Müshinka Pablo namüin na laülaashii chajanakana Éfeso: «Ee mata jaaʼin jaaʼujiraa jiakana otta saaʼu süpüshuaʼa tü anoujasükalüirua naapaakat Maleiwa süpüla nüpüshin sükajee ouktüin chi Nüchonkai. Chi Naaʼinkai Maleiwa, niʼitaain jia süpüla jaaʼinmajüin naya maa aka wane wayuu naaʼinmajüin tü nümüʼünüinkat» (Aluw. 20:28). Laülaainjachire wanee wawala jee niʼyataainjachire neʼipajee na laülaashiikana, ¿jamüsü sukuwaʼipa süpüla nüneekünüinjachin nükajee chi naaʼinkai Maleiwa?

Nükaaliinjain chi naaʼinkai Maleiwa na wayuu ashajakana tü Wiwüliakat süpüla nashajüin suluʼu tü kettaainjatkat nutuma wanee wawala süpüla laülaashiin nia suluʼu tü outkajaaleekat jee niʼyataainjachire neʼipajee na laülaashiikana. Aküjünüsü suluʼu 1 Timoteo 3:1-7 waneeirua kasa kettaainjatka nutuma wanee wawala süpüla laülaashiin nia. Jee müsia suluʼu Tito 1:5-9 otta Santiago 3:17, 18, aküjünüsü waneeirua kasa kettaainjatka nutuma. Otta tü achuntünakat nümüin wanee wawala süpüla niʼyataainjachin neʼipajee na laülaashiikana, aküjünüsü suluʼu 1 Timoteo 3:8-10, 12, 13. Aluwataanüsü wanee karaloukta nanüliamaajatü na wawalayuu anakana süpüla laülaashiin jee na anakana süpüla naʼyataaliin neʼipajee. Süpülapünaa naneekünüin na wawalayuu ashajünüinjanakana anülia, nachuntüin chi naaʼinkai Maleiwa na laülaashii aluwataakana tia karalouktakat. Akaataajaʼa neʼe na wawalayuu aluwataanakana amüin tia karalouktakat, nachuntüin nümüin Maleiwa chi naaʼinkai süpülapünaa «kettaashi chi wawalakai süpüla laülaashiin» namüin. Jee müshia jüüjüüinjachi chia wawalakai nümüin chi naaʼinkai Maleiwa (Gal. 5:22, 23). Tü aküjünüitpakat yaʼayaa, shia tü aainjünajatkat süpüla nüneekünüin wanee wawala nükajee chi naaʼinkai Maleiwa.

Süpüla nüneekünüin wanee wawala süpüla tia aʼyatawaakat, ¿jarai chi «aa» makai anüiki süpüla niʼitaanüin sünain tia? Mapuʼusü sukuwaʼipa mayaa: aluwataanüsü Weteetmüin wanee karaloukta nanüliamaajatü na wawalayuu anakana süpüla laülaashiin jee na anakana süpüla naʼyataaliin neʼipajee. Shiasaʼa chaa Weteet, aneekünüshii waneeinnua wawalayuu natuma na Laülaashii Jülüjakana aaʼin na aküjüliikana pütchi sainküin mma süpüla nanaʼlaain sümüin tia karaloukta aluwataanakat. «Aa, kettaashia chi wawalakai süpüla tia aʼyatawaakat», müshii naya wawalayuukana kettaale nia. Shiasaʼa süchikijee tia, ajütünüsü pütchi chejee Weteet eere süküjünüin namüin na laülaashiikana nüneekünüitchipain chia wawalakai süpüla tia aʼyatawaakat. Nayasaʼa na laülaashiikana, naküjüin nümüin chia wawalakai sünain nüneekünüin süpüla laülaashiin jee niʼyataainjachin neʼipajee. «Aa», nümüle chia wawalakai sümüin tia aʼyatawaa aapünakat nümüin, aküjüna müsia namüin na wawalayuukana sünain tü outkajawaakat.

¿Jamapuʼusü sukuwaʼipa natuma na nikirajüinkana Jesuu süpüla naneeküinjachin wanee anoujashi süpüla wanee aʼyatawaa nümüin Maleiwa? Eeshi naneeküle na aluwataaushiikana wanee anoujashi süpüla naaʼinrüin wanee aʼyatawaa. Jamüshiijaʼa naya, naneeküin akaratshishii tooloyuu süpüla nottonojüin eküülü sümüin tü jieyuu oukta aʼwayuusetkat (Aluw. 6:1-6). Tü wayaawatakat aaʼu sünainjee tia, shia nnojoliin nayain aneeküin na aluwataaushiikana na laülaashiinjanakana suluʼu tü outkajaaleekat.  Na anoujashii aneekünakana süpüla nottonojüin tü eküütkat, eeshiijaʼa süpüla laülaashiitüjülüin naya süpülapünaa saapünüin tia aʼyatawaakat namüin. ¿Jaraliika aneeküin wanee anoujashi süpüla laülaashiin jee niʼyataalin neʼipajee na laülaashiikana?

Süküjüin wamüin tü Wiwüliakat jamapuʼuin sukuwaʼipa tia. Saashin tü Wiwüliakat, nüleʼejapa Pablo nümaa Bernabé sünain tü palajatkat nakua sünain misioneeroin naya, «eʼinaajaleeshiʼiya wayuu süpüla laülawaa suluʼu waneʼewai sukua tü noutkajaalekat na anoujashiikana. Je süchikijee naashajaain nümaa Maleiwakai nooʼopünaa na anoujashiikana sünain naamajüin namaa, neʼitaain naya najapuluʼu chi Senyotkai» (Aluw. 14:23). Maʼaka jeʼra juya süchikijee tia, müshi Pablo nümüin Tito, wanee alapalaai naaʼu na anoujashiikana: «Tapütüin pia chaʼaya suluʼu tü mmakat Creta süpüla pikeraajüinjatüin tü kasa nnojotkat taaʼinrüin otta süpüla püneeküinjanain wane laülaashii napüleerua na anoujashiikana suluʼu tü outkajaaleekat sainküin tü pueulokalüirua chaʼaya» (Tito 1:5). Akaataajaʼa Timoteo, aluwataanüshi nia sünain tiaʼayaa (1 Tim. 5:22). Tü wayaawatakat aaʼu sünainjee tia, shia nayain aneeküin na alapalaakana naaʼu na anoujashiikana na laülaashiinjanakana suluʼu tü outkajaaleekat jee na aʼyataainjanakana neʼipajee na laülaashiikana. Nnojoishii nayain kajapuluʼuin tia na aluwataaushiikana jee na laülaashii chajanakana Jerusalén.

Suluʼujee tia, na Laülaashii Jülüjakana Aaʼin na aküjüliikana pütchi sainküin mma, naʼwanajaaitpa sukuwaʼipa joo tü naaʼinrapuʼukat süpüla nüneekünüin wanee wawala süpüla laülaashiin jee niʼyataalin neʼipajee. Soʼujee settienpüroʼu 1, 2014, nayainjana joo na wawalayuu alapalaakana waaʼu anaʼlaaka sümüin tü karaloukta nanüliamaajatkat na anakana süpüla tia aʼyatawaakat. Nülapalaapa chi wawalakai naaʼu na wawalayuukana, nüchajaainjatü sukuwaʼipa süpüla niʼraajüin naya wawalayuukana jee eeshi süpüla nujuʼitüin sünain aküjaa pütchi namaa. Süchikijee tia, yootuinjachi nia namaa na laülaashiikana nachiki na wawalayuu aneekünüinjanakana süpüla laülaashiin jee naʼyataaliin neʼipajee na laülaashiikana. Niainjachi chi alapalaakai naaʼu na wawalayuukana aneekakai naya wawalayuukana kettaale süpüla tia aʼyatawaakat. Tia, shia tü naainjapuʼukat na nikirajüinkana Jesuu paala sümaiwa.

Süpüla watüjaain saaʼu jamüin maʼin sukuwaʼipa süpüla nüneekünüinjachin wanee wawala süpüla laülaashiin jee niʼyataalin neʼipajee na laülaashiikana, anuu tü aainjünakat: «Chi achepchiee oonookai otta kekiikai maʼin» nia chi aapakai tü choʼujaakat sümüin nanoula na anoujashiikana (Mat. 24:45-47, TNM). Nuchuntüin chi naaʼinkai Maleiwa süpüla nüntüin sünain wanee pütchi suluʼu tü Wiwüliakat eekai anainjatüin atuma naʼyataain na wawalayuukana suluʼu tü outkajaaleekat jee aluwataashi nia karaloukta namüin na wawalayuukana süpüla nüküjüin namüin tü naaʼinrajatkat. Chi achepchieekai, nia aneekakai chi wawala alapalaakai waaʼu jee na Laülaashii Jülüjakana Aaʼin tü Aʼyatawaakat suluʼu Weteet. Shiasaʼa suluʼujee Weteet, aküjünüsü namüin na wawalayuukana tü naaʼinrajatkat naashin chi achepchieekai. Jee müshiʼiya na laülaashiikana, süpülapünaa naluwataain tü karaloukta nanüliamaajatkat na wawalayuu kettaakana naashin süpüla laülaashiin jee naʼyataaliin neʼipajee, jülüjachoinjatü maʼin naaʼin müleka nekeraajüle tü sümakat tü Wiwüliakat. Niasaʼa chi wawala alapalaakai waaʼu, oʼuraajüshi nia süpüla nünaʼlaain sümüin tü karaloukta nanüliamaajatkat naya wawalayuukana. Nüneeka namüshiijaʼa naya kettaale naya süpüla tia aʼyatawaakat.

Wekirajaaitpa anain jamüin sukuwaʼipa süpüla nüneekünüin wanee wawala nükajee chi naaʼinkai Maleiwa süpüla laülaashiin jee niʼyataalin neʼipajee na laülaashiikana. Müsüjeseʼe weʼitaain waaʼin nünain wanee wawala eekai aneekünüin süpüla tia aʼyatawaakat jee kojutüshi maʼin nia wamüin (Heb. 13:7, 17).