Dan premye syek N.L., zapot Pol ti dir avek bann ansyen ki ti pe servi dan kongregasyon Efez: “Vey byen zot lekor e pran swen troupo ki Sent-Espri in konfye zot konman bann gardyen. Pran swen [“kongregasyon,” NW] ki Bondye in gannyen par disan son prop Garson.” (Akt 20:28) Ki rol lespri sen i zwe ler bann ansyen ek asistan ministeryel i ganny apwente ozordi?

Premyerman, lespri sen ti pous bann ekriven Labib pour ekrir sa ki en frer i bezwen fer pour li kalifye konman ansyen ouswa asistan ministeryel. Dan 1 Timote 3:1-7 nou vwar apepre 16 kondisyon ki en frer i bezwen ranpli pour vin ansyen. I annan plis kalifikasyon ankor ki ganny mansyonnen dan bann verse Labib parey Tit 1:5-9 ek Zak 3:17, 18. Kalifikasyon ki en frer i bezwen annan pour vin asistan ministeryel i ganny dekrir dan 1 Timote 3:8-10, 12, 13. Dezyenmman, bann ki rekomann e apwent bann frer i priy Zeova pour ki son lespri sen i gid zot anmezir ki zot diskite si en frer i ranpli bann kondisyon dapre Labib dan en fason rezonnab. Trwazyenmman, sa frer ki’n ganny rekomande i bezwen demontre fri lespri sen Bondye dan son prop lavi. (Gal. 5:22, 23) Alor, lespri sen Bondye i zwe en rol dan tou laspe sa prosedir pour apwent en frer konman ansyen oubyen asistan ministeryel.

Me lekel ki apwent sa bann frer? Dan lepase, tou bann rekomandasyon pour apwent bann ansyen oubyen asistan ministeryel ti ganny anvoye kot biro brans. Kot biro brans bann frer ki ti’n ganny swazir par Konsey Direkter ti annan sa responsabilite pour verifye sa bann rekomandasyon e apwent bann frer ler i ti apropriye. Apre sa, biro brans ti pou fer konsey ansyen konnen. An retour, bann ansyen ti pou fer sa frer konnen e demann li si i pare e santi ki i kalifye pour aksepte sa responsabilite. Finalman en lanons ti ganny fer dan kongregasyon.

Me ki mannyer bann ansyen ek asistan ministeryel ti ganny apwente dan premye syek? Par ler bann zapot ti apwent sa bann zonm direkteman. Par egzanp zot ti fer sa ler zot ti apwent set zonm pour pran responsabilite pour distribye manze sak zour avek bann vev. (Akt 6:1-6) Me petet sa bann zonm ti pe deza servi konman ansyen avan ki zot ti ganny demande pour distribye manze.

Menm si Labib pa eksplik an detay lafason ki bann ansyen ti ganny swazir dan sa letan, nou  vwar serten lendikasyon ki mannyer sa ti ganny fer. Labib i dir ki ler Pol ek Barnabas ti pe retourn kot zot apre zot premye vwayaz misyonner, ‘zot ti swazir bann ansyen dan sak kongregasyon e apre ki zot ti’n zennen e priye, sa de zapot ti konfye zot dan lanmen Bondye dan ki zot ti’n met zot lafwa.’ (Akt 14:23) Plizyer lannen pli tar, Pol ti ekrir son konpannyon Tit e dir: “Mon’n kit ou Kret pour ki ou met lord dan bann keksoz kot i fodre, e ki ou etabli bann ansyen, dan sak lavil, dapre mon rekonmandasyon.” (Tit 1:5) Pareyman, i paret ki Timote ki ti’n vwayaz en kantite avek zapot Pol ti’n ganny sa menm lotorite. (1 Tim. 5:22) I kler alor ki bann ansyen ek asistan ministeryel ti ganny apwente par bann sirveyan rezyonal, non pa par bann zapot ek ansyen Zerizalenm.

Konsey Direkter in fer bann azisteman dan lafason ki bann ansyen ek asistan ministeryel i ganny apwente baze lo sa legzanp ki nou’n vwar dan Labib. Depi le 1 Septanm 2014, bann asistan ministeryel ek ansyen pou ganny apwente dan sa fason: Sak sirveyan rezyonal pou verifye bann rekomandasyon ki’n ganny fer dan sa rezyon. I pou esey konn sa bann dimoun ki’n ganny rekomande ler i vizit sa kongregasyon e travay avek zot dan predikasyon si sa i posib. Apre ki i’n diskit lo sa rekomandasyon avek konsey ansyen, sirveyan rezyonal i annan sa responsabilite pour apwent asistan ministeryel ek ansyen dan kongregasyon dan son rezyon. Dan sa fason, nou ava pe swiv fason ki bann asistan ministeryel ek ansyen ti ganny apwente dan premye syek.

Lekel ki okip tou sa bann prosedir? Parey i toultan leka “lesklav fidel e pridan” (NW) i annan sa pli gran responsabilite pour nouri lezot serviter. (Mat. 24:45-47) Sa i enkli egzamin bann verse Labib avek led lespri sen pour kapab donn gidans lo ki mannyer pour aplik bann prensip Labib ki relye avek lafason ki kongregasyon dan lemonn antye i ganny organize. Lesklav fidel i osi apwent tou bann sirveyan rezyonal ek manm Komite Biro Brans. An retour, sak biro brans i donn led pratik pour ki sa bann lenstriksyon i ganny aplike. Sak konsey ansyen i annan sa gro responsabilite pour verifye si bann frer i kalifye dapre Labib avan ki zot rekomande ki sa bann frer i ganny apwente dan kongregasyon Bondye. Sak sirveyan rezyonal i annan sa gro responsabilite pour reflesir seryezman e priy lo bann rekomandasyon ki’n ganny fer par bann ansyen e apre apwent bann frer ki kalifye.

Ler nou konpran ki mannyer bann frer i ganny apwente, nou pli byen konpran rol lespri sen dan sa prosedir. Sa i fer nou annan plis konfyans ek respe pour bann ki’n ganny apwente dan kongregasyon Kretyen.—Ebr. 13:7, 17.

Revelasyon 11:3 i koz lo de temwen ki ti pou profetize pour 1,260 zour. Sa resi i dir ki sa bebet sovaz ti pou “ganny laviktwar lo zot e touy zot.” Me apre “trwa zour edmi” sa de temwen ti pou resisite e tou dimoun ki ti pou vwar zot ti pou sirprann.—Rev. 11:7, 11.

Lekel sa de temwen? Bann detay dan sa resi i ed nou idantifye zot. Premyerman, Labib i dir ki zot pe ganny reprezante par “sa de pye zoliv ek sa de sandelye.” (Rev. 11:4) Sa i fer nou rapel sa sandelye ek sa de pye zoliv dan profesi Zekarya. Dapre sa resi, sa de pye zoliv ti reprezant “sa de ki’n ganny swazir,” setadir, Gouverner Zorobabel ek Gran Pret Zozye “ki pe debout o bor Senyer later antye.” (Zeka. 4:1-3, 14) Dezyenmman, Labib i dir ki sa de temwen pe fer bann mirak parey sa ki Moiz ek Eliya ti fer.—Konpar Revelasyon 11:5, 6 avek Nonm 16:1-7, 28-35 e 1 Lerwa 17:1; 18:41-45.

Kwa ki parey ant sa de resi ki’n ganny site? Toulede resi i refer avek bann ki ti ganny swazir par Bondye pour diriz vre ladorasyon dan bann letan leprev ki ti difisil. Pour akonpli sa profesi dan Revelasyon sapit 11, bann Kretyen swazir ki ti pe diriz sa travay predikasyon kan Rwayonm Bondye ti ganny etablir dan lesyel an 1914, ti pres dan “lenz goni” pour trwa-z-an edmi.

A lafen sa trwa-z-an edmi ki zot ti’n pres dan zot lenz goni, sa bann Kretyen swazir ti ganny touye dan en sans senbolik. Sa ti arive ler zot ti ganny met dan prizon pour trwa zour edmi senbolik, ki bokou mwens ki sa trwa-z-an edmi. Bann lennmi pep Bondye ti kontan akoz zot ti krwar ki sa de temwen ti’n ganny touye alor sa travay ki zot ti pe fer ti pou fini lanmenm.—Rev. 11:8-10.

Me parey i ti’n ganny predir dan sa profesi, a lafen sa trwa zour edmi sa de temwen ti resisite. Sa ti arive ler bann Kretyen swazir ti ganny large dan prizon e bann ki ti’n reste fidel ti ganny en misyon spesyal sorti kot Bondye atraver zot Senyer Zezi Kri. An 1919, zot ti parmi bann ki ti ganny apwente pour servi konman ‘lesklav fidel e pridan,’ pour pran swen avek bezwen spirityel pep Bondye pandan bann dernyen zour.—Mat. 24:45-47; Rev. 11:11, 12.

I enteresan pour vwar ki Revelasyon 11:1, 2 i relye sa bann levennman avek sa letan ler tanp spirityel ti pou ganny mezire oubyen evalye. Malaki sapit 3 i koz konsernan lenspeksyon sa tanp spirityel parey avek sa enn dan Revelasyon. Me apre sa lenspeksyon ki ganny mansyonnen dan Malaki i annan en letan kot tanp i ganny pirifye. (Mal. 3:1-4) Ki kantite letan sa lenspeksyon ek pirifikasyon tanp ti dire? I ti konmans depi 1914 ziska bann premye mwan 1919. Sa letan i enkli sa 1,260 zour (42 mwan) ek sa trwa zour edmi senbolik ki Revelasyon sapit 11 i koz lo la.

Pa nou kontan ki Zeova in fer laranzman pour fer sa netwayaz spirityel e pirifye en pep spesyal pour fer dibyen! (Tit 2:14) Nou osi vreman apresye legzanp ki sa bann Kretyen swazir in kite ler zot ti pe diriz vre ladorasyon dan bann letan leprev e an fezan sa zot ti pe reprezant sa de temwen senbolik. *