1, 2. 1) ¿Kʼusi smalaoj ta stojolal yajtuneltak li Jeovae? 2) ¿Kʼusitik sjakʼobiltak ta jtakʼtik li ta xchanobil liʼe?

LI JTAKBOL Pedroe laj yalbe skʼoplal li slivroal Leviticoe xchiʼuk laj yalbe smelolal ti jaʼ akʼbat snaʼ yuʼun Dios ti yajtsʼaklomtak Cristoe xchiʼuk li j-israeletike skʼan la chʼulik ta skotol li kʼusi tspasik ta xkuxlejalike (kʼelo 1 Pedro 1:14-16). «Li Bochʼo [...] tucʼ yoʼnton [o chʼul]», ti jaʼ li Jeovae, ta skʼan li buchʼutik tʼujbil chbatik ta vinajel xchiʼuk li «yantic jchij[etike]» akʼo yakʼik persa ti chʼulikuk ta skotol li ‹kʼusi tspasike› (Juan 10:16).

² Li ta xchanobil liʼe, ta jkʼeltik yan kʼusitik toj tsotsik skʼoplal li ta slivroal Levítico ti tskoltautik ta yaʼibel smelolal li mantaletik ta sventa ti toj chʼul li Jeovae xchiʼuk ti xkakʼ ta jkuxlejaltike. Jech noxtok, ta jtakʼtik li sjakʼobiltak liʼe: ¿Kʼu yuʼun toj tsots skʼoplal ti jchʼunbetik smantal skotol ora li Jeovae? ¿Kʼusi chchanubtasutik li Levítico ta sventa li yichʼel ta mukʼ Jeova ta skoj ti jaʼ noʼox Ajvalil kuʼuntik ta sjunul vinajelbalumile? Xchiʼuk ¿kʼusi xuʼ jchantik ta sventa li matanal chakʼik toʼox j-israeletike?

3, 4. 1) ¿Kʼu yuʼun skʼan xchʼunik mantal xchiʼuk li beiltasel chakʼ Jeova li yajtsʼaklomtak Cristoe? 2) ¿Kʼu yuʼun mu stakʼ jpak jkʼoplaltik xchiʼuk ti te jnakʼoj-o li skʼakʼal koʼontontike?

³ Sventa jlekubtasbetik yoʼonton li Jeovae, skʼan xkakʼtik ta mukʼ li mantaletik xchiʼuk li beiltaseletik yuʼune, mu me xkakʼtik ta ilel ti  muʼyuk sbalil chkiltike o ti yan xa-o kʼu yelan ta jnoptike. Akʼo mi mu xa persauk jchʼuntik li Smantaltak Moisese, li mantal taje tskoltautik sventa jnaʼtik li kʼusi leke xchiʼuk li kʼusi chopole, ti jaʼ jech chil li Diose. Jech kʼuchaʼal liʼe, li Jeovae xi laj yalbe li j-israeletike: «Mu me tojtoj paqueluc avuʼunic li cʼusi chapasbatique; mu me tojtoj ilineloxuc noʼox ta stojol li achiʼiltaquic ta israelale. Cʼano achiʼil jech chac cʼu chaʼal cʼux ta avoʼnton abecʼtal atuc, yuʼun vuʼun Mucʼul Diosun» (Lev. 19:18).

⁴ Jech kʼuchaʼal chkiltike, li Jeovae mu skʼan ti jpaktik sutel li kʼusi chkichʼtik pasbele xchiʼuk ti mu jnakʼ skʼakʼal koʼontontike (Rom. 12:19). Mi mu xkakʼtik ta venta li kʼusi tskʼanbutike, chkikʼubtasbetik li sbie xchiʼuk jaʼ ta jmuyubtabetik yoʼonton li Satanase. Jaʼ yuʼun, kʼalal oy buchʼu kʼusi chopol la spasbutike, mu me xkakʼtik ti jaʼ akʼo stsalutik li ilinele. Li Vivliae ta xal «ti [pasbilutik] noʼox ta lum jech chac chaʼal [pʼin]» ti akʼbilutik jun kʼulejale: li cholmantale (2 Cor. 4:1, 7). Mu xuʼ jmoj xkakʼtik li jun matanal jtaojtik ti jaʼ li cholmantale xchiʼuk li kʼusi toj chopol ti jaʼ li skʼakʼal koʼonton jnakʼojtik ti chlajesvane.

5. ¿Kʼusi xuʼ jchantik ta sventa li sloʼil xkuxlejal Aarón ti la xchʼun mantal kʼalal cham li chaʼvoʼ xnichʼnabe? (Kʼelo li lokʼol ta slikebale.)

⁵ Li ta Levítico 10:1-11 te chal ti toj kʼux li kʼusi kʼot ta pasel ta stojolal li Aarón xchiʼuk yutsʼ yalale. Li Jeovae laj yakʼ talel kʼokʼ ta vinajel sventa tslajes li Nadab xchiʼuk Abihú ti jaʼ li chaʼvoʼ xnichʼnabtak Aarone xchiʼuk laj yalbe noxtok li yutsʼ yalaltak ti akʼo mu xakʼik ta ilel ti chat yoʼontonike. ¡Mu kʼunuk van ta chʼunel laj yaʼiik li mantal taje! ¿Li voʼotik une? Jech-o chʼulutik ta stojolal Jeova kʼalal muʼyuk ta jchiʼintik li kamigotik xchiʼuk li kutsʼ kalaltik ti lokʼemik ta tsobobbaile (kʼelo 1 Corintios 5:11).

6, 7. 1) ¿Kʼusitik tsots skʼoplal skʼan jtsaktik ta venta kʼalal ta jnoptik ta sventa mi chijbat o muʼyuk li ta jun skʼinal nupunel ti chichʼ pasel ta jun chʼulnae? (Kʼelo li tsʼib ta yok vune.) 2) ¿Kʼusi van xuʼ xkalbetik kutsʼ kalaltik ti chikʼutik ta jun skʼinal nupunel ti chichʼ pasel ta jun chʼulnae?

⁶ Li avie xuʼ van muʼyuk ta jnuptantik tsatsal vokolil jech kʼuchaʼal la snuptan li Aarón xchiʼuk yutsʼ yalale. Pe ¿kʼusi ta jpastik mi oy junuk kutsʼ kalaltik ti chikʼutik ta junuk skʼinal nupunel ti ta chʼulna chichʼ pasele? Melel onoʼox ti mu tukʼuk tajek chal Vivlia ti mu stakʼ pasele, pe oy yichʼoj beiltaseletik te ti tskoltautik ta snopel lek kʼusi ta jpastike. *

⁷ Xuʼ van junantik kutsʼ kalaltike mu lekuk chaʼiik li kʼusi chkʼot ta nopel kuʼuntike. Yuʼun xuʼ van mu xaʼibeik smelolal ti kʼu yuʼun ta jchʼunbetik smantal li Jeovae xchiʼuk ti chʼulukutik ta sventa taje (1 Ped. 4:3, 4). Ta melel, mu van jkʼantik ti x-ilinike jaʼ yuʼun ta slekil koʼonton ta jkʼopontik, pe tsots me skʼoplal ti jamal xkalbetike. Mas to me lek mi chkalbetik noʼox li kutsʼ kalaltike. Xuʼ van xlik jtojbetik ta vokol ta skoj ti laj yikʼutik li ta skʼinal nupunele xchiʼuk ti xkalbetik smelolal ti oy kʼusi mu xuʼ jpastik li kʼusitik nopem xaʼiik spasel li ta relijione, pe ta skoj ti mu jkʼantik ti chopol xaʼi sbaik li ta jun kʼakʼal ti toj tsots skʼoplal chaʼiike, jaʼ mas lek ti mu xijbate. Kʼalal jech chkalbetike jaʼ me tskoltautik sventa mu xijtsʼujutik xchiʼuk ti jchʼunbetik smantal skotol ora li Jeovae.

8. ¿Kʼu yelan chal li slivroal Levítico ti oy sderecho chakʼ mantaletik li Jeovae?

⁸ Li slivroal Leviticoe chal ti Jeovae jaʼ noʼox stuk oy sderecho chal mantaletik ta skoj ti jaʼ Ajvalilal ta sjunul vinajelbalumile. Chal mas ta 30 ta velta ti jaʼ Jeova laj yakʼ li mantaletik te tsakale. Li Moisese snaʼoj lek taje; jaʼ yuʼun la spas skotol li kʼusi albat yuʼun Diose (Lev. 8:4, 5). Jaʼ jech li voʼotik eke, skʼan jchʼunbetik smantal Jeova ti jaʼ noʼox Ajvalil kuʼuntik ta sjunul vinajelbalumile. Sventa spas kuʼuntike jaʼ tskoltautik li s-organisasione. Pe bakʼintike xuʼ van skʼan xkakʼtik ta ilel ti ta jchʼuntik mantal kʼalal jtuk oyutike, jech kʼuchaʼal kʼot ta stojolal Jesús li ta takixokol balumile (Luc. 4:1-13).  ¿Kʼusi ta jpastik un? Mi ta jpat koʼontontik ta stojolal li Diose xchiʼuk ti chkichʼtik ta mukʼ ta skoj ti jaʼ li mukʼta ajvalile, muʼyuk me buchʼu xakʼ ti mu jchʼunbetik smantale xchiʼuk muʼyuk me chkakʼ stsalutik li xiʼele (Prov. 29:25).

9. ¿Kʼu yuʼun chkichʼtik pʼajel?

⁹ Li yajtsʼaklom Cristoe mu me bu labal chaʼiik ti chlajik ta ilbajinele, yuʼun xi onoʼox laj yalbe yajtsʼaklomtak li Jesuse: «Ta to xaʼacʼatic ta cʼabal, yuʼun jech chavichʼic tsots utsʼintael, xchiʼuc chavichʼic milel. Bajbil chacʼotic yuʼun scotol cristianoetic ta scoj ti acuchojbicun jbie» (Mat. 24:9). Akʼo mi oy buchʼutik tspʼajutik, ta onoʼox jcholtik mantal xchiʼuk chʼulutik-o ta sat Jeova ta skotol li kʼusi ta jpastike. Jaʼutik krixchanoetik ti mu jnaʼ jutik kʼope, ti sakutike xchiʼuk ti lek xchapet li kʼusitik ta jkuxlejaltike. Vaʼun chaʼa, ¿kʼu yuʼun chkichʼtik pʼajel? (Rom. 13:1-7.) Jaʼ ta skoj ti ta jchʼunbetik smantal Jeova ti jaʼ noʼox ajvalil kuʼuntik ta sjunul vinajelbalumile. Yuʼun «jaʼ noʼox» ta xkichʼtik ta mukʼ xchiʼuk ta onoʼox jchʼunbetik li stukʼil mantaltake (Mat. 4:10).

10. ¿Kʼusi kʼot ta pasel ta stojolal jun ermano ti muʼyuk tukʼ laj yakʼ sba ta stojolal li Jeovae?

¹⁰ Li Vivliae chal ti yajtsʼaklomtak Cristoe «muʼyu[kik] xa ta sventa banamil». Jaʼ yuʼun, muʼyuk ta jtikʼ jbatik ta paskʼop xchiʼuk ta politika (kʼelo Juan 15:18-21, Isaías 2:4). Kʼux ta alel ti junantik ermanoetike muʼyuk tukʼ yakʼoj sbaik. Ep li ermanoetik taje, la sutes yoʼontonik ta melel xchiʼuk sutik talel ta stojolal li Jeovae (Sal. 51:17). Pe li yantike muʼyuk sutik. Jkʼeltik kʼusi kʼot ta pasel ta Hungría kʼalal echʼ li Xchibal Mukʼta Paskʼop ta spʼejel Balumile. Junantik polisiaetik la stsobik 160 ermanoetik ti mu sta 45 sjabilalik ti laj toʼox yichʼik tikʼel ta chukel ta jelajtik chukinabetik li ta lum taje ta skoj ti tukʼ laj yakʼ sbaike. Kʼalal te oyike laj yichʼik albel ti skʼan x-ochik ta soltaroile. Akʼo mi jutuk mu skotolik tukʼ laj yakʼ sbaik, baluneb la xchʼamik li abtelale xchiʼuk li uniformee. Chib jabil ta mas tsʼakale, oy kʼusi toj chopol la snuptan jun li ta balunvoʼ ti la xchʼam li abtelale: albat ti akʼo xbat li ta jtsop soltaroetik ti chmilvanike xchiʼuk ti xbat smilik junantik testigoetik ti tukʼ yakʼoj sbaik ti jaʼ toʼox xchiʼiltake. ¡Toj chopol laj yaʼi ti te oy sbankil li ta jtsop jchukeletike! Akʼo mi jech, muʼyuk laj yichʼik milel li jchukeletik taje.

11, 12. ¿Kʼusi chakʼ jchantik ta sventa Jeova li kʼusi chal Mantal ta sventa li matanaletike?

¹¹ Li Mantal akʼbat yuʼun Jeova li Moisese, te chal ti skʼan xakʼik matanal li j-israeletike (Lev. 9:1-4, 15-21). Li chikʼbil matanal taje skʼan muʼyuk xchopolil, yuʼun jaʼ skʼan xal li tukʼil matanal chakʼ Jesuse. Jech noxtok, yuʼun ta jujuntal li matanal taje oy smelolal ta pasel. Jech kʼuchaʼal liʼe, li Levítico 12:6 chal ti kʼusi skʼan spas jun ants kalal mi vokʼ xaʼox yole: «Cʼalal me itsʼaqui ti cʼu yepal cʼacʼal albil chacʼ sba ta lecubtasele, me querem me tseb ivocʼ yuʼune, acʼo yicʼ batel jcotuc chʼium chij te ta stiʼ scoralil chʼulna pasbil ta nucul. Li chij chicʼ batele, jaʼ ti bu jun to jabil svoqʼuele, yuʼun jaʼ sventa chichʼ chiqʼuel ta jmoton. Xchiʼuc acʼo yicʼ batel jcotuc stsumut, o me jcot puruvoc stsu sventa chichʼ milel ta sventa smul; jaʼ acʼo yacʼbe li palee». Akʼo mi lek xchapet chal ti kʼu yelan tskʼane, li Mantale lek jamal chakʼ ta ilel ti Jeovae lek snaʼ xrasonaj xchiʼuk lek snaʼ xkʼanvan. Mi muʼyuk yuʼun jkotuk chʼiom chij li meʼile, xuʼ xakʼ «jcotuc stsumut, o me jcot puruvoc stsu» (Lev. 12:8). Akʼo mi abol noʼox sba, li Jeovae muʼyuk buchʼu ta spʼaj, akʼo mi jaʼ mas mukʼ chichʼ batel matanal li yane. ¿Kʼusi chakʼ jchantik taje?

¹² Li jtakbol Pabloe laj yalbe li yajtsʼaklomtak Cristo ti akʼo yalbeik li «slequilal Dios[e]» (Heb. 13:15). Chkakʼbetik matanal o kʼupil kʼoptael kʼalal chkakʼtik ta ojtikinel li xchʼul bi Jeova kʼalal ta jcholtik mantale. Melel onoʼox ti mu jkotoltikuk koʼol ta jpastike o ta skoj ti iputike, pe li kʼusi mas tsots skʼoplale jaʼ ti  skotoluk velta xkakʼbetik Jeova li kʼusi mas lek oy kuʼuntike. Jech kʼuchaʼal liʼe, li buchʼutik mu xuʼ xlokʼik ta snaik ta skoj ti oy xa sjabilalik o ti ipike chcholik mantal ta karta o ta telefono xchiʼuk chcholbeik mantal xtok li buchʼutik chbat kʼelatikuke. Jaʼ jech tskʼupil kʼoptaik li Jeova eke (Rom. 12:1; 2 Tim. 2:15).

13. ¿Kʼu yuʼun skʼan xkaltik jayib ora la jcholtik mantal jujun u?

¹³ Kʼalal chkakʼbetik matanal o kʼupil kʼoptael li Jeovae, muʼyuk bu sujbilutik, moʼoj, yuʼun jaʼ tstij koʼontontik ti jkʼanojtik ta melel li Jeovae (Mat. 22:37, 38). ¿Kʼu yelan skʼan xkiltik ti chkaltik jayib ora la jcholtik mantal jujun ue? Kʼalal chkakʼtik li svunal bu chal jayib ora la jcholtik mantale, jaʼ te chkakʼtik ta ilel ti «jun [koʼonton chkichʼtik] ta mucʼ Diose», jaʼ xkaltik, ti jkʼanojtik xchiʼuk ti ta jchʼunbetik smantal li Jeovae (2 Ped. 1:7). Melel onoʼox ti skʼan muʼyuk buchʼu sujbil xaʼi sba sventa xlokʼ ta cholmantal ta skoj noʼox ti yuʼun tskʼan mas ep tstsak batel yorae. Yuʼun onoʼox mi oy jun jcholmantal ti kʼajomal 15 minuto la spas ta skoj ti oy xa sjabilale o ta skoj ti ipe, xuʼ stsak li yorae. Li Jeovae snaʼoj ti manchuk mi jutuk tajek, li kʼusi mas tsots skʼoplal chaʼie jaʼ ti kʼanbil tajeke xchiʼuk ti tstoj ta vokol li matanal ti jaʼ jun stestigoe. Snaʼoj ti jaʼ li kʼusi mas lek chakʼe xchiʼuk oy tajek sbalil chil. Jech kʼuchaʼal laj xa kiltike, manchuk mi abol sba li jun j-israele pe maʼuk chmakat sventa xakʼbe matanal li Jeovae. Jaʼ jech ek, li ermanoetik ti mu xuʼ yuʼunik ep xcholik mantale xuʼ me xmuyubajik chakʼik ti kʼu yepal la xcholik mantale. Ti kʼu yepal tstak bal yoraik li jcholmantaletike chichʼ chapel ta spʼejel Balumil sventa xakʼ venta li organisasion bu skʼanik mas koltaele xchiʼuk jaʼ jech chchapanik li kʼusitik ta sventa cholmantale. ¿Mi mu meleluk ti mu toj tsotsuk ti xkaltik jayib ora ta jcholtik mantal jujun ue?

14. ¿Kʼu yuʼun skʼan jkʼeltik ti kʼu yelan ta jchantik li Vivliae?

¹⁴ Kʼalal laj xa jkʼeltik li kʼusitik toj tsots skʼoplal ta sventa li mantale, ¿mi mu jechuk ti mas xa xkaʼibetik smelolal ti kʼu yuʼun laj yichʼ tikʼel li slivroal Levítico li ta Skʼop Diose? (2 Tim. 3:16.) Ta melel li avi une jpʼel ta koʼontontik ti chʼulutikuke, maʼuk noʼox ti yuʼun jaʼ jech tskʼan li Jeovae, yuʼun jaʼ sta-o ti xkakʼbetik li kʼusi mas lek kuʼuntike. Jech noxtok, li xchanobil liʼe jaʼ tstij koʼontontik ti jchanbetik mas lek skʼoplal li Vivliae (kʼelo Proverbios 2:1-5). Melel onoʼox ti jkotoltik ta jkʼantik ti xchʼam Jeova li matanal chkakʼbetike. Jaʼ yuʼun xi jakʼbe jbatike: «¿Kʼu van yelan nopem xkaʼi xchanel li Jvivliae? ¿Mi chkakʼ van ti jaʼ smakun li television, li videojuego, li tajimol o li kʼusi ta jchʼay-o koʼonton ti jaʼ ta skoj ti mu xichʼi ta mantale?». Mi jaʼ jeche, jnopbetik skʼoplal li kʼusi laj yal jtakbol Pablo li ta skarta la stakbe batel j-hebreoetike.

15, 16. ¿Kʼu yuʼun lek jamal laj yal kʼalal la stsʼibabe batel j-hebreoetik li jtakbol Pabloe?

¹⁵ Li jtakbol Pabloe lek jamal laj yal kʼalal la stsʼibabe batel li j-hebreoetike (kʼelo Hebreos 5:7, 11-14). Xi laj yalbe ta jamale: «Yuʼun toj macal avoʼntonic», yuʼun mu xaʼibeik smelolal li kʼusitik tsotsik ta aʼiele. ¿Kʼu yuʼun lek jamal laj yalbe? Ta skoj ti tsvul yoʼonton jech kʼuchaʼal Jeovae, chopol chaʼi ti jaʼ noʼox kuxulik-o ta «chuʼil» li yajtsʼakomtak Cristoe, ti jaʼ noʼox yabinojbeik  smelolal jutuk li kʼusi chal Vivliae. Yuʼun toj jtunel onoʼox ti snaʼikuk li kʼusitik skʼan chanel ta slikebale, pe mi tskʼan chyijubik ta mantale skʼan slajesik «li tsatsal veʼlile», jaʼ xkaltik, ti skʼelbeik lek smelolal kʼalal chchanunajike.

¹⁶ Li j-hebreoetike xuʼ van jaʼ chchanubtasvanik ti jechuke, pe ta skoj ti mu jechuke solel jech-o tskʼanik chanubtasel. ¿Kʼu van yuʼun? Yuʼun muʼyuk slajesojik «li tsatsal veʼlile». ¿Kʼusi xuʼ xkaltik li ta jtojoltike? ¿Kʼu van yelan chkiltik li kʼusitik tsotsik ta aʼibel smelolale? ¿Mi chkakʼbetik yipal ta yaʼibel smelolal? ¿Mi ta jchʼakbetik yorail ta spasel li orasione xchiʼuk ta xchanel lek li Vivliae? Mi toj tsots chkaʼitike, ¿mi jaʼ van ta skoj ti nopem xa xkaʼitik ta jchantik ta anile? Jvules ta joltik ti maʼuk noʼox xcholel mantal li kabteltike, moʼoj, yuʼun jaʼ sventa xichʼ chanubtasel xchiʼuk ti xkʼot ta yajtsʼaklomtak Cristo li krixchanoetike (Mat. 28:19, 20).

17, 18. 1) ¿Kʼu yuʼun skʼan xkakʼtik persa jchantik lek li kʼusitik melel ta Vivliae? 2) ¿Kʼu yelan skʼan xkiltik li yuchʼel pox kʼalal skʼan toʼox xijbat ta jtsobajeltike?

¹⁷ Jutuk mu jkotoltikuk ti toj tsots chkaʼitik xchanel li Vivliae xchiʼuk li Jeovae muʼyuk buchʼu tsuj sventa xchan ta persa. Akʼo mi jech, mu ventauk jayib xa jabil oyutik ta mantal, jkotoltik skʼan jmakʼlin jbatik ta tsatsal mantal, yuʼun toj tsots skʼoplal sventa jech chʼulukutik-o.

¹⁸ Sventa chʼulukutik-o ta sat li Jeovae, skʼan jkʼeltik lek li Vivliae xchiʼuk ti jpastik li kʼusi tskʼanbutik li Diose. Jchaʼalbetik skʼoplal li Nadab xchiʼuk Abihú ti laj yichʼik milel yuʼun Jeova ta skoj ti «la stsanic yan cʼocʼ ta stojol Mucʼul Dios ti cʼalal muʼyuc albilic jech tspasique», taje xuʼ van jaʼo jech la spasik kʼalal chyakubike (Lev. 10:1, 2). Jkʼeltik kʼusi laj yalbe Dios li Aarón kʼalal jaʼo kʼot ta pasel taje (kʼelo Levítico 10:8-11). ¿Mi jaʼ van skʼan xal ti skʼan mu xkuchʼtik pox kʼalal jaʼo oy jtsobajeltike? Jnopbetik skʼoplal jlikeluk. Li voʼotike mu xa persauk jchʼuntik kʼusi chal li Mantaletik yuʼun Moisese (Rom. 10:4). Jech noxtok, li kʼusi chal Vivlia ti chopole jaʼ ti ep xkuchʼtik li poxe xchiʼuk ti xijyakube, pe muʼyuk kʼusi chal mi ta smelol noʼox chichʼ uchʼele (1 Cor. 6:10; 1 Tim. 3:8). Jech kʼuchaʼal liʼe, li ta kʼin Koltaele chuchʼik chanib kopa vino. Xchiʼuk kʼalal laj yal Jesús ta sba velta ti skʼan xichʼ pasel li Snaʼobil slajel Cristoe, laj yalbe jtakboletik ti akʼo xuchʼik vino ti jaʼ skʼan xal li xchʼichʼele (Mat. 26:27). Melel onoʼox ti jelel li kuxlejaletik ta jujun lume. Ta junantik lume oy ermanoetik ti chuchʼik jutuk pox kʼalal chveʼik ti skʼan toʼox xbatik ta tsobajeletike. Pe ta skoj li sjol yoʼontonike oy buchʼu tsnop ti skʼan mu xuchʼik mi jutebuk pox kʼalal tspasik kʼusuk abtelal ta sventa mantale. Li kʼusi skʼan jpastike jaʼ ti jnaʼtik stʼujel li «cʼusitic tucʼ, cʼusi muc tucʼuc» sventa jnaʼtik kʼusi xmuyubaj-o li Diose xchiʼuk ti chʼulukutik ta skotol li kʼusitik ta jpastike.

19. 1) ¿Kʼusi xuʼ skoltautik sventa jtabetik sbalil li yichʼel ta mukʼ Jeova ta kutsʼ kalaltike xchiʼuk li xchanel Vivlia ta jtuktike? 2) ¿Kʼusi xuʼ jpastik sventa chʼulukutike?

¹⁹ Toj ep kʼusitik tsots skʼoplal ta mantal xuʼ jtatik mi ta jkʼeltik lek li Skʼop Diose. Li organisasione toj ep kʼusi chakʼbutik sventa skoltautik xchiʼuk jtabetik sbalil li ta yichʼel ta mukʼ Jeova ta kutsʼ kalaltike xchiʼuk kʼalal ta jchan jtuktike, ¿mi yakalutik van stunesel? Kepajestik me li kʼusi jnaʼtik ta stojolal Jeovae xchiʼuk li kʼusi yaloj tspase xchiʼuk nopajkutik-o me ta stojolal (Sant. 4:8). Jechuk me jkʼanbetik kʼuchaʼal li jtsʼibajom yuʼun salmoe: «Jambun lec jsat, yuʼun acʼo quil lec ti jun noʼox yutsil li amantaltaque» (Sal. 119:18). Jchʼunbetik me li smantaltak Jeovae, ti «tucʼ [o chʼule]», xchiʼuk ta sjunuluk me koʼontontik «cabtel[antik] xcholel li Lequil Aʼyej yuʼun Diose» (1 Ped. 1:15; Rom. 15:16). Kuxulutik avi ti toj tsots ta ichʼel batele, jaʼ yuʼun jpʼeluk me koʼontontik ti chʼulukutik ta skotol li kʼusitik ta jpas ta jkuxlejaltike xchiʼuk ti xijtun ta stojolal Jeova ti jaʼ noʼox Ajvalil kuʼuntik ta sjunul vinajelbalumile.