1, 2. Long lafet blong Pentekos long yia 33, ?Jehova i mekem wanem bigfala jenis? ?Hu ol fas man long niufala neson ya? (Yu luk pija long stat blong stadi.)

LONG lafet blong Pentekos long yia 33, wan bigfala jenis i kamaot. Jehova i stanemap niufala neson ya, “Isrel blong God.” (Galesia 6:16, Nyutesteman Wetem Ol Sam Long Bislama) Jehova i yusum tabu spirit blong makemaot ol man wanwan long neson ya. Pol i talem se, i no nid blong olgeta oli sakomsaes long bodi olsem ol laen blong Ebraham. Sakomsaes blong olgeta, hemia ‘samting we spirit blong God i mekem long hat blong olgeta.’—Rom 2:29.

² Ol fas man long niufala neson ya, hemia ol aposol wetem moa long 100 disaepol blong Kraes, we oli joen wanples long wan rum long Jerusalem. (Ol Wok 1:12-15) God i sanem tabu spirit i kamdaon long olgeta, nao oli kam ol pikinini blong hem. (Rom 8:15, 16; 2 Korin 1:21) Samting ya i soemaot se Jehova i agri long sakrefaes blong Jisas, mo niufala kontrak i tekem ples blong kontrak blong Loa. (Luk 22:20; ridim Hibrus 9:15.) Ol disaepol ya we tabu spirit i kamdaon long olgeta, oli kam man blong niufala neson ya. Tabu spirit i mekem se oli save toktok mo kasemsave long plante lanwis, mo oli save tijim ol man long “ol bigbigfala wok ya we God i mekem.”—Ol Wok 2:1-11.

3-5. (1) ?Pita i talem wanem long ol man Isrel long lafet blong Pentekos? (2) ?Olsem wanem niufala neson ya i kam bigwan?

³ Jehova i lidim aposol Pita blong i pulum ol man Isrel mo ol proselaet oli kam joen long niufala neson ya, hemia kongregesen blong ol tabu Kristin. Long lafet blong Pentekos, Pita i talem klia long ol man Isrel we oli kilim Jisas i ded, se naoia God i mekem Jisas i kam ‘Masta blong olgeta, mo Mesaea.’ Taem oli askem wanem samting we oli mas mekem, Pita i talem se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala. Nao bambae God i givim Tabu Spirit ya long yufala.” (Ol Wok 2:22, 23, 36-38) Long sem dei ya, samwe long 3,000 man oli joen long niufala neson ya, Isrel blong God. (Ol Wok 2:41) Afta, ol aposol oli gohed blong prij strong, mo plante moa man oli bilif long trutok. (Ol Wok 6:7) Niufala neson ya i kam bigwan moa.

⁴ Samtaem biaen, ol disaepol blong Jisas oli prij long ol man Sameria. Plante long olgeta oli bilif long trutok mo oli baptaes, be oli no kasem tabu spirit. Nao hed kampani long Jerusalem i sanem Pita mo Jon i go long ol niufala brata mo sista ya. Tufala aposol ya i putum han blong tufala long olgeta, “nao olgeta i kasem Tabu Spirit.” (Ol Wok 8:5, 6, 14-17) Long taem ya, tabu spirit i makemaot olgeta nao oli joen long Isrel blong God.

⁵ Long yia 36, God i lidim Pita i go singaot sam narafala man bakegen blong oli joen long niufala neson ya, Isrel blong  God. Pita i go prij long Konilias we i komanda blong ami blong Rom, wetem ol famle mo ol fren blong hem. (Ol Wok 10:22, 24, 34, 35) Baebol i talem se taem Pita i stap toktok yet, tabu spirit i kam fulap long ol man ya. “Nao ol laen blong Isrel ya we oli bilif long Jisas, we oli aot long Jopa wetem Pita oli kam, oli sapraes tumas long samting ya, we olgeta we oli no laen blong Isrel, be God i givim Tabu Spirit long olgeta.” (Ol Wok 10:44, 45) Stat long taem ya, ol man blong narafala kantri we oli no sakomsaes oli save joen long Isrel blong God.

6, 7. ?Niufala neson ya i mekem wanem blong soemaot se i holem nem blong God?

⁶ Long miting blong hed kampani long yia 49, disaepol Jemes i talem se: “Saemon [Pita] i talemaotgud long yumi we God i kamtru olsem wanem fastaem long ol man we oli no laen blong Isrel blong tekemaot sam long olgeta, blong oli holem nem blong hem.” (Ol Wok 15:14) Long niufala neson ya we God i stanemap blong “holem nem blong hem,” i gat ol Kristin we oli man Isrel mo olgeta we oli blong ol narafala kantri. (Rom 11:25, mo fas haf blong 26) Biaen, Pita i raetem se: “Fastaem yufala i no man blong God, be naoia yufala i kam man blong hem finis.” Pita i tokbaot wok blong niufala neson ya se: “God i jusumaot yufala blong yufala i laen blong hem. Yufala i pris blong King. Yufala i man blong wan kantri nomo, we yufala i tabu man blong God, mo yufala i man blong hem nomo. Hem i mekem olsem long yufala, blong yufala i save talemaot ol gudgudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.” (1 Pita 2:9, 10) Olgeta ya oli mas kam ol strong witnes blong Jehova, mo oli mas talemaot se hem i King blong heven mo wol.

⁷ Jehova i stap yusum niufala neson ya blong mekem wok blong hem, taswe hem i save talem se: “Hemia ol man we mi mi mekem olgeta blong oli kam man blong mi, mo olgeta ya, bambae oli save singsing blong presem nem blong mi.” (Aesea 43:21) Oli no fraet blong talemaot long ol man se Jehova nomo i tru God be ol narafala god oli no tru. (1 Tesalonaeka 1:9) Olgeta oli witnes blong Jehova mo Jisas long ‘Jerusalem, mo long olgeta ples long Judia mo Sameria, gogo oli finisim olgeta ples long wol.’—Ol Wok 1:8; Kolosi 1:23.

8. ?Aposol Pol i givim wanem woning long kongregesen?

⁸ Pol i wan strong witnes blong Jehova. Hem i stap talemaot se Jehova nomo i tru God, mo hem i talemaot samting ya long ol hiten man tu we oli gat fulap waes blong wol. Hem i talem se Jehova i “mekem wol ya, mo olgeta samting we oli stap long hem,” mo hem nomo i “Masta blong heven mo wol.” (Ol Wok 17:18, 23-25) Mo Pol i givim woning long kongregesen, se: “Mi mi save finis, se bambae, taem mi mi aot long yufala, olgeta ya we oli olsem wael dog, bambae oli kam long yufala, mo bambae oli ronem yufala ol man blong Jisas, olsem we yufala i sipsip nomo. Yes, i gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Ol Wok 20:29, 30) Klosap long yia 100, i gat plante Kristin we oli man blong apostasi finis.—1 Jon 2:18, 19.

9. Afta we ol aposol oli ded, ?wanem i hapen?

⁹ Afta we ol aposol oli ded, ol man blong apostasi oli kam plante long kongregesen, mo oli statem ol giaman skul we oli talem  se oli Kristin. Ol giaman Kristin ya oli no moa holem nem blong God, Jehova, be oli girap, oli tekemaot nem ya long plante Baebol. Oli mekem plante narafala fasin tu blong spolem nem blong God. Oli folem kastom blong ol hiten man, mo oli tijim ol man long ol bilif we oli no kamaot long Baebol. Oli mekem ol faet long nem blong God, mo oli talem se ol faet ya oli tabu. Oli mekem kruked fasin mo ol doti fasin blong man wetem woman. Long ol handred yia afta we apostasi i stat, i gat sam man nomo we oli holemstrong long Jehova, be i no gat wan grup we i ‘holem nem blong God.’

10, 11. (1) ?Jisas i talem wanem long parabol blong wit mo rabis gras? (2) Afta long yia 1914, ?parabol ya i kamtru olsem wanem?

¹⁰ Long parabol blong wit mo rabis gras, Jisas i soemaot se bambae i had blong luksave skul we i tru, from we bambae i gat plante man blong apostasi. Hem i talem se “taem ol man oli slip,” Setan bambae i planem rabis gras long garen ya we Pikinini blong man i planem gudfala sid long hem. Rabis gras bambae i gru wanples wetem wit gogo klosap “en blong wol ya.” Hem i talem se “ol gudfala sid” i minim “ol man blong Kingdom” (NW), mo “ol rabis gras” i minim “ol man blong Setan.” Long taem ya we i klosap long en blong wol, Pikinini blong man bambae i sanem ol enjel blong oli seraot ol rabis gras long ol wit. Nao ol enjel bambae oli tekemaot ol man blong Kingdom. (Matiu 13:24-30, 36-43) ?Parabol ya i kamtru olsem wanem? ?Mo olsem wanem samting ya i mekem se God i gat wan grup bakegen long wol?

¹¹ Taem ya we i klosap long “en blong wol,” hem i stat long yia 1914. Long taem ya, i gat samwe long 5,000 tabu Kristin nomo long wol. Long ol yia blong bigfala faet ya we i stat long 1914, “ol man blong Kingdom” oli stap kalabus yet long sam giaman tijing blong Bigfala Babilon. Be long yia 1919, Jehova i mekem olgeta oli fri, nao i kam klia se hu i tru Kristin mo hu i giaman. Hem i mekem “ol man blong Kingdom” oli joen olsem wan neson, folem tok blong Aesea se: “?Samtaem wan ples i kam niufala kantri long wan dei nomo? ?Samtaem yufala i harem nius blong samting olsem? !Nogat! Be ples ya Saeon bambae i no save harem nogud longtaem, bambae niufala kantri i kamaot long hem wantaem nomo.” (Aesea 66:8) Long profet tok ya, Saeon i minim ogenaesesen blong Jehova long heven. “Niufala kantri i kamaot” long Saeon taem neson blong ol tabu man i stat long wol.

12. ?Wanem i soemaot se ol tabu man oli holem nem blong God?

¹² Ol tabu “man blong Kingdom” tede oli witnes blong Jehova, olsem ol fas Kristin. (Ridim Aesea 43:1, 10, 11.) Oli defren long ol narafala man from ol gudfala fasin blong olgeta, mo from wok ya blong talemaot  gud nius blong Kingdom ‘blong oli witnes long fes blong olgeta man.’ (Matiu 24:14; Filipae 2:15) Olsem nao, oli givhan long plante milian man blong oli fren gud wetem Jehova.—Ridim Daniel 12:3.

13, 14. ?Olgeta we tabu spirit i no makemaot olgeta, oli mas mekem wanem? ?Wanem tufala profet tok i talemaot samting ya?

¹³ Long las stadi, yumi lanem se Jehova i agri long wosip blong ol man blong narafala kantri taem oli joen wetem ol man Isrel blong wosipim hem. (1 King 8:41-43) Long sem fasin, tede, olgeta we tabu spirit i no makemaot olgeta oli mas joen wetem ol tabu Witnes blong wosipim Jehova.

¹⁴ Ol profet bifo oli talemaot se long taem ya we i klosap long en blong wol, plante man bambae oli joen long wosip blong Jehova. Profet Aesea i talem se: ‘Olgeta ya bambae oli kam, oli talem se, “Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot, from we oltaem, tok blong hem i stap kamaot long taon ya Jerusalem, mo oltaem, long hil ya Saeon, hem i stap tijim ol man blong hem long ol loa blong hem.”’ (Aesea 2:2, 3) Profet Sekaraea i talemaot tok blong Jehova se: “Bambae i gat plante man blong ol narafala kantri we oli gat paoa, mo ol haeman oli kam long Jerusalem blong mekem wosip long mi. Mo bambae oli prea long mi blong mi blesem olgeta.” Ol man ya bambae oli kamaot long ‘ol naranarafala lanwis,’ mo bambae oli joen wetem Isrel blong God blong wosipim Jehova. Bambae oli talem se: “Mifala i wantem kam fren blong yufala, from we mifala i harem nius se God i stap givhan long yufala.”—Sekaraea 8:20-23.

15. ?“Ol narafala sipsip” oli “kam fren” blong Isrel blong God olsem wanem?

¹⁵ “Ol narafala sipsip” oli “kam fren” blong Isrel blong God taem oli joen wetem olgeta blong talemaot gud nius blong Kingdom. (Mak 13:10) “Ol narafala sipsip” ya tu oli kam ol man blong God. Olgeta wetem ol tabu Kristin oli kam “wan kampani nomo,” we i gat “wan man nomo blong lukaot long olgeta,” hemia Jisas Kraes.—Ridim Jon 10:14-16.

16. ?Olsem wanem Jehova bambae i lidim ol samting we i hapen blong mekem Amagedon i faerap?

¹⁶ Afta we Bigfala Babilon i lus, Setan mo ol ami blong hem bambae oli agensem fulwan ol man blong Jehova. Long taem ya, yumi mas mekem samting we Jehova i talem, blong yumi save stap sef. Long taem we Jehova i jusum, bambae hem i lidim ol samting we i hapen long wol, blong mekem se Setan i girap agensem ol man blong hem. Long taem ya nao, Amagedon, we i las haf blong “bigfala trabol,” bambae i faerap. (Matiu 24:21; Esikel 38:2-4) Gogo bambae i girap agensem ol man we ‘oli aot long ol narafala kantri, oli kam,’ hemia ol man blong Jehova. (Esikel  38:10-12) Taem Gogo i girap, wantaem nomo Jehova bambae i tekem aksen blong sevem ol man blong hem. Bambae hem i smasem Gogo mo ol ami blong hem. Long fasin ya, Jehova bambae i leftemap hae rul blong hem mo bambae i mekem nem blong hem i tabu. Hem i talem se: “Bambae mi soemaot long ol man blong olgeta kantri we mi mi tabu mo mi gat olgeta paoa. Nao bambae oli savegud we mi mi Hae God.”—Esikel 38:18-23.

17, 18. (1) Taem Gogo i girap agensem ol man blong Jehova, ?Jehova bambae i talem wanem? (2) Sipos yumi wantem se Jehova i sevem yumi, ?yumi mas mekem wanem?

¹⁷ Taem Gogo i girap agensem ol man blong Jehova, Jehova bambae i talem long ol man blong hem se: ‘Yufala i go insaed long ol haos blong yufala, mo taem yufala i stap insaed, yufala i satem doa. Yufala i go haed blong smoltaem, gogo kros blong mi bambae i godaon bakegen.’ (Aesea 26:20) Long taem ya, Jehova bambae i talem long yumi wanem we yumi mas mekem blong yumi stap sef. Maet tok ya “insaed long ol haos blong yufala” i minim samting we i joen wetem kongregesen blong yumi.

¹⁸ Sipos yumi wantem se Jehova i sevem yumi long taem blong bigfala trabol, yumi mas bilif se hem i gat ol man blong hem long wol tede. Yumi mas bilif tu se hem i stanemap ol kongregesen we ol man blong hem oli stap insaed long olgeta. Yumi mas joen wetem ol man blong Jehova, mo yumi mas fasgud long kongregesen blong yumi. I gud yumi talem wetem fulhat blong yumi, ol tok blong man blong raetem Sam ya, se: “[Jehova.] Paoa blong sevem man i blong yu nomo. Mi wantem blong yu blesem ol man blong yu.”—Ol Sam 3:8.