1, 2. Gini ariapai namangi rago Pendekote, na ada naada ni ga Yekova vovo rikaaboro? (Oni bi gu sura du ti tonatonaha.)

RAGO Pendekote 33 F.B.K., angia nyanyakipa uru rogo gu pangbanga nga ga ga Yekova aboro auru kpotosende. Bakere ariapai namangi ti gu regbo re. Rogo gu uru re, Yekova akusi vovo rikaaboro vurube ziazia toro nga agu aYisaraere nga ga toro yo watadu “ga Mbori Yisaraere.” (Gara. 6:16) Natona ti regbo Abarayama, gere angia bambata regbo si adu nga yeratise nga gupai i ainongo ga Mbori aboro ti ni te. Pauro afura tipa gi vovo rikaaboro re ni basasa ki ya: ‘Gayo yeratise nga ga kpotoyo kina rogo Toro yo.’—Rom. 2:29.

² Ga Yesu amokedi nangia gu bambata aboro nangia gi vovo rikaaboro re, kodihe na gu gako abawiriki naadu wa kama sa nadunguratiyo ku rogo bangisa bambu sa Yerusarema yo. (Amo. 1:12-15) I dunduko ziazia toro azoro ku, na i ki da ni agu awiri Mbori nga ga toro yo. (Rom. 8:15, 16; 2 Kor. 1:21) Gipai re aayugo gu gopai nga gu vovo mokido Yesu angia azarõ ho ima tona mangasunge nga gu naaru riipa kureko. (Rk. 22:20; oni gedi AEbere 9:15.) Rogo gi gene re, agi abawiriki re ada ni ga Yekova vovo rikaaboro watadu vovo  aboro. Ziazia toro aundo yo i tungusipai rogo afugo aYudo na gu kura aboro anaagumbaha, agi aboro re aguari rogo ringara aRomo nabaha ka ye tipa Pumbo Aposo watadu Pendekote ku Yerusarema yo. Agi aboro re adegetuyo kuti agu apai gu mbedimbedi aKristano re aatungusaha rogo afugoyo yo na ki rugutiyo na “agu apai du na tandu nga ga Mbori.”—Amo. 2:1-11.

3-5. (a) Ginipai Petero apehe fu aYudo ti rago Pendekote? (b) Gini apai naasa gupai nga gi ga Yekova vovo rikaaboro re zugo ti agu agarã i aenge ti ni?

³ Yekova amangisunge na Petero ko zaki gene fu aYudo na agu aboro nangianga aYudo ya i da ni papara ga Yekova vovo rikaaboro rogo gu dungurati nangia ga aKristano. Rogo gu uru nangia ga Pendekote re, Petero ape gupai fu aYudo nga si naida i di Yesu kugume nangia gu kumba i “awagi” ko ti ngua mbiko “Mbori amangi ko ni Gbia, ni Kristo.” Ho rimbasa aboro asana Petero ni tipa gupai rengbe yo ka mangaha, ko aya fuyo wẽ: “Oni sá gaoni berã i ki bapatizi roni dunduko ti rimo Yesu Kristo i di gaoni ­ingaapai ti roni; oni ki di gu ũgume nga Ziazia Toro.” (Amo. 2:22, 23, 36-38) Rogo gu uru re, aboro wa 3,000 akoditiyo na gu vovo rikaaboro nangia agu aYisaraere nga ga toro yo re. (Amo. 2:41) Fuo gure, amokedi atona ka tungusapai nyanyaki na sangbanaha kidu ni wenehe. (Amo. 6:7) Gu vovo rikaaboro re atona ka zugo.

⁴ Kusa, i ada na tungusapai Somorona yo, na surungbaha kidu ni wenehe. Gu batungusi wene pangbanga nangia Firipo abapatiza dungu aboro yo, ono i agbianga ziazia toro nibasa ti gu regbo re te. Riigbu Bipasunge Yerusarema yo akedi Petero na Yoane fuo gu vovo aidipase naadu Somorona yo re, na “i ki mamoi beyo ti yo i ki du na Ziazia Toro.” (Amo. 8:5, 6, 14-17) Sidu, i ambedi agi aboro Somorona re na ziazia toro i ki da ni agu aYisaraere nga ga toro yo.

⁵ Rogo gu garã nangia 36 F.B.K., Mbori amangisunge a na Petero ko zaki gene fu gu kura vovo rikaaboro nga ga toro yo re. Gipai re amangi ho ko atungusipai ni fu ga aRomo baira abanzengere nangia Korunerio na gako aborokporo gbiati abakureako. (Amo. 10:22, 24, 34, 35) Ziazia Kekeapai naya: “Wa Petero agumba agi apai re, Ziazia Toro ki zorõ ku ri agu yo dunduko naagia ha. Agu aYudo naidi pa ko si ki niiriwo airiwo ti yo a wa i aye na Petero, bambiko i afu gu gamahe nga Ziazia Toro fu aGendiria a.” (Amo. 10:44, 45) Sidu, Mbori afu gi momu re fu agu azanga yeratise nangia aGendiria na idipase i da ni agu aYisaraere nga ga toro yo.

6, 7. Rogo gini gene si adu nga gu vovo rikaaboro re mangipai wa agu ‘aboro du na rimo Yekova’ , na bakio gu sunge i amangihe adu wai?

⁶ Ti regbo gu dunguratise Riigbu Bipasunge  amangihe rogo bambata sa kama agarã rogo gu garã nangia 49 F.B.K., gu mokedi nangia Yakoba aya: “Awirina, oni gí pare; Simona [Petero] nipeke pa ha wa Mbori andu koyo du aGendiria ni mbata, ka roga aboro dagba yo sa rimoko.” (Amo. 15:14) Gu vovo rikaaboro naadu na rimo Yekova re akodi aYudo na agu aidipase nangianga aYudo ya. (Rom. 11:25, 26a) Kusa, Petero ake waraga fuyo ki ya: “Oni adu nga ni rika aboro mbata te, ono awere oni nga gu rika aboro nga ga Mbori yo.” Petero ape gupai si adu nga i nika mangaha niya: “Oni nga siasia ngbatunga aboro, nga ga bakindo aboromotumo, nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago yo.” (1 Pet. 2:9, 10) Si adu nga i takipande gu taarimo nga ga gu Boro i aarukuba ni na kini taasirimo ni. Si aida i du a ni agu adezire du na wingbaduse tipa Yekova, nga Bakindo Zegino Dunduko.

⁷ A wa si adu tipa agu aYisaraere nangia ga borose yo, agu aYisaraere nga ga toro yo nangia agu aboro Yekova ayamba yo nga “agu aboro mi ambakadi yo tipa re i yugu pa tambua re.” (Yes. 43:21) Pa kusa agu aKristano naadu mbata re pa agu ziree ambori aboro anaairiso yo ti gu regbo re ku yangura, asayo i takipande Yekova zanga gunde nga ko nga bangisa ndikidi Mbori. (1 Tesa. 1:9) I amangi dezirepai tipa Yekova na Yesu “Yerusarema yo na Yuda yo a Somorona yo, na digida sende yo.”—Amo. 1:8; Koro. 1:23.

8. Gini zahe gu mokedi nangia Pauro afuhe fu ga Mbori aboro rogo bambata sa kama agarã?

⁸ Gu kura boro naadu na wingbaduse rogo bambata sa kama agarã angia gu mokedi nangia Pauro, ko ada ni papara agu ‘aboro naadu na rimo Yekova.’ Ko aru barabangiri ga apagano bawisigipai na ki songodi ga Yekova bakere pagbia nga, “Mbori namangi zegino na ahe dunduko rogo yo, ko nga Gbia ngbangbaturũ na sende.” (Amo. 17:18, 23-25) Pauro aza agu aboro naadu na rimo Mbori ti gu regbo ko andu gako biata nunguro ki ya: “Mi ini ya fuo ga mi gbegberẽ awaru aríma ku dagba roni yo, ami ahe nga akandoro te. Akumba agúari dagba roni tigaoni a, ki nigumba irairaapai, ka gbefa abawiriki fuo yo.” (Amo. 20:29, 30) Agi abasamungu re atona ka kura bara ti digido bambata sa kama agarã.—1 Yo. 2:18, 19.

9. Ginipai namangi fuo kpio amokedi nibipa agu ‘aboro naadu na rimo Yekova’?

⁹ Fuo kpio amokedi, agi abasamungu re amoipai na ki kusi agu akanisa i aya ti ni si nga ga aKristano. Agu abasamungu re aadunga ni agu ‘aboro naadu na rimo Yekova’ te, i aima dia rimo Mbori kusayo rogo gayo aZiazia Kekeapai. I adi agu asino pambori nangia ga apagano na gayo yugopai na mangapai aafunga ngbarago fu Mbori te, na i kini ‘sovura ti rimo Mbori.’ Sidu, tipa kama agarã, ruru airisi Yekova adu ni kina beteyo auru kpotosende ono mbakadapai aadunga ho naadu na agu ‘aboro naadu na rimo Yekova’ te.

10, 11. (a) Ginipai Yesu afura tipaha ku mbatayo nibipa rende na morũ? (b) Gi ga Yesu sanza re adigisitihe wai rogo 1914, na sangbanaha angia gine?

¹⁰ Rogo ga Yesu sanza du tipa morũ na rende, ko afura ku mbatayo tipa gu regbo si adu nga aboro nika ti ni rame rogo toro yo abasamungu ki kuru. Ko aya “ho i ara ni,” Bakitingbanga aurugu rende rogo gu ati Wiri-boro aima aurugo tungu morũ rogoho. Ono si adu nga i nika mbu rende na morũ si sona sa dati “rago ke he.” Yesu  asakipai nga gu “wene tunga” re narukuba “awiri ngbi” watadu awiri Kindo na “rende” nga “awiri gbegberẽ ko.” Ti yangara arame, Wiri-boro nika keda gako “abakehe” i kpara morũ ti rende. Agu amaraika re nika dungura awiiri Kindo. (Mt. 13:24-30, 36-43) Wai gipai re amangi, na ginipai si amangaha na ga Mbori aboro auru kpotosende ane?

¹¹ Gi “rago ke he” re atona rogo 1914. Ti regbo gu vura namangi rogo gu garã re, bete akutu mbedimbedi aKristano nangia ‘awiri Kindo,’ adu ni zizi yo rogo toro yo be Bakere Babera. Rogo gu garã nangia 1919, Yekova akusiyo na ki kparayo i du kia ti “rende” watadu ziree aKristano. Ko adungura ‘awiri Kindo’ i du ni mbakadimbakadi yo wa aboro sa, tipa ka digiso ga Yesaya sangbanebi naya: “Ka i vungu rikaaboro rogo ngbutuko rago? Bambiko ho Siona atona ka ima ni si avungu awirihe.” (Yes. 66:8) Gu ga Yekova riigbu nga Siona du na agu aboro rogoho nga atoro, si akusi agu awiriko du ni mbedimbedi yo ni ziazia toro na ki sayo i du ni rikaaboro.

12. Wai mbedimbedi aKristano ayugu tiyo ni agu ‘aboro du na rimo Yekova’ areme?

¹² A wa si adu tipa bambata aKristano, agi ‘awiri Kindo’ naadu ni mbedimbedi yo ni toro re, si adu nga i nika du ni adezire Yekova. (Oni gedi Yesaya 43:1, 10, 11.) Mbiko gipai re, si adu nga i nika du kia ti kura aKristano tigayo mangapai na tungusapa “wene pangbanga nga ga ngbi . . . mbiko ndika fu arikaaboro dũ.” (Mt. 24:14; Frp. 2:15) Rogo gi gene re, i ima ye na dungu amirioni aboro i du na wene pagume na Yekova.—Oni gedi Daniere 12:3.

13, 14. Agurani angianga agu aYisaraere nga ga toro yo ya, ginipai si aida ani mangihe Yekova idi na gaani irisombori, na ginipai sangbaanebi apehe tipa gipai re?

¹³ Rogo gu kekeapai ye mbata fu gere, ani abi gupai nga rogo gu Yisaraere naadu mbata, kungbo aboro anaairiso Yekova airiso, ono i anaakodatiyo sa na ga Mbori  aboro. (1 Aba. 8:41-43) Areme a, agu aboro angianga agu aYisaraere nga ga toro yo ya i du wa ka i koditiyo na ga Yekova aboro nga ‘awiri Kindo,’ nga mbedimbedi aKristano.

¹⁴ Anebi ue aima fura bakuru kusayo tipa wai aboro atiria areme ka iriso Yekova na gako aboro rogo gi yangara arame re. Gu nebi nangia Yesaya aya: “Aboro andú ni dungu yo, ki niya: ‘Oni yé, ani dákpa ku ri ga Yekova bagangara yo, koyo du ga ga Yakoba Mbori bambu ni; ya ko raba rani na gako asino ani ki nipeke kina gako agene.’ Bambiko rugute akúra Siona yo, na ga Yekova pai Yerusarema yo.” (Yes. 2:2, 3) Wakina gure a, gu nebi nangia Zakaraya afura ku mbatayo nga “dungu aboro na nyanyaki arikaaboro ayé ka gbata Yekova nga ga rimbasa ko Yerusarema yo na ka zungadi Yekova tipa wenepai.” Ko afura tipa yo ki ya “akumba bawe” dagba ngbatunga afugo aboro dunduko nika zada ga gu boro Yisaraere nga ga toro baukadi ki ya: “Ani ndú na mo, bambiko ani gi he ya Mbori du na mo.”—Zek. 8:20-23.

15. Gini sunge “kura akandoro” ‘andu’ ku genehe yo sa na agu aYisaraere nga ga toro yo?

¹⁵ “Kura akandoro” ‘nandu’ sa na agu aYisaraere nga ga toro yo gene tungusa wene pangbanga nga ga Kindo yo. (Mk. 13:10) I nada ni papara ga Mbori aboro kidu nga “rimbasa” aboro sa na mbedimbedi aKristano tii gu ngbembatayo nga ga “wene babanda akandoro” nga Yesu Kristo.—Oni gedi Yoane 10:14-16.

16. Yekova nika ye na yangara papara “bakere gberãngbi” wai?

¹⁶ Fuo i gbarasi Bakere Babera, Bakitingbanga nika zubo ga Yekova aboro, na ti gu regbo re si nika ida ani du tii gu bandahe Yekova nika fuhe fu gako amoyambu. Wa duhe nga gi zubohe re nika ye na yangara papara “bakere gberãngbi,” ti gu regbo re, kina Yekova nika rugapai na ki sia wai ko nika ida ka so gu vura re. (Mt. 24:21; Yeze. 38:2-4) Ti gu regbo re, Gogo nika zubo “agu aboro i adungura yo dagba arikaaboro yo” nga ga Yekova aboro. (Yeze. 38:10-12) Gu gako zubohe re nika sa gupai nga Yekova nyasiriipa Gogo na gako rimbasa aboro dunduko kusayo. Yekova nika ye na taarimo fu gako bakere pagbia na ki ziasi rimoko, mbiko ko aya: “Mi ayúgo . . . tire ku bangiri dungu arikaaboro i ini re. Si du i aína ha ya mi nga Yekova.”—Yeze. 38:18-23.

17, 18. (a) Ho Gogo nika zubo ga Mbori aboro ni, gini arugute i nika gbiaha? (b) Ka ani aida na ga Yekova bandahe, ginipai si aida ani mangihe?

¹⁷ Ho Gogo nika tona gako zubohe ni, Yekova nika ya fu gako amoyambu wẽ: “Oni yé, gimi aboro, oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Ti gu kere regbo re, Yekova nika fu agu arugute nika batasarani, na si nawira wa agu “abambu” re nika ngia adungurati.

¹⁸ Kangia ani naida ka gbia undo ti ga Yekova bandahe ti regbo bakere gberãngbi, si naida ani ini gupai nga Yekova na kina aboro beko auru kpotosende, du ni mbakadimbakadiyo ku rogo adungurati. Si naida ani koditirani na yo na kidu barambeda na gaani adungurati. A wa si adu tipa bake papara Atambuahe, ani yanga aya ngbaduraniyo wẽ: “Bata kina be Yekova; ga maku dú ku ri gamo aboro.”—Tam. 3:8.