Ndakai Mwemwe Antu Yakwe Leza
Ndakai Mwemwe Antu Yakwe Leza
“Pa nsita imwi mutali antu yakwe Leza, nomba ndakai mwemwe antu yakwe.”—1 PETULO 2:10.
UZYE MUNGAASUKA?
Uzye umu nsita ya atumwa aaweni aizile yaya antu yakwe Leza apya?
Uzye Aina Klistu yacumi yaali nu kuisininkizya uli ukuti aantu aizina lyakwe Yeova?
Uzye ndakai antu yakwe Yeova aaweni, nupya amfwele nazyuze yalinzile ukucita uli pakuti yakacingililwe umu nsita ya ucuzi ukulu cuze?
1, 2. Uzye u kusenuka ci ukwacitiike umu mwaka wa 33 C.E pa wanda wa Pentekosti, nupya aaweni aizile yaya antu yakwe Yeova apya? (Lolini cikope cakutandikilako.)
UMU mwaka wa 33 C.E. pa wanda wa Pentekosti, kwacitiike icintu cimwi cisuma sana pa yantu yakwe Yeova pano nsi. Kwali vimwi ivyasenwike. Pa wanda uwa, Yeova waomvizye umupasi wakwe uwamuzilo pa kulenga kuti kuye uluko lupya, kulikuti “Izlaeli wakwe Leza.” (Galatiya 6:16, NW) Ukufuma pa nsita ino Abulaamu wali nu umi, uu wali ali muku wakutandikilako lino antu yakwe Leza yataali nu kumanyikwa ukupitila umu kusilamula aonsi. Lelo, ukulozya uku muntu wenga na wenga uwa muluko kwene luulu lupya, Paulo walemvile ati: “Ukusilamulwa kwakwe u kwa mwenzo ukupitila umu mupasi.”— Loma 2:29, NW.
2 Aatandikilepo ukuya umu luko lupya lwakwe Leza, yaali aatumwa alino na asambi yakwe Klistu yauze ukucila pali 100 aakomanyile umu muputule wa papela umu Yelusalemu. (Milimo 1:12-15) Yaa yaapokeliile umupasi wa muzilo, uwayalenzile ukuya ana yakwe Leza apakwe nu mupasi. (Loma 8:15, 16; 2 Kolinto 1:21) Uu, wali usininkizyo wakuti upangano upya wakwe Leza wati-utandika ukuomba ukupitila muli Klistu pa mulandu wa wazi wakwe. (Luka 22:20; welengini Ayebulai 9:15.) Vikwene avino asambi yaayo izile yaya uluko lupya lwakwe Yeova, kulikuti antu yakwe apya. Umupasi wakwe Leza wayalenzile ukuti yaasimikila umu ndimi zipusane-pusane zino aYuda yavwanganga alino na antu aataali Ayuda aizile uku Yelusalemu mu kuzevya kwa Milungu, nanti ukwa pentekosti ukufuma uku mpanga izyatekwanga na ina Loma. Antu yaa yuvwanga umu ndimi zyao “vintu vikulu vino Leza wacita” vino Aina Klistu apakwe nu mupasi wamuzilo yaakosoolanga.—Milimo 2:1-11.
ANTU YAKWE LEZA APYA
3-5. (a) I vyani vino Petulo wanenyile Ayuda pa wanda wa Pentekosti? (b) Uzye uluko lupya lwakuzile uli umu myaka inono sile?
3 Yeova waomvizye Petulo ukwama Ayuda na antu aataali Ayuda ukuti yaye umu luko lwakwe Leza ulupya, kulikuti icilongano ca Ina Klistu apakwe. Pa wanda wa Pentekosti, Petulo wasifile pa kuneena Ayuda ukuti aaliyo yakomile Yesu, nupya yaalinzile ukuzumila Yesu ukuti ali ‘Klistu Umwene’ wao. Lino antu yuzizye pali vino yaali nu kucita, Petulo waswike ati: “Zenzukini, cila muntu, muwatiziwe mwi zina lyakwe Yesu, pakuti maifyo inu yelelwe. Alino mulapokelela uwila uno Leza walaya.” (Milimo 2:22, 23, 36-38) Uwanda kwene uuwa, antu apiipi na 3,000 izile iyaya umu luko lupya lwakwe Leza. (Milimo 2:41) Atumwa yatwalilile ukuombesya umu mulimo wa kusimikila, nupya antu nayauze aingi yazumiile icumi. (Milimo 6:7) Uluko lupya, lwatwaliliile ukukula.
4 Mukuya kwa nsita, asambi yakwe Yesu yatandike ukusimikila aina Samaliya. Aingi yapokeelile icumi nu kuwatiziwa, lelo yataapokeliile umupasi wamuzilo. Iumba ilyatungululanga ilyali umu Yelusalemu, lyatumile atumwa yaili, Petulo na Yoane ukuti yakatandalile aina na ya nkazi uku Samaliya, nupya ‘iika makasa yao panoyali, nga nao yapokelela umupasi wamuzilo.’ (Milimo 8:5, 6, 14-17) Lyene, aina Samaliya yapokeliile umupasi wa muzilo iyaya nu mwiumba lya Ina Klistu apakwe.
5 Mu mwaka wa 36 C.E, Leza waomvizye Petulo ukwama iumba lya antu nalyuze ukwizaya umu luko lupya ulwa ina Izlaeli. Cii cacitiike lino Petulo wasimikiile uku mukalamba wa asilika ya ciLoma Konelio nu lupwa lwakwe ni vyuza. (Milimo 10:22, 24, 34, 35) Baibo ikati, lino Petulo acili akuvwanga, umupasi wamuzilo wizile pali yonsi auvwanga aataali aina Izlaeli. ‘Ayuda yano ataila, aizile na Petulo kufuma ku Yopa yazunguka pa kulola vino na Akulukuwa kwene yapokelela uwila wa mupasi wamuzilo.’ (Milimo 10:44, 45) Ukufuma pa nsita kwene iiya, antu aataali Ayuda yaamilwe ukuti nayo yangaya muli Izlaeli wakwe Leza nanti icakuti yataali asilamulwe.
ANTU AIZINA LYAKWE
6, 7. Uzye antu aizina lyakwe Yeova aali umwiumba lya luko lupya, yaacisile vyani?
6 Pakukomaana kwakwe yaayo aali umwiumba ilyatungululanga umu mwaka wa 49 C.E, umutumwa Yakobo walanzile ati: “Simoni [Petulo] watalondolola vino inkolelo Leza watandike kusolola yamwi mu Akulukuwa kuti yaye antu yakwe.” (Milimo 15:14) “Aantu aizina lyakwe” Leza yaali iumba lya yantu umwali Ayuda na aataali Ayuda yonsi yano Leza walenzile kuti yaye uluko longa. (Loma 11:25, 26a) Lino papisile insita, Petulo walemvile ati: “Pa nsita imwi mutali antu yakwe Leza, ndakai mwemwe antu yakwe.” Petulo walondolwile icalenzile ukuti kuye uluko kwene luu ulupya ati: “Mwemwe mutundu usololwe, yasimapepo aku wene. Mwemwe luko lwamuzilo, nupya antu yakwe Leza yano asololwa kuti yalande vicitwa vyakwe Leza vyakuzungusya.” (1 Petulo 2:9, 10) Yaali nu kuya inte zyakwe Yeova izisipe nu kulumbanya Leza ukuti ali Kateeka wa Papela-pela.
7 Lyene Yeova waomvyanga uluko lupya lwakwe Izlaeli wakwe Leza, nupya wamanga antu aali umwiumba kwene lilyo ati, “antu yano naipangile, kuti yaimbila inyimbo zyakundumbanya.” (Ezaya 43:21) Yaanenanga antu ukuti Yeova sile ali Leza wa cumi nu kuti tu leza tuuze twali utwaufi. (1 Tesalonika 1:9) Yakosoolanga pali Yeova na Yesu “mu Yelusalemu, mu Yudeya na monsi Musamaliya, nga nu kufika na kuno insi yapela.”—Milimo 1:8; Kolose 1:23.
8. Uzye u kucelula kwa musango ci kuno Paulo wapeezile uku yantu yakwe Leza umu nsita ya atumwa?
8 Paulo wali inte yakwe Yeova isipe sana nupya wanenanga antu ukuti Yeova sile ali Leza wa cumi, wacitaanga vivyo kwene na lino wavwanganga uku antu aataali yakapepa yakwe Leza aatemilwe amano ya untunze. Wanenanga antu ati, Yeova ‘waumvile insi na vyonsi ivyayamo’ nupya “ali mwine wi yulu ni nsi.” (Milimo 17:18, 23-25) Nupya Paulo wacelwile icilongano ati: “Manyile ukuti lino ndapita, antu ali wa mimbulu ikalipe cuze yaliza munomuli, nga yatalapanya ufyo. Insita iliza lino antu yamwi kufuma umwiumba linu yalatumpoka nu kupuulula ataile.” (Milimo 20:29, 30) Mu kusila kwa myaka ya atumwa, kwali asangu aingi sana.—1 Yoane 2:18, 19.
9. I cani cacitiike uku yantu yakwe Leza lino atumwa yonsi yaafwile?
9 Lino atumwa yonsi yaafwile, asangu yaavuzile cuze iyapanga na macalici yaufi aitakanga ukuti Aina Klistu. Mu cifulo cakuti yaye antu aizina lyakwe Yeova, yakapepa kwene yaa aufi yaafumya izina lyakwe Yeova mu ma Baibo yano yasenula. Nupya yakasaalula Leza umu nzila nazyuze izingi. Yakalondela intambi zyakwe yaayo aataali yakapepa yakwe Leza nu kusambilizya ivisambilizyo ivitaaya muli Baibo. Yakalwa inkondo zino yakati nkondo zya muzilo nupya yakaati yakalwila Leza. Yaaya nu usomvi nupya yakacita ulalelale. Imyaka ingi iyapisilepo ukufuma pano asangu yaelileko, kwali yakapepa yakwe Yeova acumi anono sile pano nsi nupya kutaali iumba ilyapekanyiziwe lya antu aizina lyakwe Leza.
LEZA WIZILE AKWATA ANTU YAKWE NUPYA
10, 11. (a) I vyani vino Yesu wasoowile pali “kalolo” ni “ngano”? (b) Uzye usoowelo wakwe Yesu wafikiliziwe uli pa cisila ca mwaka wa 1914, nupya i cani icacitiike?
10 Umu mulumbe wa ngano na kalolo, Yesu wasoowile ukuti asangu yaali nu kuleenga ukuti catala sana ukumanya ukupepa kwa cumi. Yesu walanzile ati, “lino antu yati yakasula,” Ciwa wali nu kuta kalolo umu calo cino Umwana wa muntu watiile imbezu zya ngano. Ingano na kalolo vyali nu kukulila pamwi ukufika uku “mpelelekezyo ya nsi.” Walondolwile ukuti “imbezu zisuma” zikaimililako “antu amu Wene” nu kuti “kalolo” akaimililako “antu ya mwanisi wakwe Leza.” Mu nsita zya ku mpelelekezyo, Umwana wa muntu wali nu kutuma angeli ukuti yakapatukanye kalolo ni ingano. Lyene angeli yaali nu kukolonganika antu ya mu Wene. (Mateo 13:24-30, 36-43) Uzye cii cacitiike uli? Uzye cali uli pakuti Leza akwate iumba lyakwe yakapepa apekanyiziwe ningo pano nsi nupya?
11 “Mpelelekezyo ya nsi” yatandike umu mwaka wakwe 1914. Pa nsita iiya, pano nsi paali Aina Klistu apakwe anono sile. Lino kwali inkondo iyatandike umu mwaka kwene uuwa, aapakwe kwene yaa kulikuti “antu amu Wene” yaali ala yacili umu uzya muli Babiloni Mukulu. Nomba umu mwaka wa 1919, Yeova wayakulwile, nupya upusano uwali pa Ina Klistu ya cumi na aufi walolike ningo sana. Leza wakolonganiike “antu amu Wene” ukuya antu apekanyiziwe ningo, wakwe vino Ezaya wasoowile ukuti: “Uzye kwatala kwaloleka nanti ukuvwika icamusango ndi uo? Uzye kwatala kwaloleka umutundu umwi uwa antu uno waliko apa wanda sile onga? Ala Zioni wene alavyala umutundu wa antu, lilyo kwene lino watandika ukucuziwa sile ni ndilwa.” (Ezaya 66:8) Umu mazwi yaa, Zioni iuvi lya angeli yakwe Yeova. Zioni wali nu ‘kuvyala’ lino uluko lwa yantu apakwe pano nsi lwatandika sile ukuyako.
12. Uzye apakwe yaaya uli antu aizina lyakwe Yeova?
12 Wakwe vino cali ku Ina Klistu yakutandikilako, “antu amu Wene” apakwe yaali nu kuya inte zyakwe Yeova. (Welengini Ezaya 43:1, 10, 11.) Yaali nu kuya aiyele pa mulandu ni micitile yao isuma iya Ina Klistu alino nu kusimikila ilandwe lisuma ilya Wene “kuya umboni ku antu amu nko zyonsi.” (Mateo 24:14; Filipi 2:15) Umu nzila kwene ii, yaavwa antu aingi cuze ukuya sana ya cuza yakwe Yeova.—Welengini Danieli 12:3.
‘TUKULONDA TUYE NAAWE’
13, 14. Pakuti yaapepa nu kuombela Yeova umu nzila ino Leza wazumilizya, uzye yaayo aataaya umwiumba lyakwe Izlaeli wakwe Leza yalinzile ukucita uli, nupya cii casoowilwe uli muli Baibo?
13 Ilyasi ilya fumileko lyalanzile ukuti mpiti umu Izlaeli, Yeova wazumilanga ukupepa kwa antu aataali aina Izlaeli lino yapepelanga pamwi na antu yakwe. (1 Yamwene 8:41-43) Ndakai, yaayo aatapakwa nu mupasi wamuzilo yalinzile ukupepa Yeova pamwi na Yante Yakwe Yeova apakwe.
14 Ukwiza kwa yantunze uku kupepa Yeova pamwi na antu yakwe umu manda yaa akusyalikizya, kwasoowilwe na yakasema aaliko mpiti yaili. Ezaya wasoowile ukuti: ‘Antu aingi yalavwanga nu kuti, tuyini twapita tutumbele umwamba wakwe Yeova, apakuti aye akatusunde vino tuli nu kucita, apakuti twalondela mwi kula lyakwe. Umu cumi amasunde yakwe Yeova yakafuma mu Yelusalemu, pano umu Zioni ali muno akapeelela antu yakwe amalango.’ (Ezaya 2:2, 3) Avino na Zekaliya nawe wasoowile ati, “antu amu mitundu ikalamba yalaiza kuno ku Yelusalemu.” Walanzile pa yantu yaa ukuti, “ainamasi ikumi,” yano mu kulanda kwa unkolanya yaali nu kulema uku mukanju wakwe wenga muli yaayo aaya muli Izlaeli wakwe Leza, nu kulanda yati: “Tukulonda tuye nawe, pano swemo tuvwa ukuti Leza waya kunomuli.”—Zakaliya 8:20-23.
15. U mulimo ci uno yaayo aaya umwiumba lya “mfwele nazyuze” yakaombela pamwi na aaya muli Izlaeli wakwe Leza?
15 Yaayo aaya umwiumba lya “mfwele nazyuze” yakaombela pamwi na aaya muli Izlaeli wakwe Leza umu mulimo wa kusimikila. (Mako 13:10) Nayo yakaya antu yakwe Leza, iyaya “ufyo onga” pamwi na apakwe, ala yakutungululwa nu “mucemi musuma,” Klistu Yesu.—Welengini Yoane 10:14-16.
MULINZILE UKUYA PAMWI NA ANTU YAKWE YEOVA PAKUTI MUKACINGILILWE
16. I cani cino Yeova alacita icilatungulula kuli Alamagedoni?
16 Lino Babiloni Mukulu alononwa, antu yakwe Leza yalayazanza. Pakuti tukapusuke, tulalondekwa ukuti Yeova akatucingilile. Pa nsita kwene ii iyasoololwa, Yeova alaatungulula ivintu pano nsi, na cii cilaleenga ukuti antu yakwe yazanzwe. Lyene impelelekezyo ya “macuzi aipisye kuluta,” ilafika, kulikuti Alamagedoni. (Mateo 24:21; Ezekelo 38:2-4) Pa nsita iiya, Gogi alazanza antu aakolonganikwe “ukufuma umu mitundu,” kulikuti antu yakwe Yeova. (Ezekelo 38:10-12) Ndi cii cacitika, Yeova alapususya antu yakwe papokwene sile nu kulwa inkondo na Gogi kumwi ni vita vyakwe Gogi. Yeova alalenga ukuti ukateeka wakwe umanyikwe alino ni zina lyakwe lilacindikwa. Walaanda ukuti: ‘Ali vino nemo ndalanga antu ya mitundu yuze ukuti nene mukulu nupya nene mucindami. Ali lino antu yalasininkizya ukuti fwandi nene, indi Yeova.’—Ezekelo 38:18-23.
17, 18. (a) Uzye Yeova alaneena antu yakwe ukucita vyani lino Gogi alayazanza? (b) Uzye tulinzile ukucita vyani ndi tukulonda ukuti Yeova akatucingilile?
17 Lino Gogi alatandika ukuzanza, Yeova alaneena antu yakwe ati: “Mwe antu yane aleni ingilini mu ng’anda inu, muyale ni visasa. Mufisame apakasita kanono cisuke icipyu cakwe Leza cisile.” (Ezaya 26:20) Pa nsita kwene iiya, Yeova alatunena ivyakucita pakuti tukapusuke. Umu “ng’anda” limwi mungaya umu vilongano vino twayamo.
18 Ndi tukulonda kuti tukacingililwe umu nsita ya ucuzi ukulu cuze, tulinzile ukuzumila ukuti Leza wakwata antu aaya pano nsi ndakai nu kuti wayapekanya ningo umu vilongano. Tulinzile ukuya pamwi na antu yakwe Yeova nu kuombela pamwi ni vilongano vino twayamo. Wakwe kalemba wa masamu, tungalanda nu mwenzo onsi ukuti: ‘Ukukululwa kukafuma sile kuli Yeova, upolelelo wako ungala uye apa antu yako.’ —Masamu 3:8.
[Mauzyo ya Masambililo]
[Cikope api’fwa 28]
Petulo wasimikile Konelio nu lupwa lwakwe (Lolini palagalafu 5)
[Cikope api’fwa 30]
Lino kulaya “macuzi akulu kuluta,” tulalondekwa ukutwalilila ukuya apiipi sana na ina umu vilongano vino twayamo (Lolini mapalagalafu 16-18)
