1, 2. (a) Kiko Yehova ta spera di su pueblo? (b) E artíkulo akí lo kontestá ki preguntanan?

APÒSTEL PEDRO a sita for di e buki di Levítiko i a splika bou di inspirashon di Dios ku kristiannan, meskos ku e israelitanan, mester ta santu den tur aspekto di nan bida. (Lesa 1 Pedro 1:14-16.) Yehova, “Esun Santu,” ta spera di e ungínan i di e ‘otro karnénan’ ku nan ta hasi nan bèst pa ta santu den tur nan kondukta, sí, den tur loke nan ta hasi.—Huan 10:16.

² Den e artíkulo akí nos lo analisá algun hoya spiritual mas ku tin den e buki di Levítiko ku lo yuda nos komprondé Dios su norma di santidat. Anto si nos apliká loke nos siña, nos lo demostrá ku nos ta santu den tur nos kondukta. Tambe nos lo trata e siguiente preguntanan: Pakiko semper nos mester obedesé e normanan di Yehova? Kiko Levítiko ta siña nos tokante respetá Yehova komo nos úniko Soberano? I kiko nos por siña for di e sakrifisionan ku e israelitanan tabata ofresé?

3, 4. (a) Dikon semper kristiannan mester obedesé e lei- i prinsipionan di Yehova? (b) Dikon nos no mester tuma vengansa ni warda renkor?

³ Pa nos agradá Yehova, nos semper tin ku obedesé su lei- i prinsipionan, i sòru pa nunka nos no desaroyá un aktitut  indiferente òf trata nan komo di ménos importansia. Awe, nos no ta bou di e Lei di Moises mas, pero tòg e Lei ei ta yuda nos komprondé kiko ta aseptabel i kiko ta inaseptabel den bista di Yehova. Por ehèmpel, Yehova a bisa e israelitanan: “No tuma vengansa, ni tene renkor kontra e yunan di bo pueblo, ma stima bo próhimo manera bo mes; ami ta SEÑOR.”—Lev. 19:18.

⁴ Pues, Yehova no ke pa nos tuma vengansa ni warda renkor. (Rom. 12:19) Si nos pasa por haltu di e lei- i prinsipionan di Yehova, nos lo mancha su nòmber i hasi Satanas kontentu. Asta ora un hende hasi nos daño pa malu, nos no mester laga renkor poderá di nos i bira manera “pòchi” ku ta warda renkor. Yehova a duna nos e privilegio di sirbi komo “pòchi di klei” ku ta karga un tesoro. E tesoro ei ta e sirbishi. (2 Kor. 4:1, 7) Renkor ta manera ásido, i p’esei nos lo no ke usa e pòchinan balioso akí pa warda renkor aden!

5. Kiko nos por siña for di e relato di Aron i e morto di su dos yu hòmbernan? (Wak e promé plachi.)

⁵ Na Levítiko 10:1-11, nos ta lesa tokante un eksperensia masha doloroso pa e famia di Aron. Yehova a manda kandela for di shelu pa kaba ku Nadab ku Abiú, e yu hòmbernan di Aron, na e tabernakel. Anto el a bisa Aron ku su famia ku nan no tabatin mag di demostrá niun forma di tristesa pa esei. Lo mester tabata hopi difísil pa nan obedesé e mandato ei! Kiko di abo? Bo ta evitá di asosiá ku miembronan di famia òf amigunan ekspulsá i asina demostrá ku bo ta santu?—Lesa 1 Korintionan 5:11.

6, 7. (a) Riba kiko nos tin ku pensa ora nos tin ku disidí si nos lo partisipá den un kasamentu na misa? (Wak e nota.) (b) Kon nos lo por splika un famia ku no ta Testigu dikon nos no ta partisipá den un kasamentu na misa?

⁶ Kisas awe nos lo no konfrontá un prueba pisá manera esun di Aron ku su famia. Pero kiko si un famia di nos ku no ta Testigu invitá nos na un kasamentu na misa i asta pidi nos partisipá den dje. Aunke no tin un lei spesífiko den Beibel ku ta prohibí nos di bai, tin prinsipionan bíbliko sí ku mester influensiá nos desishon. *

⁷ Nos desishon pa agradá Yehova i keda santu kisas ta sorprendé nos famianan ku no ta Testigu di Yehova. (1 Ped. 4:3, 4) Nos no ke ofendé nan, p’esei nos lo papia kariñosamente ku nan; pero ta importante pa nos splika nos posishon na un manera kla. Kisas lo ta bon pa nos hasi esei hopi promé ku e evenemento mester tuma lugá. Di promé, nos lo por gradisí nan mashá ku nan a pidi nos pa partisipá den nan kasamentu. Kaba nos lo por splika nan ku den e seremonia religioso lo tin kosnan ku nos no por hasi i ku ta mihó pa nos no partisipá den e kasamentu, ya ku nos lo no ke brongosá nan ni nan invitadonan riba e dia tan spesial ei. Esaki ta un manera ku nos por obedesé e normanan di Yehova sin komprometé nos fe.

8. Kon e buki di Levítiko ta enfatisá ku Yehova tin derecho di establesé lei?

⁸ E buki di Levítiko ta enfatisá Yehova su derecho komo Soberano pa establesé lei. Mas ku 30 biaha, nos ta lesa ku ta Yehova a duna e leinan ku tin den Levítiko. Moises tabata sa esaki i p’esei semper el a hasi presis manera Yehova a mand’é. (Lev. 8:4, 5) Meskos ku Moises, semper nos tambe mester obedesé nos úniko Soberano, Yehova. Pa logra esaki, nos por konta ku e apoyo di e organisashon di Dios. Pero tin biaha ku nos lo tin ku demostrá nos obedensia ora nos ta nos so, manera a sosodé ku Hesus ora e tabata den desierto. (Luk. 4:1-13) Kiko nos lo hasi e ora ei? Si nos ta konfia den Dios i ta respet’é komo nos úniko Soberano, niun hende lo no por pone nos bai kontra  su prinsipionan ni nos lo no laga miedu vense nos.—Pro. 29:25.

9. Dikon e pueblo di Dios ta ser odiá den tur nashon?

⁹ Komo siguidónan di Kristu i Testigunan di Yehova, nos ta ser persiguí den vários nashon. Esaki no ta sorprendé nos, pasobra Hesus a bisa su disipelnan: “Hende lo persiguí boso i mata boso, i tur nashon lo odia boso pa motibu di mi nòmber.” (Mat. 24:9) Pero apesar ku hende ta odia nos, nos ta sigui prediká e Reino i ta keda santu den tur nos kondukta. Awor bon, dikon hende tin asina tantu rabia riba nos siendo ku nos ta siudadanonan onesto, ku ta hiba un bida limpi i ordená? (Rom. 13:1-7) Pasobra nos ta obedesé Yehova so komo nos Señor Soberano! “Na e so” nos ta rindi sirbishi sagrado, i hamas nos lo bai kontra su lei- i prinsipionan hustu.—Mat. 4:10.

10. Kiko a pasa ku un ruman hòmber ku no a keda neutral?

¹⁰ Ademas, nos “no ta parti di mundu.” P’esei, nos ta keda neutral i no ta partisipá den guera ni den asuntunan polítiko di mundu. (Lesa Huan 15:18-21; Isaías 2:4.) Pero lamentablemente, algun kristian ku a hasi un dedikashon na Dios no a keda neutral i a bai kontra di prinsipionan bíbliko. Hopi di nan despues a arepentí i a bolbe na nos Tata selestial miserikòrdioso. (Sal. 51:17) Pero tin otronan ku no a arepentí. Por ehèmpel, wak kiko a pasa na Hungria durante Segundo Guera Mundial. Hopi ruman a keda inhustamente enkarselá den prizònnan einan. Algun ofisial a hiba 160 ruman ku tabata bou di 45 aña na un sierto stat i a ordená nan pa drenta servisio militar. Mayoria di nan tabata fiel i a nenga, pero nuebe di e grupo a hasi e huramentu militar i a aseptá pa bisti unifòrm. Dos aña despues, un di e nuebenan ei a haña su mes den un situashon hopi difísil: Nan a asign’é pa forma parti di un peloton di fusilamentu ku tabatin e tarea di ehekutá algun di e Testigunan ku a keda fiel. Imaginá bo kon lo e mester a sintié ora el a mira ku su propio ruman hòmber tabata entre e grupo di esnan fiel! Afortunadamente, nan no a ehekutá e Testigunan ei.

11, 12. Kiko nos ta siña for di e sakrifisionan ku e hendenan tabata ofresé den Israel di antigwedat?

¹¹ E Lei di Moises a bisa spesífikamente ki sakrifisionan e israelitanan mester a ofresé. (Lev. 9:1-4, 15-21) E sakrifisionan mester tabata sin defekto pasobra nan a representá e sakrifisio perfekto di Hesus. Ademas, e israelitanan mester a sigui un prosedura spesífiko pa kada tipo di ofrenda, òf sakrifisio. Por ehèmpel, Levítiko 12:6 ta splika kiko un mama ku a kaba di haña yu mester a hasi: “Ora e dianan di su purifikashon keda kumplí, pa un yu hòmber òf pa un yu muhé, e mester hiba un lamchi di un aña komo un ofrenda kimá, i un pichon òf un tòrteldùif komo un ofrenda pa piká pa e saserdote na entrada di e tènt di reunion.” Loke Dios a rekerí tabata spesífiko, pero tòg e Lei ta laga nos mira bon kla ku Yehova ta un Dios amoroso i rasonabel. Por ehèmpel, si e mama no por a afòrt un karné, e tabatin mag di ofresé dos tòrteldùif òf dos pichon. (Lev. 12:8) Aunke e mama tabata pober, Yehova a stim’é i apresi’é mes tantu ku esun ku a trese un bestia mas kostoso. Kiko nos por siña for di esaki?

¹² Apòstel Pablo a urgi kristiannan pa ofresé Dios “un sakrifisio di alabansa.” (Heb. 13:15) Nos ta duna e sakrifisio di alabansa akí ora nos ta hasi Yehova su nòmber santu konosí i ta proklamá e bon notisia. Klaru ku no ta nos tur tin e mesun sirkunstansianan ni e mesun salú, pero loke ta importante ta pa semper nos duna Yehova lo mihó di nos mes. Por ehèmpel, rumannan surdu ta usa idioma di seña pa alabá Dios.  Kristiannan ku no por sali for di kas pa motibu di edat avansá òf problema ku salú ta alabá Yehova skirbiendo karta, dunando testimonio na telefòn i predikando na hende ku ta kuida nan òf bishitá nan.—Rom. 12:1; 2 Tim. 2:15.

13. Dikon nos mester entregá un rapòrt di nos aktividat den sirbishi di vèlt?

¹³ Ora nos ta ofresé sakrifisio di alabansa na Yehova, nos no ta hasié obligá, sino mas bien pasobra nos ta stim’é. (Mat. 22:37, 38) Pero kiko mester ta nos aktitut ora ta pidi nos pa raportá nos aktividat den sirbishi? Nos mester ta dispuesto pa hasi esei ya ku e rapòrt ku nos ta entregá tur luna ta un manera ku nos ta demostrá nos deboshon na Dios, esta, nos amor i obedensia na dje. (2 Ped. 1:7) Klaru ku niun di nos no mester sinti ku nos ta bou di preshon pa sali bai prediká djis pa nos por yena mas ora riba nos rapòrt. De echo, si un publikadó, debí na su edat òf salú, por dediká solamente 15 minüt pa luna na e predikashon, e tin mag di raportá esei. Yehova ta keda masha kontentu ku e minütnan ei pasobra e sa ku e rumannan akí ta stim’é i ta apresiá e privilegio di por sirbi komo su Testigunan, i ku esaki ta e mihó ofrenda ku nan por dun’é. Manera nos a mira, e israelitanan di pasado ku tabata pober tòg por a ofresé un sakrifisio na Dios. Wèl, asina tambe e rumannan awe ku ta limitá por sinti nan kontentu ku e rapòrt ku nan ta entregá. Nos rapòrtnan individual ta bira parti di e total di e rapòrt mundial, i esei ta permití e organisashon mira unda falta mas yudansa, i asina plania tur loke tin di haber ku e predikashon. Pues, ta muchu pidi pa nos entregá un rapòrt di sirbishi di vèlt fin di luna?

14. Dikon nos mester analisá nos kustumbernan di estudio?

¹⁴ Awor ku nos a analisá algun di e lèsnan balioso ku tin den e buki di Levítiko, kisas bo ta komprondé mihó pakiko e buki akí ta forma parti di e Palabra inspirá di Dios. (2 Tim. 3:16) Podisé esaki ta hasi bo mas determiná pa keda santu, no solamente pasobra Yehova ke esei sino tambe pasobra e meresé lo mihó. Loke bo a siña tokante Levítiko den e dos artíkulonan akí kisas a motivá bo pa hasi un estudio mas profundo di Beibel. (Lesa Proverbionan 2:1-5.) Sin duda, bo ke pa Yehova aseptá bo sakrifisionan di alabansa. P’esei, analisá bo kustumbernan di estudio huntu ku orashon. Puntra bo mes: ‘Mi ta duna Yehova lo mihó? Òf mi ta permití programa di televishon, wega di vidio, deporte òf hòbi stroba mi di hasi progreso den e bèrdat?’ Si ta asina, lo ta bon pa bo meditá riba loke apòstel Pablo a bisa den e buki di Hebreonan.

15, 16. Dikon Pablo tabata asina stret den su karta na e kristiannan hebreo?

¹⁵ Pablo tabata masha franko ora el a skirbi e kristiannan hebreo. (Lesa Hebreonan 5:7, 11-14.) E di ku nan: “Boso a bira slo pa komprondé.” Dikon Pablo tabata asina stret ku nan? Meskos ku Yehova, Pablo tabata stima nan i e tabata preokupá ku nan a purba di sobrebibí riba lechi so, esta, riba un konosementu superfisial di Beibel. Aunke tabata importante pa nan komprondé e  doktrinanan fundamental di kristianismo, nan tabatin mester tambe di “kuminda sólido,” esta, siñansanan mas profundo di Beibel, pa nan por a hasi progreso den e bèrdat i bira kristiannan maduro.

¹⁶ Pero en bes di ku e hebreonan a hasi progreso te ku nan por a siña otro hende, nan mes tabatin mester di hende pa siña nan. Dikon? Pasobra nan no a nutri nan mes ku “kuminda sólido.” Kiko di nos awor? Puntra bo mes: ‘Mi tin e aktitut korekto pa ku siñansanan mas profundo di Beibel? Mi ta hasi esfuerso pa komprondé nan? Mi ta dediká tempu na hasi orashon i na studia Beibel na un manera profundo?’ Si nos tin problema ku esaki, lo por ta pasobra nos a kria e kustumber di studia aribariba? Kòrda ku no ta prediká so nos mester prediká, sino tambe siña hende i hasi nan disipel.—Mat. 28:19, 20.

17, 18. (a) Dikon nos mester hasi esfuerso pa studia e bèrdatnan profundo di Beibel? (b) Kon nos mester mira uso di bibida alkohóliko promé ku reunion?

¹⁷ Pa hopi di nos kisas no ta fásil pa studia Beibel, i Yehova no ta obligá niun hende hasié. Pero asina mes, sea ku nos tin hopi aña komo sirbidónan dediká di Dios òf nos tin poko tempu den e bèrdat, nos tin ku sigui nutri nos mes ku kuminda spiritual sólido. Ta asina so nos por keda santu.

¹⁸ Pa nos por ta santu den bista di Yehova, nos tin ku analisá e Skritura kuidadosamente i hasi loke e ta pidi nos. Laga nos bolbe wak e ehèmpel di Nadab ku Abiú, e yu hòmbernan di Aron. Yehova a ehekutá nan pasobra nan a ofresé “kandela straño,” esta, sakrifisio ku tabata “kontra e reglanan di Dios,” ku kisas nan a hasi bou di influensia di alkohòl. (Lev. 10:1, 2; BPK) Tuma nota di loke Yehova a bisa Aron djis despues di e insidente. (Lesa Levítiko 10:8-11.) E pasashi akí ta nifiká ku nos no mag bebe nada alkohóliko promé ku nos bai un reunion kristian? Wèl, pensa riba e siguiente puntonan: Nos no ta bou di e Lei di Moises mas. (Rom. 10:4) Na algun pais, nos rumannan ta usa bibida alkohóliko ku moderashon ora di kome promé ku bai reunion. Na e Pasku Hudiu, nan tabata usa kuater kopa di biña. Ora Hesus a instituí e Konmemorashon, el a pidi su apòstelnan bebe e biña ku a representá su sanger. (Mat. 26:27) Beibel ta kondená bebementu di mas i buracheria. (1 Kor. 6:10; 1 Tim. 3:8) I hopi ruman, pa motibu di nan konsenshi, kisas no ta bebe nada alkohóliko promé ku nan partisipá den kualke forma di sirbishi sagrado. Pero nos tin ku tene kuenta ku sirkunstansianan ta varia di un pais pa otro, i ku e kos importante ta pa nos “hasi un distinshon entre loke ta santu i loke ta profano” pa asina nos ta sigur ku nos ta agradá Yehova i ta santu den tur loke nos ta hasi.

19. (a) Kiko por yuda nos saka máksimo probecho di nos adorashon komo famia i nos estudio personal? (b) Kon bo por demostrá ku bo ta determiná pa keda santu?

¹⁹ Tin hopi tesoro spiritual ku nos por deskubrí den e Palabra di Dios si nos hasi esfuerso pa buska nan. E organisashon ta duna nos un kantidat di hèrmènt ku por yuda nos saka máksimo probecho di nos adorashon komo famia i di nos estudio personal. Bo ta hasiendo uso di nan? Siña konosé Yehova i su propósito mas mihó, i hala mas i mas serka dje. (Sant. 4:8) Pidi Yehova meskos e salmista ku a kanta: “Habri mi wowo, pa mi por kontemplá kosnan maravioso for di bo lei.” (Sal. 119:18) No bai nunka kontra e lei- i prinsipionan di Beibel. Obedesé boluntariamente e lei supremo di Yehova, “Esun Santu,” i partisipá ku entusiasmo den “e trabou santu di deklará e bon notisia di Dios.” (1 Ped. 1:15; Rom. 15:16) Nos ta bibando den tempunan krítiko, pues nos mester ta determiná pa keda santu den tur nos kondukta i sirbi Yehova komo nos úniko Soberano.