1. Dahme ekei kin kamehlele duwen irail kan me kin kaudokiong Koht?

 ME TOHTO rahnwet kin koasoia me pelien lamalam laud kan en sampah wet sohte nohn kin sewese aramas akan. Ekei leme me Koht sohte ketin kupwurki pelien lamalam pwukat pwehki re sohte kin padahngki dahme mehlel duwen Koht oh re kin wia soahng suwed kan. Ahpw, re kin kalapw kamehlele me Koht ketin kupwurki aramas mwahu kan nan pelien lamalam koaros. Ahpw ia duwe, met mehlel? De Koht ketin kupwurki me irail kan me kaudokiong ih en tohrohr sang kaudok likamw kan? Kitail pahn kilang pasapengpen peidek wet sang atail tehk dahme Paipel mahsanihki duwen sapwellimen Siohwa tohnkaudok mehlel kan nan poadopoad.

2. Ihs me wiahla sapwellimen Siohwa aramas akan? Dahme kadehdehda me irail wia aramas kei me ahneki nanpwungmwahu tohrohr ehu rehn Siohwa? (Menlau kilang tepin kilel.)

² Mpen sounpar 4,000 samwalahro, Siohwa ketin pilada pwihn  ehu pwe ren wia sapwellime aramas nin sampah. Nan Paipel, Eipraam adaneki “semen irail kan koaros me pwoson Koht” oh wia kaun en peneinei laud ehu me naineki ladu epwiki kei. (Rom 4:11; Sen. 14:14) Nan Kenan, aramas akan kin wauneki ih nin duwen “ohl lapalap oh manaman emen.” (Sen. 21:22; 23:6) Siohwa ketin wiahda inou ehu ong Eipraam oh kadaudoke kan. (Sen. 17:1, 2, 19) Koht mahsanihong Eipraam: “Iet inou me kowe oh kadaudokomw kan pahn inoukihdahn: ohl koaros rehmwail pahn sirkumsaisla.” E pil kapatahiong: “Met pahn wia kilel en inou me poadadahr nanpwungen ngehi oh kumwail.” (Sen. 17:10, 11) Eri Eipraam oh ohl koaros nan eh peneineio sirkumsaisla. (Sen. 17:24-27) Kadaudoken Eipraam kan ar sirkumsaisla kin kadehdehda me re wia aramas kei me ahneki nanpwungmwahu tohrohr rehn Siohwa.

3. Ia duwen kadaudoken Eipraam ar wiahla wehi ehu?

³ Nein nein Eipraam pwutak Seikop, de Israel, naineki pwutak ehk riemen. (Sen. 35:10, 22b-26) Kedekedeo, irail wiahla semen kadaudok 12 en Israel. (Wiewia 7:8) Nein Seikop pwutak Sosep wisiklahng Isip, oh mwuhr Parao kihong ih manaman laud en kaunda. Erein lehk laud ehu, Sosep ahneki pwukoa en apwalih palien mwenge nan sahpwo pwon. Pwehki lehk lapalap wet, Seikop oh eh peneineio kohla Isip. (Sen. 41:39-41; 42:6) Ni arail kousoanla mwo, kadaudoken Seikop kan wie tohtohla.​—Sen. 48:4; wadek Wiewia 7:17.

4. Nin tapio, soangen nanpwungmwahu dah me mehn Isip kan oh kadaudoken Seikop kan ahneki?

⁴ Kadaudoken Seikop kan kousoandi wasa ieu nan Isip me adaneki Kosen daulih sounpar 200. (Sen. 45:9, 10) Parao lukehdo mehn Israel ko en kousoanla nan Isip pwehki e ese oh pil wauneki Sosep. (Sen. 47:1-6) Mpen sounpar 100, e kin mie meleilei nanpwungen irail oh mehn Isip kan. Mehn Israel kan kin kousoan nan kahnimw tikitik kan oh kin apwalih mahn. Mendahki mehn Isip kan kin kailongki sounsilepen sihpw kan, re anahne peikiong Parao oh mweidohng mehn Israel kan en kousoan mwo.​—Sen. 46:31-34.

5, 6. (a) Ia duwen irair en sapwellimen Koht aramas akan nan Isip eh wekila? (b) Dahme kahrehda Moses sohte kamakamla, oh dahme Siohwa ketin wiahiong sapwellime aramas akan?

⁵ Mwurin ahnsoukis, mehn Isip kan wiahkihla mehn Israel ko arail lidu kan. Paipel mahsanih: “Eri, nanmwarki kapw emen, me sohte mwahn mwahngih duwen Sosep, ahpw kesepwilda nan Isip. E ahpw mahsanihong sapwellime aramas akan, ‘Kumwail kilang duwen mehn Israel kan ar wie tohtohla oh kehlailasang kitail.’ Re kin itonehng irail nan mour apwal en kalidu oh nan doadoahk laud en wiahda ihmw, oh pil soangen doadoahk koaros en nansapw. Re sohte kin poakeirailla.”​—Eks. 1:8, 9, 13, 14.

⁶ Parao kapw menet pil wiahda kehkehlik me nein mehn Israel seri pwutak koaros en kamakamla ni ahnsou me re ipwidi. (Eks. 1:15, 16) Ni ahnsowo, lihen Israel men me adaneki Sokeped, naitikihda Moses. Ni Moses eh sounpwong siluh, eh nohno ekihla ih nan pelien ahlek ehu ni keilen Pillap en Nail. Sohte pwand, nein Parao serepeino diarada Moses oh nainekihla. E mweidohng ahn Moses eh nohno en apwalihada Moses. Kedekedeo, Moses wiahla sapwellimen Siohwa ladu lelepek men. (Eks. 2:1-10; Ipru 11:23-25) Siohwa ketin mwahngih me sapwellime aramas akan wie lokolok oh ketin koasoanehdi en doadoahngki Moses pwehn kahluwairailsang Isip. (Eks. 2:24, 25; 3:9, 10) Ni ahl wet, Siohwa ketin kasaledekihala mehn Israel kan.​—Eks. 15:13; wadek Deuderonomi 15:15.

7, 8. Ia duwen sapwellimen Siohwa aramas akan ar wiahla wehi sarawi ehu?

⁷ Siohwa saikinte ketin koasoanehdi mehn Israel kan en wiahla wehi ehu me mie kosonned kan oh koasoandi en pwihn en samworo, ahpw e ketin pilada irail en wiahla sapwellime. Ihme kahrehda Siohwa ketin kaweidki Moses oh Aaron en padahkihong Parao: “KAUN-O, Koht en Israel, ketin mahsanih, ‘Komw ketin mweidala pwe nei aramas akan en patolahng kaudokiong ie nan sapwtehn.’”​—Eks. 5:1.

⁸ Ahpw Parao sohte men mweidala mehn Israel kan en kohkohla. Pwehn kasaledekihala sapwellime aramas akan, Siohwa ketikihda kalokolok eisek ko nan Isip oh mwuhr kasohrehla Parao oh nah karis en sounpei ko nan Sehd Weitahtaho. (Eks. 15:1-4) Sohte lel sounpwong siluh mwuri, Siohwa ketin wiahda inou ong mehn Israel ko nan Nahnahn Sainai, mahsanih: “Ma kumwail pahn peikiong ie oh dadaur ei inou, kumwail pahn wiahla nei aramas kesempwal. Tohn sampah pwon uhdahn nei, ahpw kumwail me pahn wiahla nei aramas pilipil, . . . pwihnen aramas ehu me kasarawihong iehte.”​—Eks. 19:5, 6.

9, 10. (a) Nin duwen Deuderonomi 4:5-8, ia duwen Kosonnedo eh kahrehiong mehn Israel kan en weksang wehi teikan? (b) Dahme mehn Israel kan anahne wia pwehn kasalehda me irail pwihnen aramas ehu me kasarawihong Siohwa?

⁹ Erein sounpar epwiki kei, tapwin peneinei kan me wia kaun kan, sounkopwung kan, oh samworo kan iei me kahluwa sapwellimen Siohwa ladu kan. Nan Isip, mehn Israel kan kin idawehn koasoandi en kaunda wet mwohn re wiahla lidu kei. (Sen. 8:20; 18:19; Sohp 1:4, 5) Ahpw, mwurin Siohwa ketin kapitala mehn Israel kan sang kalidu, e ketikihong irail kosonned kei me kahrehiong irail en weksang wehi teikan koaros. (Wadek Deuderonomi 4:5-8; Mel. 147:19, 20.) Kosonnedo koasoanehdi pwihn tohrohr ehu en wia samworo kan ong wehio. Kosonnedo pil koasoia me “me mah kan,” me aramas ako kin wauneki pwehki re loalokong oh erpit, pahn wiahla sounkopwung kei. (Deud. 25:7, 8) Kosonnedo kihong aramas akan kaweid kan me pid duwen arail en kaudok oh ong arail mour en ehuehu rahn.

¹⁰ Mwohnte mehn Israel ko pedolong nan Sapwen Inowo, Siohwa ketin pwurehng padahkihong irail sapwellime kosonned ko. Moses padahkihong irail: “Rahnwet KAUN-O ketin aleikumwaildahr pwe kumwail en wiahla sapwellime aramas, duwen me e ketin inoukidahr, oh e mahsanih kumwail en peikiong sapwellime kosonned akan koaros. E pahn ketin kasapwilkumwailda pohn wehi koaros me e ketin kapikada. Kumwail en kapinga oh wauneki mware. Kumwail pahn wiahla sapwellime aramas.”​—Deud. 26:18, 19.

11-13. (a) Ihs irail kan me tepida iang sapwellimen Koht aramas akan kaudok? (b) Ma mehn liki kan men kaudokiong Siohwa, dahme re anahne wia?

¹¹ Mendahki mehn Israel kan wia sapwellime wehi pilipil ehu nin sampah, Siohwa ketin mweidohng mehn liki kan en iang kousoan rehrail. Karasepe, Paipel mahsanih me tohtohn irail pwukat, iangahki mehn Isip kan, iangala mehn Israel ko ni ahnsou me Koht ketin kahluwairailsang Isip. (Eks. 12:38) Ele ekei nanpwungarail iei nein Parao ladu kan me peikiong kaweid en Moses ko erein kalokolok keisuhwo.​—Eks. 9:20.

¹² Mwohnte mehn Israel kan kotehla Pillap en Sordan kohlahng Kenan, Moses padahkihong irail me re anahne ‘kasalehda arail poakohng mehn liki kan’ me koukousoan nanpwungarail, me iei irail kan me kaidehn mehn Israel kan. (Deud. 10:17-19) Ma mehn liki men men peikiong kosonned  kan me Moses kihda, sapwellimen Koht aramas akan alehdi kaweid en mweidohng aramaso en kousoan rehrail. (Lip. 24:22) Ekei mehn liki kan pil wiahla sapwellimen Siohwa tohnkaudok kan. Karasepe, Rud wia emen mehn Mohap me men papah Siohwa. E ndaiong lihen Israelo Naomi: “Kisehmw kan iei kisehi; oh omw Koht iei ei Koht.” (Rud 1:16) Mehn liki pwukat iei irail kan me wehkohng lamalam en mehn Israel ko, oh ohl akan rehrail sirkumsaisla. (Eks. 12:48, 49) Siohwa ketin kupwurperenki irail en iang wia kisehn sapwellime aramas pilipil kan.​—Nemp. 15:14, 15.

¹³ Ehu en Solomon eh kapakap ko pil kasalehda me Siohwa kin ketin kupwurki mehn liki ko nin duwen sapwellime tohnkaudok kei. Ni ahnsou me kasarawien tehnpaso wiawi, Solomon kapakapki: “Ahnsou me mehn liki men me koukousoan nan sahpw doh ehu pahn rong duwen omwi ketin roson oh lapalahpie oh duwen omwi kin ketin onopada ahnsou koaros pwehn sewese aramas, e ahpw patohdo kapakap nan Tehnpas wet, komwi ketin karonge eh kapakap. Sang nanleng, wasa me komwi kin ketiket ie, komwi ketin karonge oh kapwaiada dahme e peki rehmwi, pwe tohn sampah koaros en eseikomwihla oh peikiong komwi, duwehte sapwellimomwi mehn Israel kan. Irail eri pahn esehla me Tehnpas wet me I kauwadahr iei wasa me aramas pahn kaudokiong komwi ie.” (2 Kron. 6:32, 33) Pil ni mwein Siseso, mehn liki kan me men kaudokiong Siohwa kak wia met ma re iang sapwellime aramas pilipil kan kaudok.​—Sohn 12:20; Wiewia 8:27.

14-16. (a) Ia duwen mehn Israel kan ar wiahla wehi ehu en sounkadehde kan en Siohwa? (b) Dahme Siohwa ketin kupwurki sapwellime aramas akan rahnwet en wia?

¹⁴ Mehn Israel kan kin kaudokiong arail Koht, Siohwa, ahpw wehi teikan kin kaudokiong pein arail koht akan. Eri mie peidek kesempwal ehu me anahne pasapengla: Ihs me Koht mehlelo? Ni mwehin Aiseia, Siohwa mahsanih me peidek wet anahne pasapengla ni ahlohte me peidek ehu kin pasapengla nan mwoalen kopwung. E ketin mahsanih me ma koht en wehi kan uhdahn mie, re anahne pein kihda arail sounkadehde kan ong kopwung wet. E mahsanih: “Re en kapwarehda arail sounkadehde kan me pahn kadehdehda arail pwuhng, me pahn  kadehdehda mehlel en arail lokaia kan.”​—Ais. 43:9.

¹⁵ Koht en wehi kan sohte kak kadehdehda me re uhdahn mie. Irail ihte dikedik kei me sohte kak lokaia oh pil sohte kak mwekid ihte ma emen wahseli irail. (Ais. 46:5-7) Ahpw Siohwa mahsanihong sapwellime mehn Israel ako: “Kumwail me iei ei sounkadehde; I pilkumwaildahr nin duwen ei ladu men, pwe kumwail en eseiehla oh kamehlele ie, oh dehdehkihla me ngehite, me Koht. Sohte emen koht mie, pwe ngehite; sohte mwahn emen mie, pil sohte me pahn mie mwuhr. ‘Ngehite me KAUN-O, ngehite me kak komourkumwailla. . . . Kumwail me ei sounkadehdehn irair wet.’”​—Ais. 43:10-12.

¹⁶ Duwehte sounkadehde kan nan mwoalen kopwung ehu, sapwellimen Siohwa aramas akan ahneki pwais kaselel en kadehdehda me Siohwa kelehpw me Koht mehlelo. E ketin mahsanih: “Irail nei aramas akan me I wiadahr ong ni kalinganpen mwarei, re pahn kin kokouliong ie oh kapikapinga ie.” (Ais. 43:21) Aramas esehkin irail nin duwen sapwellimen Siohwa aramas akan. Pwehki Siohwa ketin kasaledekihala mehn Israel ko sang Isip, e ketin kupwurki irail en perenki peikiong ih oh kalinganahla ih nin duwen arail Kaun me keieu lapalap. Soukohp Maika kasalehda mwuhr soangen madamadau me re anahne ahneki en duwehte sapwellimen Koht aramas akan rahnwet ni eh koasoia: “Aramas tohto pahn kekeid ni mwaren arail koht; ahpw kitail pahn kekeid ni mwaren Siohwa atail Koht kohkohlahte.”​—Maika 4:5, NW.

17. Dahme kahrehda Siohwa ketin kilangwohng mehn Israel kan nin duwen tuhkehn kreip ehu me sohla katepe?

¹⁷ E kansensuwed me mehn Israel kan sohla loalopwoat ong Siohwa. Re tapiada alasang wehi kan me kin kaudokiong koht kan me wiawihkihda tuhke oh takai, oh re wiahda pei sarawi kan ong kaudok likamw. Mpen sounpar 2,800 mwoweo, soukohp Oseia karasahiong mehn Israel kan tuhke kreip ehu oh nda: “Aramas akan me nan kapehd likamw pahn lokolongki diparail kan.” (Os. 10:1, 2) Mpen sounpar 150 mwuri, Seremaia pil kapahrekiong mehn Israel ko tuhke kreip ehu. E kasalehda me irail duwehte tuhkehn kreip kaselel ehu me wekila oh sohla katepe. Ni eh ketin doadoahngki Seremaia, Siohwa mahsanih: “Ia koht ako me kumwail wiadahng pein kumwail? Re en doareikumwailla ni amwail kin lelohng apwal—ma re kak!” E pil mahsanih: “Nei aramas akan manokeielahr.”​—Ser. 2:21, 28, 32.

18, 19. (a) Ia duwen Siohwa eh ketin kohpada me e pahn ketin sapwellimaniki aramas pilipil kei nin sampah? (b) Dahme kitail pahn koasoiapene nan iren onop en mwuhr?

¹⁸ Mehn Israel kan kihda wah suwed pwehki re sohte kaudokiong Siohwa ni ahl pwung. Re sohte pousehlahte wie sapwellime sounkadehde kan ahpw re uhd kaudokiong dikedik kan. Sises eri ketin padahkihong kaun suwed en mehn Suhs ko ahnsowo: “Wehin Koht pahn kohsang kumwail oh uhd kohieng aramas akan me pahn kapwarehda wahn Wehin Koht.” (Mad. 21:43) Irail kante me Siohwa ketin pilada iei me kak wia kisehn wehi kapw wet, Israel en Koht. E pahn ketin wiahda “inou kapw ehu” ong irail. Siohwa ketin mahsanih duwen irail: “I pahn wiahla ar Koht, oh re pahn wiahla nei aramas.”​—Ser. 31:31-33.

¹⁹ Mwurin mehn Israel kan ar salelepekla, Siohwa ketin pilada Israel en Koht en wiahla sapwellime aramas ni mwehin tepin Kristian ko. Ahpw ihs me wia sapwellime aramas akan rahnpwukat? Ia duwen irail kan me men papah Siohwa arail kak ese ihs sapwellime tohnkaudok mehlel kan? Kitail pahn koasoiapene met nan iren onop en mwuhr.