1, 2. Anong pagbabago an nangyari kan Pentecostes 33 C.E., asin siisay an nagin mga miyembro kan bagong banwaan ni Jehova? (Hilingon an ritrato sa itaas.)

AN Pentecostes 33 C.E. sarong mahalagang marhay na aldaw sa kasaysayan kan banwaan ni Jehova sa daga. May nangyaring dakulaon na pagbabago. Kan aldaw na iyan, paagi kan saiyang banal na espiritu, naglalang si Jehova nin sarong bagong nasyon—an espirituwal na Israel, an ‘Israel nin Diyos.’ (Gal. 6:16) Sa kainot-inuting pagkakataon puon kan panahon ni Abraham, dai na magigin tanda kan banwaan nin Diyos an literal na pagturi sa mga lalaki. Imbes, arog kan isinurat ni Pablo manungod sa lambang miyembro kan bagong nasyon na iyan: ‘An pagturi [sa saiya] iyo an sa puso, [paagi] sa espiritu.’—Roma 2:29.

² An inot na mga miyembro kan bagong nasyon nin Diyos iyo an mga apostol asin an labing sanggatos na iba pang disipulo ni Cristo na nagtiripon sa Jerusalem sa sarong kuwarto na nasa itaas. (Gui. 1:12-15) Ibinubo sa sainda nin Diyos an banal na espiritu kaya sinda nagin mga aki nin Diyos na pinaniaki sa espiritu. (Roma 8:15, 16; 2 Cor. 1:21) Pruweba ini na nagpupunsiyonar na an bagong tipan, na si Cristo an parapangultanan asin nagin balido paagi kan saiyang dugo. (Luc. 22:20; basahon an Hebreo 9:15.) Kaya an mga disipulong  ini nagin miyembro kan bagong nasyon ni Jehova, an saiyang bagong banwaan. Tinabangan sinda kan banal na espiritu na makapaghulit sa lain-lain na lengguwahe kan mga Judio asin proselitang hali sa bilog na Imperyo nin Roma na nagpa-Jerusalem tanganing iselebrar an Judiong Kapiyestahan nin mga Semana, o Pentecostes. Nadangog asin nasabutan kan mga tawong ini sa sadiri nindang lengguwahe an ‘darakulang mga bagay na ginibo nin Diyos’ na ihinulit kan pinaniaki sa espiritung mga Kristiyano.—Gibo 2:1-11, An Marahay na Bareta Biblia.

3-5. (a) Ano an sinabi ni Pedro sa mga Judio kan aldaw nin Pentecostes? (b) Anong sunod-sunod na lakdang an nakatabang sa pagdakul kan miyembro kan bagong nasyon ni Jehova kan inot na mga taon kaiyan?

³ Ginamit ni Jehova si apostol Pedro tanganing bukasan an dalan para sa mga Judio asin mga proselita na magin miyembro kan bagong mamundag na nasyon na ini, an Kristiyanong kongregasyon. Kan aldaw nin Pentecostes, daing takot na sinabi ni Pedro sa mga Judio na dapat nindang akuon si Jesus, an tawong “ipinako” ninda, huling ‘ginibo siya nin Diyos na Kagurangnan asin Cristo.’ Kan maghapot an mga tawo kun ano an dapat nindang gibuhon, nagsimbag si Pedro: ‘Magsurulsol kamo, asin [magpabawtismo] an lambang saro sa saindo sa ngaran ni Jesu-Cristo sa kapatawadan kan saindong mga kasalan, asin kamo maako kan balaog nin [banal na espiritu].’ (Gui. 2:22, 23, 36-38) Kan aldaw na iyan, mga 3,000 katawo an nakadagdag sa bagong nasyon nin espirituwal na Israel. (Gui. 2:41) Pagkatapos, padagos na nagin mabunga an maigot na paghuhulit kan mga apostol. (Gui. 6:7) Nagdadakul an miyembro kan bagong nasyon.

⁴ Kan huri, naghulit man sinda sa mga Samaritano asin nagkaigwa iyan nin marahay na resulta. Dakul an nabawtismuhan kan ebanghelisador na si Felipe, pero dai tulos sinda nakaako kan banal na espiritu. An namamahalang grupo na nasa Jerusalem isinugo si apostol Pedro asin Juan sa nakumbertir na mga Samaritanong ini, asin ‘ibinugtak ninda sa sainda an saindang mga kamot, asin sinda nag-ako kan [banal na espiritu].’ (Gui. 8:5, 6, 14-17) Huli kaini, nagin linahidan nin espiritu asin miyembro man kan espirituwal na Israel an mga Samaritanong ini.

⁵ Kan 36 C.E., ginamit giraray si Pedro tanganing magtao pa sa iba nin oportunidad na magin miyembro kan bagong nasyon nin espirituwal na Israel. Nangyari ini kan maghulit siya sa Romanong senturyon na si Cornelio asin sa mga paryente saka mga katuod kaini. (Gui. 10:22, 24, 34, 35) An Bibliya nagsasabi: ‘Mantang si Pedro nagtataram pa, an [banal na espiritu] naghilig sa gabos [na mga bakong Judio] na nagdadangog kan tataramon. Asin sinda na kairiba ni Pedro na mga tinuri nagngaralas, huli ta ibinubo man an balaog nin [banal na espiritu] sa mga Hentil.’ (Gui. 10:44, 45) Huli kaini, an oportunidad na magin miyembro kan bagong nasyon nin espirituwal na Israel nakaabot na ngunyan sa mga may pagtubod na bakong turing mga Hentil.

6, 7. Ano an dapat gibuhon kan mga miyembro kan bagong nasyon bilang ‘sarong banwaan para sa ngaran ni Jehova,’ asin sagkod sain ninda nagibo iyan?

⁶ Sa sarong miting kan namamahalang grupo  kan inot na siglong mga Kristiyano kan 49 C.E., sinabi kan disipulong si Santiago: ‘Si Simon [Pedro] nagsaysay sato dapit kan pagsungko nin Diyos sa mga Hentil sa pagkua diyan sa sainda nin sarong banwaan [para] sa saiyang ngaran.’ (Gui. 15:14) An mga may pagtubod na Judio asin bakong Judio parehong kaiba sa bagong banwaan na ini na nagdadara kan pangaran ni Jehova. (Roma 11:25, 26a) Kan huri, nagsurat si Pablo: ‘Kaidto kamo bakong banwaan, alagad ngunyan banwaan na [kamo] nin Diyos.’ Sinumaryo ni Pedro an asignasyon ninda paagi sa pagsabi: ‘Kamo “an kapag-arakian na pinili, sa hading pagkasaserdote, banal na nasyon, banwaan na sadiri nin Diyos, tanganing ikapahayag nindo an mga kalangkawan” kaidtong nag-apod saindo hali sa kadikluman pasiring sa makangangalas niyang ilaw.’ (1 Ped. 2:9, 10) Dapat nindang umawon an Saro na irinerepresentar ninda asin hayagan na pamurawayon an saiyang pangaran. Dapat sindang magin daing takot na mga saksi para ki Jehova, an Unibersal na Soberano.

⁷ Arog kan Israel sa laman, inapod man ni Jehova an mga miyembro kan espirituwal na Israel na ‘an banwaan na linalang ko [para sa] sakuya, [tanganing] ibalangibog an sakuyang mga kaumawan.’ (Isa. 43:21) Pusuan na ihinayag kan inot na mga Kristiyanong idto na si Jehova sana an tunay na Diyos asin na palso an gabos na ibang mga diyos na sinasamba kan panahon na idto. (1 Tes. 1:9) Nagpatotoo sinda dapit ki Jehova asin ki Jesus ‘sa Jerusalem, asin sa bilog na Judea asin Samaria, patin sagkod sa kapuro-puruhi nin daga.’—Gui. 1:8; Col. 1:23.

8. Ano an itinaong patanid ni apostol Pablo sa banwaan nin Diyos kan inot na siglo?

⁸ An sarong daing takot na miyembro kan inot na siglong ‘banwaan para sa ngaran ni Jehova’ iyo si apostol Pablo. Sa atubangan kan paganong mga pilosopo, marigon niyang idinepensa an soberaniya ni Jehova, ‘an Diyos na naggibo kan kinaban asin kan gabos na yaon diyan, siya, huling Kagurangnan nin langit asin nin daga.’ (Gui. 17:18, 23-25) Sa pagtatapos kan saiyang ikatulong pagbiyahe bilang misyonero, pinatanidan ni Pablo an mga miyembro kan banwaan nin Diyos: ‘Ako nakakaaram na pakahali ko, lalaugon kamo nin maringis na mga lobo na dai tatadaan an aripumpon, asin may maruluwas sa pag-iriba nindo na magtataram nin mga bagay na maraot tanganing maguyod ninda sa sainda an mga disipulo.’ (Gui. 20:29, 30) Nagin risang-risa an ihinulang apostasyang ini sa katapusan kan inot na siglo.—1 Juan 2:18, 19.

9. Kun dapit sa ‘banwaan para sa ngaran ni Jehova,’ ano an nangyari pagkagadan kan mga apostol?

⁹ Pagkagadan kan mga apostol, gruminabe an apostasya asin naglataw an mga relihiyon kan Kakristiyanuhan. Imbes na magin ‘sarong banwaan para sa ngaran ni Jehova,’ hinali kan mga apostatang Kristiyano an pangaran nin Diyos sa dakul na traduksiyon ninda kan Bibliya. Inarog ninda an paganong mga ritwal asin hinalian nin onra an Diyos paagi kan saindang mga doktrina na mayo sa Kasuratan, “banal na mga giyera” daa, asin imoral na mga paggawi. Kaya, sa laog nin dakul na siglo, pira sana an maimbod na parasamba ni Jehova sa daga asin mayo nin organisadong ‘banwaan para sa saiyang ngaran.’

10, 11. (a) Ano an ihinula ni Jesus sa saiyang parabula dapit sa trigo asin mga duot? (b) Paano nautob an parabula ni Jesus pagkatapos kan 1914, asin ano an nagin resulta?

¹⁰ Sa saiyang parabula dapit sa trigo asin mga duot, ihinula ni Jesus an espirituwal na kadikluman na resulta nin apostasya. Sinabi niya na ‘mantang turog an mga tawo,’ masabwag an Diyablo nin mga duot sa uma na pinagsabwagan kan Aki nin tawo nin mga banhi kan trigo. Magkaiba sindang matalubo sagkod sa “katapusan nin kinaban.” Ipinaliwanag ni Jesus na an  “marahay na banhi” nagrerepresentar sa ‘mga aki kan Kahadian’ asin an mga ‘duot’ iyo an ‘mga aki [kan saro na] maraot.’ Sa panahon kan katapusan, isusugo kan Aki nin tawo an saiyang mga “paraani,” an mga anghel, tanganing isuway an simbolikong trigo sa duot. Titipunon an mga aki kan Kahadian. (Mat. 13:24-30, 36-43) Paano ini nangyari, asin ano an koneksiyon kaini sa pagkaigwa giraray ni Jehova nin sarong organisadong banwaan sa daga?

¹¹ Nagpuon an “katapusan nin kinaban” kan 1914. Kan puminutok an giyera kan taon na iyan, an pirang ribong linahidan na Kristiyano, an ‘mga aki kan Kahadian,’ nasa espirituwal na pagkabihag sa Dakulang Babilonya. Kan 1919, pinatalingkas sinda ni Jehova, na malinaw na nagpahiling kan pagkakalain ninda asin kan mga ‘duot’ o imitasyon na mga Kristiyano. Tiniripon niya an ‘mga aki kan Kahadian’ sa sarong organisadong banwaan, bilang kautuban kan hula ni Isaias: ‘Mangangaki daw an daga sa sarong aldaw? Mamumundag daw an sarong nasyon nin tulos man? Tara, kan [purusan] na an Sion, nangaki siya kan saiyang mga aki.’ (Isa. 66:8) Ipinangaki kan Sion, na iyo an organisasyon nin espiritung mga linalang ni Jehova, an saiyang linahidan nin espiritung mga aki asin inorganisar sinda na magin sarong nasyon.

12. Paano ipinahiling kan mga linahidan ngunyan na sinda ‘sarong banwaan para sa ngaran ni Jehova’?

¹² Arog kan inot na mga Kristiyano, an ninombrahan na ‘mga aki kan Kahadian’ magigin mga saksi ni Jehova. (Basahon an Isaias 43:1, 10, 11.) Huli kaini, magigin lain nanggad sinda huli sa saindang Kristiyanong paggawi asin huling ihinuhulit ninda ‘ining ebanghelyo nin Kahadian sa pagpapatotoo sa gabos na nasyon.’ (Mat. 24:14; Fil. 2:15) Sa paaging ini, natabangan ninda an dakul, an totoo minilyon, na magkaigwa nin matanos na kamugtakan sa atubangan ni Jehova.—Basahon an Daniel 12:3.

13, 14. Ano an dapat gibuhon kan mga bakong kabilang sa espirituwal na mga Israelita tanganing akuon ni Jehova an pagsamba asin paglilingkod ninda, asin paano ini ihinula sa Bibliya?

¹³ Nahiling ta sa nainot na artikulo na sa suanoy na Israel, dapat na umiba sa katipan na banwaan  ni Jehova an mga taga ibang banwaan tanganing akuon Niya an pagsamba ninda. (1 Ha. 8:41-43) Siring man ngunyan, dapat man na umiba an bakong kabilang sa espirituwal na mga Israelita sa banwaan ni Jehova, ‘an mga aki kan Kahadian’—an linahidan na mga Saksi ni Jehova.

¹⁴ Ihinula kan duwang suanoy na propeta na dakul an maburunyog tanganing magsamba ki Jehova kaiba kan saiyang banwaan sa panahon na ini kan katapusan. Ihinula ni Isaias: ‘Maarabot an dakul na banwaan asin masarabi: “Madya kamo, asin masarakat kita sa bukid ni Jehova, sa harong kan Diyos ni Jacob. Asin ta tutukduan kita niya kan saiyang mga dalan, asin magraralakaw kita sa saiyang mga dana.” Huli ta sa Sion maluwas an pagbuot, asin sa Jerusalem an tataramon ni Jehova.’ (Isa. 2:2, 3) Siring man, ihinula ni propeta Zacarias na ‘madaratong an dakul na banwaan asin makusog na mga nasyon sa paghanap ki Jehova kan mga hukbo sa Jerusalem asin sa pag-arang kan tabang ni Jehova.’ Ilinadawan niya sinda bilang ‘sampulong tawo sa gabos na tataramon kan mga nasyon’ na, sa simbolikong pagtaram, makarapot sa halabang gubing kan espirituwal na Israel, na nagsasabi: ‘Maiba kami sa saindo, huli ta samuyang nadangog na an Diyos yaon diyan sa saindo.’—Zac. 8:20-23.

15. Sa anong gibuhon “maiba” an ‘ibang mga karnero’ sa espirituwal na mga Israelita?

¹⁵ “Maiba” an ‘ibang mga karnero’ sa espirituwal na mga Israelita sa gibuhon na paghuhulit kan maugmang bareta kan Kahadian. (Mar. 13:10) Nagigin kabtang sinda kan banwaan nin Diyos, ‘sarong aripumpon’ kaiba kan mga linahidan, sa irarom kan “marahay na pastor,” si Cristo Jesus.—Basahon an Juan 10:14-16.

16. Paano papangyarihon ni Jehova an huring kabtang kan ‘dakulang kahurasaan’?

¹⁶ Pagkalaglag kan Dakulang Babilonya, magkakaigwa nin todo-todong pagsalakay sa banwaan ni Jehova, asin sa panahon na iyan kakaipuhanon ta an proteksiyon ni Jehova sa saiyang banwaan. Sa saiyang piniling oras, mamaniobrahon ni Jehova an mga bagay-bagay sa daga, na maresulta sa pagsalakay sa saiyang banwaan. An pagsalakay na ini an pupunan kan huring kabtang kan ‘dakulang kahurasaan,’ an Armagedon. (Mat. 24:21; Ezeq. 38:2-4) Sa panahon na iyan, sasalakayon ni Gog an ‘banwaan na tiniripon hali sa mga katawuhan,’ an banwaan ni Jehova. (Ezeq. 38:10-12) An pagsalakay na iyan an magigin senyal kan paghukom ni Jehova ki Gog asin sa mga hukbo kaini. Ibabantog ni Jehova an saiyang soberaniya asin papakangbanalon an saiyang pangaran, huli ta siya nagsabi: ‘Ipapamidbid ko [an sakong sadiri] sa mga mata kan dakul na katawuhan; asin makakaisi sindang ako si Jehova.’—Ezeq. 38:18-23.

17, 18. (a) Anong instruksiyon an itatao ni Jehova sa saiyang banwaan pag sinalakay na sinda ni Gog? (b) Ano an dapat tang gibuhon tanganing maprotektaran ni Jehova?

¹⁷ Pag pinunan na ni Gog an pagsalakay, sasabihon ni Jehova sa saiyang mga lingkod: “Lumaog ka, banwaan ko, sa saimong tagong mga kuwarto, asin isara mo an saimong mga pinto. Magtago ka nin kadikit na panahon sagkod na makalihis an grabeng kaanggutan.” (Isa. 26:20, NW) Sa kritikal na panahon na iyan, matao si Jehova sa sato nin nagliligtas-buhay na mga instruksiyon, asin an “tagong mga kuwarto” posibleng may koneksiyon sa satong lokal na mga kongregasyon.

¹⁸ Kaya, kun gusto niyatong maprotektaran ni Jehova sa dakulang kahurasaan, dapat tang akuon na may banwaan si Jehova sa daga, na inorganisar sa mga kongregasyon. Dapat na padagos kitang manindugan kaiba ninda asin dayupot na makiasosyar sa satong lokal na mga kongregasyon. Arog kan salmista, bilog na puso lugod niyatong sabihon: ‘Ki Jehova an [kaligtasan]. Manunungod sa saimong banwaan an saimong bendisyon.’—Sal. 3:8.