1, 2. (a) Ngerang mengerechir a Jehovah er a rechedal? (b) Tia el suobel ngmo onger a ngera el ker?

 A JEHOVAH a ulemekrael er a Petrus el mo omelekl a tekoi el medung er a babier er a Levitikus e dochelii el kmo, a Rekristiano a di ua rechad er a Israel el mle kirir el mo chedaol. (Monguiu er a 1 Petrus 1:14-16.) A Jehovah a chedaol, me ngmengerechir er a rengellitel me a ‘rekuk bebil el sib’ el mo melasem er a tkurrebab el sebechir el mo chedaol er a rokui el tekoi el loruul.​—Jn. 10:16.

² Ngar er tia el suobel e kede mo mesaod a omellach el mengai er a babier er a Levitikus el ngosukid el mo chedaol er aike el rokui el tekoi el doruul er a klengar er kid. Kede dirrek el mo onger aika el ker el kmo: Ngkirel el mo ua ngera uldesued el kirel a llechul a Jehovah me a omellach er ngii? Ngera kede suubii er a Levitikus el kirel a rolel a dolisiich er a omengederederel a Jehovah? E ngera kede suubii er aike el tenget el lullenget a rechad er a Israel er a irechar?

3, 4. (a) Ngera uchul me ngdiak el kired el mengebekakl a llechul a Dios me a omellach er ngii? (b) Ngera me ngdiak el kired el melaitechei me a lechub e dolemolem er a ngesechel a rengud?

³ A lsekum ngsoad el odeuir a rengul a Jehovah, e ngkired el olengesenges a llechul me a omellach er ngii er a bek el taem, el diak  dongebekakl a bebil er ngii. Kid a diak dengar er cheungel a Llach er a Moses er chelechang, engdi ngsebechel el ngosukid el mo medengei a uldesuel a Jehovah el kirel a ungil me a mekngit. El ua tiang, a rechad er a Israel a mluchelechel el kmo: “Lak molaitechei er a ngii di le chad, ma lechub e di mouketui er ngii, e bai bo le betik a rengum er a re ngodech el chad el di ua le betik a rengum er kau. Ngak a RUBAK.”​—Lev. 19:18.

⁴ A Jehovah a chetil a dolaitechei me a lechub e dolemolem er a ngesechel a rengud. (Rom 12:19) A lsekum kede mengemikr a llechul a Dios me a omellach er ngii, e ngmo dmeu a rengul a Satan e kid a dirrek el mo otubii a ngklel a Dios. Me alta e a chad a kmal mo tomellii a rengud, engdi ngdiak el kired el di melemolem el kesib a rengud er ngii. A Biblia a mesaod er kid el kmo kede ua “bekai el oltekau er a meringelchad el klalo,” el ngii a omesiunged el mo er a Dios. (2 Ko. 4:1, 7) Me ngdiak el soad el nguu a ngasecherreng el ngii a ua acid el mo mesuk er ngii er a chelsel tia el bekai el oltekau a meringelchad el klalo.

5. Ngera kede suubii er a tekoi el dilubech el mo er a Aron me a rengelekel? (Momes er a siasing er a uchelel a suobel.)

⁵ Ngar er a Levitikus 10:1-11 e kede menguiu el kirel a tekoi el dilubech el mlo uchul a klou el kngtil a rengul a Aron me a rechedal. A Jehovah a ultengelii a ngau er a eanged el sosebeterir a rengelekel a Aron el Nadab me a Abihu, e dilu er a Aron me a rechedal me lak longeiung el kirir. Me tiang a ulterekokl el kmal millasem a klaumerang er tir! Me kau ke melemolem el chedaol el okiu sel mongeroid er kau er a rechad er a blim me a rekuk bebil el milsuld a ngklir?​—Monguiu er a 1 Korinth 5:11.

6, 7. (a) Ngera kired el melatk er ngii a lsekum a chad a soal a dobengkel el ngar er aike el telengtengil a chebechiielel er a ikelesia er ngii? (Momes er a footnote.) (b) Kede mekerang e mo ungil el smodid er ngii?

⁶ Nglocha diak bo el measem a klaumerang er kid el ua Aron me a rechedal. Engdi kede mo mekerang a lsekum a chedad el diak el Sioning a olengit er kid el mo obengkel el ngar er aike el telengtengil a chebechiielel er a ikelesia er ngii? Ngdiak a llach er a Biblia el olekebai er kid me lak debong, engdi ngar er ngii a omellach el kired el melatk sel doruul a omelilt er kid el kirel tia el tekoi. *

⁷ A blakerreng er kid el soad el melemolem el chedaol e odeuir a rengul a Jehovah a sebechel el omekerrau a rengrir a rechedad. (1 Pe. 4:3, 4) Ngdiak el soad el olengasech a rengrir, me ngkired el mo melemalt e ungil el mengedecheduch er tir. Ngungil a dongedecheduch el smaod a tekoi el mo er tir er a uchei. Ngsebeched el mereng a sulir el mle sorir el mengemedaol er kid el mo teloi er a merengel a chebechiielir. E dochelii el kmo, ngkmal soad a bo ledeu a rengrir er tia el ileakl el sils er tir, me ngdiak el soad el meruul a tekoi el mo uchul e kede omekrur er tir e le kid el diak dekengei el teloi a ngii di el rolel a omengull er tir. Me tia el omerelled a mo omekerreu er kid me ngdiak bo detemellii a llechul a Jehovah.

8. Ngmekerang a babier er a Levitikus e melisiich er a llemeltel a Jehovah el mengedereder?

⁸ A babier er a Levitikus a melisiich er a llemeltel a Jehovah el mengedereder. Tia el babier a betok er a 30 el taem el losaod el kmo, a llach el ngar er a chelsel a mla er a Dios el mei. A Moses a mle medengelii tia el tekoi me ngkilengei el olengesenges a llechul. (Lev. 8:4, 5) Me ngsoad el mo ua Moses el mo blechoel el meruul a soal a Jehovah. Me alta kede melai a ngeso me a omelisiich er a cheldebechelel a Dios, engdi ngmo er ngii taem el bo el measem a klaumerang er kid sel di lekid el tang, el ua tekoi el dilubech el mo er a Jesus er a lengar er a ked. (Lk. 4:1-13) A lsekum kede oumerang er a  Dios e melisiich er a llemeltel el mengedereder, e ngdiak demorimel me a lechub e bo demedakt er a rechad e dolemall a llechul.​—Osi. 29:25.

9. Ngera uchul me a rechad er a bek el beluu a ouketui er a rechedal a Dios?

⁹ Ngdiak el mechas a rengud er a ultok el lechelebangel er ngii a rechedal a Dios er a beluulechad el rokir, e le Jesus a dilu er a redisaiplo er ngii el kmo: “Kemiu a bo le ngikemiu el mo omekcharm er kemiu, e mo omekoad er kemiu. Ma rokui el chad a mo ouketui er kemiu el ngak a uchul.” (Mt. 24:9) Me alta e a rechad a ouketui er kid, engdi kede melemolem el omerk er a klumech e mo melemalt a omerelled er a bek el taem. Ngdiak domulak e klikiid a omerelled me a bedenged. Kede dirrek el kerekikl el oltirakl a llach er a beluu. Me ngera uchul me a rebebil a ouketui er kid? (Rom 13:1-7) E le kid a di ta el Jehovah el Merredeled a dolengesenges er ngii. Ngdi ngii el tang a dongull e meluluuch er ngii, e kmal diak dekengei el mo melemall a llechul me a omellach er ngii.​—Mt. 4:10.

10. Ngera dilubech el mo er a odam el kilengei el mo soldau?

¹⁰ Kid a ‘diak dechedal tia el beluulchad,’ me ngdiak deteloi me a lechub e dolab el mo er a bitang me a bitang er a tekoi er a balatiks me a mekemad. (Monguiu er a Johanes 15:18-21; Isaia 2:4.) A rebebil el Kristiano el mla tuib a rengrir el mo er a Dios a mlo diak loltirakl a llechul el kirel aika el tekoi. E a uriul e a rebetok er tir a uluuchel a rengrir e liluut el mo mesiou er a Jehovah. (Psa. 51:17) Me nguaisei, engdi te mla er ngii a rebebil el dimlak lobult. El ua tiang, sera taem er a Ongeru el Mekemedil a Beluulechad e te betok el odam a mlekelebus er a beluu er a Hungary. A rulab a dereder a ngilititerir a re 160 er tirka el rudam el mle ngariou er a 45 a rekrir, e milengudel er tir er a chimo el beluu e ulerrimel er tir el mo soldau. A ruumesingd er tir a dimlak lekengei, engdi a re 9 er tir a kilengei el mo soldau e ngilai a bilir er a klsoldau. Me a eru el rak er a uriul, e a ta er tirke el kilengei el mo soldau a mlodurech el mo omekoad er tirke el Sioning el millemolem el blak a rengrir. E a ta er tir a mle obekul! Me nguaisei, engdi tia el tekoi a dimlak lemeketmokl.

11, 12. Ngera kede suub er aike el tenget el lullenget a rechad er a Israel?

¹¹ A Llach a mileketakl aike el tenget el mle kirir a rechad er a Israel el melenget. (Lev. 9:1-4, 15-21) Me a tengetengir a mle kirel el diak a telemellel e le ngmillutk er sel cherrungel el tengetengel a Jesus. Me a lmuut el tang, a Llach a mle komakai a omesodel a rolel a loldars a tengetengir. A Levitikus 12:6 a mesaod aike el kirel a chedil el meruul sel lochellii a ngelekel el kmo: “Sel bo le merek a ikel sils er omengikiid er ngii, e a ble le sechal a ngelekel ma lechub e ng redil, e ng mo nguu a ta rekil el ngelekel a sib el mo msa prist er a medal a Tento er ongdibel el mo delaol tenget, e dirrek el mo oba el mong a belochel er a ked ma lechub e ng ulekeroul el ngelekel a belochel el mo tenget er a klengit.” Me alta e a Jehovah a mla smaod a tekoi el soal a loruul a rechedal, engdi a Llach a mileketeklii el kmo ngbetik a rengul e tabesul a omerellel. El ua tiang, a chedil el dimlak el sebechel el melenget a sib a mle sebechel el tonget a teblo el belochel er a ked me a lechub e ngteblo el ulekeroul el ngelekel a belochel. (Lev. 12:8) Me a bltkil a rengul a Jehovah el mo er ngika el chebuul el chedil a di ua bltkil a rengul el mo er tirke el millenget a meklou el tenget. Me ngera kede suubii er tia el tekoi?

¹² A apostol el Paulus a milengelechel er a Rekristiano me loldars “a tenget er odanges” el mo er a Dios. (Heb. 13:15) Kede meruul er tiang sel dongedecheduch er a rechad el kirel a ngklel a Jehovah. A rudam me a rudos el mechad a dingerir a ousbech a sign language el oldanges er a Dios. Me a Rekristiano el diak el sebechir el tuobed er a blirir a oldanges er a  Jehovah el okiu sel loluches a babier, e lousioning el ousbech a dengua, e lomerk er a klumech el mo er tirke el oldingel er tir. Me alta e a odanges el debsa Jehovah a ultuil er a klisichel a bedenged me aike el sebeched, engdi ngkired el msa aike el kot el ungil er kid.​—Rom 12:1; 2 Ti. 2:15.

13. Ngera uchul me ngkired el meluches a temed er a odingel?

¹³ A bltkil a rengud el mo er a Jehovah a uchul me kede kongei el oldanges er ngii. (Mt. 22:37, 38) Engdi ngkirel el mo ua ngera uldesued er chelecha el bla demuklatk el mo meluches a temed er a odingel er a bek el buil? Ngkired el kongei el meluches e le kid el meluu er a Dios. (2 Pe. 1:7) Me nguaisei, engdi ngdiak el kired el omdasu el kmo ngkired el menglou er a temed er a odingel me bo lungil a report er kid. Me a lsekum a publisher a di sebechel el oldingel el 15 el bung er a ta el buil e le ngsecher me a lechub e ngcheluodel a uchul, e ngdirk sebechel el meluches a temel. Me a Jehovah a dmeu a rengul er ngii e le ngmeruul aike el rokui el sebechel. Ngmedengei el kmo a rudam me a rudos a betik a rengrir er Ngii e kmal sorir el Sioning er Ngii. A Jehovah a kongei aike el report er tirke el diak el sebechir el mengoit a kemanget el taem er a omesiungir, el di ua omerellel el kilengei a tengetengir a remechebuul el chad er a Israel er a irechar. Me aike el report er kid a uldimukl er a report er a rudam me a rudos er kid er a beluulechad el rokir, e aikang a ngosuir a cheldebechelel a Jehovah el mo kutmokl a tekoi el usbechall me lolemolem a ureor er a berkel a klumech. Tiakid a uchul me kede meluches a temed er a odingel.

14. Mosaod er a uchul me ngkired el merriter er a omesubed el di kid el tang.

¹⁴ Chelecha el bla desuub a bebil el tekoi er a babier er a Levitikus, e kau ngsebechem el mo medengelii a uchul me tia el babier a llechukl er a Biblia el ngii a Tekingel a Dios? (2 Ti. 3:16) Ke mla tibir er a rengum el mo chedaol er a rokui el tekoi el moruul? A Jehovah a mengerechir er kid el mo msang aike el kot el ungil er kid e ngii a rredemelel a ngmai aika el tekoi. Aika el suobel a locha dirrek el mla ngosukau el mo soam el lmuut el menglou er a klemedengei er kau er aike el bebil er a babier er a Biblia. (Monguiu er a Osisechakl 2:1-5.) Me di lekau el merriter er a omesubem el di kau el tang, e molatk el kmo: ‘Ngak ak msa Jehovah aike el kot el ungil er ngak? Me a lechub e ak mechei a show er a TV, video games, sports, me a lechub aike el soak el meruul el tekoi me ngmengesang er ngak el uchul me ngdiak kulengeriakl er a omesiungek?’ A leuaisei, e ngungil el molatk er a tekingel a Paulus el llechukl er a babier er a Hebru.

15, 16. Ngera uchul me a Paulus a di mle beches el melekoi a tekingel er a loluches el mo er a Rekristiano el chad er a Hebru?

¹⁵ A Paulus a di mle beches el melekoi a tekingel er a loluches el mo er a Rekristiano el chad er a Hebru. (Monguiu er a Hebru 5:7, 11-14.) Ngdilu el kmo: “Ng kmal cheldeng a rengmiu.” E ngera uchul me ngdi mle beches el melekoi? Ngdi mle ua uldesuel a Jehovah el mle betik a rengul er tir e miltebengii el kmo te mle ua ngalek el dirk tmut e dimlak el sorir el menglou a klemedengei er tir er a osisecheklel a Biblia. Me  alta ngklou a ultutelel el dosuub aike el beot el osisechakl el ngar er a Biblia, engdi ngdirrek el kired el mo menga “medecherecher el kall,” el ngii a dmolech el osisechakl el ngar er a Biblia, me bo el sebeched el meleketek a klaumerang er kid e dolengeriakl er a omesiunged.

¹⁶ Tirka el Kristiano el chad er a Hebru a mle metitur el olisechakl er a rebebil, me te dirk uluusbech er a chad el mo olisechakl er tir. E ngera uchul? E le tir el mle chetirir el menga “medecherecher el kall.” Me di lekau el oker el kmo: ‘Ngua ngera uldesuek el kirel aike el dmolech el osisechakl el ngar er a Biblia? Ak semeriar el mesuub er ngii? Me a lechub e ak di oltirakl aike el bla ksuub e diak kulengeriakl er a omesubek me a rolel a kululuuch? A lsekum nguaisei, e ngak ngkirek el mesmechokl er a rolel a omesubek el di ngak el tang?’ Kid a diak di domerk er a klumech el mo er a rechad, e ngdirrek el kired el olisechakl er tir e ngosuterir me te mo disaiplo er a Kristus.​—Mt. 28:19, 20.

17, 18. (a) Ngera uchul me ngkired el blechoel el menga “medecherecher el kall”? (b) Ngkirel el mo ua ngera uldesued el kirel a omelim el rrom er a uchei er a temel a miting er kid?

¹⁷ A rebetok a meringel er tir el mesuub er a Biblia. Me a Jehovah a diak lorrimel er kid el mo mesuub. Engdi ngkired el melemolem el menga “medecherecher el kall,” alta kede mla metecholb el betok el rak, e le ngsmisichid me bo el sebeched el melemolem el chedaol er aike el rokui el tekoi el doruul.

¹⁸ A lsoad el mo chedaol, e ngkired el mo kerekikl el mesuub er a Biblia e meruul a soal a Dios. A rengelekel a Aron el Nadab me a Abihu a mlad e le tir el uleldars er a “diak le chedaol el ngau,” e tirkang a locha mle cheltelaol er sera loruul er tia el tekoi. (Lev. 10:1, 2) Ka momtab er a tekingel a Dios el mo er a Aron er a uriul er a leduubech tia el tekoi. (Monguiu er a Levitikus 10:8-11.) Me aika el bades, ngbelkul a kmo ngdiak el kired el melim a ngii di el rrom er a uchei er a debo er a miting er a Rekristiano? Ka molatk aika el tekoi: Kid a diak dengar er cheungel a Llach. (Rom 10:4) Me ngar er a bebil el beluu, e a rudam me a rudos a melim a di sesei el rrom er a uchei er a lebo er a miting. Sera longedaol er a Baskua a rechad er a Judea e te millim a kleua el kob el bilong. Me a Jesus er sera loruul er a Chedaol Belsoil e ngdilu er a rechapostol er ngii me lolim a bilong el ulemtechei er a rsechel. (Mt. 26:27) Engdi a Biblia a olekebai a imis el omelim el rrom me a cheltelaol. (1 Ko. 6:10; 1 Ti. 3:8) Me a ukltkir a rebetok el Kristiano a diak lekengei er tir el melim a rrom er a uchei er a bo longull er a Jehovah. Me nguaisei, engdi ngkakerous a blekeradel er a bek el beluu, me ngklou a ultutelel el kirir a Rekristiano el “mo mengetukel a chedaol ma diak le chedaol” el tekoi, me lolemolem el chedaol e lodeuir a rengul a Jehovah.

19. (a) Kede mekerang e ngmai a klungioled er a omengull el telungalek er kid me a omesubed el di kid el tang? (b) Ke mekerang e ochotii el kmo ngkmal soam el mo chedaol er aike el rokui el tekoi el moruul?

¹⁹ A lsekum kede mo kerekikl el merriter er a Tekingel a Dios e ngsebeched el metik a betok el ungil el omellach er a Biblia. Mousbech a research tools er kid el osiik a suobel sel mosuub el di kau el tang, me a lechub e ke ousbech el osiik a suobel el ungil el kirel a omengull el telungalek er kau. Monglou er a klemedengei er kau el kirel a Jehovah me a moktek er ngii. E molekeed er kau er ngii. (Jak. 4:8) Me a nglunguchem, bo leua ngike el milluches er a Psalm el milengitakl el kmo: “Bok a medak, me bo le sebechek el mes a mengasireng el tekoi er a llechum.” (Psa. 119:18) Lak mongebekakl a llach me a omellach el ngar er a Biblia. Bo mkengei el olengesenges a llechul a Chedaol Dios er kid el Jehovah e bo el blak a rengum el “omerk er a Ebangkelio er a Dios.” (Rom 15:16; 1 Pe. 1:15) Me kid el rokui el kiei er a uriul el sils el di medbedubech a ringel er ngii, bo dolemolem el chedaol er aike el rokui el tekoi el doruul e dolisiich er a llemeltel a Jehovah el mengedereder.