1, 2. (a) Kico Jehova ta spera di su sirbidornan? (b) E articulo aki lo contesta ki preguntanan?

APOSTEL Pedro a cita for di e buki di Levitico y a splica bou di inspiracion di Dios cu cristiannan, mescos cu e Israelitanan, mester ta santo den tur aspecto di nan bida. (Lesa 1 Pedro 1:14-16.) Jehova, “Esun Santo”, ta spera di e unginan y di e ‘otro carnenan’ cu nan ta haci nan best pa ta santo ‘den tur nan conducta’, si, den tur loke nan ta haci.—Juan 10:16.

² Den e articulo aki nos lo analisa algun joya spiritual mas cu tin den e buki di Levitico cu lo yuda nos compronde Dios su norma di santidad. Anto si nos aplica loke nos siña, nos lo demostra cu nos ta santo den tur aspecto di nos bida. Tambe nos lo trata e siguiente preguntanan: Pakico semper nos mester obedece e normanan di Jehova? Kico Levitico ta siña nos tocante respeta Jehova como nos unico Soberano? Y kico nos por siña for di e sacrificionan cu e Israelitanan tabata ofrece?

3, 4. (a) Dicon semper cristiannan mester obedece e ley- y principionan di Jehova? (b) Dicon nos no mester tuma venganza ni warda rencor?

³ Pa nos agrada Jehova, nos semper tin cu obedece su ley- y principionan, y percura pa nunca nos no desaroya un actitud  indiferente of haci comosifuera esakinan no ta dje importante ey. Awe, nos no ta bou di e Ley di Moises mas, pero toch e Ley ey ta yuda nos compronde kico ta aceptabel y kico ta inaceptabel den bista di Jehova. Por ehempel, Jehova a bisa e Israelitanan: “No tuma venganza, ni tene rencor contra e yiunan di bo pueblo, ma stima bo prohimo manera bo mes; ami ta SEÑOR.”—Lev. 19:18.

⁴ Pues, Jehova no kier pa nos tuma venganza ni warda rencor. (Rom. 12:19) Si nos pasa por alto di e ley- y principionan di Jehova, nos lo mancha su nomber y haci Satanas contento. Hasta ora un hende haci nos daño pa malo, nos no mester laga rencor podera di nos. Jehova a duna nos e privilegio di sirbi como “pochi di klei” cu ta carga un tesoro. E tesoro ey ta e sirbishi. (2 Cor. 4:1, 7) Rencor ta manera acido, y pesey nos lo no kier uza e pochinan valioso aki pa warda rencor aden.

5. Kico nos por siña for di e relato di Aaron y e morto di su dos yiu hombernan? (Wak e prome plachi.)

⁵ Na Levitico 10:1 pa 11, nos ta lesa tocante un experencia masha doloroso pa e famia di Aaron. Jehova a manda candela for di cielo pa caba cu Nadab cu Abiu, e yiu hombernan di Aaron, na e tabernakel. Anto el a bisa Aaron cu su famia cu nan no tabatin mag di mustra nan tristeza di ningun manera. Lo mester tabata hopi dificil pa nan obedece e mandato ey. Kico di abo? Bo ta evita di asocia cu miembronan di famia of amigonan expulsa y asina demostra cu bo ta santo?—Lesa 1 Corintionan 5:11.

6, 7. (a) Riba kico nos tin cu pensa ora nos tin cu dicidi si nos lo participa den un casamento na misa? (Wak e nota.) (b) Con nos lo por splica un famia cu no ta Testigo dicon nos no ta participa den un casamento na misa?

⁶ Kisas awe nos lo no confronta un prueba pisa manera esun di Aaron cu su famia. Pero kico si un famia di nos cu no ta Testigo invita nos na un casamento na misa y hasta pidi nos participa den dje. Aunke no tin un ley specifico den Bijbel cu ta prohibi nos di bay, tin principionan biblico si cu mester influencia nos decision. *

⁷ Nos decision pa agrada Jehova y keda santo kisas ta sorprende nos famianan cu no ta testigo di Jehova. (1 Ped. 4:3, 4) Nos no kier ofende nan, pesey nos lo papia cariñosamente cu nan; pero ta importante pa nos splica nos posicion na un manera cla. Kisas lo ta bon pa nos haci esey hopi prome cu e evenemento tuma luga. Prome cos cu nos lo por haci ta gradici nan masha hopi cu nan a pidi nos pa participa den nan casamento. Despues nos lo por splica nan cu den e ceremonia religioso lo tin cosnan cu nos no por haci y cu ta mihor pa nos no participa den e casamento, ya cu nos lo no kier brongosa nan ni nan invitadonan riba e dia tan special ey. Esaki ta un manera cu nos por obedece e normanan di Jehova sin compromete nos fe.

8. Con e buki di Levitico ta enfatisa cu Jehova tin derecho di establece ley?

⁸ E buki di Levitico ta enfatisa Jehova su derecho como Soberano pa establece ley. Mas cu 30 biaha, nos ta lesa cu ta Jehova a duna e leynan cu tin den Levitico. Moises tabata sa esaki y pesey semper el a haci precies manera Jehova a mand’e. (Lev. 8:4, 5) Mescos cu Moises, semper nos tambe mester obedece nos unico Soberano, Jehova. Pa logra esaki, nos por conta cu e apoyo di e organisacion di Dios. Pero tin biaha cu nos lo tin cu demostra nos obediencia ora nos ta nos so, manera a sosode cu Hesus ora e tabata den desierto. (Luc. 4:1-13) Kico nos lo haci e ora ey? Si nos ta confia den Dios y ta respet’e como nos unico Soberano, niun hende lo no por pone nos bay contra su principionan ni nos lo no laga miedo vence nos.—Prov. 29:25.

9. Dicon e sirbidornan di Dios ta ser odia den tur nacion?

 ⁹ Como siguidornan di Cristo y testigonan di Jehova, nos ta ser persigui den varios nacion. Esaki no ta sorprende nos, pasobra Hesus a bisa su discipelnan: “Hende lo persigui boso y mata boso, y tur nacion lo odia boso pa motibo di mi nomber.” (Mat. 24:9) Pero a pesar cu hende ta odia nos, nos ta sigui predica e Reino y ta keda santo den tur aspecto di nos bida. Awor, dicon hende tin asina tanto rabia riba nos siendo cu nos ta ciudadanonan honesto, cu ta hiba un bida limpi y ordena? (Rom. 13:1-7) Pasobra nos ta obedece solamente Jehova como nos Señor Soberano! “Na e so” nos ta rindi sirbishi sagrado, y hamas nos lo bay contra su ley- y principionan husto.—Mat. 4:10.

10. Kico a pasa cu un ruman homber cu no a keda neutral?

¹⁰ Ademas, nos “no ta parti di mundo.” Pesey, nos ta keda neutral y no ta participa den guera ni den asuntonan politico di mundo. (Lesa Juan 15:18-21; Isaias 2:4.) Pero lamentablemente, algun cristian cu a dedica nan bida na Dios no a keda neutral y a bay contra di principionan biblico. Hopi di nan despues a arepenti y a bolbe na nos misericordioso Tata celestial. (Sal. 51:17) Pero tin otronan cu no a arepenti. Por ehempel, wak kico a pasa na Hungria durante Segundo Guera Mundial. Hopi ruman a ser encarcela inhustamente den prizonnan eynan. Algun oficial a hiba 160 ruman cu tabata bou di 45 aña na un cierto stad y a ordena nan pa drenta servicio militar. Mayoria di nan a keda fiel y a nenga, pero nuebe di e grupo a haci e huramento militar y a acepta pa bisti uniform. Dos aña despues, un di e nuebenan ey a haya su mes den un situacion hopi dificil: Nan a asign’e pa forma parti di un peloton di fusilamento cu tabatin e tarea di ehecuta algun di e Testigonan cu a keda fiel. Imagina bo con lo e mester a sintie ora el a mira cu su propio ruman homber tabata entre e grupo di esnan fiel! Afortunadamente, nan no a ehecuta e Testigonan ey.

11, 12. Kico nos ta siña for di e sacrificionan cu e hendenan tabata ofrece den Israel di antiguedad?

¹¹ E Ley di Moises a bisa specificamente ki sacrificionan e Israelitanan mester a ofrece. (Lev. 9:1-4, 15-21) E sacrificionan mester tabata sin defecto pasobra nan a representa e sacrificio perfecto di Hesus. Ademas, e Israelitanan mester a sigui un procedura specifico pa cada tipo di ofrenda, of sacrificio. Por ehempel, Levitico 12:6 ta splica kico un mama cu a caba di haya yiu mester a haci: “Ora e dianan di su purificacion keda cumpli, pa un yiu homber of pa un yiu muher, e mester hiba un lamchi di un aña como un ofrenda kima, y un pichon of un tortelduif como un ofrenda pa pica pa e sacerdote na entrada di e tent di reunion.” Loke Dios a rekeri tabata specifico, pero toch e Ley ta laga nos mira bon cla cu Jehova ta un Dios amoroso y rasonabel. Por ehempel, si e mama no por a afford un carne, e tabatin mag di ofrece dos tortelduif of dos pichon. (Lev. 12:8) Aunke e mama tabata pober, Jehova a stim’e y apreci’e mes tanto cu esun cu a trece un bestia mas costoso. Kico nos por siña for di esaki?

¹² Apostel Pablo a urgi cristiannan pa ofrece Dios “un sacrificio di alabanza.” (Heb. 13:15) Nos ta duna e sacrificio di alabanza aki ora nos papia cu otro hende tocante Jehova su nomber santo. Claro cu no ta nos tur tin e mesun circunstancianan ni e mesun salud, pero loke ta importante ta pa semper nos duna Jehova lo mihor di nos mes. Por ehempel, rumannan sordo ta uza idioma di seña pa alaba Dios. Cristiannan cu no por sali for di cas pa motibo di edad avansa of problema cu salud ta alaba Jehova  skirbiendo carta, dunando testimonio via telefon y predicando na hende cu ta cuida nan of bishita nan.—Rom. 12:1; 2 Tim. 2:15.

13. Dicon nos mester entrega un rapport di nos actividad di sirbishi di veld?

¹³ Ora nos ta ofrece sacrificio di alabanza na Jehova, nos no ta haci esey como un obligacion, sino mas bien pasobra nos ta stim’e. (Mat. 22:37, 38) Nos ta ser pidi pa entrega nos rapport di sirbishi. Dicon nos ta haci esey? Wel, nos ta dispuesto pa haci esey ya cu e rapport cu nos ta entrega tur luna ta un manera cu nos ta demostra nos devocion na Dios, esta, nos amor y obediencia na dje. (2 Ped. 1:7) Claro cu niun di nos no mester sinti cu nos ta bou di presion pa sali predica djis pa nos por yena mas ora riba nos rapport. En realidad, si un publicador, debi na su edad of salud, por dedica solamente 15 minuut pa luna na e predicacion, e tin mag di raporta esey. Jehova ta keda masha contento cu e minuutnan ey pasobra e sa cu e rumannan aki ta stim’e y ta aprecia e privilegio di por sirbi como su Testigonan, y cu esaki ta e mihor ofrenda cu nan por dun’e. Manera nos a mira, e Israelitanan di pasado cu tabata pober toch por a ofrece un sacrificio na Dios. Wel, asina tambe e rumannan awe cu no por haci hopi den sirbishi por sinti nan contento cu e rapport cu nan ta entrega. Nan ta compila un rapport mundial di tur nos rapportnan individual, y esey ta permiti e organisacion mira unda falta mas yudansa, y asina nan por plania tur loke tin di haber cu e predicacion. Pues, esey ta e motibo cu nos ta entrega nos rapport di sirbishi di veld fin di luna.

14. Dicon nos mester analisa nos custumbernan di estudio?

¹⁴ Awor cu nos a analisa algun di e lesnan valioso cu tin den e buki di Levitico, kisas bo ta compronde mihor pakico e buki aki ta forma parti di e Palabra inspira di Dios. (2 Tim. 3:16) Podise esaki ta haci bo mas determina pa keda santo, no solamente pasobra Jehova kier esey sino tambe pasobra e merece lo mihor. Loke bo a siña tocante Levitico den e dos articulonan aki kisas a motiva bo pa haci un estudio mas profundo di Bijbel. (Lesa Proverbionan 2:1-5.) Sin duda, bo kier pa Jehova acepta bo sacrificionan di alabanza. Pesey, analisa bo custumbernan di estudio hunto cu oracion. Puntra bo mes: Mi ta duna Jehova lo mihor? Of mi ta permiti programa di television, video game, deporte of hobby stroba mi di haci progreso den e berdad? Si ta asina, lo ta bon pa bo medita riba loke apostel Pablo a bisa den e buki di Hebreonan.

15, 16. Dicon Pablo tabata asina stret den su carta na e cristiannan Hebreo?

¹⁵ Pablo tabata masha franco ora el a skirbi e cristiannan Hebreo. (Lesa Hebreonan 5:7, 11-14.) E di cu nan: “Boso a bira slow pa compronde.” Dicon Pablo tabata asina stret cu nan? Mescos cu Jehova, Pablo tabata stima nan y e tabata preocupa cu nan a purba di sobrevivi bebiendo lechi spiritual so, esta, un conocemento superficial di Bijbel. Aunke tabata importante pa nan  compronde e doctrinanan fundamental di cristianismo, nan tabatin mester tambe di “cuminda solido”, esta, siñansanan mas profundo di Bijbel, pa nan por a haci progreso den e berdad y bira cristian maduro.

¹⁶ Pero en bes di a haci progreso pa nan por a siña otro hende, e Hebreonan mes tabatin mester di hende pa siña nan. Dicon? Pasobra nan no a nutri nan mes cu “cuminda solido.” Kico di anos? Puntra bo mes: Mi tin e actitud corecto pa cu siñansanan mas profundo di Bijbel? Mi ta haci esfuerso pa compronde nan? Mi ta dedica tempo na haci oracion y na profundisa mi mes den estudio di Bijbel? Si nos tin problema cu esaki, lo por ta pasobra nos tin custumber di studia aribariba? Corda cu no ta predica so nos mester predica, sino tambe siña hende y haci nan discipel.—Mat. 28:19, 20.

17, 18. (a) Dicon nos mester haci esfuerso pa studia e berdadnan profundo di Bijbel? (b) Con nos mester mira uzo di bibida alcoholico prome cu reunion?

¹⁷ Pa hopi di nos kisas no ta facil pa studia Bijbel, y Jehova no ta obliga niun hende haci esey. Pero asina mes, sea cu nos tin hopi aña como sirbidornan dedica di Dios of nos tin poco tempo den e berdad, nos tin cu sigui nutri nos mes cu cuminda spiritual solido. Ta asina so nos por keda santo.

¹⁸ Pa nos por ta santo den bista di Jehova, nos tin cu analisa e Scritura cuidadosamente y haci loke e ta pidi nos. Laga nos bolbe wak e ehempel di Nadab cu Abiu, e yiu hombernan di Aaron. Jehova a ehecuta nan pasobra nan a ofrece “candela straño”, esta, sacrificio cu tabata “kontra reglanan di Dios” (BPK), cu kisas nan a haci bou di influencia di alcohol. (Lev. 10:1, 2) Tuma nota di loke Jehova a bisa Aaron un poco despues di e incidente. (Lesa Levitico 10:8-11.) Esey ta nifica cu nos no mag bebe nada alcoholico prome cu nos bay un reunion cristian? Wel, pensa riba e siguiente puntonan: Nos no ta bou di e Ley di Moises mas. (Rom. 10:4) Na algun pais, nos rumannan ta uza bibida alcoholico cu moderacion ora di come prome cu bay reunion. Na e Pasco Hudiu, nan tabata uza cuater copa di biña. Ora Hesus a institui e Conmemoracion, el a pidi su apostelnan bebe e biña cu a representa su sanger. (Mat. 26:27) Bijbel ta condena bebemento di mas y buracheria. (1 Cor. 6:10; 1 Tim. 3:8) Y hopi ruman, pa motibo di nan consenshi, kisas no ta bebe nada alcoholico prome cu nan participa den cualkier forma di sirbishi sagrado. Pero nos tin cu tene cuenta cu circunstancianan ta varia di un pais pa otro, y cu e cos importante ta pa nos “haci un distincion entre loke ta santo y loke ta profano” pa asina nos ta sigur cu nos ta agrada Jehova y ta santo den tur loke nos ta haci.

19. (a) Kico por yuda nos saca maximo probecho di nos adoracion como famia y nos estudio personal? (b) Con bo por demostra cu bo ta determina pa keda santo?

¹⁹ Tin hopi tesoro spiritual cu anos por descubri den e Palabra di Dios si nos haci esfuerso pa busca nan. E organisacion ta duna nos un cantidad di herment cu por yuda nos saca maximo probecho di nos adoracion como famia y di nos estudio personal. Bo ta haciendo uzo di nan? Siña conoce Jehova y su proposito mas mihor, y hala mas y mas cerca dje. (Sant. 4:8) Pidi Jehova mescos e salmista cu a canta: “Habri mi wowo, pa mi por contempla cosnan maraviyoso for di bo ley.” (Sal. 119:18) No bay nunca contra e ley- y principionan di Bijbel. Obedece boluntariamente e ley supremo di Jehova, “Esun Santo”, y participa cu entusiasmo den “e trabou santo di declara e bon noticia di Dios.” (1 Ped. 1:15; Rom. 15:16) Nos ta bibando den temponan critico, pues nos mester ta determina pa keda santo den tur aspecto di nos bida y sirbi Jehova como nos unico Soberano.