1, 2. Ñanyi lupimpu lwaubiwe pa juba ja Pentekosita mu 33 C.E., kabiji bañanyi baikele kisaka kipya kya bantu ba Yehoba? (Monai kipikichala kitanshi.)

PA JUBA ja Pentekosita mu 33 C.E. Yehoba waubile kintu kyanema bingi. Walengele kisaka kipya kitelwa’mba “bena Isalela ba Lesa,” nangwa’mba bena Isalela ba ku mupashi. (Nga. 6:16) Yehoba waingijishe mupashi wanji wazhila pa kusala bantu ba mu kino kisaka. Paulo wanembele kuba’mba baji mu kino kisaka kipya kechi bafwainwe kuya ku mukanda byonka byayanga ba mu kisemi kya kwa Abalahama ne. Pakuba ‘mukanda wabo wakine ke yewa wa mu muchima.’—Loma 2:29.

² Batumwa ne baana ba bwanga bakwabo kukila pa kitota kimo basambakene mu kibamba kya peulu mu Yelusalema bo bajinga batanshi mu kino kisaka kipya kya Lesa. (Byu. 1:12-15) Bano bebetulwijile mupashi wazhila wibalengejile kwikala baana ba Lesa. (Loma 8:15, 16; 2 Ko. 1:21) Kino kyamwesheshe kuba’mba Yehoba watambula kitapisho kya kwa Kilishitu ne kufumyapo lulayañano lwa Mizhilo ne kupingizhapo lulayañano lupya. (Luka 22:20; tangai Bahebelu 9:15.) Bano baana ba bwanga bo baikele kisaka kipya kya bantu ba Yehoba. Mupashi wazhila wibakwashishe kusapwila mu milaka yapusana pusana ya Bayudea ne bantu baalukile ke Bayudea baikele mu Yelusalema. Bano bantu baishile  ku Kijiilo kya Milungu kya Bayudea nangwa’mba Pentekosita, bafumine mu Bufumu bwa bena Loma. Bano bantu bonse baumvwine bena Kilishitu bashingwa na mupashi saka basapwila “pa mingilo ikatampe ya Lesa” mu milaka yabo.—Byu. 2:1-11.

3-5. (a) Ñanyi bintu Petelo byo abujile Bayudea pa juba ja Pentekosita? (b) Ñanyi bintu byalengejile kisaka kipya kya bantu ba Yehoba kukoma mu myaka itanshi yo kyalengelwe?

³ Yehoba waingijishe mutumwa Petelo kukwasha Bayudea ne bantu baalukile ke Bayudea kwiya mu kisaka kipya kyalengelwe, ko kuba’mba mu kipwilo ya bwina Kilishitu. Pa juba ja Pentekosita, Petelo wabujile Bayudea kuba’mba bafwainwa kwitabila mwi Yesu, yenka ye ‘bapopele pa kichi,’ mambo “Lesa ye wamulengela kwikala Nkambo kabiji Kilishitu.” Jibumba byo jaipwizhe byo bafwainwa kuba, Petelo wibakumbwile’mba: “Pa kuba amba mambo enu alekelwe, lapilai ne kubatizhiwa mu jizhina ja Yesu Kilishitu. Kabiji musakutambula mupashi wazhila wa bupetu.” (Byu. 2:22, 23, 36-38) Pa joja juba bantu 3,000 baishile mu kisaka kipya kya bena Isalela ba ku mupashi. (Byu. 2:41) Panyuma ya kino, batumwa batwajijile kusapwila na mukoyo, kabiji bantu bavula baswile bukine. (Byu. 6:7) Kino kisaka kipya kyayilengatu na kubailako.

⁴ Mu kuya kwa moba mwingilo wa kusapwila wafikile ne ku bena Samaliya. Bavula bebabatizhe kwi Filipa wajinga musapwishi, pano bino kechi batambwile mupashi wazhila ponkapotu ne. Jibumba jitangijila mu Yelusalema jatumine mutumwa Petelo ne Yoano ku bano bena Samaliya baalukile ke Bayudea kabiji “batatwile kwibatenteka maboko ne kutambula mupashi wazhila.” (Byu. 8:5, 6, 14-17) Bano bena Samaliya nabo baikele bena Kilishitu bashingwa ba mu kisaka kya bena Isalela ba ku mupashi.

⁵ Mu mwaka wa 36 C.E., Petelo bamwingijishe jikwabo kukwasha bantu bakwabo kwiya mu kisaka kipya kya bena Isalela ba ku mupashi. Kino kyaubiwe byo asapwijile mukulumpe wa Bashilikale wa bena Loma aye Koneleusa, balongo banji ne balunda nanji. (Byu. 10:22, 24, 34, 35) Baibolo waamba’mba: “Petelo byo akyambilenga . . . , mupashi wazhila waikijile bonse [bantu babujile Bayudea] batelekelenga byo aambilenga. Ne boba ba mu mukanda baitabijile baishile ne Petelo bakuminye bingi, mambo mupashi wazhila wa bupetu waitulukijile pa bantu ba mu bisaka bikwabo.” (Byu. 10:44, 45) Ne bantu ba mu bisaka bikwabo babujile kuya ku mukanda nabo pano bajinga na jishuko ja kwikala mu kisaka kipya kya bena Isalela ba ku mupashi.

6, 7. Bantu bajinga mu kisaka kipya batelwanga pa jizhina ja Yehoba baingijile ñanyi mwingilo?

⁶ Ba mu jibumba jitangijila ja bena Kilishitu ba mu myaka kitota kitanshi byo basambakene pamo mu 49 C.E., mwana wa bwanga Yakoba waambile’mba: “Shimeona [Petelo] walumbulula bingi bulongo Lesa byo aalulukila ku bisaka bikwabo pa kimye kitanshi ne kupatulamo bantu ba jizhina janji.” (Byu. 15:14) Kino kisaka kipya kya bantu batelwa pa jizhina ja Yehoba mwajinga  bena Kilishitu Bayudea ne babujile Bayudea. (Loma 11:25, 26a) Petelo wanembele’mba: “Kala kechi mwajinga bantu ba Lesa ne, pano luno mwi bantu banji.” Petelo walumbulwile mwingilo wabo amba: “Mwi kisaka kyasalululwa, mwi ba buñanga bwa bufumu, kisaka kyazhila, bantu bo enonkejile mwine Lesa kuba amba musapwile ku mapunzha onse byawamisha bya yewa wimwichile byo mwajinga mu mfishi amba mwiye mu kyeya kyanji kya kukumya.” (1 Pe. 2:9, 10) Bafwainwe kutakaika ye baimenangako ne kutumbijika jizhina janji ku bantu. Kabiji bafwainwe kwikala bakamonyi ba kwa Yehoba bachinchika batumbijika Nkambo Walengele Bintu Byonse.

⁷ Byonkatu byo kyajinga ku bena Isalela bakisemwa, ne bena Isalela ba ku mupashi nabo Yehoba wibatela’mba, “bo bantu bo nalengele ke bami ami mwine, namba bakantotenga.” (Isa. 43:21) Bena Kilishitu batanshi bachinchikile ne kusapwila’mba Yehoba ye yenkatu Lesa wa kine, balesa bapopwelanga bantu bavula bajinga ba bubela. (1 Tesa. 1:9) Bashimunanga bukamonyi pe Yehoba ne Yesu “mu Yelusalema, mu Yudea ne mu Samaliya monse, ne monse mwapela ntanda.”—Byu. 1:8; Kolo. 1:23.

8. Ñanyi lujimuno mutumwa Paulo lo ajimwineko bantu ba Lesa ba mu myaka kitota kitanshi?

⁸ Paulo ke umo wachinchikile bingi wajinga mu jibumba ja ‘bantu batelwa pa jizhina ja Yehoba’ jajingako mu myaka kitota kitanshi. Kimye kyo aambilenga na bantemwamaana babulanga kwakamwa Lesa, Paulo wachinchikile ne kutumbijika Yehoba, “Lesa walengele ntanda ne byonse bijimo, aye ye Nkambo wa mwiulu ne pano pa ntanda.” (Byu. 17:18, 23-25) Na ku mpelo ya lwendo lwanji lwa busatu lwa bumishonale, Paulo wajimwineko bantu batelwa pa jizhina ja Lesa amba: “Nayuka namba byo nkafumako, misuka ikaji ikatwela mwi anweba kabiji kechi ikalama bulongo jitanga ne, kabiji mukachi kenu mukafuma bantu bakafunjishanga mafunjisho aluwankana kukeba kongola baana ba bwanga amba bebalondelenga.” (Byu. 20:29, 30) Buno bunsatuki bo baambijile jimo bwaishile ku mpelo ya myaka kitota kitanshi.—1 Yoa. 2:18, 19.

9. Batumwa byo bafwile, ki ka kyamwekele ku “bantu ba jizhina [ ja Yehoba]”?

⁹ Batumwa byo bafwile, bunsatuki bwasampukijile ne pakatele kabiji bano bansatuki balengele machechi avula bingi a Kilishitendomu. Bano bena Kilishitu bapondokele mu lwitabilo kechi “bantu ba jizhina [ja Yehoba]” ne, mambo bafumyamo jizhina ja Lesa mu ma Baibolo avula o batuntulula. Balondela bisho bya bantu babula kwakamwa Lesa. Kabiji mafunjisho abo abula a mu binembelo aleta mwenga pa jizhina ja Lesa. Balwa makondo o batela’mba makondo azhila ne kubepekezha amba babena kulwilako Lesa kabiji baji na byubilo byatama bingi. Pa myaka yavula yapitapo kufuma patendekejile buno bunsatuki, pano pa ntanda pajingatu bapopweshi ba Yehoba bakishinka bacheche, pano bino kechi kwajinga jibumba jakwatankana ja “bantu ba jizhina janji” ne.

10, 11. (a) Yesu waambile’mba ka mu kishimpi kya wichi ne bincha? (b) Kishimpi kya kwa Yesu kyafikile byepi panyuma ya mwaka wa 1914, kabiji ki ka kyafuminemo?

¹⁰ Mu kishimpi kya wichi ne bincha, Yesu waambijile jimo kuba’mba bunsatuki bukalengela bantu kukankalwa kuyuka bupopweshi bwa kine. Yesu waambile’mba: “Bantu byo balaajile,” Diabola wakushilemo bincha mu bujimi Mwana muntu mo akushile nkunwa ya wichi. Bincha ne wichi byakomejilenga pamo kufikatu ne ‘kimye kya ku mpelo ya bwikalo.’ Yesu walumbulwile’mba “nkunwa yawama” bo “baana ba mu Bufumu” kabiji “bincha” bo “baana ba kwa yewa mubi.” Mu kimye kya ku mpelo, Mwana muntu ukatuma “bakunowa,” ko kuba’mba  bamalaika ba kwabanya wichi ne bincha. Baana ba mu Bufumu bebakonkenye pamo. (Mat. 13:24-30, 36-43) Kino kyaubiwe byepi? Kabiji kino kyalengela byepi Lesa kwikala jikwabo na jibumba ja bapopweshi bakwatankana pano pa ntanda?

¹¹ “Kimye kya ku mpelo ya buno bwikalo” kyatendekele mu mwaka wa 1914. Kimye kya nkondo yabukile mu uno mwaka, bena Kilishitu bashingwa, ko kuba’mba “baana ba mu Bufumu,” bajinga mu buzha bwa ku mupashi mu Babilona Mukatampe. Mu 1919, Yehoba wibapokolwele ne kwibalengela kupusana na “bincha” nangwa’mba bantu bebepekezha kwikala bena Kilishitu. Wakonkenye “baana ba mu Bufumu” ne kwibakwatankanya mu bujibumba pa kuba’mba afikizhe byaawile ngauzhi Isaya amba: ‘Ñanyi waumvwinepo kala kintu kya byonkabyo? Kabiji ñanyi wamwenepo kala bintu bya byonkabyo? Nanchi ntanda ikasemwe mu juba jimo nyi? Nanchi mukoka wa bantu akasemwe mu kimye kimo nyi? Mambo Ziona ponka pa kumvwatu bisanso wasemene baana banji.’ (Isa. 66:8) Mu kino kyepelo, Ziona wimenako jibumba ja Yehoba ja bilengwa bya mupashi. Jino jibumba ‘jasemene’ bashingwa ne kwibakwatankanya mu bukisaka.

12. Bashingwa bamwesha byepi kuba’mba “bantu ba jizhina [ ja Yehoba]” ano moba?

¹² Byonkatu byajinga bena Kilishitu batanshi, bashingwa, ko kuba’mba “baana ba mu Bufumu” ke bakamonyi ba kwa Yehoba. (Tangai Isaya 43:1, 10, 11.) O ene mambo o bapusenako na bantu bakwabo, mambo baji na byubilo byawama bya bwina Kilishitu kabiji basapwila ‘mambo awama a Bufumu kuba amba ba mu bisaka byonse bya bantu beomvwe.’ (Mat. 24:14; Fili. 2:15) Mu jino jishinda bakwasha bantu bavula kwikala na bulunda bwawama ne Yehoba.—Tangai Danyela 12:3.

13, 14. Aba babula bena Isalela ba Lesa bafwainwa kuba byepi pa kuba’mba bapopwelenga Yehoba ne kumwingijila mu jishinda jaitabilwa? Kabiji kino kyaambijilwe byepi jimo mu bungauzhi bwa mu Baibolo?

¹³ Byonka byo twisambile mu mutwe wafumako, mu bena Isalela, bantu bafumine  mu bisaka bikwabo nabo bakonsheshe kupopwela Yehoba mu jishinda jaitabilwa. Pano bino bafwainwe kukwatankana na bantu bajinga mu lulayañano ne Yehoba. (1 Mfu. 8:41-43) Ne mu ano moba kyo kimotu, aba babula bena Isalela ba ku mupashi bafwainwa kukwatankana na bantu ba Yehoba, “baana ba mu Bufumu,” ko kuba’mba, Bakamonyi ba kwa Yehoba bashingwa.

¹⁴ Bangauzhi babiji baawijile jimo kuba’mba bantu bavula bakeya na kupopwela Yehoba pamo na bantu banji mu moba akupelako. Isaya waawile’mba: “Bantu ba mitundu yavula bakeya ne kwamba’mba: Twayai, tuye ku mutumba wa Yehoba, ku nzubo ya Lesa wa Yakoba; namba aketufunjishe mwa kwendela, twendenga mu mashinda anji. Mambo monka mu Ziona mo mukafumanga mafunjisho, ne jiwi ja Yehoba jikafumanga mu Yelusalema.” (Isa. 2:2, 3) Ne ngauzhi Zekaliya naye waawile’mba: “Ba mu mitundu yavula, ne ba mu mikoka yakosa bakeya na kumukeba Yehoba wa mabumba ku Yelusalema, ne na kulomba bibusa kwi Yehoba.” Bano bantu wibafwanyikizhe ku “bantu jikumi ba mu mikoka yamba milaka yapusana-pusana” bakakwata ku mukangyo wa bena Isalela ba Lesa ne kwamba’mba: “Tuyenga nenu, mambo twaumvwa’mba Lesa muji nanji.”—Zeka. 8:20-23.

15. Mu ñanyi mwingilo ba mu “mikooko ikwabo” mo ‘bayila pamo’ na bena Isalela ba ku mupashi?

¹⁵ Ba mu “mikooko ikwabo” ‘bayila pamo’ na bena Isalela ba Lesa mu mwingilo wa kusapwila mambo awama a Bufumu. (Mako 13:10) Nabo baji mu bantu ba Lesa, mu “jitanga jimo” na bashingwa saka bebafunga kwi Yesu Kilishitu aye “kafunga wawama.”—Tangai Yoano 10:14-16.

16. Yehoba ukaleta byepi lubaji lukapelako lwa “malwa akatampe”?

¹⁶ Bantu ba Yehoba bakebalukuka panyuma ya konaunwa kwa Babilona Mukatampe. Pa kyo kya kimye twafwainwa kwikala mu bapopweshi ba kwa Yehoba bo akazhikijila. Byo kiji kuba’mba kuno kulukukwa ko kukekala lubaji lwapelako lwa “malwa akatampe,” ko kuba’mba Yehoba mwine ye wayuka kimye pakamwekela bino bintu. (Mat. 24:21; Ezi. 38:2-4) Pa kyo kya kimye Gogi ukalukuka bantu ba Yehoba ‘bo bakonkanya kufuma mu mikoka ya bantu.’ (Ezi. 38:10-12) Kino inge kyaubiwa, Yehoba ponkapotu ukapokolola bantu banji ne kulwa nkondo na Gogi ne mazhita anji. Kabiji Yehoba ukamwesha bukata bwa bumfumu bwanji ne kuzhijika jizhina janji. Mambo waamba’mba: “Byo byo nkamwesha bukata bwami ne buzhile bwami namba mikoka yavula ya bantu ikangyuke. Kepo bakayuka’mba amiwa yami Yehoba.”—Ezi. 38:18-23.

17, 18. (a) Ñanyi mikambizho Yehoba yo akapa bantu banji kimye kyo bakebalukuka kwi Gogi? (b) Ñanyi bintu byo twafwainwa kuba pa kuba’mba Yehoba aketuzhikijile?

¹⁷ Gogi byo akatatula kulukukañana, Yehoba ukambila bakalume banji amba: “Iyai bantu bami, mutwele mu mazubo enu a mukachi, mushinke ne bibelo byenu mufyamemo kimye kicheche poso bukaji bwapita.” (Isa. 26:20) Pa kyo kimye kyakatazha, Yehoba uketupa mikambizho yo tukalondela pa kuba’mba tukazhikijilwe. Kabiji ‘mazubo a mukachi’ afwainwa emenako bipwilo byetu.

¹⁸ Onkao mambo, inge tukeba kuba’mba Yehoba aketuzhikijile mu kimye kya malwa akatampe, twafwainwa kuyuka kuba’mba Yehoba uji na bantu pano pa ntanda bo akwatankanya mu bipwilo. Twafwainwa kutwajijila kwikala mu bantu ba Yehoba ne kukwatankana na kipwilo kyo tujimo. Byonka byaubile nyimbi wa masalamo, twayai ne atweba bonse tutayenga mbila na muchima yense ya kuba’mba: “Lupulukilo luji mwi Yehoba: Mapesho enu ekale pa bantu benu.”—Sala. 3:8.