Mulikulukaji lyamyaka lyakulivanga C.E, kaposetolo Paulu alwezele vakulwane vamuchikungulwilo chamuEfwesu ngwenyi: “Hakenunga muchima kuvyuma vyayenu vavene, nakuutanga wosena nawa, uze haukiko vanamitongola enu kuli shipilitu yajila kupwa tulama, mangana mufungenga chikungulwilo chaKalunga chize alanjile namanyinga aMwanenyi.” (Vili. 20:28) Shipilitu yeji kuzatanga mulimo muka hakutongola vakulwane navaka-kuzachila makumbi ano?

Chatete, shipilitu yajila yakafwile vaka-kusoneka Mbimbiliya vasoneke vyuma vize vatela kutesamo vakulwane navaka-kuzachila. Vyuma 16 vize vatela kutesamo vakulwane vyatwama hali WaChimoteu 1, 3:1-7. Kaha vyuma vikwavo vyakutesamo vyatwama mumikanda yakufwana nge Chituse 1:5-9 naWaYakova 3:17, 18. Vyuma vize vatela kutesamo vaka-kuzachila vyatwama hali WaChimoteu 1, 3:8-10, 12, 13. Kaha chamuchivali, vaze veji kusakulanga nakutongola vandumbwavo veji kulombanga shipilitu yaYehova yivatwaminyine omu navakekesa vamone numba nge ndumbwetu natesamo kanawa kweseka naVisoneka nyi chiku. Chamuchitatu, ndumbwetu uze vali nakusakula atela kusolola mihako yashipilitu yajila yaKalunga mukuyoya chenyi. (Ngale. 5:22, 23) Ngachize, shipilitu yaKalunga yikiko yeji kulingisanga vandumbwetu vavatongole.

Uno iya eji kutongolanga vandumbwetu kana? Kushimbu yakunyima, majina avakulwane navaka-kuzachila osena vaze vanasakula vapwilenga nakuwatuma kuofesi yamutango. Kuheta kuze, vandumbwetu vaze vatongola kuLizavu Lyakutwaminyina vapwilenga nakukekesa majina osena nakutongola vaze vanatemo. Kufumaho ofesi yamutango yasonekelenga mukanda wamajina avandumbwetu vaze vanatongola nakuutuma kulizavu lyavakulwane vamuchikungulwilo muze mwafumine majina avandumbwetu kana. Kaha vakulwane vamuchikungulwilo kana vapwilenga nakulweza vandumbwetu vaze vanatongola, nakuvahulisa nge vanatemo nakwitavila mulimo kana. Kufumaho, hikuvilika jino ava vandumbwetu kuchikungulwilo.

Vatongwelenga ngachilihi vandumbwetu mulikulukaji lyamyaka lyakulivanga? Lwola lumwe vaposetolo vatongwelenga vandumbwavo. Chakutalilaho vatongwele malunga 7 mangana vatalenga hamulimo wakupangila vatuliwe vyakulya. (Vili. 6:1-6) Chipwe ngocho, malunga kana vavangile kuvatongola kupwa vakulwane shimbu kanda vavahane mulimo kana.

 Numba tuhu Visoneka kavyalumbununa chikuma omwo vatongwelenga vandumbwetu kunyimako, oloze kwatwama vyuma vimwe vize vyasolola omu vazachilenga mulimo kanou. Mbimbiliya yahanjika ngwayo omu Paulu naMbalanape vapwile nakukinduluka kufuma kuungeji watete waumishonali, “vavatongwelele vakulwane muchikungulwilo hichikungulwilo, ngocho hakulijilika kulya nakulomba, vavakunjikile kuli Yehova uze vetavilile.” (Vili. 14:23) Omu mwahichile myaka, Paulu asonekelele mukanda Chituse ngwenyi: “Ngwakusezele kuKelete mangana wolole vyuma vize vyahengele nakutongola vakulwane munganda hinganda nge muze ngwakulwezele.” (Chitu. 1:5) Chimoteu uze atambukilenga nakaposetolo Paulu maungeji amasuku, chasolokele nge naikiye apwile najingolo jakutongola vakulwane. (Chimo. 1, 5:22) Echi chinasolola hatoma nge tulama vakutambwojoka vakiko vatongwelenga vakulwane, keshi nge vaposetolo navakulwane vamuYelusalemako.

Echi chikiko chinalingisa Lizavu Lyakutwaminyina lyaVinjiho jaYehova lyalumuneko mujila navatongwelangamo vakulwane navaka-kuzachila. Kuputuka haSeptember 1, 2014, vakulwane navaka-kuzachila navavatongolanga ngane: Kalama wakujinguluka mwahitulukanga muvyuma vize vinalingisa vakulwane vamuchihanda vasakule vandumbwetu. Kaha omu mwatambukila chikungulwilo, mwafwila kutachikiza vandumbwetu vaze vanasakula, nakuzata navo mumulimo wamuwande nge chinahase. Omu mwakumisa kushimutwila nalizavu lyavakulwane hali vandumbwetu kana, kaha himwatongola jino vakulwane navaka-kuzachila muchihanda kana. Echi nachilingisa kutongola kana chilifwane nakutongola chamulikulukaji lyamyaka lyakulivanga.

Uno iya mwazatanga milimo yeka yikwavo? Nganomu chapwa lwola lwosena, “ndungo wakushishika wakuzangama” ikiye eji kulisanga vakuzuvo yenyi. (Mateu 24:45-47) Atwama namulimo wakuhehwojola muVisoneka, nakuzachisa shipilitu yajila, mangana yimukafwe akavangize jindongi jamuMbimbiliya jize liuka lyaYehova lyeji kukavangizanga. Ndungo wakushishika eji kutongolanga natulama vakujinguluka vosena navandumbwetu vamuKomiti yaMutango. Kaha nawa ofesi yamutango yeji kukafwanga vandumbwetu vakavangize vyuma vanavalweze. Lizavu lyavakulwane likwechi mulimo wakuhituluka kanawa muvyuma vyamuVisoneka vize vatela kutesamo vandumbwetu vaze vanasakula muchikungulwilo. Kalama wakujinguluka akwechi mulimo wakukekesa kanawa nakulomba kuli Yehova hali vandumbwetu vaze vanasakula kuli vakulwane, nakutongola jino vaze vanatemo.

Kutachikiza omu veji kutongolanga vandumbwetu nachitukafwa tutachikize kanawa mulimo yeji kuzatanga shipilitu yajila hakutongola vandumbwetu muvikungulwilo. Echi chatela kutulingisa tufwelele chikuma nakuvumbika vandumbwetu vaze vanatongola muchikungulwilo.—Hepe. 13:7, 17.

Mukanda waKusoloka 11:3 wahanjika haVinjiho vavali vaze navakahanjika upolofweto hamakumbi 1,260. Kaha mujimbu kana wahanjika nge chisuma “mwakavafungulula nakuvajiha.” Kaha hanyima yamakumbi “atatu nachimbwa chalikumbi,” vaze vinjiho navakasanguka. Echi chalingishile vatu valikomokele hakusanguka chavo.—Kuso. 11:7, 11.

Uno ava vinjiho vavali vemanyinako veya? Mazu amumujimbu kana nawatukafwa tutachikize vinjiho kana. Chatete vatulweza nge “ava vakivo milive yize yivali navitumbikilo vyamanongo vivali.” (Kuso. 11:4) Echi cheji kutwanukisanga vyachitumbikilo chamanongo namitondo yamilive yivali yize vahanjika muupolofweto waZekaliya. Eyi mitondo yamilive yemanyinyineko “vawavisa vavali,” Nguvulu Zeluvavele naKapilishitu Wakulitulaho Yoshuwa, “vanemana hakamwihi naMwata wahamavu hosena.” (Zeka. 4:1-3, 14) Chamuchivali, ava vinjiho vavali valingilenga vinjikizo vize vyalifwanyine navize alingilenga Mose naElija. Esekesenuko Kusoloka 11:5, 6, naKulava 16:1-7, 28-35, naVamyangana 1, 17:1; 18:41-45.

Uno mijimbu kaneyi yivali yalifwana ngachilihi? Mijimbu yosena yivali yemanyinako vatu jaKalunga vawavisa vaze vatwaminyinyinenga vatu jaKalunga mulwola lwavyeseko. Shikaho mukanda waKusoloka kapetulu 11, wateselemo omu vandumbwetu vawavisa vaze vatwaminyinyinenga halwola luze vazamishile Wangana waKalunga mwilu mumwaka wa 1914, vambulwile oku vanavwale ‘vikeleyi’ hamyaka yitatu nachimbwa.

Hanyima yakukumisa kwambulula oku vanavwale vikileyi, ava vawavisa vapwile kwijiva nge vanavajihi omu vavahakile mukamenga halwola lwalundende, kulumbununa makumbi atatu nachimbwa. Vaze vemanyinyinenga vatu jaKalunga nakole vamwene nge mulimo wava Vinjiho vanauhonesa, kaha echi chavevwishile kuwaha.—Kuso. 11:8-10.

Chipwe ngocho, upolofweto uze wateselemo omu mwahichile makumbi atatu nachimbwa chalikumbi vaze Vinjiho vavali vavafumishile mukamenga, kahechi chapwile nge vanasanguka. Ava vawavisa kavavafumishile kaha mukamengako, oloze mwomwo yakushishika chavo vavahanyine mulimo weka wakulipwila kuli Kalunga kuhichila muli Yesu Kulishitu. Mu 1919 vavatongwele kupwa “ndungo wakushishika wakuzangama” mangana vahanenga vatu jaKalunga vyakulya vyakushipilitu mumakumbi akukuminyina.—Mateu 24:45-47; Kuso. 11:11, 12.

Tuyokutuyoku nawa mukanda waKusoloka 11:1, 2 wahanjika nawa omu navakatomesa tembele yakushipilitu. Mukanda waMalaki kapetulu 3 naukiko wavuluka vyuma vyovimwe kutalisa kukukekesa nakutomesa tembele yakushipilitu. (Mala. 3:1-4) Uno echi kukukekesa nakutomesa chambachile myaka yingahi? Chaputukile mu 1914 nakuheta kumaputukilo amwaka wa 1919. Lwola kana lwapwa makumbi akuheta ku 1,260 (tukweji 42) nawaze makumbi atatu nachimbwa chalikumbi achifwanyisa vavuluka mumukanda waKusoloka 11.

Tweji kwivwanga kuwaha hakuwana nge Yehova ahakileko ou mulimo wakutomesa chakushipilitu “nakulitomesela ivene vatu jenyi vaze vanapu luheto lwenyi lwakulipwila, vaze nawa vafwila vilinga vyamwenemwene.” (Chitu. 2:14) Kaha nawa tweji kusakwililanga vyakutalilaho vyamwaza vyavandumbwetu vakushishika vawavisa vaze vapwilenga namulimo wakutwaminyina mulwola lwaluyanjisa nakupwa vinjiho vavali vachifwanyisa. *