1, 2. Wetin bin apin insay Pɛntikɔst 33? Udat dɛn na bin di fɔs pipul dɛn we bin de na Jiova in nyu neshɔn? (Luk di pikchɔ nia dis atikul in taytul.)

PƐNTIKƆST 33, na bin impɔtant ia fɔ Jiova in pipul dɛn na di wɔl. Wan big chenj bin apin. Jiova yuz in spirit fɔ mek wan nyu neshɔn we go tan lɛk di Izrɛlayt dɛn. Dis neshɔn na “di Izrɛl we na Gɔd in yon.” (Gal. 6:16) Dɛn pipul ya nɔ nid fɔ sakɔmsayz igen lɛk aw Ebraam in bɔy pikin dɛn bin de du. Pɔl bin rayt se na dɛn “at [dɛn] sakɔmsayz, ɛn na Gɔd in spirit de mek dat bi.”—Rom 2:29.

² Di fɔs pipul dɛn we bin de na Gɔd in nyu neshɔn na di apɔsul dɛn ɛn Krays in ɔda disaypul dɛn we bin de insay wan rum na wan ɔpgarɛt na Jerusɛlɛm. Dɛn disaypul ya bin pas ɔndrɛd. (Akt 1:12-15) Di oli spirit bin kam pan dɛn pipul ya, ɛn dɛn bi Gɔd in pikin dɛn. (Rom 8:15, 16; 2 Kɔr. 1:21) Dis sho se di nyu agrimɛnt bin dɔn bigin wok, ɛn Krays we na di midulman bin dɔn yuz in blɔd fɔ mek di agrimɛnt ol wata. (Lyuk 22:20; rid Di Ibru Pipul Dɛn 9:15.) Dɛn disaypul ya kam bi Jiova in pipul dɛn ɛn de insay di nyu neshɔn we i mek. Di oli spirit bin mek dɛn ebul fɔ prich insay difrɛn langwej dɛn we di Ju pipul dɛn ɛn ɔda  pipul dɛn we bin kam na Jerusɛlɛm fɔ sɛlibret Pɛntikɔst, bin de tɔk. Dɛn bin de kɔl dis sɛlibreshɔn bak di Avɛst Fɛstival. Dɛn pipul ya bin kɔmɔt na di difrɛn say dɛn we di Roman gɔvmɛnt bin de rul. Ɛn di apɔsul dɛn bin prich to dɛn insay dɛn yon langwej, so dɛn bin ɔndastand “di wɔndaful tin dɛn bɔt Gɔd.”—Akt 2:1-11.

3-5. (a) Wetin Pita bin tɛl di Ju dɛn di de we na Pɛntikɔst? (b) Wetin bin mek pipul dɛn de bɔku insay Jiova in nyu neshɔn?

³ Jiova bin mek di apɔsul Pita de bifo fɔ ɛp di Ju dɛn ɛn ɔda pipul dɛn, fɔ bi Kristian ɛn kam insay di nyu neshɔn. Di de fɔ Pɛntikɔst, Pita tɛl di Ju pipul dɛn plen wan se dɛn fɔ biliv Jizɔs we dɛn bin dɔn “ɛng pan stik ɛn kil,” bikɔs Gɔd dɔn mek i bi Masta ɛn Krays. We di pipul dɛn aks Pita wetin dɛn fɔ du, i tɛl dɛn se: “Una ripɛnt, ɛn baptayz fɔseka Jizɔs Krays in nem, so dat Gɔd go fɔgiv una sin dɛn ɛn una go gɛt di fri gift we na di oli spirit.” (Akt 2:22, 23, 36-38) Da de de, na lɛk 3,000 pipul dɛn bin kam insay di nyu neshɔn. (Akt 2:41) Frɔm da tɛm de, di apɔsul dɛn kɔntinyu fɔ prich wit zil ɛn bɔku pipul dɛn bin de kam fɔ jɔyn dɛn. (Akt 6:7) Di pipul dɛn na di nyu neshɔn bin de bɔku.

⁴ Leta, Jizɔs in disaypul dɛn bin bigin fɔ prich to di Samɛritan dɛn ɛn dɛn bin lisin. Filip bin baptayz bɔku pan dɛn, bɔt dɛn nɔ bin gɛt di oli spirit wantɛm wantɛm. Di gɔvnin bɔdi na Jerusɛlɛm, bin sɛn Pita ɛn Jɔn to di Samɛritan brɔda dɛn, ɛn “dɛn put dɛn an dɛn pan dɛn, ɛn dɛn bigin fɔ gɛt oli spirit.” (Akt 8:5, 6, 14-17) Di oli spirit bin kam pan dɛn Samɛritan ya ɛn dɛnsɛf bin tan lɛk Izrɛlayt dɛn na Gɔd in yay.

⁵ Insay di ia 36, Jiova bin yuz Pita bak fɔ mek mɔ pipul dɛn kam insay di nyu neshɔn. Dis bin apin we i prich to Kɔnilyɔs, in fambul dɛn, ɛn in padi dɛn. Kɔnilyɔs na bin wan Roman sojaman. (Akt 10:22, 24, 34, 35) Di Baybul se: “We Pita bin stil de tɔk . . . , di oli spirit bin kam pan ɔl di wan dɛn we bin de yɛri wetin i de tɔk. Ɛn di fetful wan dɛn we bin sakɔmsayz ɛn we kam wit Pita bin sɔprayz, bikɔs di fri gift we na di oli spirit bin kam pan pipul dɛn we nɔto Ju.” (Akt 10:44, 45) Frɔm da tɛm de, Jiova bigin kɔl pipul dɛn we nɔto Ju ɛn we nɔ sakɔmsayz, fɔ kam insay dis nyu neshɔn.

6, 7. Wetin di pipul dɛn na dis nyu neshɔn bin du fɔ sho se dɛn na pipul dɛn we de tɔk bɔt Jiova in nem? Aw fa dɛn bin du dis?

⁶ We di gɔvnin bɔdi bin de ol wan mitin insay di ia 49, Jems bin tɔk se: “Simyɔn [Pita] dɔn tɔk gud gud wan bɔt aw Gɔd de sho se i bisin bɔt pipul dɛn  we nɔto Ju ɛn i dɔn tek sɔm pan dɛn fɔ in nem fɔ di fɔs tɛm.” (Akt 15:14) Dɛn nyu pipul ya we go tɔk bɔt Jiova in nem go bi di Ju pipul dɛn ɛn di wan dɛn we nɔto Ju. (Rom 11:25, 26a) Leta, Pita bin rayt se: “Trade, una nɔto bin pipul dɛn, bɔt naw una na Gɔd in pipul dɛn.” Pita bin ɛksplen bɔt di wok we dɛn gɛt. I se: “Una na ‘pipul dɛn we Gɔd dɔn chuz, una na kiŋ ɛn prist dɛn, una na oli neshɔn, una na pipul dɛn we go gɛt spɛshal tin, so dat una go tɔk wɔndaful tin dɛn’ bɔt di Wan we pul una kɔmɔt na dak ɛn briŋ una kam na in wɔndaful layt.” (1 Pit. 2:9, 10) Dɛn fɔ tɔk bɔt di Wan we kɔl dɛn ɛn prez in nem to ɔlman. Dis min se dɛn fɔ gɛt maynd fɔ tɔk bɔt Jiova ɛn mek ɔlman no se na in wangren gɛt di rayt fɔ rul di wan ol wɔl.

⁷ Na dis nyu neshɔn Jiova bin de yuz naw ɛn i kɔl dɛn, “di pipul dɛn we a dɔn mek fɔ misɛf so dat dɛn go prez mi.” (Ayz. 43:21) Dɛn fɔstɛm Kristian ya bin gɛt kɔrej fɔ tɛl pipul dɛn se na Jiova na di wangren tru Gɔd ɛn ɔl di ɔda gɔd dɛn we pipul dɛn de wɔship na lay lay gɔd dɛn. (1 Tɛsa. 1:9) Dɛn bin de tɔk bɔt Jiova ɛn Jizɔs to ɔl di pipul dɛn “na Jerusɛlɛm, Judia, Sameria, ɛn ɔlsay na di wɔl.”—Akt 1:8; Kɔl. 1:23.

8. Us wɔnin we di apɔsul Pɔl bin gi to Gɔd in pipul dɛn we bin de na di nyu neshɔn?

⁸ Wan pan di pipul dɛn we bin gɛt maynd fɔ tɔk bɔt Jiova in nem na di apɔsul Pɔl. Wan tɛm, Pɔl bin gɛt maynd fɔ tɛl di pegan masta sabi bukman dɛn se na Jiova nɔmɔ gɛt di rayt fɔ rul. I tɛl dɛn bak se: “Di Gɔd we mek di wɔl ɛn ɔl wetin de insay de, na in na di Masta fɔ di ɛvin ɛn di wɔl.” (Akt 17:18, 23-25) Di apɔsul Pɔl bin gɛt fɔ wɔn di wan dɛn we de na di nyu neshɔn se: “A no se afta a dɔn go bad bad wulf dɛn go kam miks wit una ɛn dɛn nɔ go trit di ship dɛn fayn, ɛn sɔm pipul dɛn pan una go bigin fɔ tɔk lay lay tin dɛn fɔ mek di disaypul dɛn fala dɛn.” (Akt 20:29, 30) Dis tin we Pɔl bin tɔk bɔt bin apin di tɛm we di apɔsul dɛn nɔ bin de igen.—1 Jɔn 2:18, 19.

9. Wetin apin to Gɔd in pipul dɛn afta di apɔsul dɛn day?

⁹ Afta di apɔsul dɛn day, pipul dɛn bigin tich lay lay tin na di kɔngrigeshɔn ɛn dɛn bigin fɔ mek dɛn yon chɔch dɛn. Dɛn pipul ya bin sho se dɛn nɔto pipul dɛn we de tɔk bɔt Jiova in nem. Aw dɛn dɔn du dis? Na bay we dɛn dɔn pul Gɔd in nem kɔmɔt na bɔku Baybul dɛn we dɛn translet. Dɛn dɔn sho bak se dɛn nɔ gɛt wan rɛspɛkt fɔ Gɔd bay we dɛn de tich lay lay tin dɛn we nɔ de na di Baybul. Dɛn dɔn tek pegan ɔlide dɛn, ɛn put an pan wɔ dɛn we dɛn se na “oli wɔ dɛn” ɛn dɛn dɔn put an pan mami ɛn dadi biznɛs we Gɔd nɔ want. So dis bin mek fɔ lɔng tɛm, Jiova nɔ bin gɛt bɛtɛ fetful savant dɛn na dis wɔl, ɛn i nɔ bin gɛt pipul dɛn we ɔganayz fɔ tɔk bɔt “in nem.”

10, 11. (a) Wetin Jizɔs bin tɔk bɔt na in parebul bɔt di wit ɛn di gras? (b)  Aw Jizɔs in parebul bin apin afta 1914?

¹⁰ We Jizɔs bin de pul wan parebul bɔt di wit ɛn di gras, i bin tɔk se dɛn lay lay Kristian ya go mek i nɔ izi fɔ no di tru rilijɔn. I se we di “man dɛn bin de slip,” di Dɛbul kam plant gras na di fam usay mɔtalman Pikin dɔn plant wit sid. Di wit ɛn di gras go gro togɛda te “di tɛm we di wɔl go want fɔ dɔn.” Jizɔs bin  se “di fayn sid” min “di pikin dɛn we gɛt di Kiŋdɔm” ɛn “di gras” min “di wikɛd wan in pikin dɛn.” Insay di tɛm we di wɔl go dɔn, mɔtalman Pikin go sɛn “di wan dɛn we de avɛst,” dat na in enjɛl dɛn, fɔ pul di gras frɔm di wit. Dɔn di enjɛl dɛn go gɛda di pikin dɛn we go de na di Kiŋdɔm. (Mat. 13:24-30, 36-43) Aw dis apin? Aw dis go mek Jiova gɛt ɔganayz pipul dɛn na dis wɔl we go wɔship am bak?

¹¹ “Di tɛm we di wɔl go want fɔ dɔn,” bin bigin insay 1914. Dis na di tɛm we Wɔl Wɔ Wan bigin. Da tɛm de, di anɔyntɛd Kristian dɛn we bin de na di wɔl nɔ bin bɔku. Di anɔyntɛd Kristian dɛn we na “di pikin dɛn we gɛt di Kiŋdɔm,” bin stil de na dɛn lay lay rilijɔn dɛn. Bɔt insay 1919, Jiova bin pul dɛn kɔmɔt de, ɛn i bin mek ɔlman no klia wan se dɛn difrɛn frɔm “di gras,” we na dɛn lay lay Kristian dɛn. I gɛda “di pikin dɛn we gɛt di Kiŋdɔm” ɛn ɔganayz dɛn, so dat wetin di prɔfɛt Ayzaya bin tɔk go bi, we i se: “Dɛn go bɔn land insay wan de? Ɔ dɛn go bɔn wan neshɔn wantɛm wantɛm? Bɔt as Zayɔn in bɛlɛ at so, na in i bɔn in bɔy pikin dɛn.” (Ayz. 66:8) Zayɔn we na Jiova in ɔganayzeshɔn usay di enjɛl dɛn de, bin bɔn pikin dɛn we Gɔd dɔn anɔynt wit in oli spirit ɛn ɔganayz dɛn fɔ bi wan neshɔn.

12. Aw di anɔyntɛd dɛn we de tide de sho se dɛn na pipul dɛn we de tɔk bɔt Jiova in nem?

¹² Jɔs lɛk dɛn fɔstɛm Kristian dɛn, di anɔyntɛd dɛn we na “di pikin dɛn we gɛt di Kiŋdɔm,” dɛnsɛf fɔ bi Jiova in witnɛs dɛn. (Rid Ayzaya 43:1, 10, 11.) Dis min se dɛn fɔ difrɛn bay di we aw dɛn de biev ɛn bay di we aw dɛn de prich di “gud nyus bɔt di Kiŋdɔm . . . so dat ɔl di neshɔn dɛn go yɛri.” (Mat. 24:14; Fil. 2:15) Dis we aw dɛn de biev ɛn di prich we dɛn de prich dɔn ɛp bɔku bɔku pipul dɛn fɔ liv dɛn layf di we aw Jiova want.—Rid Daniɛl 12:3.

13, 14. Wetin di wan dɛn we nɔto anɔyntɛd Kristian fɔ du if dɛn want fɔ wɔship Jiova di we aw i want? Wetin di Baybul bin dɔn tɔk bɔt dis?

¹³ Wi dɔn lan na di las atikul se Jiova bin de alaw pipul dɛn we nɔto Izrɛlayt fɔ wɔship am, bɔt dɛn pipul ya fɔ kam jɔyn in pipul dɛn we i dɔn mek agrimɛnt wit. (1 Kiŋ 8:41-43) Semweso tide, di wan dɛn we nɔto anɔyntɛd Kristian dɛn fɔ kam jɔyn Jiova in pipul dɛn we na “di pikin dɛn we gɛt di Kiŋdɔm.”

¹⁴ Tu prɔfɛt dɛn we bin de trade trade bin dɔn tɔk se we di wɔl want dɔn bɔku pipul dɛn go kam jɔyn Jiova in pipul dɛn fɔ wɔship am. Di prɔfɛt Ayzaya bin tɔk se: “Bɔku pipul dɛn go go ɛn tɔk se: ‘Una kam, lɛ wi go ɔp na Jiova in mawnten, we na Jekɔb in Gɔd in os. I go tich wi bɔt aw i want lɛ wi waka, ɛn wi go waka di we aw i want.’ Na Zayɔn lɔ go kɔmɔt, ɛn na Jerusɛlɛm Jiova in wɔd go kɔmɔt.” (Ayz. 2:2, 3) Di prɔfɛt Zakaraya insɛf bin tɔk se: “Bɔku pipul dɛn ɛn pawaful neshɔn dɛn go kam na Jerusɛlɛm fɔ no bɔt Jiova we gɛt bɔku amiman dɛn, ɛn fɔ beg Jiova mek i sɔri fɔ dɛn.” Dɛn pipul ya go kɔmɔt “frɔm ɔl di langwej dɛn na di wɔl.” Dɛn go wɔship Gɔd wit di anɔyntɛd Kristian dɛn ɛn dɛn go se: “Wi want fɔ go wit [una], bikɔs wi dɔn yɛri se Gɔd de wit una.”—Zak. 8:20-23.

15. Aw di “ɔda ship dɛn” de “go wit” di anɔyntɛd Kristian dɛn?

¹⁵ Di “ɔda ship dɛn” de “go wit” di anɔyntɛd Kristian dɛn bay we dɛn de ɛp dɛn fɔ prich di gud nyus bɔt di Kiŋdɔm. (Mak 13:10) Dɛnsɛf dɔn jɔyn Gɔd in pipul dɛn, so dɛn ɛn di anɔyntɛd dɛn dɔn bi “wan grup,” ɛn dɛn ɔl de ɔnda “di gud shɛpad,” Jizɔs Krays.—Rid Jɔn 10:14-16.

16. Aw Jiova go mek di las pat pan da “big big trɔbul,” bigin?

¹⁶ Afta we dɛn go dɔn dɔnawe wit ɔl lay lay rilijɔn, dɛn go atak Jiova in pipul dɛn ɔlsay na di wɔl. Da tɛm de, wi ɔl nid fɔ de usay Jiova go protɛkt in pipul dɛn. Dis atak go mek di las pat pan da “big big trɔbul,” bigin. Na Jiova insɛf sɛf go chuz di tɛm ɛn na in go du sɔntin we go mek Amagɛdɔn kam. (Mat. 24:21; Izik. 38:2-4) We i du dat, Gɔg go atak in “pipul dɛn we dɔn kam bak togɛda frɔm ɔda neshɔn dɛn.” (Izik. 38:10-12) Dis atak go mek Jiova kil Gɔg ɛn ɔl di wan dɛn we de biɛn am. Jiova go mek ɔlman no se na in wangren gɛt rayt fɔ rul, ɛn i go pul ɔl di badnem we pipul dɛn dɔn briŋ pan in nem. I se: “A go mek shɔ se . . . bɔku neshɔn dɛn no mi; ɛn dɛn go no se na mi na Jiova.”—Izik. 38:18-23.

17, 18. (a) We Gɔg go atak Jiova in pipul dɛn, wetin Jiova go tɛl in pipul dɛn fɔ du? (b) Wetin wi fɔ du if wi want lɛ Jiova protɛkt wi?

¹⁷ We Gɔg bigin fɔ atak Jiova in pipul dɛn, Jiova go tɛl in pipul dɛn se: “Mi pipul dɛn, una go insay una rum dɛn, ɛn lɔk una domɔt dɛn. Una ayd fɔ shɔt tɛm te di trɔbul dɔn.” (Ayz. 26:20) Da tɛm de, Jiova go tɛl wi wetin fɔ du fɔ mek wi sev, ɛn sɔntɛm di “rum dɛn” we dis skripchɔ tɔk bɔt go gɛt sɔntin fɔ du wit wi kɔngrigeshɔn dɛn.

¹⁸ If wi want lɛ Jiova protɛkt wi we da big big trɔbul go kam, wi fɔ no se Jiova gɛt pipul dɛn na dis wɔl we i dɔn ɔganayz. Ɛn dɛn pipul ya de na difrɛn kɔngrigeshɔn dɛn. So wi fɔ kɔntinyu fɔ de wit Jiova in pipul dɛn ɛn wit wi kɔngrigeshɔn. Lɛ wi jɔyn wan pan di man dɛn we rayt di Sam buk fɔ se: “Jiova, na yu de sev. Yu blɛsin de pan yu pipul dɛn.”—Sam 3:8.