1, 2. O le ā le suiga na tupu i le Penetekoso 33 T.A., ma o ai sa avea ma sui o le nuu fou o Ieova? (Tagaʻi i le ata i luga aʻe o le matua.)

E IAI se suiga tele na tupu i le Penetekoso 33 T.A., ma na avea ma aso iloga i le talafaasolopito o tagata o Ieova i le lalolagi. I lenā aso, na faavaeina ai e Ieova e ala i lona agaga se nuu fou, o le Isaraelu faaleagaga po o “le Isaraelu a le Atua.” (Kala. 6:16) Talu mai aso o Aperaamo, o le taimi muamua lea ua lē toe mātaulia ai tagata o le Atua i le peritomeina faaletino o o latou tane. Nai lo o lea, na tusi Paulo e faatatau i sui o lenā nuu fou: “Ua peritomeina i lona loto e ala i le agaga.”​—Roma 2:29.

² O uluaʻi sui o le nuu fou o le Atua, o aposetolo ma isi soo o Keriso e silia i le toʻaselau, ia sa faapotopoto i se potu pito i luga i Ierusalema. (Galu. 1:12-15) Sa latou mauaina le agaga paia na liligiina ifo, ma avea ai i latou ma atalii o le Atua ua faauuina i le agaga paia. (Roma 8:15, 16; 2 Kori. 1:21) O lea, na faamaonia ai ua amata le feagaiga fou, ua avea ai Keriso ma puluvaga ma ua faamautūina e ala i lona toto. (Luka 22:20; faitau le Eperu 9:15.) O i inā foʻi na avea ai loa nei soo ma sui o le nuu fou o Ieova. E ala i le agaga paia, sa mafai ai ona latou talaʻi atu i gagana eseese na tautatala ai tagata Iutaia ma tagata liulotu, o ē na ō mai i Ierusalema mai i le  Emepaea o Roma, ina ia faamanatu le Talisuaga o Vaiaso a tagata Iutaia, po o le Penetekoso. Sa faalogo ma malamalama nei tagata i a latou lava gagana, i “mea matagofie a le Atua” sa talaʻia e Kerisiano ua faauuina i le agaga.​—Galu. 2:1-11.

3-5. (a) O le ā na taʻu atu e Peteru i tagata Iutaia i le aso o le Penetekoso? (e) Sa faapefea ona tuputupu aʻe le nuu fou o Ieova, a o faagasolo uluaʻi tausaga talu ona faavaeina?

³ Sa faaaogā e Ieova le aposetolo o Peteru e taʻimua i le tatalaina o le ala mo tagata Iutaia ma tagata liulotu, e avea ai ma sui o lenei nuu fou faatoʻā faavaeina, le faapotopotoga Kerisiano. I le aso o le Penetekoso, sa taʻu atu ma le lototele e Peteru i tagata Iutaia e tatau ona latou talia Iesu, o lē na latou ʻtutuʻiina i luga o le laau’ ona “ua faia o ia e le Atua ma Alii ma Keriso.” Sa fesili le motu o tagata po o le ā e tatau ona latou faia, ma na faapea atu Peteru: “Inā salamō ia ma ia taʻitasi ma papatisoina outou i le suafa o Iesu Keriso mo le faamagaloina o a outou agasala, ona outou maua lea o le meaalofa foaʻifua o le agaga paia.” (Galu. 2:22, 23, 36-38) E tusa ma le 3,000 tagata na faaopoopo i lenā aso i le nuu fou o le Isaraelu faaleagaga. (Galu. 2:41) Mulimuli ane, sa faaauau ona fua mai le talaʻiga maelega a aposetolo, ma sa faatuputupulaʻia le nuu fou.​—Galu. 6:7.

⁴ Sa faalautele atu le galuega talaʻi i tagata Samaria, ma na iai iʻuga lelei. E toʻatele na papatisoina e le faievagelia o Filipo, peitaʻi e latou te leʻi mauaina i le taimi lava lenā le agaga paia. Sa iai le vaega pule i Ierusalema, ma na latou aauina atu aposetolo o Peteru ma Ioane i nei tagata Samaria ua liulotu, “ona faaee atu lea o o la lima iā i latou, ma latou maua ai le agaga paia.” (Galu. 8:5, 6, 14-17) Sa avea ai foʻi nei tagata Samaria ma sui faauuina o le Isaraelu faaleagaga.

⁵ I le 36 T.A., sa toe faaaogā ai Peteru e tatala atu le avanoa i isi e avea ai ma sui o le nuu fou o le Isaraelu faaleagaga, ina ua talaʻi atu i le taʻitaʻiʻau Roma o Konelio, ma tagata o lona aiga ma ana uō. (Galu. 10:22, 24, 34, 35) Ua taʻua i le Galuega 10:44, 45: ʻA o talanoa atu Peteru, ona liligi ifo lea o le agaga paia iā i latou uma e lē o ni Iutaia o loo faalogologo i le upu. Ona matuā taufaiofo ai lea o ē e faamaoni ua peritomeina, o ē na ō mai faatasi ma Peteru, auā ua liligi ifo foʻi le meaalofa foaʻifua o le agaga paia i tagata o nuu ese.’ O lea, na tatala atu ai le avanoa i tagata talitonu mai i Nuu Ese e leʻi peritomeina, e avea ai ma sui o le nuu fou o le Isaraelu faaleagaga.

6, 7. Sa faapefea ona gaoioi sui o le nuu fou o ʻni tagata mo le suafa o Ieova,’ ma o le ā le mamao na latou faia ai faapea?

⁶ Sa faia se fono a le vaega pule o Kerisiano i le uluaʻi senituri i le 49 T.A. I lenā fono, na taʻua ai e le soo o Iakopo: “Ua uma ona faamatala auʻiliʻili atu e Simeona [Peteru] e faapea, o le uluaʻi  taimi lea ua silasila ai le Atua i nuu ese, ina ia filifilia mai ai ni tagata mo lona suafa.” (Galu. 15:14) O lenei nuu fou o loo tauaveina le suafa o Ieova, sa aofia ai tagata talitonu Iutaia ma ē e lē o ni Iutaia. (Roma 11:25, 26a) Mulimuli ane, na tusi atu Peteru: “E leʻi avea muamua outou ma nuu, a ua avea nei outou ma nuu o le Atua.” Sa faamatilatila atu e Peteru lo latou tiute tauave e faapea: “O outou o ʻse vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai i le pōuliuli i lona malamalama ofoofogia.” (1 Pete. 2:9, 10) E tatau ona latou taʻutaʻu atu viiga o Lē o loo fai i latou ma ona sui, ma viiviia i le lautele lona suafa. E tatau ona latou lototetele e molimau atu e faatatau iā Ieova le Pule Silisili Ese.

⁷ I le pei o le Isaraelu faaletino, ua taʻua e Ieova sui o le Isaraelu faaleagaga “o le nuu ua faia mo aʻu, ina ia latou taʻutaʻu atu pea loʻu viiga.” (Isa. 43:21) Sa faalauiloa atu ma lototetele e na uluaʻi Kerisiano o Ieova o le Atua moni e toʻatasi, e ala i le faaalialia i lumāmea o atua sesē uma sa tapuaʻia e tagata i na taimi. (1 Tesa. 1:9) Sa latou molimau atu “i Ierusalema, i Iutaia uma ma Samaria, ma tuluʻiga uma o le lalolagi” e faatatau iā Ieova ma Iesu.​—Galu. 1:8; Kolo. 1:23.

8. O le ā le lapataʻiga na avatu e le aposetolo o Paulo i tagata o le Atua i le uluaʻi senituri?

⁸ O se tasi o sui lototele o ʻtagata mo le suafa o Ieova’ i le uluaʻi senituri, o le aposetolo o Paulo. Sa ia puipuia ma le lototele i luma o le ʻaufaifilosofia faapaupau le pule silisili ese a Ieova, “o le Atua o lē na faia le lalolagi ma mea uma ua iai, o Ia lea o le Alii o le lagi ma le lalolagi.” (Galu. 17:18, 23-25) A o lata ina faaiʻu le malaga faamisionare lona tolu a Paulo, sa ia lapataʻia ai tagata o le Atua: “Ua ou iloa pe a ou alu ese, ona ō mai lea o luko feʻai iā te outou, ma latou te lē faapelepeleina le lafu, ma e maua foʻi iā te outou ni tane latou te faauiga sesē mea, ina ia fetoso ese ai soo e mulimuli atu iā i latou.” (Galu. 20:29, 30) O lenei valoaga e faatatau i ē na liliuese mai i le upu moni, na taunuu i le faaiʻuga o le uluaʻi senituri.​—1 Ioa. 2:18, 19.

9. O le ā na tupu i ʻtagata mo le suafa o Ieova’ ina ua maliliu le ʻauaposetolo?

⁹ Ina ua maliliu le ʻauaposetolo, sa faatuputupulaʻia ē na liliuese mai i le upu moni ma aliaʻe mai ai lotu ua faapea mai o Kerisiano. Nai lo o le avea ma ʻtagata mo le suafa o Ieova,’ ae na aveesea e Kerisiano na liliuese mai i le upu moni le suafa o le Atua, mai i le tele o a latou faaliliuga o le Tusi Paia. Sa latou talia faiga faapaupau ma lē faamamaluina le Atua e ala i a latou talitonuga e lē faale-Tusi Paia, faapea a latou taua paia ma amioga lē mamā. O lea, o le tele o senituri sa na o ni nai tagata tapuaʻi faamaoni o Ieova sa iai i le lalolagi, peitaʻi e leʻi iai ni ʻtagata ua faamaopoopoina mo lona suafa.’

10, 11. (a) O le ā na valoia e Iesu i lana talafaatusa i le saito ma vao leaga? (e) Sa faapefea ona faataunuuina le talafaatusa a Iesu ina ua mavae le 1914, ma o le ā le iʻuga?

¹⁰ I le talafaatusa a Iesu e faatatau i le saito ma vao leaga, na ia valoia ai le pogisa faaleagaga ona o ē ua liliuese mai i le upu moni. Na fetalai o ia, “a o momoe tagata” ona alu ane lea o le Tiapolo, ma lūlū vao leaga i le fanua na lūlū ai e le Atalii o le tagata fatu o le saito. Sa tuu e tutupu faatasi aʻe nei fatu seʻia oo i le “taufaaiʻuiʻuga o le faiga o mea a le lalolagi.” Na taʻua e Iesu o le “fatu lelei,” e  faaāta mai ai ʻatalii o le malo,’ a o “vao leaga” o ʻatalii o lē o loo leaga.’ I le taimi o le iʻuga, o le a aauina mai e le Atalii o le tagata “ē selesele,” o agelu, ina ia tuueseese le saito ma vao leaga faafaatusa, ona aoaoina lea o atalii o le Malo. (Mata. 13:24-30, 36-43) Na faapefea ona tupu lenei mea, ma na faapefea ona toe maua ai ni tagata tapuaʻi o Ieova ua faamaopoopoina i le lalolagi?

¹¹ Na amata “le taufaaiʻuiʻuga o le faiga o mea a le lalolagi” i le 1914. A o faagasolo le taua na gāpā i lenā tausaga, e pe ā ma le 5,000 Kerisiano faauuina, o ʻatalii o le malo,’ na saisaitia faaleagaga iā Papelonia le Aai Tele. I le 1919, sa faasaʻoloto e Ieova i latou, ma faaalia manino ai le eseesega i le va o i latou ma “vao leaga” po o Kerisiano faatagāfai. Sa aoaoina e Ieova ʻatalii o le malo’ e avea ma nuu ua faamaopoopoina, ina ia taunuu ai le valoaga a Isaia e faapea: “Pe e fanau mai ea se laueleele i le tigā a fanau i se aso e tasi? Pe e fanau ea se nuu i se taimi e tasi? Auā ua faatigā o le a fanau Siona ma ua fanaua mai e ia o lana fanau tama.” (Isa. 66:8) Sa fanaua e Siona, o le faalapotopotoga o foafoaga agaga a Ieova, ona atalii ua faauuina i le agaga, ma faamaopoopoina i latou o se nuu.

12. Ua faapefea ona faaalia e le ʻaufaauuina o i latou o ʻtagata mo le suafa o Ieova’ i aso nei?

¹² Sa tatau i ʻatalii o le malo’ ona avea ma molimau a Ieova, e pei foʻi o uluaʻi Kerisiano. (Faitau le Isaia 43:1, 10, 11.) O le faia faapea, o le a matilatila ese ai i latou i a latou amioga faa-Kerisiano, ma le talaʻia o le ʻtala lelei o le malo e fai ma molimau i atunuu uma.’ (Mata. 24:14; Fili. 2:15) O lenei auala ua latou fesoasoani ai i le faitau miliona o isi tagata, ina ia maua se tulaga amiotonu i luma o Ieova.​—Faitau le Tanielu 12:3.

13, 14. (a) O le ā e tatau ona fai e i latou e lē o iai i le Isaraelu faaleagaga, ina ia talia ai e Ieova la latou tapuaʻiga? (e) Sa faapefea ona valoia lenei tulaga i le Tusi Paia?

¹³ Na tatou iloa mai i le mataupu ua mavae, sa mafai ona talia tagata ese e tapuaʻi atu iā Ieova i Isaraelu anamua. Peitaʻi, sa tatau i na tagata ese ona auaufaatasi  ma tagata na osi feagaiga ma Ieova. (1 Tu. 8:41-43) I aso foʻi nei, e tatau i ē e lē o iai i le Isaraelu faaleagaga ona auaufaatasi ma tagata o Ieova, o ʻatalii o le malo’ po o Molimau faauuina a Ieova.

¹⁴ Sa valoia e ni perofeta anamua se toʻalua le lolofi mai o le toʻatele o tagata, e tapuaʻi atu iā Ieova faatasi ma ona tagata i lenei taimi o le iʻuga. Na valoia e Isaia: “E ō mai lava nuu e tele ma faapea ane: ʻŌ mai ia, tatou ō aʻe i le mauga o Ieova, i le fale o le Atua o Iakopo; e na te aʻoaʻoina ai i tatou i ona ala, ma tatou savavali ai i ona ala.’ Auā e alu atu le tulafono mai i Siona, ma le afioga a Ieova mai i Ierusalema.” (Isa. 2:2, 3) Sa valoia foʻi e le perofeta o Sakaria: “E ō mai foʻi nuu e tele ma nuu malolosi e saʻili iā Ieova o ʻau i Ierusalema ma saʻili foʻi e faamalieina lona finagalo.” Sa ia faamatalaina i latou o “tagata e toʻasefulu mai i gagana uma a atunuu eseese.” I se uiga faafaatusa, o loo latou fetagofi atu i le pito ofu o le Isaraelu faaleagaga ma faapea atu: “E matou te ō ma outou, auā ua matou faalogo o loo iā te outou le Atua.”​—Saka. 8:20-23.

15. O le ā le galuega o loo “ō” faatasi ai “isi mamoe” ma le Isaraelu faaleagaga?

¹⁵ O loo “ō” faatasi “isi mamoe” ma le Isaraelu faaleagaga i le galuega o le talaʻia o le tala lelei o le Malo. (Mare. 13:10) E avea i latou ma vaega o le nuu o le Atua, o le “lafu e tasi” faatasi ma Kerisiano faauuina, i le taʻitaʻiga a le “leoleo mamoe lelei” o Iesu Keriso.​—Faitau le Ioane 10:14-16.

16. O le a faapefea ona aumaia e Ieova le vaega faaiʻu o le “puapuaga tele”?

¹⁶ Pe a mavae le faaumatiaga o Papelonia le Aai Tele, o le a osofaʻia tagata o Ieova. O le a manaʻomia i lenā taimi ona tatou maua le puipuiga o le a saunia mai e Ieova mo ana auauna. O lenei osofaʻiga o le a amata ai le vaega faaiʻu o le “puapuaga tele.” O lea, o Ieova lava ia o le a faatonutonuina mea e tutupu ma le taimi e faia ai lenei taua. (Mata. 24:21; Eseki. 38:2-4) O le taimi lenā o le a osofaʻia ai e Koku “tagata ua toe aoaoina mai i nuu.” (Eseki. 38:10-12) O lenā osofaʻiga o le a fai ma faailoga o le faaooina mai o le sala faafaamasinoga a le Atua iā Koku ma ana ʻau. O le a faasilisilia e Ieova lana pule silisili ese ma faapaia lona suafa, auā na fetalai o ia: ʻO le a ou faailoa aʻu i luma o le tele o atunuu; ma o le a latou iloa ai o aʻu lava o Ieova.’​—Eseki. 38:18-23.

17, 18. (a) O ā faatonuga o le a maua e tagata o Ieova pe a osofaʻia i latou e Koku? (e) O le ā e tatau ona tatou faia pe a fia maua le puipuiga a Ieova?

¹⁷ Pe a amata le osofaʻiga a Koku, o le a fetalai atu Ieova i ana auauna: “Loʻu nuu e, ia outou ō ma ulu atu i o outou potu i totonu ma tapuni o outou faitotoʻa. Ia outou lalafi mo se taimi puupuu seʻia mavae atu le toʻasā.” (Isa. 26:20) O le a aumaia e Ieova i lenā taimi e sili ona faigatā, ni faatonuga e faasaoina ai o tatou ola. Atonu o loo faaāta mai e “potu i totonu” a tatou faapotopotoga.

¹⁸ O lea, pe afai e tatou te fia maua aogā mai i le puipuiga a Ieova i le taimi o le puapuaga tele, e ao ona tatou iloa o loo iai tagata o Ieova i le lalolagi, ma ua faamaopoopoina i faapotopotoga. Ia faaauau ona tatou lagolagoina ma auaufaatasi pea ma i latou i a tatou faapotopotoga. I le pei o le faisalamo, tau ina ia faalauiloa atu ma o tatou lotoatoa e faapea: “E iā Ieova le faaolataga. Ua e faamanuia i ou tagata.”​—Sala. 3:8.