Aposetolo edia negai, Paulo be Efeso kongrigeisen ena elda taudia dekenai ia gwau: “Do umui naria namonamo, umui sibona bona mamoe oreana ibounai danu. Lauma helaga ese naria taudia umui ia abia hidi bona Dirava ena kongrigeisen do umui hakaua. Unai kongrigeisen be ia sibona ena Natuna ena rara amo ia hoia.” (Kara 20:28) Hari, edena dala idauidau amo lauma helaga ese elda bona hesiai taudia abia hidi dalana ia gunalaia?

Dala ginigunana be, lauma helaga ena heduru amo Baibel torea taudia ese elda bona hesiai taudia do idia badinaia taravatudia idia torea. Elda taudia ese do idia badinaia taravatu 16 be 1 Timoteo 3:1-7 ai idia noho. Do idia badinaia taravatu ma haida be Tito 1:5-9 bona Iamesi 3:17, 18 ai idia noho. Hesiai taudia ese do idia badinaia taravatudia be 1 Timoteo 3:8-10, 12, 13 ai idia noho. Dala iharuana be, elda bona sekit naria taudia ese Iehova ena lauma idia noia, unai amo idia do ia durua idia tahua namonamo bema tadikaka ta be Baibel ese ia gwauraia taravatudia ia badinaia, eiava lasi. Dala ihatoina be, elda oreana ese ia gwauraia hidi tadikaka be ena mauri lalonai Dirava ena lauma helaga ena huahua ia hahedinaraia. (Gal. 5:22, 23) Oibe, Dirava ena lauma helaga ese elda bona hesiai taudia abia hidi dalana ia gunalaia.

To, unai elda bona hesiai taudia be daidia ese idia abia hidi? Guna ita badinaia dalana be inai: Elda oreana bona sekit naria taudia ese elda bona hesiai gaukara totona idia gwauraia hidi tadikaka edia ladana be brens ofesi dekenai idia siaia. Bena unuseniai, Hakaua Oreana ese ia abia hidi tadikaka haida ese unai tadikaka edia kara idia tahua namonamo, bena abia hidi idia karaia. Unai murinai, brens ofesi ese elda oreana ia hadibaia. Bena, elda taudia ese idia abia hidi elda o hesiai tauna matamatana idia hadibaia, bona idia nanadaia bema ia ura eiava ia hegeregere unai maduna ia huaia totona. Dokonai, kongrigeisen idia hadibaia.

To, aposetolo edia negai elda bona hesiai taudia be edena bamona idia abia hidi? Nega haida, aposetolo taudia ese abia hidi idia karaia. Hegeregere, nega ta idia ese tatau seven idia abia hidi vabu dekenai aniani idia haria totona. (Kara 6:1-6) To, reana unai tatau be unai gaukara idia do abia lasi neganai, idia be elda maduna idia abia vadaeni.

Ena be Baibel ese unai negai elda bona hesiai taudia idia abia hidi dalana ena sivarai ibounai ia herevalaia lasi, to idia karaia dalana ita itaia diba.  Baibel ia gwau Paulo bona Banaba be edia misinari laolao ginigunana amo edia hanua dekenai idia giroa lou neganai, “kongrigeisen ta ta ai, tau badadia [o elda taudia] idia abia hidi. Bena Paulo bona Banaba idia anivaga bona idia guriguri, unai amo unai taudia be Iehova dekenai idia henia, idia abidadama henia tauna unai.” (Kara 14:23) Lagani haida murinai, Paulo ese ena misinari gaukarana ai ia bamoa tauna Tito ia tore henia, ia gwau: “Kerete dekenai oi lau rakatania unai amo kerere gaudia do oi hamaoromaoroa bona taoni ta ta ai tau badadia [o elda taudia] do oi abia hidi, oi dekenai lau hadibaia hegeregerena.” (Tito 1:5) Timoteo, gabu momo dekenai aposetolo Paulo ida ia loaloa tauna be unai bamona gwaumaoro ia abia danu. (1 Tim. 5:22) Unai ese ia hahedinaraia, guna loaloa naria taudia ese elda bona hesiai taudia idia abia hidi, to aposetolo taudia bona Ierusalema ai idia noho tatau badadia ese unai idia karaia lasi.

Unai dala hegeregerena, Iehova ena Witnes taudia edia Hakaua Oreana ese elda bona hesiai taudia abia hidi dalana idia haidaua. September 1, 2014 amo, elda bona hesiai taudia abia hidi dalana be inai: Sekit naria taudia ta ta ese edia sekit lalonai elda oreana ese idia gwauraia hidi tadikaka edia kara idia tahua namonamo. Kongrigeisen ia vadivadi henia neganai, bema mai dalana unai tadikaka ida do ia haroro hebou. Unai murinai sekit tauna be elda oreana ida ia herevahereva bona ena sekit lalonai elda bona hesiai taudia matamatadia ia abia hidi. Unai amo, idia be aposetolo edia negai idia badinaia dalana idia tohotohoa.

Daidia ese unai abia hidi gaukarana ena kahana ta ta idia naria? Momokani, “igui hesiai tauna mai ena kamonai bona mai ena kara maoromaoro” ena maduna badana be biaguna ena hesiai taudia do ia ubua. (Mat. 24:45-47) Unai idia karaia totona, lauma helaga ena heduru amo idia ese Baibel idia tahua namonamo, bona hakaua herevadia idia halasia tanobada hegegemadai kongrigeisen idia gaukara namonamo totona. Danu, igui hesiai tauna ese sekit naria taudia bona Brens Komiti taudia ia abia hidi. Bona brens ofesi ta ta ese igui hesiai tauna amo idia mai hakaua herevadia badinaia dalana be elda oreadia dekenai ia hadibaia. Elda oreadia edia maduna be Baibel ena taravatu hegeregerena idia gwauraia hidi tadikaka edia kara do idia tahua namonamo. Sekit naria taudia edia maduna be elda oreadia ese idia gwauraia hidi tadikaka edia kara ibounai do idia tahua namonamo bona idia gurigurilaia. Unai murinai abia hidi idia karaia diba.

Bema unai abia hidi idia karaia dalana ita lalopararalaia, ita abia dae lauma helaga ese unai gaukara ia biagua. Bona unai ese ita do ia durua Keristani kongrigeisen lalonai idia abia hidi elda bona hesiai taudia do ita matauraia bona abidadama henidia.​—⁠Heb. 13:7, 17.

Apokalupo 11:3 be witnes taudia rua ia herevalaia bona ia gwau idia be dina 1,260 lalonai do idia peroveta. Unai siri ma ia gwau dagedage animal ese “idia do ia hadarerea bona do ia hamasedia.” To, “dina toi mai kahana” murinai, unai witnes taudia rua be do idia mauri lou, bona unai idia itaia taudia be do idia hoa.​—⁠Apok. 11:7, 11.

Unai witnes taudia rua be daidia? Unai sivarai ena hereva ma haida ese ita do ia durua idia ita diba namonamo totona. Gau ginigunana be, Apokalupo bukana ia hahedinaraia unai witnes taudia rua be “olive audia rua bona lamepa atoa gaudia rua ese idia laulaulaia.” (Apo. 11:4) Unai ita duahia neganai, Sekaraia ena peroveta herevana ai ia gwauraia lamepa atoa gaudia bona olive audia rua ita laloa. Unai olive audia rua be Iehova ese ia “horoa taudia rua,” Gavana Serubabele bona Hahelaga Tauna Badana Iosua idia laulaulaia. Idia be “tanobada ibounai ena Lohiabada badinai idia gini taudia.” (Sek. 4:1-3, 14, BHḡ) Gau iharuana be, unai witnes taudia rua be Mose bona Elia ese idia karaia hoa karadia idia karaia danu.​—⁠Apokalupo 11:5, 6 be Numera 16:1-7, 28-35 bona 1 King Taudia 17:1; 18:41-45 ida sekea.

Unai siri ese idia herevalaia gauna badana be dahaka? Unai sivarai ta ta be hahetoho negadia Dirava ena orea idia gunalaia horoa taudia idia herevalaia. Unai dainai, Apokalupo karoa 11 ia guguru negana be lagani 1914 ai, Dirava ena Basileia be guba ai ia lohia matamaia neganai. Unai negai, orea idia gunalaia horoa tadikaka be “puse dabua” idia hahedokilaia, bona lagani toi mai kahana lalonai idia haroro.

Unai puse dabua idia hahedokilaia horoa taudia be edia haroro negana ena dokona ai dibura ruma ai idia atodia. Unai be laulau dalanai idia hamasedia bamona. To, idia be dibura ruma ai idia noho daudau lasi, laulau dalanai unai be dina toi mai kahana. Dirava ena inai taudia idia moale bada, badina edia matanai, unai horoa taudia edia gaukara be ia ore bamona.​—⁠Apok. 11:8-10.

To, unai peroveta herevana hegeregerena, dina toi mai kahana idia ore murinai, unai witnes taudia rua be idia mauri lou. Unai horoa tadikaka be dibura ruma amo idia ruhaia. To unai sibona lasi, Iehova idia badinaia noho taudia be edia Lohiabada Iesu Keriso amo Dirava ese gaukara badana ta ia henidia. Lagani 1919 ai, Dirava ese idia bona ma haida ia abia hidi “igui hesiai tauna mai ena kamonai bona mai ena kara maoromaoro” ai idia lao, bona inai nega dokona ai, Dirava ena taunimanima dekenai Iena hakaua herevadia do idia halasia.​—⁠Mat. 24:45-47; Apok. 11:11, 12.

Apokalupo 11:1, 2 ena hereva be lauma dubu helagana ai do ia vara hahetohoa karana ta ida ia hegeregere. Malaki karoa 3 ese lauma dubu helagana idia sekea bona hagoevaia negana ta ia herevalaia danu. (Mal. 3:1-4) Unai sekea bona hagoevaia gaukarana ena daudau be edena bamona? Ia be lagani 1914 amo ia matamaia ela bona lagani 1919 ena matamana kahana. Unai nega ena daudau be Apokalupo karoa 11 ese ia herevalaia dina 1,260 (hua 42) eiava dina toi ma kahana.

Ita moale badina Iehova ese unai hagoevaia gaukara ia karaia, unai amo orea ta ia hagoevaia mai edia ura bada ida kara namodia idia karaia totona. (Tito 2:14) Danu, ita ese unai abidadama horoa taudia ita laloa bada, badina hahetoho neganai idia ese orea idia gunalaia. Unai amo idia hamomokania, laulau dalanai idia be unai witnes taudia rua. a