachtiaj Biblia ika okachi nejmachkayot? Komo techouijmaka tikchiuaskej nejon, ¿xe yeski porin timomattokej ijsiujka timomachtiskej? Maj tikelnamikikan ke amo sayoj moneki titanojnotsaskej, ta no moneki titamachtiskej uan tikinchiuaskej momachtianij (Mat. 28:19, 20).

17, 18. 1) ¿Keyej moneki timochikauaskej timomachtiskej tamachtilis tein ouij tein kipia Biblia? 2) ¿Moneki amo se tayis tayil tein teuintij achto ke se yas nechikol?

¹⁷ Timiakej techouijmaka timomachtiskej Biblia, uan Jiova amo techchikaujkauia maj tikchiuakan. Sayoj ke, maski uejkaujya oso yankuixtok peuak tiktekitiliaj Dios, tinochin moneki timochikauaskej ika tamachtilis tein ouij tein moajsi itech iTajtol, porin nejon techtelpaleuis maj tiksentokakan tiyektikej.

¹⁸ Komo tiknekij timoajsiskej tiyektikej iixpan Jiova, moneki tikitaskej ika nejmachkayot tein kijtoua Biblia uan tikchiuaskej tein yejuatsin techtajtania. Maj oksepa tikitakan tein kinpanok Nadab uan Abihú, akin Jiova kinmiktij porin kitemakakej “tit tein amo ixyetoya”, xa keman uintitoyaj (Lev. 10:1, 2). Maj tikitakan tein Dios kinauatij ininpopaj, Aarón, tepitsin satepan (xikonixtajtolti Levítico 10:8-11). ¿Kijtosneki ke amo moneki titayiskej tayil tein teuintij achto ke tiyaskej nechikolmej? Maj tiknemilikan nejin. Tejuan amo monekiok tiktakamatiskej Tanauatil (Rom. 10:4, TNM). Itech seki altepemej moajsij tokniuan akin tayij tayil tein teuintij ika taixejekol keman takuaj achto ke yaskej nechikol. Keman kichiuayaj Pascua kikuiaj naui copa ika vino. Uan keman Jesús kipeualtij Talnamikilis, kiniluij tatitanilmej maj tayiskiaj vino tein kiixnextiaya iesyo (Mat. 26:27). Biblia kijtoua ke amo kuali yetok maj se tel tayi uan maj se tauana (1 Cor. 6:10; 1 Tim. 3:8). Uan miakej xa kiixtaliaj senkis amo tayiskej achto ke kichiuaskej tein yeski tekit tein ika kiueyichiuaj Jiova, porin inintanemilil ijkon kiniluia. Sayoj ke, moneki tikitaskej ke tataman tein momattokej kichiuaskej itech se altepet uan okse uan okachi moneki maj tikmatikan “toni yektik uan toni amo yektik” uan ijkon timoajsiskej tiyektikej itech nochi tein tikchiuaj uan tikyolpaktiskej Dios.

19. 1) ¿Keniuj uelis tikchiuaskej maj okachi techpaleui totaueyichiualis kemej kalyetouanij uan keman timomachtiskej toselti? 2) ¿Toni moneki tikchiuaskej tein techpaleuis maj tiyektikej?

¹⁹ Onkak miak taman tamachtilis tein kitelpia ipatiuj tein uelis tikajsiskej komo ika nejmachkayot tiktemouaj itech iTajtol Dios. Maj tiktekitiltikan nochi manamikmej tein inechikol techmaka uan ijkon okachi techpaleuis totaueyichiualis kemej kalyetouanij uan keman timomachtiaj toselti. Maj okachi tikixmatikan Jiova uan itanejnekilis uan maj okachi timotokikan iuan (Sant. 4:8). Maj tiktajtanikan kemej tajtanik akin kijkuiloj Salmo: “Xiktapo noixtololouan uan ijkon uelis nikyekitas kualtsitsin taman tein kipia motanauatil” (Sal. 119:18). Maj nochipa tiktakamatikan itanauatiluan Jiova, akin “Yolchipauaktsin”, uan maj titapaleuikan ika yolpakilis itech “tekit tein yektik ika kuali tanauatilmej tein kitemaka Dios” (1 Ped. 1:15; Rom. 15:16, TNM). Tinemij itech tonalmej tein semi ouijkej, yejua ika maj tikixtalikan timoajsiskej tiyektikej itech nochi tein tikchiuaj itech tonemilis uan maj tiktekitilikan Jiova kemej toUeyi Taixyekankauj.