1, 2. Ndi tshanduko ifhio ye ya itea nga Pentekoste ya 33 C.E., nahone ndi vhafhio vhe vha vha miraḓo ya vhathu vhaswa vha Yehova? (Sedzani tshifanyiso tsha u thoma.)

PENTEKOSTE ya 33 C.E. yo vha i tshiitea tshi swayeaho kha ḓivhazwakale ya vhathu vha Yehova kha ḽifhasi. Ho vha na tshanduko khulwane. Nga ḽenelo ḓuvha, Yehova o vhumba lushaka luswa a tshi shumisa muya wawe mukhethwa—lwonolwo lushaka ndi Isiraele wa muya, “Isiraele wa Mudzimu.” (Vhagal. 6:16) Lwa u tou thoma u bva misini ya Abrahamu, vhathu vha Mudzimu vho vha vha sa tsha ḓo ṱalulwa nga u fumbiswa lwa ṋama. Nṱhani hazwo, Paulo o ṅwala zwi tevhelaho malugana na muraḓo muṅwe na muṅwe wa lwonolwo lushaka luswa, o ri: “U fumba hawe ndi ha mbiluni.”—Vharoma 2:29.

² Miraḓo ya u thoma ya lushaka luswa lwa Mudzimu yo vha i vhaapostola na vhafunziwa vha Kristo vha fhiraho ḓana vhe vha kuvhangana nḓuni ya nṱha ngei Yerusalema. (Mish. 1:12-15) Vhenevho vho ṱanganedza muya mukhethwa we vha shululelwa wone, wa vha ita uri vha vhe vhana vha Mudzimu vho ḓodzwaho nga muya. (Vharoma 8:15, 16; 2 Vhakor. 1:21) Zwenezwi zwo ṋea vhuṱanzi ha uri mulanga muswa wo no thoma u shuma, wo pfumedzanywa nga Kristo na u khwaṱhisedzwa nga malofha awe. (Luka 22:20; vhalani Vhaheberu 9:15.) Nga zwenezwo, vhenevho vhafunziwa vho vha miraḓo ya lushaka luswa lwa Yehova, vhathu vhawe vhaswa. Muya mukhethwa wo vha ita uri vha kone u huwelela nga nyambo dzo  fhamba-fhambanaho dze dza vha dzi tshi ambiwa nga Vhayuda na ṱhunḓu dze dza ḓa Yerusalema dzi tshi bva Muvhusoni woṱhe wa Roma u itela u pembelela Vhuṱambo ha Dzivhege ha Vhayuda kana Pentekoste. Vhenevho vhathu vho pfa na u pfesesa nga luambo lwavho “mishumo ya maanḓa ya Mudzimu” ye vha funziwa nga Vhakriste vho ḓodzwaho nga muya.—Mish. 2:1-11.

3-5. (a) Petro o vhudza mini Vhayuda nga ḓuvha ḽa Pentekoste? (b) Ndi vhufhio vhukando vhu tevhekanaho he ha ita uri lushaka luswa lwa Yehova lu engedzee tshifhingani tsha musi lu tshi kha ḓi tou bva u vhumbwa?

³ Yehova o shumisa muapostola Petro uri a range phanḓa kha u sumbedza Vhayuda na ṱhunḓu nḓila ya u vha miraḓo ya lwonolwo lushaka lune lwa khou ḓi tou bva u bebwa, lune lwa vha tshivhidzo tsha Vhukriste. Nga ḓuvha ḽa Pentekoste, Petro o vhudza Vhayuda nga tshivhindi uri vha fanela u ṱanganedza Yesu, munna we vha “mu ombela kha danda,” ngauri “Mudzimu o mu ita Murena na Kristo.” Musi gogo ḽi tshi vhudzisa zwine ḽa fanela u zwi ita, Petro o fhindula a ri: “Rembuluwani, nahone muṅwe na muṅwe waṋu a lovhedzwe dzinani ḽa Yesu Kristo uri ni hangwelwe zwivhi zwaṋu, nahone ni ḓo wana tshifhiwa tsha fhedzi tsha muya mukhethwa.” (Mish. 2:22, 23, 36-38) Nga ḽenelo ḓuvha, vhathu vha ṱoḓaho u vha 3000 vho mbo ḓi dzheniswa kha lushaka luswa lwa Isiraele wa muya. (Mish. 2:41) Nga murahu ha zwenezwo, u huwelela nga u fhisea ha vhaapostola ho mbo ḓi bvela phanḓa hu tshi aṋwa mitshelo minzhi. (Mish. 6:7) Lushaka luswa lwo vha lu tshi khou aluwa.

⁴ Nga murahu, ho mbo ḓi huwelelwa kha Vhasamaria, nahone ha vha na mvelelo dzavhuḓi. Vhanzhi vho lovhedzwa nga muevangeli Filipo, fhedzi a vho ngo ṱavhanya u ṱanganedza muya mukhethwa. Tshigwada tshi langaho ngei Yerusalema tsho rumela muapostola Petro na Yohane kha vhenevho Vhasamaria vho rembuluwaho, nahone “vha vha vhea zwanḓa, nahone vha thoma u wana muya mukhethwa.” (Mish. 8:5, 6, 14-17) Nga zwenezwo, na vhenevho Vhasamaria vha vha miraḓo ya vho ḓodzwaho nga muya, Isiraele wa muya.

⁵ Nga 36 C.E., Petro a dovha a rumiwa u huwelela kha vhaṅwe u itela uri vha dzhene kha lushaka luswa lwa Isiraele wa muya. Zwenezwi zwo itea musi a tshi huwelela kha Koronelio nduna ya Muroma na mashaka awe na dzikhonani. (Mish. 10:22, 24, 34, 35) Bivhili i ri: “Musi Petro a tshi kha ḓi amba. . . , vhoṱhe vhe vha vha vho mu thetshelesa [na vha si Vhayuda] vha ṱanganedza muya mukhethwa. Vhatendi vho fumbiswaho vhe vha ḓa na Petro vho vha vho mangala, ngauri vhathu vha dziṅwe tshaka vho vha vho shululelwa tshifhiwa tsha fhedzi tsha muya mukhethwa.” (Mish. 10:44, 45) Nga zwenezwo, miraḓo ya lushaka luswa lwa Isiraele wa muya yo mbo ḓi engedzea ya katela na vhatendi vha Vhannḓa vha songo fumbaho.

6, 7. Vhane vha vha miraḓo ya lushaka luswa vho vha vha tshi tea u ita mini u itela u sumbedza uri ndi “vhathu vhane vha ḓo vhidzwa nga dzina [ḽa Yehova]” nahone vho zwi ita u swika kha vhuimo vhufhio?

⁶ Muṱanganoni wa tshigwada tshi langaho wa Vhakriste vha ḓanani ḽa u thoma ḽa miṅwaha  we wa farwa nga 49 C.E., mufunziwa Yakobo o amba uri: “Simioni [Petro] o ri ṱalutshedza nga vhuḓalo nḓila ye Mudzimu a livhisa ngayo ṱhogomelo kha vha dzitshaka lwa u thoma nahone kha vhenevho a ḓinangela vhathu vhane vha ḓo vhidzwa nga dzina ḽawe.” (Mish. 15:14) Vhenevho vhathu vhaswa vhane vha vhidzwa nga dzina ḽa Yehova vho vha vha tshi ḓo katela vhatendi vha Vhayuda na vha si Vhayuda. (Vharoma 11:25, 26a) Nga murahu, Petro o ṅwala u ri: “No vha ni si vhathu vha Mudzimu, huno zwino ni vhathu vhawe.” Petro o bvisela khagala mushumo wavho nga u amba uri: “Inwi ni ‘lushaka lwo nangwaho, vhotshifhe vha vhuhosini, lushaka lukhethwa, vhathu vho khetheaho, uri ni ḓivhadze huṅwe na huṅwe nga ha vhugala’ ha we a ni vhidza ni swiswini a ni ṱanganedza tshedzani tshawe tshi mangadzaho.” (1 Pet. 2:9, 10) Vho vha vha tshi tea u renda onoyo Ane vha mu imela na u ṋea vhugala dzina ḽawe khagala. Vho vha vha tshi tea u vha ṱhanzi dzi re na tshivhindi dza Yehova, Muvhusahoṱhe.

⁷ Samusi zwo vha zwi ngoho na kha Vhaisiraele vha ṋama, miraḓo ya Isiraele wa muya ndi yone ye Yehova a i vhidza “vhathu vhavhumbiwa vhanga vha [u] ḓo nyamba vha tshi nthenda.” (Yes. 43:21) Vhenevho Vhakriste vha u thoma vho huwelela nga tshivhindi uri Yehova ndi ene Mudzimu wa ngoho, vha bvukulula midzimu yoṱhe ya mazwifhi ye ya vha i tshi gwadamelwa nga tshenetsho tshifhinga. (1 Vhathes. 1:9) Vho ṱanziela nga vhuḓalo nga ha Yehova na Yesu ngei “Yerusalema na kha ḽoṱhe ḽa Yudea na ḽa Samaria, u swika tshipiḓani tsha kule vhukuma tsha ḽifhasi.”—Mish. 1:8; Vhakol. 1:23.

8. Ndi tsevho ifhio ye muapostola Paulo a i ṋea vhathu vha Mudzimu ḓanani ḽa u thoma ḽa miṅwaha?

⁸ Muapostola Paulo a re na tshivhindi ndi muraḓo wa ḓanani ḽa u thoma ḽa miṅwaha we a vha muṅwe wa vhathu vhane vha “vhidzwa nga dzina [ḽa Yehova].” Musi o ima phanḓa ha vhaḓivhi vha pfunzo dza maṱali, o imelela vhuvhusahoṱhe ha Yehova nga tshivhindi, “Mudzimu we a sika shango na zwoṱhe zwi re khaḽo, samusi e Ene Murena wa ḽiṱaḓulu na ḽifhasi.” (Mish. 17:18, 23-25) U ya vhufheloni ha lwendo lwawe lwa vhuraru lwa vhurumiwa, Paulo o sevha vhathu vhane vha vhidzwa nga dzina ḽa Mudzimu a ri: “Ndi a zwi ḓivha uri musi ndi si tsheeho ni ḓo ḓelwa nga vhanna vha ngaho phele dzi re na vhuhali vhane vha ḓo fara luvhi sambi, vhukati haṋu hu ḓo vha na vhanna vhane vha ḓo shanda ngoho u itela u kunga vhafunziwa uri vha vha tevhele.” (Mish. 20:29, 30) Honovhu vhugunei he ha dzula ho ambiwa ho ḓisumbedza vhufheloni ha ḓana ḽa u thoma ḽa miṅwaha.—1 Yoh. 2:18, 19.

9. Malugana na “vhathu vhane vha ḓo vhidzwa nga dzina [ḽa Yehova],” ndi mini zwe zwa itea nga murahu ha lufu lwa vhaapostola?

⁹ Nga murahu ha lufu lwa vhaapostola, vhugunei ho titima nahone ha bveledza kereke dza ḽa Vhudzhagane. Vhenevho Vhakriste vha vhagunei vho ḓisumbedza uri a vha “vhathu vhane vha ḓo vhidzwa nga dzina [ḽa Yehova],” nga u vha thivhela u shumiswa ha dzina ḽa Mudzimu kha vhunzhi ha ṱhalutshedzelo dzavho dza Bivhili. Vho ṱanganedza mikhuvha ya vhuhedeni nahone vha nyadza Mudzimu nga pfunzo dzavho dzi siho maṅwaloni, nndwa dzavho khethwa, na vhuḓifari havho vhu songo kunaho. Nga zwenezwo, ho fhela maḓana a miṅwaha vhagwadameli vha Yehova vha fulufhedzaho vhe vha vhaṱuku kha ḽifhasi, fhedzi ho vha hu sa athu u vha na vhathu vho dzudzanywaho vhane vha “vhidzwa nga dzina ḽawe.”

10, 11. (a) Ndi mini zwe Yesu a dzula o zwi amba kha tshifanyiso tshawe tsha goroi na mufhunga? (b) Tshifanyiso tsha Yesu tsho ḓadzea hani nga murahu ha 1914, nahone ha vha na mvelelo dzifhio?

¹⁰ Kha tshifanyiso tshawe tsha goroi na mufhunga, Yesu o dzula o amba uri vhumuya vhu ḓo tseka-tseka nga ṅwambo wa vhugunei. O amba uri “musi vhathu vho eḓela,” Diabolo u ḓo zwala mufhunga tsimuni ye Murwa-muthu a zwala mbeu ya goroi. Vhuvhili hazwo zwi ḓo aluwa u swika “vhufheloni  ha maitele a zwithu.” Yesu o ṱalutshedza uri “mbeu yavhuḓi” i imela “vhana vha Muvhuso” nahone “mufhunga” u imela “vhana vha muvhi.” Tshifhingani tsha vhufhelo, Murwa-muthu u ḓo rumela “vhakaṋi” vhawe, vharuṅwa, uri vha khethekanye goroi na mufhunga. Vhana vha Muvhuso vha ḓo kuvhanganywa. (Mat. 13:24-30, 36-43) Zwenezwo zwithu zwi ḓo itea hani, nahone zwi kwama hani vhathu vha Yehova vha re kha ḽifhasi?

¹¹ ‘Vhufhelo ha maitele a zwithu’ ho thoma nga 1914. Tshifhingani tsha nndwa ye ya vuwa nga wonoyo ṅwaha, Vhakriste vho ḓodzwaho vha zwigidi zwi si gathi, “vhana vha Muvhuso,” vho vha vho thubiwa nga lwa muya nga Babele Ḽihulu. Nga 1919, Yehova o vha vhofholola, a sumbedza phambano khulwane vhukati havho na “mufhunga,” kana vhathu vhane vha ḓiita Vhakriste. O kuvhanganya “vhana vha Muvhuso” vha vha vhathu vho dzudzanywaho, a ḓadzisa vhuporofita ha Yesaya vhune ha ri: “Ndi nnyi we a vhuya a pfa zwine zwa nga zwenezwi? Ndi nnyi we a vhuya a vhona zwine zwa nga zwenezwi? Naa shango ḽi nga bveledzwa nga ḓuvha ḽithihi? Tsioni wone wo songwa-songwa wa mbo ḓi beba vhana vhawo.” (Yes. 66:8) Tsioni, ndangulo ya Yehova ya zwivhumbiwa zwa muya, yo vhumba vhana vhayo vho ḓodzwaho nga muya nahone ya vha dzudzanya vha vha lushaka.

12. Vhaḓodzwa vho sumbedza hani uri vha “vhathu vhane vha ḓo vhidzwa nga dzina [ḽa Yehova]” ṋamusi?

¹² U fana na Vhakriste vha u thoma, “vhana vha Muvhuso” vho ḓodzwaho vho vha vha tshi fanela u vha ṱhanzi dza Yehova. (Vhalani Yesaya 43:1, 10, 11.) Nga nṱhani ha zwenezwo, vho vha vha tshi ḓo sumbedza uri vho fhambana na vhaṅwe nga vhuḓifari havho ha Vhukriste na nga u huwelela “mafhungo-maḓifha aya a muvhuso. . . mashangoni oṱhe.” (Mat. 24:14; Vhafil. 2:15) Nga yeneyi nḓila, vho isa vhathu vhanzhi, zwi re zwone ndi uri vha dzimilioni, uri vha vhe vho lugaho phanḓa ha Yehova.—Vhalani Daniele 12:3.

13, 14. Ndi mini zwine vhane vha si vhe Vhaisiraele vha muya vha fanela u zwi ita u itela u gwadamela na u shumela Yehova nga nḓila ine a i ṱanganedza, nahone zwenezwo zwo dzula zwo ambiwa hani kha vhuporofita ha Bivhili?

¹³ Ro zwi vhona kha thero yo fhiraho uri  kha Isiraele ḽa kale, vhatsinda vho vha vha tshi nga gwadamela Yehova nga nḓila ine a i ṱanganedza, fhedzi vhenevho vhatsinda vho vha vha tshi tea u konana na vhathu vho vhofhaho mulanga na Yehova. (1 Dzikh. 8:41-43) Nga hu fanaho ṋamusi, vhane vha si vhe Vhaisiraele vha muya vha fanela u konana na vhathu vha Yehova, “vhana vha Muvhuso”—Ṱhanzi dza Yehova dzo ḓodzwaho.

¹⁴ Vhaporofita vhavhili vha kale vho dzula vho amba uri kha tshino tshifhinga tsha vhufhelo, vhathu vhanzhi vha ḓo gwadamela Yehova vhe na vhathu vhawe. Yesaya o porofita a ri: “Nḓarieni ri gonye ri ye nḓuni ya Mudzimu wa Yakobo, a ri funze nḓila dzawe, uri ri tshimbile kha gondo ḽawe! Ngauri Tsioni ndi hone hune ha ḓo bva mulayo; fhungo ḽa Yehova ḽi ḓo bva Yerusalema.” (Yes. 2:2, 3) Nga hu fanaho, muporofita Sakaria o dzula o amba uri, “tshakha nzhi na vha mirafho ya maanḓa vha tshi ṱoḓa Yehova wa Mavhuthu muḓini wa Yerusalema, vha luvha Yehova.” O vha fanyisa na “vhanna vha ná fumi vha mirafho-rafho,” vhane vha ḓo fara nguvho ya Isiraele wa muya nga lwa pfanyisedzo, vha tshi ri: “Litsha ri tshimbile na vho-inwi, ngauri ro zwi pfa zwauri Mudzimu u na inwi.”—Sak. 8:20-23.

15. Vha “dziṅwe nngu” ‘vha tshimbila’ na Vhaisiraele vha muya mushumoni ufhio?

¹⁵ Vha “dziṅwe nngu” ‘vha tshimbila’ na Vhaisiraele vha muya mushumoni wa u huwelela mafhungo maḓifha a Muvhuso. (Marko 13:10) Vha vha vhathu vha Mudzimu, “sambi ḽithihi” na vhaḓodzwa, nga fhasi ha “mulisa wavhuḓi,” Yesu Kristo.—Vhalani Yohane 10:14-16.

16. Yehova u ḓo ḓisa hani tshipiḓa tsha u fhedza tsha “maṱungu mahulu”?

¹⁶ Nga murahu ha u fheliswa ha Babele Ḽihulu, vhathu vha Yehova vha ḓo vutshelwa nga nḓila khulwane, nahone nga tshenetsho tshifhinga ri fanela u vha nga fhasi ha tsireledzo ine Yehova a ḓo i ṋea vhashumeli vhawe. Samusi yeneyi mvutshelo i tshi ḓo ita uri hu thome tshipiḓa tsha u fhedza tsha “maṱungu mahulu,” ndi Yehova ane a ḓo dzudzanya na u khetha tshifhinga tsha tshenetsho tshiitea. (Mat. 24:21; Hesek. 38:2-4) Nga tshenetsho tshifhinga, Gogo u ḓo vutshela “vhathu vhe vha kuvhanganywa thungo dzoṱhe kha vha-nnḓa,” vhathu vha Yehova. (Hesek. 38:10-12) Yeneyo mvutshelo i ḓo vha tshiga tsha uri Yehova a haṱule tshoṱhe Gogo na vhatevheli vhawe. Yehova u ḓo hulisa vhuvhusahoṱhe hawe nahone a ita uri dzina ḽawe ḽi khethwe, ngauri o amba uri: ‘Ndi ḓo ḓivhadza nda ḓihwa nga tshakha nzhi, dza ḓivha zwauri ndi Nṋe Yehova.’—Hesek. 38:18-23.

17, 18. (a) Musi Gogo a tshi vutshela vhathu vha Yehova, ndi vhulivhisi vhufhio vhune ra ḓo vhu wana? (b) Arali ri tshi ṱoḓa u tsireledzwa nga Yehova, ndi mini zwine ra fanela u zwi ita?

¹⁷ Musi Gogo a tshi thoma u ri vutshela, Yehova u ḓo vhudza vhashumeli vhawe uri: “Hee inwi vhathu vhanga; iyani dzipfamoni dzaṋu, ni dzhene ni vale mahothi aṋu, ni dzumbame tshifhinganyana, hu range u fhira maḓuvha a dziṱhamu.” (Yes. 26:20) Nga tshenetsho tshifhinga tshi konḓaho, Yehova u ḓo ri ṋea vhulivhisi vhu tshidzaho, nahone “dzipfamoni” hu nga vha hu tshi tshimbidzana na zwivhidzo zwine ra ṱanganela khazwo.

¹⁸ Nga zwenezwo, arali ri tshi ṱoḓa u vhuyelwa nga tsireledzo ya Yehova tshifhingani tsha maṱungu mahulu, ri fanela u ṱhogomela uri Yehova u na vhathu kha ḽifhasi, vho dzudzanywaho nga tshivhidzo. Ri fanela u bvela phanḓa ri tshi khwaṱhisana navho nahone ri dzule ri na vhukonani ha tsini-tsini na vhane ra ṱanganela navho tshivhidzoni. U nga ri ri nga ṱanganela na mupsalme nga mbilu dzashu dzoṱhe we a huwelela a ri: “Mulweli ndi Yehova! Phaṱhutshedzo yau kha i ḓe kha vhathu vhau.”—Ps. 3:8.