1, 2. Pentekoste 33 C.E. ai dahaka ia vara, bona daidia be Iehova ena bese matamatana ai idia lao? (Laulau ginigunana itaia.)

 PENTEKOSTE 33 C.E. be dina badana Iehova ena taunimanima totona, badina unai dina ai mai anina bada gauna ta ia vara. Iehova ese ena lauma helaga amo bese matamatana ta ia havaraia, ia be lauma Israela o “Dirava ena Israela unai.” (Gal. 6:16) Guna Aberahamo ena nega amo Israela tatau be edia kopina idia utua, to Pentekoste 33 C.E. ai unai kara ia doko. Paulo be unai bese matamata taudia ta ta ia herevalaia neganai, ia gwau: “Iena kopina utua karana be kudouna ai, unai be lauma helaga amo ia vara.”—Roma 2:29.

² Dirava ena bese matamatana ena memba ginigunadia be Ierusalema ena ataiai daiutuna ta ai idia hebou aposetolo taudia bona Keriso ena hahediba taudia handred mai kahana. (Kara 1:12-15) Dirava ese ena lauma amo ia horodia bona ena natudia ai ia halaodia. (Roma 8:15, 16; 2 Kor. 1:21) Unai ia hamomokania Iehova ese Keriso ia bouboulaia rarana ia abia dae, bona Mose ena Taravatu gabunai kontraka matamatana ia karaia. (Luka 22:20; Heberu 9:15 duahia.) Unai dainai, lauma helaga ese ia horoa hahediba taudia be Iehova ena bese matamatana ai idia lao. Lauma helaga ena siahu amo idia be Pura Edia Aria o Pentekoste ariana totona Roma basileiana ena kahana idauidau amo idia  mai Israela bona Iuda tomadihona idia abia dae taudia edia gado idauidau ai idia haroro. Unai taudia be edia gado korikorina ai “Dirava ena kara badadia” edia sivarai idia kamonai.—Kara 2:1-11.

3-5. (a) Pentekoste dinana ai, Petero be Iuda taudia dekenai dahaka ia hereva? (b) Lauma Israela besena be edena bamona ia bada ia lao?

³ Iehova ese aposetolo Petero ia gaukaralaia Israela taudia bona Iuda tomadihona idia abia dae taudia ia boiridia unai bese matamatana o horoa Keristani kongrigeisen lalonai idia vareai totona. Pentekoste dinana ai, Petero be mai gari lasi ida Iuda taudia ia hamaorodia, Iesu, idia ese “au dekenai idia kokoa kau” tauna idia abia dae be namo, badina “Dirava ese Lohiabada bona Keriso ai ia halaoa vadaeni.” Hutuma ese Petero idia nanadaia dahaka do idia karaia neganai, Petero ia gwau: “Emui kara dika idia gwauatao totona, umui helalo-kerehai bona Iesu Keriso ena ladanai bapatiso umui abia. Vadaeni davana lasi harihari gauna, lauma helaga, do umui abia.” (Kara 2:22, 23, 36-38) Unai dina ai taunimanima 3,000 bamona be lauma Israela besena lalonai idia vareai. (Kara 2:41) Unai murinai, aposetolo taudia idia haroro goadagoada bona momo idia kamonai. (Kara 6:7) Oibe, unai bese matamatana be ia bada ia lao.

⁴ Gabeai, Samaria taudia dekenai idia haroro bona momo idia kamonai. Evanelia tauna Filipo ese momo ia bapatisodia, to idia be lauma helaga idia abia lasi. Unai dainai, Ierusalema amo hakaua oreana ese aposetolo Petero bona Ioane idia siaia unai Samaria tadikaka taihu dekenai, “bona idia ruaosi ese edia imana be idia latanai idia atoa, bena lauma helaga idia abia.” (Kara 8:5, 6, 14-17) Unai amo Samaria taudia danu be horoa taudia ai idia lao, bona lauma Israela besena lalonai idia vareai.

⁵ Lagani 36 C.E. ai, Dirava ese Petero ia gaukaralaia lou ma haida be unai bese matamatana lalonai ia abidia vareai totona. Unai nega ai ia ese Roma ena ami ofesa Korenelio, iena varavara bona turadia ia haroro henidia. (Kara 10:22, 24, 34, 35) Baibel ia gwau: “Petero be unai gaudia ia herevalaia lalonai, . . . idia kamonai taudia ibounai ese lauma helaga idia abia. Petero ida idia mai abidadama taudia, kopina utua taudia unai, be idia hoa, badina lauma helaga, davana lasi harihari gauna unai, be idau bese taudia ese idia abia danu.” (Kara 10:44, 45) Unai nega amo, kopina idia utua lasi Idau Bese taudia danu idia boiria, lauma Israela besena lalonai idia vareai totona.

6, 7. Iehova “ena ladana idia abia” bese matamatana be dahaka idia karaia?

⁶ Lagani 49 C.E. ai hakaua oreana idia hebou neganai, hahediba tauna Iamesi ia gwau: “Simeona [Petero] ese ita ia hamaoroa goevagoeva vadaeni, edena bamona nega ginigunana ai Dirava ese idau bese taudia ia laloa, bona idia huanai haida ia abia hidi ena ladana idia abia totona.” (Kara 15:14) Iehova ena ladana idia abia taudia  matamatadia be Israela bona Idau Bese Keristani taudia. (Roma 11:25, 26a) Gabeai, Petero ia gwau: “Guna umui be Dirava ena taunimanima lasi, to hari umui be iena taunimanima.” Petero ese edia gaukara badana ia herevalaia, ia gwau: “Umui be ‘abia hidi besena, king gaukara umui karaia hahelaga taudia, bese helagana, bona Dirava ena taunimanima korikoridia.’ Vadaeni dibura amo ena diari namo herea dekenai umui ia boiria tauna ena ‘kara hereadaedia be gabu ibounai dekenai umui gwauraia hedinarai be namo.’” (1 Pet. 2:9, 10) Idia be mai gari lasi ida taunimanima vairanai Iehova ena ladana do idia harorolaia, bona iena lohia siahuna do idia abia isi.

⁷ Israela bese korikorina hegeregerena, lauma Israela besena danu be Iehova ese ia abidia hidi. Ia gwau: “Bese be unai, lau karaia vadaeni, lauegu taudia inai, bona idia ese ane dekenai, egu ladana do idia hanamoa!” (Isa. 43:21) Unai Keristani ginigunadia be mai gari lasi ida taunimanima idia haroro henidia idia gwau, Iehova sibona be Dirava momokanina, to dirava ma haida be koikoi. (1 Tes. 1:9) Idia ese “Ierusalema, Iudea ibounai, Samaria bona tanobada ena daudau momokani gabudia dekenai” Iehova bona Iesu edia sivarai idia harorolaia.—Kara 1:8; Kol. 1:23.

8. Paulo ese Dirava ena ladana idia abia besena dekenai dahaka ia gwau?

⁸ Iehova “ena ladana idia abia” gari lasi tauna ta be aposetolo Paulo. Dirava korikori idia diba lasi aonega taudia edia vairanai Paulo be mai gari lasi ida Iehova ena lohia siahuna ia herevalaia. Ia gwau: “Unai Dirava ese tanobada bona ia lalonai idia noho gaudia ibounai ia karaia. Ia be guba bona tanobada edia Lohiabada.” (Kara 17:18, 23-25) Paulo ena misinari laolao ihatoina dokonai, Dirava ena ladana idia abia besena ia hamaorodia, ia gwau: “Lau diba umui lau rakatania murinai, dagedage uda sisia be umui huanai do idia mai bona hebogahisi lasi dalanai mamoe oreana do idia kara henia. Bona umui huana amo tatau haida do idia toreisi bona hereva momokani do idia mogea. Bona hahediba taudia do idia hakaua siri, edia murinai idia raka totona.” (Kara 20:29, 30) Aposetolo taudia idia mase ore murinai, aposteit taudia idia momo herea.—1 Ioa. 2:18, 19.

9. Aposetolo taudia idia mase ore murinai, Dirava ena taunimanima dekenai dahaka ia vara?

⁹ Aposetolo taudia idia mase ore murinai, aposteit karana ia bada ia lao, unai amo Kerisendom dubudia idia vara. Aposteit Keristani taudia be Iehova “ena ladana idia abia” lasi, badina Baibel idia hahanaia neganai, Dirava ena ladana idia kokia. Idia ese kaivakuku tomadiho henia karana idia abia dae, hahediba hereva koikoidia idia hadibaia, “tuari helagadia” idia karaia bona matabodaga karadia amo Dirava ena ladana idia matauraia lasi. Unai dainai, aposteit karana ia matamaia murinai, tanobada ai haida sibona be Iehova idia abidadama henia, to Iehova “ena ladana idia abia” oreana ta ia noho lasi.

10, 11. (a) Iesu be “witi” bona “ava dikadia” parabolena amo, dahaka ia perovetalaia? (b) Edena dala ai Iesu ena parabole be lagani 1914 murinai ia guguru, bona dahaka namo ia havaraia?

¹⁰ Iesu ese witi bona ava dikadia ena parabole amo ia hahedinaraia, aposteit karana ese tomadiho momokanina dibaia dalana do ia koua. Ia gwau, “taunimanima idia mahuta lalonai,” Diabolo ia mai bena Taunimanima ena Natuna ese witi ia hadoa gabunai ava dikadia momo ia hadoa. Witi bona ava dikadia be do idia tubu hebou ela bona “nega oromana ena dokona.” Iesu ma ia gwau, unai “uhe namodia” be “Basileia ena natudia” bona “ava dikadia” be “Dika Tauna ena natudia.” Nega dokona ai, Taunimanima ena Natuna ese “gogoa  taudia,” aneru do ia siaia “witi” be “ava dikadia” amo idia hapararaia totona. Oibe, “Basileia ena natudia” do idia gogoa. (Mat. 13:24-30, 36-43) Edena dala ai unai ia vara, bona edena bamona unai ese dala ia kehoa tanobada ai orea ta ese Iehova ia tomadiho henia totona?

¹¹ “Nega oromana ena dokona” be lagani 1914 ai ia matamaia. Unai lagani ai, tanobada tuarina ginigunana ia vara neganai, horoa Keristani taudia tausen haida, “Basileia ena natudia” unai, be lauma dalanai Babulonia Badana ena igui henunai idia do noho. To, lagani 1919 ai Iehova ese ia ruhadia, bona ia hedinarai idia be “ava dikadia,” o Keristani koikoidia amo idia idau. Isaia ena peroveta herevana hegeregerena, Dirava ese “Basileia ena natudia” be orea ta lalonai ia haboudia. Isaia ia gwau: “Bese ta be nega sisina lalonai do idia havaraia, a? To Siona be ia hisihisi sisina sibona murinai, ia ese iena natuna, iena bese, be maoromaoro ia havaraia.” (Isa. 66:8) Unai siri ese ia herevalaia Siona be Iehova ena guba aneru oreana. Tanobada ai horoa taudia edia bese matamatana ia vara neganai, unai be Siona ese natuna ia “havaraia” bamona.

12. Hari, edena dala ai horoa taudia ese idia hahedinaraia, idia be Iehova “ena ladana idia abia”?

¹² Keristani ginigunadia hegeregerena, “Basileia ena natudia” danu be Iehova ena witnes taudia ai idia lao. (Isaia 43:1, 10, 11 duahia.) Unai dainai, idia ese Keristani kara namodia idia hahedinaraia bona ‘Basileia ena sivarai namona be tanobada ibounai dekenai idia harorolaia, unai amo bese ibounai ese idia kamonaia diba.’ (Mat. 24:14; Fili. 2:15) Unai dala amo idia ese taunimanima milioni momo idia durua Iehova idia tura henia totona.—Daniela 12:3 duahia.

13, 14. Horoa lasi taudia be Iehova do idia tomadiho bona hesiai henia totona, dahaka idia karaia be namo? Baibel ese edena dala ai unai ia perovetalaia?

¹³ Stadi gabena ai ita itaia, guna Israela ai idau bese taudia be dala maorona ai Iehova idia tomadiho henia diba, to Iehova ena gwauhamata besena sibona do idia bamoa be gau badana. (1 Kin. 8:41-43) Unai hegeregerena,  hari ena be oi be horoa tauna lasi, to “Basileia ena natudia” o Iehova ena horoa witnes taudia oi bamodia be namo.

¹⁴ Idaunega peroveta taudia rua idia gwau inai nega dokona ai, momo be Iehova ena taunimanima ida Ia do idia tomadiho henia. Isaia ia gwau: “Taunimanima do idia gwau, ‘Umui mai, Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.’” (Isa. 2:2, 3) Unai hegeregerena, peroveta tauna Sekaraia ia gwau: “Bese momo, bona basileia mai goadadia taudia do idia mai Ierusalema dekenai. Idia ese Siahu Ibounai Lohiabada do idia tahua, bona Lohiabada do idia noia, ia ese idia do ia hanamoa.” Ia gwau idia be “tau ibounai 10, gado idauidau ibounai besedia dekena amo” bona laulau dalanai lauma Israela besena ena dabua do idia dogoatao bona do idia noia: “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.”—Sek. 8:20-23.

15. Dahaka gaukara totona “mamoe ma haida” be lauma Israela ida ‘idia lao’?

¹⁵ “Mamoe ma haida” be lauma Israela ida ‘idia lao’ Basileia ena sivarai namona idia harorolaia totona. (Mar. 13:10) Idia be Dirava ena bese taudia ai idia lao “mamoe serina tamona” lalonai, bona “mamoe naria tauna” Iesu Keriso ese ia gunalaidia.—Ioane 10:14-16 duahia.

16. Aramagedono ia matamaia totona, Iehova be dahaka do ia karaia?

¹⁶ Dirava ese Babulonia Badana ia hadikaia ore murinai, Iena inai taudia ese Iena taunimanima do idia tuari henia. Ita roho mauri totona, Iehova ena gimaia henunai ita noho be namo. Iehova sibona ese nega korikori ai unai do ia havaraia, badina unai tuari ese “hisihisi badana” ena dokona kahana, Aramagedono do ia hamatamaia. (Mat. 24:21; Ese. 38:2-4) Unai nega ai, Goga ese “gabu idauidau dekena amo idia haboua lou” taudia, o Iehova ena bese taudia do ia tuari henia. (Ese. 38:10-12) Unai ia vara neganai, Iehova ese Goga bona iena tuari taudia do ia hadikaia ore. Unai negai, Ia ese iena lohia siahuna bona ladana do ia hahelagaia. Iehova ia gwau: “Egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be [Iehova].”—Ese. 38:18-23.

17, 18. (a) Goga be Iehova ena bese taudia ia tuari henia gwauraia neganai, dahaka hadibaia herevadia do idia abia? (b) Bema ita ura Iehova ese ita do ia gimaia, dahaka ita karaia be namo?

¹⁷ Goga be tuari totona ia mai neganai, Iehova ese ena hesiai taudia do ia hamaoroa: “Emui ruma dekenai do umui raka vareai, bona emui iduara do umui koua. Nega sisina lalonai do umui hunia, ia lao bona Dirava ena badu do ia ore.” (Isa. 26:20) Unai tuari negana ai, ita heau mauri totona Iehova ese hadibaia herevadia do ia henia, bona unai “ruma” be reana iseda kongrigeisen idia laulaulaia.

¹⁸ Unai dainai, bema ita ura hisihisi badana ai Iehova ese ita do ia gimaia, namona be ita abia dae tanobada ai Iehova be mai ena orea, bona iena taunimanima be kongrigeisen ta ta ai ia haridia. Namona be Iehova ena orea ita durua bona eda kongrigeisen ta ta ida do ita noho. Mai iseda kudouna ibounai ida, Salamo torea tauna ida do ita gwau: “[Iehova] e, oi sibona ese ai oi hamauria diba. Oi ese oiemu bese taudia oi hanamoa noho.”—Sal. 3:8.