1. Kico algun hende ta pensa tocante e religionnan cu tin y di e hendenan cu ta den e religionnan ey?

HOPI hende awe ta admiti di biaha cu e religionnan principal di mundo, tanto esnan cristian como no cristian, no ta haci casi nada pa yuda humanidad. Algun di nan ta pensa cu e religionnan ey no por tin e aprobacion di Dios pasobra loke nan ta siña hende tocante Dios no ta berdad y loke nan ta haci ta deshonra Dios. Toch e hendenan ey ta kere cu den tur religion tin personanan sincero y cu Dios ta mira nan y acepta nan como su sirbidornan riba Tera. Pues, nan no ta mira pakico e personanan ey mester sali for di religion falso y bay adora Dios como parti di un pueblo separa. Pero Dios tambe ta pensa asina? Pa haya e contesta, laga nos repasa kico Bijbel ta bisa tocante e berdadero sirbidornan di Jehova a traves di historia.

2. Ken a bira Jehova su pueblo cu tempo, y kico a distingui nan for di otro pueblo? (Wak e prome plachi.)

² Un 4.000 aña pasa, Jehova a scoge un grupo di hende como  su pueblo riba Tera. Abraham, describi den Bijbel como “tata di tur hende cu Dios ta considera husto pa motibo di nan fe”, tabata cabes di un famia grandi cu a consisti di cientos di persona. (Rom. 4:11; Gen. 14:14) En realidad, e gobernantenan di Canaan a consider’e “un prins poderoso” y a trat’e cu respet. (Gen. 21:22; 23:6) Jehova a cera un alianza, of pacto, cu Abraham y su descendientenan. (Gen. 17:1, 2, 19) Dios a bisa Abraham: “Esaki ta mi alianza cu boso mester warda entre ami y boso y bo descendientenan despues di bo: tur persona masculino entre boso mester wordo circuncida ... Y esaki lo ta e señal di e alianza entre ami y boso.” (Gen. 17:10, 11) Di manera cu Abraham y tur e hombernan di su cas a ser circuncida. (Gen. 17:24-27) Circuncision tabata un prueba fisico cu a distingui e descendientenan di Abraham como e unico pueblo cu tabatin un relacion special, un pacto, cu Jehova.

3. Con e descendientenan di Abraham a bira un pueblo?

³ E nieto di Abraham, Jacob—cu despues a haya e nomber Israel—tabatin 12 yiu homber. (Gen. 35:10, 22b-26) Cu tempo, e yiu hombernan aki a bira patriarca of cabes di e 12 tribunan di Israel. (Echo. 7:8) Jozef, un yiu homber di Jacob, a ser hiba Egipto, y cu tempo a bira e man drechi di Farao. Durante un periodo di scarsedad di cuminda, Jozef tabatin e responsabilidad di supervisa e suministro di cuminda di henter e pais. Debi na e hamber aki, Jacob cu su famia a bay biba na Egipto. (Gen. 41:39-41; 42:6) Eynan e descendientenan di Jacob a bira masha hopi mes.—Gen. 48:4; lesa Echonan 7:17.

4. Na prome instante, ki tipo di relacion tabatin entre e Egipcionan y e descendientenan di Jacob?

⁴ E descendientenan di Jacob a keda Egipto pa mas cu 200 aña, den un region di Riu Nijl cu yama Gosen. (Gen. 45:9, 10) E Farao cu a invita e Israelitanan pa bin biba na Egipto a ricibi nan calurosamente pasobra e tabata conoce Jozef y a apreci’e. (Gen. 47:1-6) Pa mas o menos 100 aña, nan a biba na paz cu e Egipcionan. E Israelitanan tabata biba den pueblonan chikito y tabata cuidador di bestia. Aunke e pueblo Egipcio tabata menosprecia hende cu a cria carne, nan mester a obedece Farao y permiti e Israelitanan biba eynan.—Gen. 46:31-34.

5, 6. (a) Con e situacion di e pueblo di Dios na Egipto a cambia? (b) Con bin nan no a mata Moises ora el a nace, y kico Jehova a haci pa Su pueblo?

⁵ Pero e situacion di e pueblo di Dios a cambia drasticamente. Bijbel ta bisa: “Y a lanta un rey nobo na Egipto cu no tabata conoce Jozef. Y el a bisa su pueblo: ‘Mira, e pueblo di e yiunan di Israel ta mas tanto y mas poderoso cu nos.’ Y e Egipcionan tabata obliga e yiunan di Israel pa traha rigurosamente; y nan tabata amarga nan bida cu trabou pisa di trahamento cu klei y klinker y cu tur sorto di trabou den cunucu, tur e trabou cu rigurosamente nan tabata impone riba nan.”—Exo. 1:8, 9, 13, 14.

⁶ E farao nobo a hasta duna ordo pa mata tur yiu homber Hebreo asina cu nan nace. (Exo. 1:15, 16) Den e temporada ey Moises a nace. Ora e tabatin tres luna, su mama, Jocabed, a scond’e meymey di e richinan cu tabata crece canto di Riu Nijl. Eynan e yiu muher di Farao a hay’e, y despues el a adopta Moises. Afortunadamente, el a laga Moises su mama mes cri’e durante e prome añanan di su bida, y cu tempo, Moises a bira un fiel sirbidor di Jehova. (Exo. 2:1-10; Heb. 11:23-25) Jehova a mira con su pueblo tabata sufri y a dicidi di uza Moises pa libera nan for di nan opresornan. (Exo. 2:24, 25; 3:9, 10) Di e manera ey Jehova a “redimi”,  of libera, e Israelitanan.—Exo. 15:13; lesa Deuteronomio 15:15.

7, 8. Con Jehova su pueblo a bira un nacion santo?

⁷ Aunke Jehova no a organisa e Israelitanan ainda como un nacion cu ley y sacerdocio, el a reconoce nan si como su pueblo. Ta pesey el a manda Moises cu Aaron bisa farao: “Asina SEÑOR, e Dios di Israel, ta bisa: ‘Laga mi pueblo bay pa nan tene un fiesta pa mi den desierto.’”—Exo. 5:1.

⁸ Pero farao no kier a laga e Israelitanan bay. Jehova mester a trece dies plaga riba Egipto y despues destrui farao cu su ehercito den Lama Cora pa libera su pueblo di e opresion Egipcio. (Exo. 15:1-4) Menos cu tres luna despues, Jehova a cera un pacto cu e Israelitanan na Sero di Sinai y a haci nan e promesa historico aki: “Si di berdad boso kier obedece mi bos y warda mi alianza, e ora ey boso lo ta un tesoro peculiar riba tur pueblo, ... un nacion santo.”—Exo. 19:5, 6.

9, 10. (a) Segun Deuteronomio 4:5 pa 8, con e Ley a haci e Israelitanan diferente for di e otro nacionnan? (b) Con e Israelitanan lo mester a demostra cu nan tabata “un pueblo santo pa Jehova”?

⁹ Pa siglonan, e sirbidornan di Jehova a ser dirigi pa cabesnan di famia, of patriarca, cu a fungi como gobernante, hues y sacerdote di nan famia. Na Egipto, prome cu e Israelitanan a bira esclavo, nan tabata organisa segun e sistema aki di liderato. (Gen. 8:20; 18:19; Job 1:4, 5) Pero despues cu Jehova a libera nan, pa medio di Moises, el a duna nan leynan cu a haci nan diferente for di tur otro nacion. (Lesa Deuteronomio 4:5-8; Sal. 147:19, 20.) E Ley a establece un grupo separa pa fungi como sacerdote pa e nacion. Ademas, e Ley a bisa cu e huesnan di e pueblo lo ta “e ancianonan”, kendenan tabata ser respeta pa nan conocemento y sabiduria. (Deu. 25:7, 8) Pues, e Ley a duna e nacion recien forma instruccion tocante nan adoracion y nan actividadnan di bida diario.

¹⁰ Un poco prome cu e Israelitanan a drenta e Tera Priminti, Jehova a ripiti su leynan pa nan. Anto Moises a bisa nan: “Awe Jehova a haya boso declaracion cu boso lo bira su pueblo, su propiedad special, manera el a priminti boso, y cu boso lo warda tur su mandamentonan y cu lo e duna boso un posicion mas halto cu tur e otro nacionnan cu el a traha, y boso lo resulta den un motibo pa alabanza, fama y gloria segun cu boso ta demostra cu boso ta un pueblo santo pa Jehova boso Dios, manera el a priminti.”—Deu. 26:18, 19, NW.

11-13. (a) Ken a cuminsa adora Dios hunto cu su pueblo scogi? (b) Si un hende cu no tabata Israelita kier a sirbi Jehova, kico e mester a haci?

¹¹ Aunke e Israelitanan tabata Jehova su pueblo scogi riba Tera, el a permiti hende cu no tabata Israelita pa biba entre su pueblo. Por ehempel, el a laga “un multitud di tur clase di hende”, incluso di Egipcionan, compaña su pueblo ora el a libera nan for di Egipto. (Exo. 12:38) Prome cu e di shete plaga, algun hende “entre farao su sirbidornan” a haci caso di e palabra di Jehova, y sin duda nan tabata entre e multitud di tur clase di hende cu a sali for di Egipto hunto cu e Israelitanan.—Exo. 9:20.

¹² Un poco prome cu e Israelitanan a crusa Riu Jordan pa drenta Canaan, Moises a bisa nan cu nan mester a mustra amor pa e stranheronan cu tabata biba meymey di nan. (Deu. 10:17-19) E pueblo scogi di Dios mester a acepta den nan comunidad tur stranhero cu tabata dispuesto pa obedece e leynan basico cu  Moises a haya, manera, por ehempel, e Dies Mandamento. (Lev. 24:22) Algun habitante stranhero a bira sirbidor di Jehova y tabata pensa mescos cu e Moabita Ruth, kende a bisa Noemi: “Bo pueblo lo ta mi pueblo, y bo Dios mi Dios.” (Ruth 1:16) E habitantenan stranhero cu a comberti y bira hudiu a ser yama proselito, y si nan tabata hende homber, nan a ser circuncida. (Exo. 12:48, 49) Bondadosamente Jehova a ricibi nan como parti di su pueblo scogi.—Num. 15:14, 15.

¹³ Na dedicacion di e tempel di Salomon a keda demostra cu Jehova ta acepta adoracion di hende cu no ta Israelita. E oracion di Salomon a indica esey. El a bisa: “E stranhero cu no ta di bo pueblo Israel, ora cu e bin for di un tera leu pa causa di bo gran nomber, bo man poderoso y bo brasa extendi, ora cu nan bin haci oracion den direccion di e cas aki, e ora ey tende abo for di cielo, for di bo luga di biba, y haci conforme tur loke e stranhero pidi bo, pa tur e pueblonan di mundo conoce bo nomber y tin temor pa bo, manera bo pueblo Israel ta haci, y pa nan sa cu e cas aki cu mi a traha ta wordo yama na bo nomber.” (2 Cro. 6:32, 33) Hasta den tempo di Hesus, hende cu no tabata Israelita y cu kier a sirbi Jehova por a haci esey, pero nan mester a adora Jehova hunto cu Su pueblo scogi.—Juan 12:20; Echo. 8:27.

14-16. (a) Dicon nos por bisa cu e Israelitanan tabata un nacion di testigo pa Jehova? (b) Kico Jehova ta spera di su pueblo awe?

¹⁴ E Israelitanan tabata adora nan Dios, Jehova, mientras cu e otro nacionnan tabatin nan propio diosnan. Pues un pregunta importante cu mester a haya contesta tabata: Ken ta e Dios berdadero? Den tempo di profeta Isaias, Jehova a compara e situacion mundial aki cu un huicio den corte. El a reta e diosnan di e nacionnan pa bin cu testigo cu por a confirma si nan ta existi di berdad. Jehova a declara: “Laga tur e nacionnan reuni y laga e pueblonan bin hunto. Cua di nan [diosnan] por conta esaki y proclama nos e cosnan di antes? Laga nan trece nan testigonan pa nan wordo  hustifica, of laga nan tende y bisa: ‘Ta berdad.’”—Isa. 43:9.

¹⁵ E diosnan di e nacionnan no por a presenta ningun evidencia cu nan tabata real. Nan tabata simplemente imagennan cu no por a papia y cu no por a bay ningun caminda a menos cu un hende a carganan. (Isa. 46:5-7) Di otro banda, Jehova a bisa su pueblo Israel: “Boso ta mi testigonan, ... y mi sirbidor cu mi a scoge, pa boso conoce mi y kere mi y compronde cu ta ami t’e. Prome cu mi ningun Dios no a wordo forma, y lo no tin ningun despues di mi. Ami, si, ami mes, ta SEÑOR [Jehova], y no tin otro salbador fuera di mi ... Pesey boso ta mi testigonan, ... y ami ta Dios.”—Isa. 43:10-12.

¹⁶ Mescos cu testigonan den un corte, e pueblo scogi di Jehova mester a testifica na un manera cla y firme cu Jehova ta e unico Dios berdadero. El a yama nan “e pueblo cu mi a forma pa mi mes [pa] declara mi alabanza.” (Isa. 43:21) Nan tabata e pueblo cu a carga su nomber. Como cu Jehova a libera Israel for di Egipto, nan tabatin e obligacion moral di obedec’e y glorific’e como nan Soberano dilanti di e otro pueblonan di Tera. Y Jehova ta spera mescos for di su pueblo awe. Profeta Mikeas a bisa ki actitud e pueblo di Dios mester tin. El a bisa: “Tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [Jehova] nos Dios pa semper y semper.”—Mik. 4:5.

17. Den bista di Jehova, con Israel a para bira un mata di wendruif cu no ta sirbi?

¹⁷ Lamentablemente, Israel no a keda fiel na Jehova. Nan a cuminsa imita e nacionnan cu tabata adora diosnan traha di palo y piedra y a traha masha hopi altar pa adoracion falso. Un 2.800 aña pasa, profeta Oseas a bisa cu Israel tabata manera un mata di wendruif cu no tabata produci bon fruta mas. El a agrega: “Nan curason ta infiel; awor nan mester carga nan culpa.” (Ose. 10:1, 2) Un 150 aña despues, profeta Jeremias tambe a compara Israel infiel cu un bon mata di wendruif cu a para bira algo cu no ta sirbi. Mediante Jeremias, Jehova a bisa: “Mi a planta bo manera un mata di wendruif scogi, un simia completamente fiel. Con anto bo por a cambia bo mes mi dilanti y bira spruitnan degenera di un mata di wendruif shimaron? ... Ma unda bo diosnan ta, cu bo a traha pa bo mes? Laga nan lanta, si nan por salba bo den tempo di bo calamidad ... Mi pueblo a lubida mi.”—Jer. 2:21, 28, 32.

18, 19. (a) Con Jehova a profetisa cu lo e produci un pueblo nobo pa carga su nomber? (b) Kico nos lo trata den e siguiente articulo?

¹⁸ En bes di produci bon fruta, esta, practica adoracion puro y comporta nan mes como testigonan fiel di Jehova, Israel a produci e fruta putri di adoracion di dios falso. Pesey Hesus a bisa e lidernan hudiu hipocrita di su tempo: “Lo kita e Reino di Dios for di boso y dun’e na un nacion cu ta duna fruta pa e Reino.” (Mat. 21:43) Ken lo a forma parti di e nacion nobo ey? Ta solamente e personanan cu Jehova lo a scoge pa cera e pacto cu ne por a forma parti di e nacion nobo ey, esta, Israel spiritual. Pa medio di profeta Jeremias, Jehova a priminti cu lo e cera un pacto of “alianza nobo” cu nan. Jehova a profetisa tocante e Israelitanan spiritual: “Ami lo ta nan Dios y nan lo ta mi pueblo.”—Jer. 31:31-33.

¹⁹ Despues cu Israel a bira infiel, Jehova a scoge Israel spiritual pa bira su pueblo den e prome siglo. Pero ken awe ta su pueblo riba Tera? Con hende sincero cu kier sirbi Dios por haya sa ken ta su berdadero sirbidornan? Nos lo trata esaki den e siguiente articulo.