1, 2. Ngera el omeldechel a tekoi a lerirellii a Jehovah er sera Pentekost er a rak er a 33? Te rua techang a mlo chedal tia el beches el renged? (Momes er a siasing er a uchelel a suobel.)

 SERA Pentekost er a rak er a 33, e a Jehovah a rirellii a kmal klou el omeldechel a tekoi. Ngtileketekii a beches el renged el okedongall el “Israel ra Dios.” (Gal. 6:16, BT) A Jehovah a uluusbech er sel chedaol klisichel el melilt er a derta el chedal tia el renged. A Paulus a milluches el kmo tirke el chedal tia el beches el renged a diak bo lobotk el ua ruldidellel a rsechel a Abraham. Ngbai ‘blotk a rengrir’ el oeak a chedaol klisichel a Dios.​—Rom 2:29.

² Tirka el kot el chedal tia el beches el renged a rechapostol me a rekuk betok er a dart el disaiplo er a Kristus el mlo kldibel er a ngarbab el delmerab er a Jerusalem. (Rel. 1:12-15) A Dios a milsterir a chedaol klisichel el uchul me te mirrodel el mo ngelekel. (Rom 8:15, 16; 2 Ko. 1:21) E tiang a mileketeklii el kmo a Jehovah a mla kongei er a tengetengel a Kristus e mla mtechir a Llach er a telbiil el oba beches el telbiil. (Lk. 22:20; monguiu er a Hebru 9:​15.) Me tirke el ngellitel el disaiplo a mlo chedal tia el beches el renged. Me ngoeak a chedaol klisichel a Dios e ngmlo sebechir el  mo medengei e mo melekoi a betok el omelekoi, e dirrek el mo ouchais aike el “mengasireng el tekoi el bla leruul a Dios.”​—Rel. 2:1-11.

3-5. (a) Ngerang dilung a Petrus el mo er a Rechijudea er sel sils er a Pentekost? (b) E milekerang e meteketek tia el beches el renged er a uchelel?

³ A Jehovah a uluusbech er a apostol el Petrus el mo mengemedaol er a Rechijudea me a rulebult el Chisentael el mo chedal tia el beches el renged, el ngii a ongdibel er a rengellitel el Kristiano. Me seikid el sils er a Pentekost, e a Petrus a mle bekeu el melekoi er a Rechijudea el kmo tir a milekodir a Jesus me chelechang e ngkirir el kongei el nguu el mo “Rubak e Mesias” er tir. Me a seked a uleker el kmo ngkirir el mekerang, me a Petrus a dilu el kmo: “Mobult el rokui er a kngtmiu e bo metecholb el ngar a ngklel a Jesus Kristus, me bo lousubes a kngtmiu a Dios, me mnguu a Chedaol Reng el le bilskid a Dios.” (Rel. 2:22, 23, 36-38) Sel sils e te bekord el 3,000 a mlo chedal tia el beches el renged, el okedongall el Israel er a Dios. (Rel. 2:41) Me a uriul, e a rechapostol a millemolem el blak a rengrir el omerk er a klumech me a rebetok el chad a kilengei er a klemerang. (Rel. 6:7) Me tia el beches el renged a di milleketek a klungel.

⁴ A uriul e a redisaiplo er a Jesus a ulemuchel el omerk er a klumech el mo er a rechad er a Samaria. Me a rebetok er tir a kilengei er a klemerang e mlo metecholb, engdi ngdimlak lenguu a chedaol klisichel a Dios. Me a chelechad er a ruungerachel el ngar er a Jerusalem a ulderchii a Petrus me a Johanes el mo oldingel er tirka el beches el rudam me a rudos er tir er a Samaria. Tirka el apostol a ulemor a chimorir er tir “me te ngiluu a Chedaol Reng.” (Rel. 8:5, 6, 14-17) Me ngoeak tiaikid el rolel, e tirka el chad er a Samaria a mlucheluch e mlo chedal a Israel er a Dios.

⁵ Sera rak er a 36, e a Dios a uluusbech er a Petrus el mo mengemedaol er a kuk ta er a cheldellir a rechad el mo chedal tia el beches el renged. E tia dilubech er sel taem el Petrus a mlo omerk er a klumech el mo er a merreder er a resoldau er a Rom el Kornelius me a rechedal me a resechelil. (Rel. 10:22, 24, 34, 35) A Biblia a ouchais el kmo sera longedecheduch a Petrus, e a chedaol klisichel a Dios a mlo er tirka el Chisentael el ulerrenges er ngii. Me “tirkel oumerang el chad er a Judea el ulebengkel a Petrus er a Jopa el mong a mlo mechas a rengrir el kmo a Dios a dirrek el mla otengelii a Chedaol Reng el mor a re Chisentael.” (Rel. 10:44, 45) Me ngulemuchel er seikid el taem, e a rediak leblotk el Chisentael a mlo sebechir el mo chedal a Israel er a Dios.

6, 7. Te milekerang a rechedal tia el beches el renged e mo chad el kirel a ngklel a Jehovah?

⁶ Ngar er sel miting er a chelechad er a ruungerachel er a rak er a 49, e a disaiplo el Jakobus a dilu el kmo: “A Simon [el Petrus] a mla smodii a blekerdelel a Dios er a le kot el ochotii a ulekerreuil el kirir a re Chisentael er a le  ngititerir a re bebil er tir el mo chedal [“el kirel a ngklel,” BT].” (Rel. 15:14) Tirka el chad “el kirel a ngklel” a mle uldimukl er tir a rechad er a Judea me a Rechisentael el bla lerelleterir a Dios el mo chimo el renged. (Rom 11:25, 26a) A uriul, e a Petrus a milluches el mo er tir el kmo: “A ngar a mong e ng dimlak mchedal a Dios, e ngdi chelechang e kom mla mo chedal.” A Petrus a milsaod er a moktek er tia el beches el renged el kmo: “Kemiu a ngellitel el chad, . . . el chedal a Dios, el mlengilt el kirel mo omerk a chisel a ungil el urerel a Dios, el milkedongemiu el otebedemiu er a ilkolk el mor a mengasireng el llemesel.” (1 Pe. 2:9, 10) Me ngmle kirir el bekeu el ouchais el kirel a Jehovah e mengebkall er ngika el Merreder er a Eanged me a Chutem.

⁷ Me seikid el taem e a Jehovah a mla mo ousbech er a Israel er a Dios me ngmle sebechel el mesaod er tir el kmo, te “chad el kurruul er tir el kirek, me te mo mengitakl odengesek!” (Isa. 43:21) Te mle bekeu el ouchais el kmo a Jehovah a di ta el mera el Dios e aike el bebil er a chelid a rokui el di klsuul. (1 Th. 1:9) Te mle sioning el kirel a Jehovah me a Jesus el ngar er a “Jerusalem, ma Judea el rokir, ma Samaria, el mo lmuut er a bek el beluu er a beluulchad.”​—Rel. 1:8; Kol. 1:23.

8. Ngerang dilung a apostol el Paulus el mo er a rechedal a Dios?

⁸ A Paulus a mle bekeu el ouchais el kirel a Jehovah me a omengederederel er sera longedecheduch er a remellomes a rengrir el chad el milengull a ngodech el chelid. Ngmilsaod el mo er tir el kmo, a Jehovah a “ngikel milebii a beluulchad ma ikel bek el ngar a chelsel, ingii a Rubak er a eanged ma chutem.” (Rel. 17:18, 23-25) A Paulus a dirrek el uluuchais er a rechedal a Dios el kmo: “Ak medengei el kmo sel kurael, e a tebelik el charm a mo soiseb er a delongeliu el mo melemall er a delebechel. A tar a klebesei e a re bebil er a re chad el cho mtal cheldebechel a mo omulak e mengetikaik er a ruumerang el mo oltirakl er tir.” (Rel. 20:29, 30) Me a uchei er a lemad a rechapostol e te mla mo er ngii a rebetok el chad el omtok er a mera el osisechakl.​—1 Jn. 2:18, 19.

9. Ngera dilubech el mo er a rechedal a Dios er a uriul er a lemad a rechapostol?

⁹ A uriul er a lemad a rechapostol, e a rumtok er a mera el osisechakl a siliseb er a betok el ongdibel, e tiang a mlo uchul e ngdilubech aike el ikelesia el leko te Kristiano. Tirka el klsuul el Kristiano a dimlak el chad el kirel a ngklel a Jehovah, te bai ultebedii a ngklel a Dios er a betok el oidel a Biblia er tir. Te dirrek el ultubii a ngklel a Dios el okiu a betok el rolel. Te olisechakl a tekoi el diak a uchetemel er a Biblia e dirrek el oltirakl a siukang er a omengull er a ngodech el chelid. Te mla meruul aike el lekong chedaol el mekemad e melekoi el kmo te oumekemad el kirel a Dios. Te dirrek el mengeblad er a rechad e chelsechusem er a deleboes el omeruul. Me a uriul er a lomuchel a ultok er a mera el osisechakl, e te di mle mekesai el blak a rengrir el mesiungel a Jehovah a ngar er a chutem, e dimlak a ulterekokl el cheldebechel el tir a chad el kirel a ngklel.

10, 11. (a) Ngera ngulemlaoch er ngii a Jesus el kirel a ungil me a mekngit el dellomel? (b) Ngmilekerang e mutaut a okesiu er a Jesus er a uriul er a rak er a 1914?

¹⁰ A Jesus a uluusbech er a okesiu el kirel a ungil me a mekngit el dellomel el omlaoch el kmo a utekengel a mera el osisechakl a rullii el mo meringel el medangch a mera el klechelid. Ngdilu el kmo, “a tar a klsus er a bla bo le bad a re bek el chad,” e a Diabelong a mo melalem a mekngit el dellomel er a chelsel a sers el Ngelekel a chad a mla dualem a tane er a ungil el dellomel. Me a ungil me a mekngit el dellomel a di dmak el mukeroul el mo lmuut er a “ulebongel er a beluulchad.” Ngmilsaod el kmo, a “ungil tane er a dellomel” a melutk el  kirir “tirkel chad el mo chad er a Rengedel a Dios,” e a “ikel mekngit el dellomel a tirkel el chad el chedal a Diabelong.” Me ngar er a taem er a ulebongel, e a Ngelekel a chad a mo oderecheterir a rechanghel el mo meleakl a mekngit er a ungil el dellomel. E seikid e a rechanghel a mo mengudel er a rechedal a Rengedel a Dios. (Mt. 13:24-30, 36-43) Tiang milekerang e duubech, e milekerang e lmuut el mo er ngii a ulterekokl el cheldebechel er a rechedal a Dios el ngar er a chutem?

¹¹ A taem er a “ulebongel er a beluulchad” a ulemuchel er a rak er a 1914. Sel taem e te di mle kesai el telael a rengellitel el Kristiano el ngar er a chutem. Me sera lomuchel a mekemad er seikid el rak, e tirka el ngellitel el “chad er a Rengedel a Dios” a dirk mle chelsimer er a chelsel a kloul Babilon. Engdi sera 1919 e a Jehovah a ultebedeterir me ngkmal mlo bleketakl a klekakerous er a remera el Kristiano me a reklsuul el Kristiano. Ngmilengudel er tirke el “chad er a Rengedel a Dios,” el di ua lulemlaoch a profet el Isaia el kmo: “Ng ngar ngii a beluu el mlukdubech er a chelsel a tal sils? A Sion a diak bo le meketeket el chuarm, e ng mukdubech a beluu.” (Isa. 66:7, 8) Ngar er tia el bades, e a Sion a cheldebechel er a rechanghel er a Jehovah, e a beluu a “mlukdubech” er sel taem el renged er a rengellitel el Kristiano a milteketek er tia el chutem.

12. Te mekerang a rengellitel e mo chad el kirel a ngklel a Jehovah?

¹² Me chelechang e a rengellitel el “chad er a Rengedel a Dios” a di ua Rekristiano er a irechar el mle sioning er a Jehovah. (Monguiu er a Isaia 43:1, 10, 11.) Te kmal ngodech er a rebebil el okiu a ungil el blekerdelir me a urerir el omerk er a ungil chais er a Rengedel a Dios el “mo ocholt el mor a rokui el chad.” (Mt. 24:14; Fil. 2:15) Ngoeak tiaikid el rolel e te mla ngosuterir a rebetok el miliol el chad el mo olekes er a deleuill er tir me a Jehovah.​—Monguiu er a Daniel 12:3.

13, 14. Ngkirir el mekerang tirke el diak el ngellitel el Kristiano me bo lekengei er a omengull er tir a Jehovah? Ngera el ulaoch er a Biblia a meketeklii tia el tekoi?

¹³ A suobel er a uchei a ulechotii el kmo,  ngar er a Israel er a irechar e a Jehovah a kilengei er a omengull er a Rechisentael a lsekum te mo mengull er ngii el teloi er a rechedal. (1 Ki. 8:41-43) Me chelecha el taem, e tirke el diak el ngellitel el Kristiano a kmal kirir el mengull er a Jehovah el teloi er a rengellitel el Sioning er ngii.

¹⁴ Sera irechar, e a reprofet a ulemlaoch el kmo a rebetok a mo mengull er a Jehovah el obengterir a rechedal er a taem er a ulebongel. A Isaia a ulemlaoch el kmo: “Ng betok el beluu . . . a mo kmo, ‘Bo dengasech er a bukl er a RUBAK, el mor a Templo er a Dios er a Israel. Kede mo mesuub er sel soal a doruul er ngii; kede mo merael er a ikel rael el bla lengilt.’ A osisecheklel a RUBAK a ngar a Jerusalem el mei.” (Isa. 2:2, 3) Me a Sekaria a ulemlaoch el kmo: “A re betok el chad ma mesisiich el beluu a mor a Jerusalem el mo mengull el meluluuch er a RUBAK el Olab a Bek el Klisiich e olengit a klengeltengat er ngii.” Me tirka el “chad er a ngodech el beluu” a mo mengull er a Jehovah el teloi er a Israel er a Dios e mo melekoi el kmo: “Aki obengkem el mor sel bor ngii, ele kim mla remenges el kmo a Dios a obengkem.”​—Sek. 8:20-23.

15. Te mekerang a ‘rekuk bebil el sib’ e mo ‘obengterir’ a rechedal a Israel er a Dios?

¹⁵ A ‘rekuk bebil el sib’ a mo ‘obengterir’ a rechedal a Israel er a Dios el omerk er a ungil chais er a Renged. (Mk. 13:10) Tirkang a dirrek el mo chedal a Dios, e tir me a rengellitel a “di mo tal delebechel” er cheungel a “ungil mengkerengel a sib” el Kristus Jesus.​—Monguiu er a Johanes 10:14-16.

16. Ngerang mo meruul a Jehovah el mo uchul e ngomuchel a Armakedon?

¹⁶ A uriul er a telemellel a kloul Babilon, e a rechedal a Dios a kmal mo meringel el modechelakl. Me kede kmal ousbech er a ulekerreuil a Jehovah me ngmo sebeched el mo suobel er tia el odechelakl. Ngar sel taem el bla ltetkii, e a Jehovah a mo remuul a tekoi er tia el chutem el mekedbechii tia el odechelakl el mo er a rechedal. Tiaikid a mo uchul e ngomuchel a Armakedon el ngii a ulebongel er a “kloul ringel.” (Mt. 24:21, BT; Ese. 38:2-4) Me a Kok a mo oldechelakl er a rechad el “mlar a betok el beluu el mei.” (Ese. 38:10-12) E sel leduubech tia el tekoi, e a Jehovah a di mereched el mo olsobel er a rechedal e mo oumekemad er a Kok me a urrurt er ngii. Me sel bo leuaisei, e ngmo kobkellii a omerrederel e mo chemedolii a ngklel. Ngdmu el kmo: “Isei e ak mo ochotii a klou el klisichek ma cheledolek ma betok el beluu a mo omes er a medal. Te mo medengelkak el kmo, ngak a RUBAK.”​—Ese. 38:18-23.

17, 18. (a) A Jehovah ngmo mesterir a rechedal a ngera el ulekrael er sel taem er a odelecheklel a Kok? (b) Ngera kired el meruul er ngii a lsekum ngsoad a bo lomekerreu er kid a Jehovah?

¹⁷ Me a Kok sel bo lomuchel a odelecheklel, e a Jehovah a mo melekoi er a remesiungel el kmo: “Bo msiseb er a re keblimiu e mchesimer a chesmeriu, e mtelkib el berrotel el dimerkmo le chib a ngesechel a rengul a RUBAK.” (Isa. 26:20) Seikid el taem, e a Jehovah a mo meskid a ulekrael el dousbech me bo el sebeched el mukerreu. Me a tekoi el “re keblimiu” el ngar er tia el bades a locha mesaod el kirel a ongdibel er kid.

¹⁸ Me a lsekum e ngsoad el mo mukerreu er sel taem er a kloul ringel, e ngkmal kired el kongei el kmo a Dios a ngar er ngii a rechedal el ngar er a chutem el bla longudel er tir er aike el ongdibel er a Resioning er a Jehovah. Me ngkmal kired el mo obengterir a rechedal a Jehovah e mo teloi er a ongdibel er kid. Me ngsoad el mo ua ngike el milluches er a psalm el dilu el kmo: “Osobel a kloklel a RUBAK. A klengeltengat er kau le bor a re chedam.”​—Psa. 3:8.