1, 2. Yisinke ga tulisire po Jehova poPentekoste 33, ntani wolye va ya kere muhoko gwendi gomupe? (Tara efano.)

POPENTEKOSTE 33, kwa horokere po sihorokwa somulyo mehistoli lyovantu vaJehova pevhu. Kwa kere erunduruko lyenene sili. Mezuva olyo, kupitira mompepo zendi, Jehova kwa tulisire po muhoko gomupe, Vaisraeli wopampepo ndi ‘muhoko gwaKarunga.’ (Gar. 6:16) Jehova kwa ruganesere mpepo zendi zokupongoka a horowere vantu womomuhoko gomupe. Paurusa kwa tjenge asi womuhoko gomupe kapi va hepere hena kuvarugana yovamba ngwendi moomu va rugene yovamba ruvharo rwaAbirahamu. Nye ‘erugano lyawo lyovamba kwa kere sininke somomutjima.’—Rom. 2:29.

² Vantu wokuhova va ya kere muhoko gomupe gwaKarunga kwa kere vapositoli ntani novarongwa vaKristusa wokupitakana pefere ava va pongere konzugo zekeguru moJerusarema. (Yirug. 1:12-15) Awo kwa va powomwenene mpepo zokupongoka, ezi za va ninkisire va kare vana vaKarunga wopampepo. (Rom. 8:15, 16; 2 Kol. 1:21) Eyi kwa geve umbangi asi egwanekero lyepe lina tameke kurugana, eli ga retesa po Kristusa kupitira mohonde zendi. (Ruk. 22:20; resa Vahebeli 9:15.)  Varongwa ava kwa ya kere muhoko gomupe gwaJehova. Mpepo zokupongoka kwa va vaterere va uyunge maraka gokulisiga-siga aga ngava uyunga Vajuda novapagani ava va wizire koJerusarema va tunde koRoma va ya dane Sipito soYivike soVajuda ndi Pentekoste. Vantu owo kwa zuvhire “yirugana yoyinene yaKarunga” eyi va zuvhisire Vakriste wovagwavekwa momaraka gavene.—Yirug. 2:1-11.

3-5. (a) Yisinke Peturusa ga tanterere Vajuda mezuva lyoPentekoste? (b) Ngapi omu muhoko gomupe gwaJehova gwa ligwederere posiruwo saPeturusa?

³ Jehova kwa ruganesere mupositoli Peturusa mokupa mpito Vajuda novapagani va ya kare womuhoko gomupe ndi mbungakriste. Mezuva lyoPentekoste, Peturusa kwa tanterere Vajuda nouradi asi awo va hepa kutambura Jesus, mugara ogu va “dipagere,” morwa ‘Karunga ga mu paka, a kare Hompa naKristusa.’ Apa mbunga za pulire eyi za hepa kurugana, Peturusa kwa limbwilire asi: “Litezurureni namuvenye, mu likuhwire medina lyaJesus Kristusa, va mu dongwenene po nonzo deni, ntani ngomu tambura uhwi woMpepo zoKupongoka.” (Yirug. 2:22, 23, 36-38) Mezuva olyo, vantu wokusika ngwendi 3 000 kwa va gwedererere komuhoko gomupe goVaisraeli wopampepo. (Yirug. 2:41) Kutunda opo, ezuvhiso lyovapositoli kwa twikilire kulihana. (Yirug. 6:7) Muhoko gomupe kwa ligwederere.

⁴ Konyima, kwa ya zuvhisilire Vasamaliya, ano eyi kwa retere yitundwamo yoyiwa. Wovanzi kwa va kuhwire muudisi Filipusa, nye kapi va gwene poopo mpepo zokupongoka. Mbungagendesi moJerusarema kwa tumine mupositoli Peturusa naJohanesa koVasamaliya ava va litezwilire, “makura tava va kambeke mawoko gawo, vena makura tava gwana Mpepo zoKupongoka.” (Yirug. 8:5, 6, 14-17) Vasamaliya owo nawo kwa ya kere vamwe woVaisraeli wopampepo.

⁵ Momvhura 36, Peturusa kwa mu ruganesere a gave mpito kwavamwe va kare womuhoko gomupe goVaisraeli wopampepo. Eyi kwa horokere apa ga zuvhisilire Koroneliusa, mupitisili govakwayita nekoro lyendi novakaume vendi. (Yirug. 10:22, 24, 34, 35) Bibeli kwa tanta asi: “Peturusa haga za simpe kuuyunga . . . , makura Mpepo zoKupongoka tazi va hegumukire navenye ava va zuvhire nonkango dendi. Vapuli navenye . . . , ava va wizire kumwe naPeturusa, kwa tetukire pokumona asi uhwi woMpepo zoKupongoka vana u gava nokovapagani kooku.” (Yirug. 10:44, 45) Vapuli wovapagani ava va dilire kurugana yovamba nawo kwa ya kere womuhoko gomupe goVaisraeli wopampepo.

6, 7. Mononkedi musinke womuhoko gomupe va kere ‘mbunga zedina’ lyaKarunga, ntani dogoro kupi za sikire mbudi zawo?

⁶ Pepongo lyombungagendesi lyokuhova  eli lya kere momvhura 49, murongwa Jakopo kwa tente asi: “Simoni [Peturusa] ntaantani tupu ana kusanseka apa, omu ga tameka Karunga kupaparera edina lyendi mbunga movapagani.” (Yirug. 15:14) Mbunga ezi zompe kwa ya zi zigidisire kedina lyaKarunga, Jehova, omu mwa hamenene Vajuda novapagani wovapuli. (Rom. 11:25, 26a) Konyima, Peturusa kwa tjenge asi: “Pwanare kapi mwa kere muhoko, nye ntaantani muna kara muhoko gwaKarunga.” Peturusa kwa nkondopekere sirugana sawo pokutanta asi: “One ko ezimo eli va horowora, mbunga zovapristeli zopasiuhompa, muhoko gokupongoka, vantu vaKarunga ava ga horowora asi mu udise yitetu yendi. Age yige ga mu zigida mu tunde momundema mu wize mouzera wendi wokutetura.” (1 Pet. 2:9, 10) Awo va hepere kuhamberera ogu va karerere po nokudivisa edina lyendi kwankenye ogu. Awo va hepere kukara nombangi douradi daJehova, Mupangeli gwanayinye.

⁷ Vaisraeli wopampepo yiwo ana kutumbura ngesi Jehova asi “vantu ava na lisitira nyamwange, awo ngava dimba yehamberero lyange!” (Jes. 43:21) Mokutura poruzera vakarunga navenye woyimpempa ava ngava karere mosiruwo sina, Vakriste owo kwa divisire nouradi asi Jehova yige Karunga gelike gosili. (1 Tes. 1:9) Awo kwa geve umbangi kuhamena Jehova naJesus “moJerusarema nomoJudeya nazinye nomoSamaliya, dogoro nokooku wa ka twa uzuni.”—Yirug. 1:8; Koros. 1:23.

8. Erondoro musinke ga geve mupositoli Paurusa kovantu vaKarunga womosiruwo sendi?

⁸ Mupositoli Paurusa kwa kere gumwe ‘gomombunga zedina lyaKarunga.’ Age kwa sikamene komeho zovarongi woukonentu, mokupopera nouradi upangeli waJehova, “Karunga ogu ga sita uzuni neyi ya kara mo nayinye, Hompa geguru nevhu.” (Yirug. 17:18, 23-25) Kehagero lyorugedo rwendi rwautatu routumwa, Paurusa kwa rondwere vantu vedina lyaKarunga asi: “Ame nayi diva asi, nsene ngani za, mamumbungu gonyanya ngaga wiza mokatji keni, ago kapi ngaga mu tupura one mbungakriste. Nomokatji keni si namo ngamu kara vamwe ava ngava uyunga yininke yoyimpempa, asi ngava gwane ko varongwa.” (Yirug. 20:29, 30) Varwanesi usili ava va pumbire kwa ya monekere kehagero lyomazuva govapositoli.—1 Joh. 2:18, 19.

9. Kuhamena ‘mbunga zedina lyaKarunga,’ yisinke ya horokere apa va fire vapositoli?

⁹ Konyima zonomfa dovapositoli, varwanesi usili kwa vhukire ntani nokutulisa po nongereka doyimpempa. Varwanesi ava kapi va here kuvazigida asi ‘wombunga zedina’ lyaKarunga, ntani hena awo kwa gusire mo edina lyaKarunga momatoroko gawo gomanzi goBibeli. Awo kwa tambwire nompo dovapagani ntani kwa swaukisire Karunga kupitira momapuliro gawo gokudira kutunda momatjangwa, nopokulihameka moyita nomonomukaro dokunyata. Ure wonomvhura dononzi, Jehova kwa kere novakareli wovalimburukwi wovasesu tupu pevhu nye kapi ga kere ‘nombunga zedina lyendi.’

10, 11. (a) Yisinke Jesus ga pumbire mosifanekeso sendi soyilya nomau? (b) Ngapi sifanekeso saJesus sa ya sikire mo konyima 1914, ntani noyitundwamo musinke?

¹⁰ Jesus kwa ruganesere sifanekeso soyilya nomau mokupumba asi varwanesi usili ngava yi digopekesa mokudimburura ukarelikarunga wousili. Age kwa tente asi “vantu eyi va rara,” Muzonaguli makura ta ya kunu mau moyilya mepya omu Munwamuntu ga kunine mbuto. Nayinye ngayi  kulira kumwe dogoro ‘pouhura wouzuni.’ Jesus kwa fatwilire asi “mbuto zongwa” kwa fanekesa “ava va hamena Untungi weguru” ntani asi ‘mau’ kwa fanekesa “ava va hamena Mudona.” Pouhura wouzuni, MunwaMuntu nga tuma “vatezi,” vaengeli, va ya hangure yilya yopasifanekeso komau. Ava va hamena koUhompa ngava va pongaika. (Mat. 13:24-30, 36-43) Ngapi omu ya ya horokere eyi? Ngapi omu hena Karunga ga ya kara nombunga zovakareli vendi pevhu?

¹¹ “Uhura wouzuni” kwa tamekere 1914. Posiruwo oso, apa pevhu kwa kere po tupu Vakriste wovagwaveka mayovi gongandi. Apa ya tamekere yita 1914, vagwavekwa “ava va hamena Untungi,” kwa kere mounkwate wopampepo waBabironi zonene. Mo-1919, Jehova kwa va mangwilire mo, mokuvahangura ‘komau’ ndi koVakriste woyimpempa. Age kwa pongaikire “ava va hamena koUntungi,” yipo va kare vantu vendi mokusikisa mo uporofete waJesaya ou asi: “Poguli muhoko ogu va hampuruka mezuva limwe ndi? Siyoni kapi nga hepa hena ago muhoko va hana kuguhampuruka.” (Jes. 66:8) Siyoni, mbunga zaJehova kwa pongaika vagwavekwa nokuvawapaika va kare muhoko.

12. Ngapi vagwavekwa va ya kara ‘mbunga zedina lyaKarunga’ naina?

¹² Ngwendi Vakriste wokuhova, vagwavekwa “ava va hamena koUntungi” yiwo vana kara nombangi daJehova. (Resa Jesaya 43:1, 10, 11.) Awo kwa lisiga novantu morwa nkareso zawo zongwa ntani kuzuvhisa ‘mbudi zongwa zoUhompa, zi kare umbangi wonomuhoko nadinye.’ (Mat. 24:14; Fil. 2:15) Monkedi zangesi, awo kwa vatera vantu wovanzi va ture po elikwatakano lyewa naJehova.—Resa Ndaniyera 12:3.

13, 14. Yisinke va hepa kurugana ava va hana asi vagwavekwa yipo Jehova a va tambure, ntani ngapi va yi pumbire moBibeli?

¹³ Sirongwa sa ka pita kwa likidire asi  mosiruwo soVaisraeli, Jehova kwa tambwire vanayirongo va mu karere kumwe novantu vendi. (1 Vah. 8:41-43) Mokulifana nanaina, ava va hana asi vagwavekwa va hepa kukarera Jehova kumwe novantu “ava va hamena koUntungi,” vagwavekwa vaJehova.

¹⁴ Nare, vaporofete kwa pumbire asi wovanzi ngava karera Jehova novantu vendi momazuva aga gopouhura. Jesaya kwa porofetere asi: “Vantu vawo ngava uyunga asi: ‘Tu rondeni kondundu zaHOMPA kontembeli zaKarunga gwaIsraeli. Age nga tu ronge eyi ana hara tu yi rugane, ose ngatu gende mononzira edi ga horowora. Yeeyi erongo lyaHOMPA kuna kutunda koJerusarema.’” (Jes. 2:2, 3) Mokulifana, muporofete Sakaliya kwa pumbire asi: “Vantu wovanzi nonomuhoko dononkondo ngadi za koJerusarema, di ka tongamene HOMPA Munankondo nadinye oku tadi mu kandererere etungiko lyendi.” Mbunga ezi, ngazi tunda ‘movanayirongo murongo.’ Azo ngazi karera Karunga kumwe noVaisraeli wopampepo pokutanta asi: ‘Ose kuna hara tu kare mositambo seni, yeeyi ose kwa zuvha asi Karunga, neni ga kara.’—Sak. 8:20-23.

15. Ngapi ‘nonzwi dapeke’ da kara “mositambo” soVaisraeli wopampepo?

¹⁵ ‘Nonzwi dapeke’ kuna kara “mositambo” soVaisraeli wopampepo pokuzuvhisa mbudi zongwa zoUhompa. (Mar. 13:10) Awo kwa ya kara ruha rovantu vaKarunga, ndi “siunda simwe tupu” novagwavekwa mepitisiro ‘lyomusita gomuwa,’ Jesus Kristusa.—Resa Johanesa 10:14-16.

16. Yisinke nga rugana Jehova eyi ngayi twaredesa koHarumagedoni?

¹⁶ Konyima zokuzonagura po Babironi zonene, vantu vaJehova ngava va homokera. Awo ngava hepa epopero lyaJehova mokuparuka. Posiruwo oso, Jehova nga gendesa yininke apa pevhu, eyi ngayi ninkisa va homokere vantu vendi. Eyi ngayi horoka moruha rokuhulilira ‘roudigu wounene,’ Harumagedoni. (Mat. 24:21; Hes. 38:2-4) Jehova nga ninkisa Gogo a homokere vantu ava “va pongaika va tunde konomuhoko,” vantu vendi. (Hes. 38:10-12) Apa ngayi horoka eyi, Jehova nga popera vantu vendi pokurwisa Gogo novakwayita vendi. Jehova nga hungameka upangeli wendi ntani nokupongora edina lyendi, morwa age kwa tanta asi: “Monkedi ezi yimo ngani likidira nomuhoko nadinye asi ame ni munene, . . . makura ntani ngava diva asi ame nyame HOMPA.”—Hes. 38:18-23.

17, 18. (a) Apa Gogo nga homona vantu vaJehova, mapukururo musinke ngatu gwana? (b) Nsene tuna hara ngatu gwane epopero lyaJehova, yisinke twa hepa kurugana?

¹⁷ Apa Gogo nga tameka kuhomona, Jehova nga tantera vakareli vendi asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jes. 26:20) Posiruwo oso, Jehova nga tu pa mapukururo kuhamena eyi ngatu hepa kurugana mokuparuka. ‘Nonzugo’ edi nampo kwa tamba konombungakriste.

¹⁸ Nsene tuna hara ngava tu popere posiruwo soudigu wounene, twa hepa kuyitambura asi Jehova kwa kara novantu vendi apa pevhu ntani kwa va wapaika monombungakriste. Twa hepa kutwikira kuhama kovantu vaJehova ntani nokukara nkenye apa mombungakriste. Ngwendi muepisarome, kuvhura tu uyunge nonomutjima detu nadinye asi: “Eparu kwaHOMPA ali tundu; age ngano a swere mbunga zendi!”—Epis. 3:8.