Ngapi mpepo zokupongoka za hamena mo mokuhorowora vakuronambunga novakwafimbunga naina?

Sokuhova, mpepo zokupongoka kwa vaterere vatjangi woBibeli va tjange eyi ga hepa muntu mokuwapera kukara mukuronambunga ndi mukwafimbunga. Yihepwa murongo nantazimwe mokuwapera kukara muronambunga kwa yi tumbura mwa-1 Timoteusa 3:1-7. Ntani yimwe hena kuyigwana mwaTitusa 1:5-9 nomu mwaJakopo 3:17, 18. Yihepwa yovakwafimbunga kwa yi tumbura mwa-1 Timoteusa 3:8-10, 12, 13. Sauvali, vakuronambunga kuhundira mpepo zaJehova zi va vyukise pokukonakona nsene asi munazinyetu ana sikisa mo yihepwa oyo. Sautatu, munazinyetu ogu vana hara kuhorowora ga hepa kulikida yiyimwa yompepo zokupongoka zaKarunga meparu lyendi. (Gar. 5:22, 23) Yipo nye asi mpepo zokupongoka kwa hamena mo mongendeseso ezi nazinye.

Nye yilye nawa-nawa a horowora vanavazinyetu ava? Pwanare, etokoro lyokuhorowora vakuronambunga novakwafimbunga ngava li tumu komberewa zomutayi. Oko, vanavazinyetu ava za horowora Mbungagendesi yiwo ngava konakona etokoro olyo nokutulisa po etokoro lyokuhulilira. Konyima, mberewa zomutayi ngazi divisa mbunga zovakuronambunga. Makura vakuronambunga tava zogere namunazinyetu ogo nokumupura nsene ana wapere ntani ana hara kutambura situmbukira oso. Ano moruhura, ediviso ngava li gava kombungakriste.

Nye ngapi ngava horowora vapitisili womombunga momazuva govapositoli? Posiruwo simwe, vapositoli kwa horowere vagara vatano-navavali va gavere nondya kovafisavayawo. (Yirug. 6:1-6) Komeho vagara owo va va pe situmbukira sokugavera nondya, awo nare vakuronambunga.

Nampili ngomu Matjangwa aga dili kufaturura momunene omu ngava horowora vapitisili wombunga momazuva gena, ose kumona yihonena yimwe kuhamena omu ngava yi rugana. Ose kuresa  asi apa Paurusa naBaranabasa va ka tengwire korugendo rwawo rokuhova routumwa, ‘awo kwa horowere vakurona wombungakriste mwankenye mbungakriste. Vana kumana kukanderera nokudilira, tava va tura kosipara saHompa ogu va pura.’ (Yirug. 14:23) Konyima zonomvhura dongandi, Paurusa kwa tjangerere mutareli mukwawo Titusa asi: ‘Eyi na ku sigira moKereta yeyi asi, o wapaike nayinye eyi ya hupa po, oku to tura mo vakurona wonombungakriste mwankenye sitata, moomu na ku tantera.’ (Tit. 1:5) Mokulifana, Timoteusa ogu nga gendi nomupositoli Paurusa nage kwa mu pere situmbukira. (1 Tim. 5:22) Eyi kulikida asi matokoro ngava ga tulisa po vatareli wonombungakriste, kapisi vapositoli ndi vakurona womoJerusarema.

Kuliza nomauzera aga gomoMatjangwa, Mbungagendesi zoNombangi daJehova zina tura po marunduruko monkedi omu ava horowora vakuronambunga novakwafimbunga. Kutamekera 1 Sitarara 2014, ngava yi rugana ngesi: Nkenye mutareli gonombungakriste nga konakona matokoro aga ngaga tunda kovakuronambunga. Posiruwo sendi sokudingura nombungakriste, nga hetekera ko kudiva ava vana horowora nokurugana kumwe nawo moyirugana yokuzuvhisa nsene kuvhura. Konyima zokuzogera nombunga zovakuronambunga, mutareli yige nga tura po etokoro lyokuhulilira kuhamena owo vana hara kuhorowora. Ewapaiko eli kuna lifana neli ngava ruganesa posiruwo sovapositoli.

Yilye ogu a gendesa nongendeseso nadinye edi? “Mukareli gokulimburukwa gonondunge” yige ya tumbukira kugava nondya kovantu. (Mat. 24:45-47) Nevatero lyompepo zokupongoka, awo kupapara Matjangwa yipo va gave mavyukiso gomawa gomoBibeli aga naga vatera nombungakriste uzuni mudima. Mukareli gokulimburukwa gonondunge kuhorowora vatareli wonombungakriste ntani noKomitiye zomutayi. Ano nkenye mberewa zomutayi kukwatesa ko mavyukiso aga a gava mukareli ogo. Nkenye mbunga zovakuronambunga kwa kara nositumbukira sokukonakona yihepwa yoPatjangwa yovanavazinyetu ava vana hara kupa situmbukira mombungakriste. Nkenye mutareli gonombungakriste ga kara nositumbukira somulyo sokukonakona nawa nokukanderera kuhamena etokoro lyovakuronambunga ntani nokuhorowora vanazinyetugara ava vana wapere.

Nsene tu kwata egano nkedi omu ava horowora vapitisili womombunga, ose ngatu hafera momunene sirugana sompepo zokupongoka mongendeseso ezi. Makura ngatu kara nehuguvaro nefumadeko lyenene kwava ava horowora va pitisire mombungakriste.—Heb. 13:7, 17.

Etjangwa kwa gweda ko hena asi sikasama “tasi va fundu, tasi va dipaga.” Nye konyima ‘zomazuva gatatu noharufa,’ nombangi mbali odo tadi katuka, ano vantu ava va di tere, tava tetuka unene.—Ehor. 11:7, 11.

Wolye owo nombangi mbali? Mauzera gemetjangwa taga ka tu vatera tu va dimburure. Uzera wokuhova, kuna kara asi ado kwa di fanekesa ‘komauzwe gavali nomauzweko gonoramba gavali.’ (Ehor. 11:4) Eyi kutudiworokesa mauzweko gonoramba ntani mauzwe gavali va singonona mouporofete waSakaliya. Mauzwe gavali ogo kwa fanekesa “vagara vavali ava ga horowora Karunga,” mupangeli Serubabeli nomupristeli gomunene Josuwa, ava “va gwaveka va mu kerere, HOMPA gevhu nalinye.” (Sak. 4:1-3, 14) Wauvali, nombangi mbali kwa di singonona asi kuna kurugana yitetu ngwendi yeeyi ga rugene Mosesa naEliya.—Hetakanesa Ehororo 11:5, 6 naNumeri 16:1-7, 28-35 ntani 1 Vahompa 17:1; 18:41-45.

Yisinke ga zogera matjangwa aga gavali? Mwankenye sihorokwa, matjangwa kwa uyunga kuhamena ava ga horowere Karunga mokupitisira vantu vendi posiruwo somaudigu. Apa lya sikilire mo Ehororo egaununo 11, vanavazinyetu wovagwavekwa ava ngava pitisire posiruwo esi va tulisire po Uhompa waKarunga meguru 1914, awo kwa udisire “moyikoverero yononkali” nomvhura ntatu noharufa.

Kehagero lyezuvhiso lyawo moyikoverero yononkali, vagwavekwa kwa va dipagere pasifanekeso apa va va tulire modorongo karuwogona, eyi ya fanekesa mazuva gatatu noharufa. Kononkore dovantu vaKarunga kwa monekere ngwendi sirugana sovagwavekwa sina haga po, ano eyi kwa di hafesere unene.—Ehor. 11:8-10.

Nampili ngoso, kuliza nouporofete kehagero lyomazuva gatatu noharufa, nombangi mbali kwa katukire. Vagwavekwa kapi va va mangwilire tupu modorongo, nye hena ava va twikilire kulimburukwa kwa gwene situmbukira sokulikarera sokutunda kwaKarunga kupitira mwaHompa gwawo, Jesus Kristusa. Mo-1919 awo kwa kere mokatji kowo va horowere va kare “mukareli gokulimburukwa gonondunge” mokupakera mbili vantu vaKarunga pampepo momazuva aga gopouhura.—Mat. 24:45-47; Ehor. 11:11, 12.

Ehororo 11:1, 2 kwa hetakanesa yihorokwa eyi kosiruwo esi va ya konakonene ntembeli zopampepo. Marakiya egaununo 3 kwa tumbura ekonakono lyokulifana lyontembeli zopampepo, ano konyima yipo va zi zeresere. (Mara. 3:1-4) Siruwo sokuhura kupi ekonakono nezereso lya gusire? Kwa tamekere 1914 dogoro ketamekero 1919. Siruwo esi kwa kwatera mo mazuva 1 260 (makwedi 42) ntani mazuva gatatu noharufa gopasifanekeso va tumbura mEhororo egaununo 11.

Ruhafo musi tuna kara naro mokudiva asi Jehova kwa tura po mawapaiko gokutukuhwa pampepo tu kare muhoko gwamwene mokurugana yoyiwa! (Tit. 2:14) Mokugwederera ko, ose kuhafera sihonena esi va tu tulira po vagwavekwa ava ngava pitisire posiruwo somaudigu ntani yiwo nombangi mbali dopasifanekeso. *