1, 2. (a) May kalabotan ha panggawi, ano an ginlalaoman ni Jehova ha iya katawohan? (b) Ano nga mga pakiana an hihisgotan hini nga artikulo?

GIN-GIYAHAN ni Jehova hi apostol Pedro nga ipakita an koneksyon han pagkabaraan nga ginpabug-atan ha libro han Lebitiko ha panginahanglan nga magin baraan ha aton panggawi sugad nga mga Kristiano. (Basaha an 1 Pedro 1:14-16.) Hi Jehova, an “Usa nga Baraan,” naglalaom nga bubuhaton han mga dinihogan ngan han “iba nga mga karnero” an ira bug-os nga mahihimo basi magin baraan ha ngatanan nira nga panggawi—diri la ha pipira nga panggawi.—Juan 10:16.

² Magigin mapulsanon gud an aton dugang nga pag-usisa ha importante nga mga leksyon ha Lebitiko. An pag-aplikar hito mabulig ha aton nga magin baraan ha ngatanan naton nga panggawi. Hihisgotan naton ini nga mga pakiana: Paonan-o naton sadang hunahunaon an pagkompromiso? Ano an igintututdo ha aton han Lebitiko mahitungod ha pagdapig han pagkasoberano ni Jehova? Ano an aton hibabaroan ha mga paghalad han mga Israelita?

3, 4. (a) Kay ano nga kinahanglan diri ikompromiso han mga Kristiano an mga balaud ngan prinsipyo ha Biblia? (b) Kay ano nga diri kita sadang bumulos o magdumot?

³ Kon karuyag naton lipayon hi Jehova, kinahanglan marig-on nga sundon naton an iya mga balaud ngan prinsipyo, diri gud naton  sadang hunahunaon nga puydi naton ito ikompromiso. Bisan kon diri kita ilarom han Mosaiko nga Balaud, nabulig ito ha aton nga hibaroan kon ano an ginkakarawat o diri ginkakarawat han Dios. Pananglitan, ginsugo an mga Israelita: “Diri ka bumulos, bisan ha pagdumot patok han mga anak han imo katawohan; kondi higugmaon mo an imo igkasi-tawo sugad ha imo ngahaw: Ako hi Jehova.”—Leb. 19:18.

⁴ Ginlalaoman ni Jehova nga diri kita mabulos ngan lilikyan naton nga magdumot. (Roma 12:19) Kon igbabalewaray naton an mga balaud ngan prinsipyo han Dios, malilipay an Yawa, ngan mahimo naton mapasiparahan an ngaran ni Jehova. Bisan kon may tinuyo nga magpasakit ha aton, diri kita sadang magtipig hin kasina. Iginhatag ha aton han Dios an pribilehiyo nga magin “mga surudlan nga hinimo tikang ha tuna” nga nagsusulod hin bahandi, an aton ministeryo. (2 Cor. 4:1, 7) Diri ito angay sudlan hin kasina nga pariho hin nakakahilo nga asido!

5. Ano an aton hibabaroan ha asoy mahitungod kan Aaron ngan ha kamatayon han iya mga anak? (Kitaa an retrato ha tinikangan hini nga artikulo.)

⁵ Ha Lebitiko 10:1-11, mababasa naton an masakit hinduro nga nahitabo ha pamilya ni Aaron. Hi Jehova nagpadara hin kalayo tikang ha langit ngan ginlamoy an mga anak ni Aaron nga hira Nadab ngan Abihu didto ha tabernakulo. Katapos, ginsidngan han Dios hi Aaron ngan an iya pamilya nga diri magtaguminatay para ha ira namatay nga mga kapamilya. Daku gud ito nga pagsari ha ira pagtoo! Iginpapakita mo ba an pagin baraan pinaagi ha diri pakig-upod ha mga kapamilya o ha iba pa nga ginpaiwas ha kongregasyon?—Basaha an 1 Corinto 5:11.

6, 7. (a) Ano an sadang naton ikonsiderar kon nagdidesisyon pagtambong o pagkarawat hin bahin ha usa nga kasal ha singbahan? (Kitaa an footnote.) (b) Paonan-o naton mahimo isaysay ha aton diri Saksi nga mga kapamilya o paryente an aton desisyon may kalabotan ha usa nga kasal ha singbahan?

⁶ Bangin diri naton maeksperyensyahan an duro nga pagsari nga naeksperyensyahan ni Aaron ngan han iya pamilya. Kondi kumusta man kon imbitaron kita nga tumambong ngan magkaada bahin ha kasal ha singbahan han aton diri Saksi nga kapamilya o paryente? Waray espisipiko nga balaud ha Kasuratan nga nagdidiri ha aton nga umatender, pero may-ada ba mga prinsipyo ha Biblia nga sadang ikonsiderar kon naghihimo hin desisyon? *

⁷ An aton pagin determinado nga magpabilin nga baraan ha atubangan ni Jehova bangin diri masabtan han aton diri Saksi nga mga kapamilya o paryente. (1 Ped. 4:3, 4) Syempre diri naton karuyag nga masina hira, kondi kasagaran nga gimaopayi kon makikiistorya kita ha ira ha prangka pero ha buotan nga paagi. Puydi naton ini buhaton maiha pa antes an okasyon. Mahimo naton hira pasalamatan ngan sidngon nga nalilipay kita nga gin-imbitar kita nira nga magin bahin han ira kasal. Katapos mahimo kita sumiring nga karuyag naton magin malipayon an ira espesyal nga adlaw ngan diri naton karuyag nga maalohan hira ngan an ira mga bisita pinaagi han aton diri pakigbahin ha relihiyoso nga seremonya. Usa ini nga paagi basi diri naton maikompromiso an aton pagtoo.

8. Paonan-o ginpapabug-atan han libro han Lebitiko an pagkasoberano ni Jehova?

⁸ Ginpapabug-atan han libro han Lebitiko an pagkasoberano ni Jehova. Sobra 30 ka beses nga aton mababasa nga an mga balaud dida hito tikang kan Jehova. Maaram hini hi Moises ngan ginbuhat gud niya an iginsugo ha iya ni Jehova. (Leb. 8:4, 5) Ha pariho nga paagi, kinahanglan pirme naton buhaton an iginsusugo ha aton han Soberano nga hi Jehova. Ginbubuligan kita han organisasyon han Dios basi mabuhat ini. Kondi bangin masarihan an aton pagtoo kon nag-uusahan kita, sugad han nahitabo kan Jesus han ginsulay hiya ha kamingawan. (Luc. 4:1-13) Kon nakapokus kita ha pagkasoberano han Dios ngan nasarig kita ha iya, diri kita masusulay han bisan  hin-o nga magkompromiso ngan mahadlok.—Prob. 29:25.

9. Kay ano nga ginkakapungtan an katawohan han Dios ha ngatanan nga nasud?

⁹ Sugad nga mga sumurunod ni Kristo ngan mga Saksi ni Jehova, gintitimaraot kita ha bisan diin nga nasud ha kalibotan. Maaram kita hini kay hi Jesus nagsiring ha iya mga disipulo: “Pasasakitan ngan papatayon kamo han mga tawo, ngan mapupungot ha iyo an ngatanan nga nasud tungod ha akon ngaran.” (Mat. 24:9) Kondi bisan kon ginkakapungtan kita, nagpapadayon kita pagsangyaw mahitungod han Ginhadian ngan nagpapabilin nga baraan ha atubangan ni Jehova. Kay ano nga ginkakapungtan kita bisan kon mga tangkod kita, limpyo ha pisikal ngan moral, ngan mapinasakupon ha gobyerno? (Roma 13:1-7) Tungod kay ginhimo naton hi Jehova sugad nga aton Soberano nga Ginoo! Ha ‘iya la’ naton iginhahatag an aton sagrado nga pag-alagad, ngan diri gud naton ikukompromiso an iya matadong nga mga balaud ngan prinsipyo.—Mat. 4:10.

10. Ano an nahitabo ha usa nga bugto nga nagkompromiso ha iya pagin neutral?

¹⁰ Kita liwat ‘diri kanan kalibotan.’ Salit neutral kita may kalabotan ha mga girra ngan politika. (Basaha an Juan 15:18-21; Isaias 2:4.) An pipira nga nagdedikar ha Dios nagkompromiso han ira pagin neutral. Damu ha ira an nagbasol ngan naibalik an ira maopay nga relasyon ha aton maloloy-on nga Amay ha langit. (Sal. 51:17) Pero may pipira nga waray magbasol. Pananglitan, durante han Girra ha Kalibotan II, damu nga kabugtoan an diri makatadunganon nga ginpriso ha iba-iba nga lugar han Hungary. Gintirok han mga opisyal ngadto ha usa nga bungto an 160 hini nga kabugtoan nga waray pa mag-45 anyos ngan ginsugo hira nga magsundalo. Marig-on nga nagdumiri an matinumanon nga kabugtoan, kondi siyam ha ira an nanumpa nga magsundalo ngan nagsul-ot hin uniporme. Paglabay hin duha ka tuig, usa hadton nagkompromiso an ginpaapi hin firing squad nga igintoka pagpatay ha matinumanon nga mga Saksi, nga an usa iya mismo bugto ha unod! Maopay na la nga waray madayon ito nga pagpatay.

11, 12. Ano an hibabaroan han mga Kristiano yana may kalabotan han pagtratar ni Jehova ha mga halad ha kadaan nga Israel?

¹¹ Sumala ha Mosaiko nga Balaud, an mga Israelita kinahanglan maghalad hin espisipiko nga mga halad. (Leb. 9:1-4, 15-21) Kinahanglan waray ito depekto kay nagsisimbolo ito han hingpit nga halad ni Jesus. Dugang pa, ha tagsa nga klase hin halad may espisipiko nga pamaagi nga kinahanglan sundon. Pananglitan, tagda kon ano an ginkikinahanglan ha usa nga nanay nga bag-o la nga nanganak. An Lebitiko 12:6 nasiring: “Kon matuman na an iya mga adlaw ha pagkaputli, tungod han anak nga lalaki, o tungod han anak nga babaye, magdara hiya hin nati nga karnero nga usa ka tuig an panuigon, para han halad nga sinunog, ngan hin usa nga piso nga tukmo o usa nga sarapati nga piso para han halad tungod han sala, ngadto ha ganghaan han Tabernakulo han katiringban, ngadto ha saserdote.” Espisipiko an mga ginkikinahanglan han Dios, pero makikita ha Balaud an iya pagin mahigugmaon ngan makatadunganon. Pananglitan, kon an nanay diri makakaakos paghalad hin karnero, puydi hiya maghalad hin duha nga tukmo o duha nga sarapati nga piso. (Leb. 12:8) Bisan kon pobre hiya, hinigugma ngan ginpapabilhan hiya ni Jehova pariho hadton naghahalad hin mas mahal nga halad. Ano an aton hibabaroan tikang hini?

¹² Ginsagda ni apostol Pablo an mga Kristiano nga maghalad ha Dios hin “halad han pagdayaw.” (Heb. 13:15) An aton mga im-im sadang magpasamwak ha publiko mahitungod han baraan nga ngaran ni Jehova. Ginagamit han ngula nga kabugtoan an sign language ha pagdayaw ha Dios. An mga Kristiano nga aada na la ha ira balay nagdadayaw kan Jehova pinaagi ha pagsangyaw gamit an surat, telepono, ngan ha  pagsangyaw ha mga bisita. Nadepende ha aton kahimsog ngan abilidad kon mationan-o kadaku an aton mahihimo nga halad han pagdayaw—an pagpasamwak han ngaran ni Jehova ngan han maopay nga sumat. Pero kinahanglan ihalad naton pirme an aton gimaopayi.—Roma 12:1; 2 Tim. 2:15.

13. Kay ano nga sadang naton ireport an aton nahihimo ha ministeryo?

¹³ Kinaburut-on nga iginhahalad naton kan Jehova an aton mga halad han pagdayaw tungod kay hinigugma naton hiya. (Mat. 22:37, 38) Kondi ginhahangyo kita nga ireport an aton nabuhat ha ministeryo. Ano an aton sadang magin disposisyon may kalabotan hini nga kahikayan? An aton paghatag hin report kada bulan nagpapakita han aton debosyon ha Dios. (2 Ped. 1:7) Syempre, diri naton sadang hunahunaon nga kinahanglan naton maggahin hin damu ka oras ha ministeryo basi la damu an aton maireport. Ngani, kon an usa nga magwarali limitado na la an nahihimo ha ministeryo tungod han kalagas o sakit, mahimo hiya magreport bisan la 15 minutos. Ginpapabilhan ito ni Jehova tungod kay ito an gimaopayi nga maihahalad han magwarali ngan kapahayagan ito han iya gugma kan Jehova ngan apresasyon ha daku nga pribilehiyo nga magin Iya Saksi. Pariho ha mga Israelita nga waray makaakos paghalad hin pipira nga mahal nga mga halad, an presyoso nga mga surugoon ni Jehova nga limitado na la an nahihimo puydi pa gihapon magreport. An aton tagsa-tagsa nga report igin-uupod ha bug-os-kalibotan nga report, nga nabulig ha organisasyon basi makagplano para ha tidaraon nga buruhaton ha pagsangyaw han Ginhadian. Salit makuri gud ba an ginhahangyo ha aton nga ireport an aton nahihimo ha ministeryo?

14. Isaysay kon kay ano nga kinahanglan naton usisahon an aton batasan ha pag-aram.

¹⁴ Katapos hisgotan an pipira nga importante nga leksyon ha Lebitiko, bangin makasiring ka, ‘Mas nasasabtan ko na yana kon kay ano nga ini nga libro igin-upod ha giniyahan nga Pulong han Dios.’ (2 Tim. 3:16) Bangin mas determinado ka na yana nga magpabilin nga baraan, diri la kay ginkikinahanglan ito ni Jehova kondi tungod kay takos hiya han imo duro nga pangalimbasog basi mapalipay hiya. Posible nga an imo hinbaroan mahitungod ha Lebitiko dinhi hinin duha nga artikulo nagpahilarom han imo hingyap nga usisahon pa gud hin maopay an bug-os nga Kasuratan. (Basaha an Proberbios 2:1-5.) Mainampoon nga usisaha an imo batasan ha pag-aram. Sigurado nga karuyag mo gud nga karawaton ni Jehova an imo mga halad han pagdayaw. Gintutugotan mo ba an mga programa ha TV, video game, isport, o hilangkagan nga makaulang han imo espirituwal nga pag-uswag? Kon oo, makakabulig gud ha imo an pagpamalandong han ginsiring ni apostol Pablo dida ha libro han Hebreo.

15, 16. Kay ano nga nagin prangka gud hi Pablo han nagsurat hiya ha Hebreo nga mga Kristiano?

¹⁵ Nagin prangka gud hi Pablo han nagsurat hiya ha iya igkasi-Hebreo nga mga Kristiano. (Basaha an Hebreo 5:7, 11-14.) Direkta ha punto an iya mga pulong! Hiya nagsiring ha ira nga “nagin maluya” an ira pagpamati. Kay ano nga nagin prangka gud hi Pablo? Pariho kan Jehova, hinigugma niya hira ngan nabaraka hiya tungod  kay kontento na hira ha espirituwal nga gatas. Bisan kon importante an pagkaada kahibaro ha nangunguna nga doktrina han Kristianidad, kinahanglan kumaon kita hin “matig-a nga pagkaon” basi magin hamtong nga Kristiano.

¹⁶ Imbes nga mag-uswag an Hebreo nga mga Kristiano basi makagtutdo ha iba, hira lugod an kinahanglan tutdoan. Kay ano? Tungod kay diri hira nakaon hin “matig-a nga pagkaon.” Pakianhi an imo kalugaringon: ‘Husto ba an akon disposisyon may kalabotan ha matig-a nga espirituwal nga pagkaon? Nakaon ba ako hito? O nahuhubya ba ako pag-ampo ngan paghimo hin hilarom nga pag-aram ha Biblia? Kon oo, posible ba nga an akon batasan ha pag-aram an problema?’ Diri la kita nagsasangyaw ha mga tawo kondi kinahanglan liwat naton magtutdo ngan maghimo hin mga disipulo.—Mat. 28:19, 20.

17, 18. (a) Kay ano nga kinahanglan regular kita nga kumaon hin matig-a nga espirituwal nga pagkaon? (b) Paonan-o naton sadang hunahunaon an pag-inom hin de-alkohol nga irimnon antes han aton mga katirok?

¹⁷ Damu ha aton an bangin nakukurian pag-aram ha Biblia. Syempre, diri karuyag ni Jehova nga mag-aram kita tungod la kay nakukonsensya kita. Pero bisan kon maiha na kita nga nag-aalagad ha Dios o bag-ohan pa la, kinahanglan padayon kita nga kumaon hin matig-a nga espirituwal nga pagkaon. Importante gud ini kon karuyag naton magpabilin nga baraan.

¹⁸ Basi magin baraan, kinahanglan naton usisahon hin maopay an Kasuratan ngan buhaton an iginsusugo ha aton han Dios. Hunahunaa an nahitabo ha mga anak ni Aaron nga hira Nadab ngan Abihu nga ginpatay han naghalad hira hin “lain nga kalayo,” bangin samtang nakainom hira hin de-alkohol nga irimnon. (Leb. 10:1, 2) Tigamni an ginsiring han Dios kan Aaron. (Basaha an Lebitiko 10:8-11.) Iginpapasabot ba hini nga teksto nga diri kita sadang uminom hin bisan ano nga de-alkohol nga irimnon antes tumambong hin Kristiano nga katirok? Hunahunaa ini nga mga punto: Diri kita ilarom han Balaud. (Roma 10:4) Ha pipira nga nasud, an aton mga igkasi-tumuroo nainom hin de-alkohol nga irimnon ha kasadangan ha ira pangaon antes tumambong ha mga katirok. Durante han Paskua, upat nga kopa nga may bino an gin-gamit. Han gintikangan ni Jesus an Memoryal, iya ginpainom an iya mga apostol hin bino nga nagsisimbolo han iya dugo. (Mat. 26:27) Ginkukondenar han Biblia an sobra nga pag-inom ngan paghubog. (1 Cor. 6:10; 1 Tim. 3:8) Ngan tungod han konsensya, damu nga Kristiano an diri gud nainom hin de-alkohol nga irimnon antes makigbahin ha bisan ano nga klase han sagrado nga pag-alagad. Kondi tungod kay iba-iba an kahimtang ha tagsa nga nasud, importante para ha mga Kristiano nga hibaroan an ‘kalainan han baraan ngan han diri baraan’ basi magpabilin hira nga baraan ngan makapalipay ha Dios.

19. (a) Paonan-o naton mapapauswag an aton Pagsingba han Pamilya ngan personal nga pag-aram? (b) Paonan-o mo maipapakita nga determinado ka magpabilin nga baraan?

¹⁹ Damu pa an imo hibabaroan nga importante nga mga prinsipyo ha Biblia kon imo uusisahon hin maopay an Pulong han Dios. Gamita an mga garamiton ha pagsaliksik basi mapauswag an iyo Pagsingba han Pamilya ngan an imo personal nga pag-aram. Pauswaga an imo kahibaro mahitungod kan Jehova ngan han iya mga katuyoan. Magin duok gud ha iya. (San. 4:8) Pag-ampo ha Dios pariho han ginbuhat han salmista nga nagkanta: “Bungata an akon mga mata, basi nga hikit-an ko an mga urusahon nga mga bagay han imo balaud.” (Sal. 119:18) Ayaw gud ikompromiso an mga balaud ngan prinsipyo ha Biblia. Kinaburut-on nga sunda an gihitaasi nga balaud han “Usa nga Baraan” nga hi Jehova, ngan magin madasigon ha pakigbahin ha “baraan nga buruhaton nga pagsangyaw han maopay nga sumat han Dios.” (1 Ped. 1:15; Roma 15:16) Pagpabilin nga baraan durante hinin maraot nga kataposan nga mga adlaw. Hinaot kita ngatanan magin baraan ha aton panggawi ngan dumapig ha pagkasoberano han aton baraan nga Dios, hi Jehova.