1, 2. a) Ngande wahomba dionga di’ekambi waki Nzambi monga? b) Ambola akɔna wayangaso nsɛdingola lo sawo nɛ?

JEHOWA akalɔmbɔla ɔpɔstɔlɔ Petero dia nde nyomɔtɔtɔmiya awui w’ekila watanema lo dibuku di’Akambu w’Asi Lewi, l’oyango wa sho monga ekila lo dionga diaso oko weso Akristo. (Adia 1 Petero 1:14-16.) Jehowa “Ɔnɛ lele ekila” nongamɛka di’akitami ndo “ɛkɔkɔ ekina” nsala la wolo dia vɔ monga ekila lo dionga diawɔ tshɛ, koko aha lo awui amɔtshi ato wa lo dionga diawɔ.—Jni. 10:16.

² Lo sawo nɛ tayanga nsɛdingola awui wa lo nyuma akina watanema lo dibuku di’Akambu w’Asi Lewi ndo kɛsɔ ayotokimanyiya dia sho mbeka tɔndɔ diaki Nzambi diendana la ekila ndo nkamba l’awui akɔ lo nsɛnɔ yaso. Tayanga nsɛdingola ambola anɛ: Ngande wahombaso mbɔsa osekwelo w’ɛlɛmbɛ? Wetshelo akɔna wakondjaso oma lo dibuku di’Akambu w’Asi Lewi lo kɛnɛ kendana la nsukɛ lowandji laki Jehowa? Wetshelo akɔna wakokaso nkondja oma lo elambo wakalambolaka ase Isariyɛlɛ?

3, 4. a) Lande na kahahombe Akristo mɔnyɔla ɛlɛmbɛ ndo atɔndɔ wa lo Bible? b) Lande na kahombaso mbewɔ nsɔmbɔya kɔlɔ lo kɔlɔ kana mombanɛ tokumbɛkumbɛ?

³ Dia sho ngɛnyangɛnya Jehowa, sho pombaka nkukutɛ ɛlɛmbɛ ndo atɔndɔ ande, mongaka ekila ndo hatohombe mɔnyɔla ɛlɛmbɛ  ande. Kaanga mbeso bu l’ɛse k’Ɛlɛmbɛ wa Mɔsɛ, vɔ tokimanyiyaka dia mbeya kɛnɛ ketawɔma la kɛnɛ kahetawɔma lo washo waki Nzambi. Ɛnyɛlɔ, Jehowa akasha ase Isariyɛlɛ didjango nɛ: “Tukaluyaki kolo lu kolo, tuyalaki la ukumba le asi wudja aye. Keli ulangaki unyaye uku ayalangaye. Dimi keli [Jehowa].”—Lew. 19:18.

⁴ Jehowa nangaka diaha sho sɔmbɔya kɔlɔ lo kɔlɔ ndo mbewɔ namɛ anto tokumbɛkumbɛ. (Rɔmɔ 12:19) Naka sho mboka ɛlɛmbɛ ndo atɔndɔ waki Nzambi ɔkɔngɔ, kete Diabolo ayɔngɛnangɛna ndo dui sɔ diayɔtɛngamisha Jehowa. Oyadi kaanga onto ɔmɔtshi ambotosalɛ dui dimɔtshi dia kɔlɔ l’okonda, hatohombe ndjaetɛ oko mpoke y’awomba dia mombaka tokumbɛkumbɛ. Nzambi akatosha diɛsɛ dia monga “mpoke y’awomba” yele la ɛngɔ ka nɛmɔ, mbuta ate esambishelo. (2 Kɔr. 4:1, 7) Tokumbɛkumbɛ bu l’atei wa diangɔ diatanema lo mpoke shɔ.

5. Wetshelo akɔna wakokaso nkondja oma lo ɔkɔndɔ wendana la Arɔna ndo oma lo nyɔi k’anande w’apami? (Enda osato wele lo mbɔtwɛlɔ.)

⁵ Dui dimɔtshi dia kɔlɔ diakakomɛ Arɔna la nkumbo kande kɔndɔma lo Akambu w’Asi Lewi 10:1-11. Weho akɔ tshɛ, vɔ wakatshimbe wɔɔngɔ etena kakaholɔ dja oma l’olongo ko ntshumba ana w’apami waki Arɔna Nadaba nde l’Abihu lo tabɛrnakɛlɛ. Mbetawɔ kaki Arɔna nde l’ase nkumbo kande kakɔtɔ l’ohemba nɛ dia takawahombe nsala otanda wa wanɛ wakavu asɔ. Onde wɛ mɛnyaka dia wɛ ekɔ ekila lo ntona mongaka kaamɛ l’ase nkumbo ndo l’angɛnyi ayɛ wakatshanyema oma l’okongamelo?—Adia 1 Kɔrɛtɔ 5:11.

6, 7. a) Naa awui w’ohomba wahombaso nsɛdingola etena kɔsaso yɛdikɔ ya ntshɔ lo fɛtɛ ka diwala kasalema lo ɔtɛmwɛlɔ ɔmɔtshi? (Enda nɔtɛ.) b) Ngande wakokaso nkana yimba la ewotɔ aso wele bu Ɛmɛnyi wa Jehowa lo kɛnɛ kendana la otshwelo aso lo fɛtɛ ka diwala kasalema lo ɔtɛmwɛlɔ ɔmɔtshi?

⁶ Mbeyaka monga ko hatotohomana la woho w’ohemba wa wolo wakahomana la Arɔna nde la nkumbo kande. Ko kayotota naka wambotelɛ lo fɛtɛ ka diwala di’owotɔ aso ɔmɔtshi wele bu Ɔmɛnyi wa Jehowa kasalema lo ɔtɛmwɛlɔ ɔmɔtshi? Kaanga mbele ndooko divɛsa shikaa diatoshimba dia sho ntshɔ, onde ekɔ atɔndɔ amɔtshi wa lo Bible wakoka tokimanyiya dia sho mbɔsa yɛdikɔ? *

⁷ Yɛdikɔ yaso ya monga ekila la ntondo ka Jehowa lo awui wɔtɛkɛtshiso la diko koka ntshindja wɛɔngɔ wa ewotɔ aso wele keema Ɛmɛnyi wa Jehowa. (1 Pet. 4:3, 4) Koko sho pombaka nsala la wolo diaha mbanyangiya, diakɔ diele ayoleka dimɛna sho tɛkɛta la wɔ la lɔsɛngɔ lo mbatondjɛ ɛtɛkɛta wakeketsha. Ondo ayonga dimɛna sho tatɛkɛtshi la wɔ la ntondo ka dui ndjosalema. Sho koka mbaoka losaka ndo mbatɛ ɔnɛ tekɔ l’ɔngɛnɔngɛnɔ lo woho wakawatele lo fɛtɛ ka diwala. Oma laasɔ, sho koka mbatɛ ɔnɛ l’ɔtɛ w’awui wa lo ɔtɛmwɛlɔ wayosalema lo fɛtɛ, naka sho ntshɔ lɛkɔ kete dui sɔ koka mfukutanya ɔngɛnɔngɛnɔ wa lushi lɔsɔ ndo koka monga kiɔkɔ ya lonyangu le wɔ ndo le anto wayotshɔ. Ɔsɔ ekɔ yoho mɔtshi yakokaso mbewɔ nsekola awui wendana la dietawɔ ndo la mbetawɔ kaso.

8. Ngande wele dibuku di’Akambu w’Asi Lewi mbikaka epole ɔsɛkɛ lo kɛnɛ kendana la lowandji laki Jehowa?

⁸ Dibuku di’Akambu w’Asi Lewi mbikaka epole ɔsɛkɛ lo lowandji laki Jehowa. Bible mbutaka mbala ndeka 30 dia ɛlɛmbɛ watanema lo dibuku di’Akambu w’Asi Lewi ndja oma le Nzambi. Mɔsɛ akeyaka dui sɔ ndo akasale kɛnɛ kakawodjangɛ Jehowa dia nsala. (Lew. 8:4, 5) Sho lawɔ pombaka salaka nshi tshɛ kɛnɛ kalanga Jehowa Nkum’olongo dia sho nsala. Lo kɛnɛ kendana la dui sɔ, okongamelo waki Nzambi toshaka ekimanyielo. Koko mbetawɔ kaso koka mbɔtɔ l’ohemba etena keso shoamɛ oko wakahembama Yeso etena kakinde l’oswe. (Luka 4:1-13)  Naka sho mbika washo lo lowandji laki Nzambi ndo ndjaɛkɛ le nde, kete ndooko onto lakoka tokonya lo nsekola ɛlɛmbɛ ande kana mbetawɔ tokanyi t’anto la wɔma.—Tuk. 29:25.

9. Lande na kahetshama ekambi waki Nzambi lo wedja tshɛ?

⁹ Oko weso ambeki waki Kristo ndo Ɛmɛnyi wa Jehowa, sho soyamaka oma le anto wa lo wedja tshɛ wa lo andja ɔnɛ. Sho pombaka nongamɛ dui sɔ, nɛ dia Yeso akatɛ ambeki ande ɔnɛ: “Anto wayonyosoya ndo wayonyodiaka ndo anto wa lo wedja tshɛ wayonyohetsha l’ɔtɛ ami.” (Mat. 24:9) Oyadi la ntondo ka lohetsho l’efula la ngasɔ, sho mbikikɛka lo olimu w’esambishelo ka Diolelo ndo tetemalaka mɛnya dia tekɔ ekila la ntondo ka Jehowa. Ko lande na kahetshamaso ngasɔ etena kele tekɔ la losembwe, tekɔ lo nsɛna lɔsɛnɔ la pudipudi ndo tekɔ lo nkitanyiya ɛlɛmbɛ wa lo wedja weso? (Rɔmɔ 13:1-7) Ekɔ ngasɔ nɛ dia takasɔnɛ dia Jehowa monga Nkumadiɔndjɔ ndo Nkum’Olongo kaso. Tekɔ lo mbokambɛ “ndamɛ oto” olimu w’ekila ndo hatosekolaki pondjo ɛlɛmbɛ ndo atɔndɔ ande wa losembwe.—Mat. 4:10.

10. La ntondo ka dui diakɔna diakayotanemaka ɔnangɛso ɔmɔtshi lakashisha lomangemange lande?

¹⁰ Ndo nto, sho keema “anto wa l’andja ɔnɛ.” Diakɔ diele, sho mongaka la lomangemange lo awui w’ata ndo wa pɔlitikɛ wa l’andja ɔnɛ. (Adia Joani 15:18-21; Isaya 2:4.) Anto amɔtshi wakalambola nsɛnɔ yawɔ le Nzambi wakayoshishaka lomangemange lawɔ. Diɛsɛ ko efula ka l’atei awɔ wakayatshumoya ndo wakayɔlɔngɔsɔlaka diɔtɔnganelo diasawɔ la Shɛso ka nkɛtshi lele l’olongo. (Osam. 51:17) Paka anto yema tshitshɛ tsho mbaki kondjatshumoya. Ɛnyɛlɔ, etena kakalɔmaka Ta dia hende dia l’andja w’otondo, ewandji w’asɔlayi wakɔsɛ anangɛso 160 waki l’ɛnɔnyi l’ɛse ka 45 waki komonga l’onongo wakatanemaka lo mpango ya nkanu ya la Hongrie ko mbatshumanya l’osomba ɔtɔi. Lɛsɔ, vɔ wakatafundɛka dia vɔ mbɔtɔ l’olimu w’ɔsɔlayi. Anangɛso waki la kɔlamelo wakatshikala nge, koko anto divwa oma l’atei awɔ wakatshike dɔkɔlɔkɔ dia monga asɔlayi ndo waketawɔ mbɔsa ahɔndɔ w’asɔlayi. Ɛnɔnyi ehende l’ɔkɔngɔ, ɔnangɛso ɔmɔtshi lakashisha lomangemange lande, akatotanemaka l’atei w’anto wakahombe ndjaka anangɛso waki la kɔlamelo. Ndo ɔnango la lo demba aki l’atei w’anto wakawahombe ndjaka. Lam’ele akambo wakayotshikitanaka, vɔ kondjodiakaka anangɛso asɔ.

11, 12. Wetshelo akɔna wakokaso nkondja oma lo elambo wakalambɔmaka lo Isariyɛlɛ w’edjedja?

¹¹ Ɛlɛmbɛ wa Mɔsɛ wakɛnyaka weho w’elambo wakahombaka ase Isariyɛlɛ nambola. (Lew. 9:1-4, 15-21) Elambo wakahombaka monga aha l’ɛkɔmɔ nɛ dia vɔ waki didjidji di’olambo wa kokele waki Yeso. Koko ekɔ awui amɔtshi wakawahombaka ndjela dia nambola oseka olambo tshɛ. Ɛnyɛlɔ, tɔsɛdingole kɛnɛ kakalɔmbamaka le mama kaki l’ɔna leke kaambotɔ. Akambu w’Asi Lewi 12:6 mbutaka ɔnɛ: “Ku lam’ayukuka nshi yandi ya ndjaedia, lu dikambu dia ona pami kana di’ona umuntu, ndi kela olombedi osongo w’okoko weki eleku otoi ulambu wa lutshumba, ndu yana ya kudumba kana inga, ne dia ulambu wa kolo l’eotwelo ka luudu l’esanganelu la dipema.” Kaanga mbakɛnyaka Ɛlɛmbɛ elambo wakahombaka nambɔma, vɔ wakɛnyaka dia Nzambi ekɔ la ngandji ndo la wɛdimo. Naka ombutshi wa womoto komongaka l’ɔkɔkɔ wa nambola, nde akakokaka nambola benga pende kana tana ta tukudumba tohende. (Lew. 12:8) Kaanga mbakinde woola, ɔtɛmɔdi waki Nzambi ɔsɔ akokamaka ngandji ndo akandɔmaka oko ɔnɛ lakakimɔka woshasha w’oshinga wolo. Wetshelo akɔna wakokaso nkondja oma lo dui sɔ?

¹² Ɔpɔstɔlɔ Pɔɔlɔ akahɛmɔla asekande ambetawudi dia vɔ nambola Nzambi “olambo wa lotombo.” (Hɛb. 13:15) Ɛlɔmɔ aso  pombaka mbuta wotelo wa lo sɛkɛ wa lokombo la Jehowa l’ekila. Anangɛso l’akadiyɛso wa mpoke kambaka l’ɔtɛkɛta w’akanga wa mpoke dia ntombola Nzambi. Akristo wodihami lo mvudu la hemɔ tombolaka Jehowa lo fundanɛ mikanda, lo sambishaka lo telefɔnɛ ndo lo sambishaka enganga ndo anto waya ndjowaenda. Olambo aso wa lotombo ndo woho watombolaso Jehowa lo mbeyanya lokombo lande ndo lo mbewoya lokumu l’ɔlɔlɔ, pombaka salema lo ndjela yonge ndo akoka wele la so. Sho pombaka nsala dui sɔ lo nambola kɛnɛ kele laso koleki dimɛna.—Rɔmɔ 12:1; 2 Tim. 2:15.

13. Lande na kahombaso kimɔka alapɔlɔ w’esambishelo?

¹³ Sho nambolaka Nzambi elambo wa lotombo la lolango laso nɛ dia sho mbookaka ngandji. (Mat. 22:37, 38) Sho nɔmbamaka dia nkimɔ alapɔlɔ aso w’esambishelo. Ko, ngande wahombaso mbɔsa yɛdikɔ shɔ? Alapɔlɔ wakimɔso ngɔndɔ tshɛ mɛnyaka ndjakimɔ kaso le Nzambi. (2 Pet. 1:7) Koko, ndooko onto lahomba ndjaoka dia nde pombaka mbetsha wenya amboleka efula l’esambishelo paka dia nde nkondja wenya efula. Diakɔ diele, opandjudi wa Diolelo wele lo luudu lalamawɔ esombe kana wele bu la yoonge ya dimɛna koka nkimɔ kaanga minitɛ 15 lo ngɔndɔ. Jehowa mandolaka minitɛ shɔ ndo ndjiɔsaka oko kɛnɛ koleki dimɛna kokimwe opandjudi wa Diolelo ɔsɔ, oko djembetelo ya ngandji kawokande ndo lowando lele lande lo diɛsɛ dia laande dia mbokambɛ oko Ɔmɛnyi ande. L’ɛnyɛlɔ k’ase Isariyɛlɛ waki komongaka l’akoka wa nkimɔ elambo waki la nɛmɔ di’efula, ekambi waki Jehowa wele l’awui wawadjɛ elelo koka ntetemala nkimɔ alapɔlɔ lo ndjela akoka awɔ. Alapɔlɔ wakimɔ onto l’onto mongaka l’atei w’alapɔlɔ watomba l’andja w’otondo ndo dui sɔ kimanyiyaka okongamelo dia nkongɛ olimu w’esambishelo ka Diolelo lo nshi y’otsha la ntondo. Ko onde laasɔ ekɔ dui dia wolo leso dia kimɔka alapɔlɔ aso w’esambishelo?

14. Lande na kahombaso nsɛdingola mbekelo yaso ya wekelo wa Bible?

¹⁴ L’ɔkɔngɔ wa sho nsɛdingola awui wa nɛmɔ wa lo nyuma watanema lo dibuku di’Akambu w’Asi Lewi, ondo wɛ ambokoka mbuta ɔnɛ ‘kakianɛ lamboshihodia mɛtɛ dia dibuku nɛ diekɔ etenyi kɛmɔtshi k’Ɔtɛkɛta wa Nzambi wakafundama lo ɛlɔmbwɛlɔ ka nyuma kande.’ (2 Tim. 3:16) Ondo wɛ amboleka ndjashikikɛ l’etena kɛnɛ dia mɛnya dia wɛ ekɔ ekila, aha tsho nɛ dia Jehowa mbakɔlɔmba dui sɔ koko nɛ dia nde ngɛnangɛnaka welo wadjayɛ dia mbɔngɛnyangɛnya. Ondo awui wamboteka oma lo dibuku di’Akambu w’Asi Lewi lo asawo anɛ ahende, amboleka mfudia nsaki kaso ka ndeka nsɛdingola Afundelo lo tshɛ kawɔ. (Adia Tukedi 2:1-5.) Ekɔ ohomba sho mbidja wekelo aso wa Bible lo dɔmbɛlɔ. Ekɔ mɛtɛ dia wɛ kombolaka dia elambo ayɛ wa lotombo mbetawɔma le Jehowa. Ko onde sho mbetawɔka dia tɔkɛnyɔ ta lo televiziɔ, ta lo vidɛo, weho ekina wa tɔkɛnyɔ kana awui akina wele bu ohomba mbekola timba ndo todjɛ wekamu lo ohamelo aso wa lo nyuma? Naka ngasɔ, kete ekɔ ohomba efula sho nsɛdingola awui wakafunde ɔpɔstɔlɔ Pɔɔlɔ lo dibuku dia Hɛbɛru.

15, 16. Lande na kakate Pɔɔlɔ akambo hwe hwe etena kakandafundɛka ase Hɛbɛru?

 ¹⁵ Ɔpɔstɔlɔ Pɔɔlɔ akate akambo hwe hwe etena kakandafundɛka Akristo w’ase Hɛbɛru. (Adia Hɛbɛru 5:7, 11-14.) Nde kɔtɔma onyɔ koko akawatɛ ɔnɛ “nyaya atoyi wolo” lo eokelo kanyu. Ko lande na kakakambe Pɔɔlɔ la ɛtɛkɛta wa wolo wa ngasɔ? Nde akakɛnɛmɔlaka ngandji kaki Jehowa ndo akayasha tshɛ le Akristo wakanɔka paka awɛlɛ wa lo nyuma. Kaanga mbele ekɔ ohomba mbeya awui w’etatelo wa lo Lokristo la mɛtɛ, “mbo ya ndɛ ya wolo” yekɔ ohomba dia mpama lo nyuma l’oyango wa nkoma Akristo wambotshunda.

¹⁶ Lo dihole dia vɔ mpama polo lo yɛdikɔ ya vɔ ndjetsha anto akina, ase Hɛbɛru waki l’ohomba w’onto lawaetsha. Lande na? Nɛ dia vɔ wakewɔka “mbo ya ndɛ ya wolo.” Toyambole ɔnɛ: ‘Onde dimi mongaka la nsaki ka mbo ya ndɛ ya lo nyuma ya wolo? Onde dimi ndjilɛka? Kana onde dimi mbewɔka dia mbɔsa etena ka nɔmba ndo nsala wekelo wa Bible wa lotshimola? Naka ngasɔ, onde mbekelo yami ya wekelo mbele lo kiɔkɔ ya dikambo?’ Sho bu tsho la ɔkɛndɛ wa nsambisha anto koko tekɔ nto l’ɔkɛndɛ wa mbaetsha ndo mbakonya ambeki.—Mat. 28:19, 20.

17, 18. a) Lande na kahombaso ndɛka mbo ya ndɛ ya lo nyuma ya wolo mbala la mbala? b) Ngande wahombaso mbɔsa ɔnwɛlɔ wa wanu la ntondo ka ntshɔ lo nsanganya yaso y’Akristo?

¹⁷ Wekelo wa Bible bu dui dia wɔdu le efula ka l’atei aso. Koko Jehowa hatshutshuya ekambi ande dia vɔ mbeka Bible polo lo vɔ ndjaɛndja onongo. Oyadi taya okambi waki Nzambi wambookambɛ l’edja k’ɛnɔnyi efula kana teke kaabatizama, sho pombaka ntetemala ndɛ mbo ya ndɛ ya lo nyuma ya wolo. Dui sɔ diekɔ ohomba naka sho nangaka ntetemala monga ekila.

¹⁸ Dia sho monga ekila, sho pombaka sɛdingolaka Afundelo la yambalo tshɛ ndo salaka kɛnɛ katɔlɔmba Nzambi. Tɔsɛdingole ɛnyɛlɔ kaki ana w’apami waki Arɔna, mbuta ate Nadaba nde la Abihu, wanɛ wakalambola olambo ‘wakiwɔ komonga la lotshungɔ,’ ondo l’ɔtɛ wakawadjɔ wanu. (Lew. 10:1, 2) Tende kɛnɛ kakatɛ Nzambi Arɔna. (Adia Akambu w’Asi Lewi 10:8-11.) Onde avɛsa asɔ mɛnyaka dia hatohombe nnɔ wanu la ntondo ka ntshɔ lo nsanganya y’Akristo? Tokane yimba l’awui anɛ: Sho bu l’ɛse k’Ɛlɛmbɛ. (Rɔmɔ 10:4) Lo wedja ɛmɔtshi, asekaso ambetawudi nɔɔka wanu la wɛdimo etena kalɛwɔ yangɔ ya ndɛ la ntondo ka ntshɔ lo nsanganya y’Akristo. Lo Elekanelo, wakakambe la akɔhɔ anɛi wa wanu. Etena kakahɔhɔla Yeso Eohwelo, nde akasha apɔstɔlɔ ande vinyɔ yaki didjidji dia dikila diande. (Mat. 26:27) Bible shimbaka ɔnwɛlɔ wa tshambandeko ndo wodjwelo wa wanu. (1 Kɔr. 6:10; 1 Tim. 3:8) L’ɔtɛ wa nkum’otema kawɔ, Akristo amɔtshi mbɔsaka yɛdikɔ yaha ndɛta kaanga yema ya wanu la ntondo ka nsala olimu tshɛ w’ekila. Koko akambo tshikitanaka lo ndjela wodja la wodja ndo dui di’ohomba diahomba Akristo tshɛ mbeya ele “ntshikitanya akambu w’ekila la akambu w’anyanya” l’oyango wa mongaka ekila ndo ngɛnyangɛnya Nzambi.

19. a) Ngande wakokaso ndowanya Ɔtɛmwɛlɔ aso wa lo nkumbo ndo wekelo w’onto ndamɛ? b) Kakɔna kamboyoyashikikɛ dia nsala l’oyango wa tshikalaka ekila?

¹⁹ Sho koka mbishola awui wa lo nyuma efula naka sho mbayanga la yambalo tshɛ lo Ɔtɛkɛta waki Nzambi. Tokambe la dihomɔ di’eyangelo diele la so dia ndowanya Ɔtɛmwɛlɔ aso wa lo nkumbo ndo wekelo aso w’onto ndamɛ. Tohamia ewo kaso ka mbeya Jehowa ndo alaka ande. Toleke ndjasukanya la nde. (Jak. 4:8) Tɔlɔmbɛ Nzambi oko wakasale omembi w’esambu wakembe ate: “Osenya ashu ami, dia dimi mena akambu wa mamba w’uma l’elembe aye.” (Osam. 119:18) Sho pombaka nkitanyiya ɛlɛmbɛ wa laadiko waki Jehowa, “Ɔnɛ lele Ekila” ndo ndjasha l’ohetoheto tshɛ lo “olimu w’ekila wa lokumu l’ɔlɔlɔ laki Nzambi.” (1 Pet. 1:15; Rɔmɔ 15:16) Tɛnya dia tekɔ ekila lo nshi y’ekomelo ya paa nyɛ. Nyɛsɔ sho tshɛ tongake ekila lo dionga diaso ndo tosukɛke lowandji laki Jehowa, Nzambi kaso k’ekila.