Itech yekinika siglo, tatitanil Pablo kiniluij tayekananij itech nechikol tein moajsia Éfeso: “Ximoyekpiakan namejuan uan xikinyekpiakan nochin ichkamej, akin yektikatsin espíritu namechixtalij kemej tayekananij ininixpan, uan ijkon nantekitiskej kemej ichkatajpianij itech inechikol Dios, tein yejuatsin kikouak ika iesyo iKonetsin” (Hech. 20:28, TNM). ¿Keniuj yektikatsin espíritu tekiti axkan keman kinixtaliaj tayekananij uan tapaleuianij?

Yekinika, yektikatsin espíritu kinolinij tajkuilouanij maj kitalianij itech Biblia toni taman moneki kichiuaskej tayekananij uan tapaleuianij. Dieciséis taman tein moneki kichiuaskej tayekananij moijtoua itech 1 Timoteo 3:1-7. Okseki moijtoua itech textos kemej Tito 1:5-9 uan Santiago 3:17, 18. Tein moneki kichiuaskej tapaleuianij moijtoua itech 1 Timoteo 3:8-10, 12, 13. Ojpatika, akin kijtouaj ke se tokniuj uelisya kiixtaliskej uan akin taixtaliaj kitataujtiaj Jiova maj kinyekana ika iespíritu keman kiitaj ox nejon tokniuj kichiujtokya tein Biblia tajtani nochi tein ueli. Uan expatika, tokniuj akin kiitaj ox uelis kiixtaliskej moneki kinextis itech inemilis takilot tein kitemaka iespíritu Dios (Gál. 5:22, 23). Kemej tikitaj, iespíritu Dios tekiti itech nejin eyi taman.

Sayoj ke, ¿akonimej kinixtaliaj nejon tokniuan? Achto, kititaniaj itech sucursal amat kampa kitaliayaj nochi tein kuali tein kichiujtoya se tokniuj akin kiitayaj ke ueliskia kiixtaliskej kemej tayekankej oso tapaleuijkej. Ompa, tokniuan akin Oloch Taojtokaltianij kinixtaliayaj, kiitayaj amat tein kititaniaj uan kiixtaliayaj akin kiitayaj ke uelis. Satepan, kinmatiltiayaj tayekananij itech nechikol. Uan tayekananij kimatiltiayaj tokniuj uan kitajtaniayaj ox kinekia kiselis uan ox amo onkaya teisa tein ueliskia kitsakuilis. Satepan, motematiltiaya itech nechikol.

Sayoj ke ¿akonimej kinixtaliayaj tokniuan itech yekinika siglo? Kemansa, tatitanilmej kinixtaliayaj tokniuan itech seki taman tekit, kemej ijkuak kinixtalijkej chikome takamej akin kiitaskiaj maj mojmostaj kinxelouilianij takual siuamej akin amo nemiajok inintakauj (Hech. 6:1-6). Sayoj ke, nejin neskayot amo kinextia ke tatitanilmej kinixtalijkej tayekananij uan tapaleuianij, ta nejon takamej xa ipa tekititoyajya kemej tayekananij achto ke kiseliskiaj nejin okse tekit. Komo ijkon, ¿akonimej kinixtaliayaj tayekananij uan tapaleuianij?

Maski Biblia amo senkis kimelaua keniuj kiixtaliayaj sejse tokniuj, kemaj kinextia seki taman kemej  mochiuaya. Techiluia ke ijkuak Pablo uan Bernabé mokepayajya keman yekinika takalpanotoj itech altepemej kemej misioneros, “kinixtalijkej tayekananij itech nechikolmej keman kichiuayaj netataujtilmej uan mosauayaj, uan kintemaktiayaj iixpan Jiova akin iuan taneltokakej” (Hech. 14:23, TNM). Seki xiujmej satepan, Pablo kijkuilouilij Tito, akin no katka takalpanojkej, nejin tajtolmej: “Nimitskauak Creta uan ijkon tikmelauaskia tein amo kuali yetok uan tikinixtaliskia tayekananij itech se altepet uan okse, ijkon kemej nimitsnauatij” (Tito 1:5, TNM). Uan moajsikamati ke Timoteo, akin miakkan yajtinemik iuan tatitanil Pablo, no kipiak nejon tanauatil (1 Tim. 5:22). Ika nejin, moyekita ke yejuan tokniuan takalpanouanij taixtaliayaj, uan amo tatitanilmej uan tayekananij tein moajsiaj Jerusalén.

Ika nejin tein kinextia Biblia, Oloch Taojtokaltianij akin kinixyekanaj itaixpantijkauan Jiova kipatakej kemej kinixtaliaj tayekananij uan tapaleuianij. Itech tonal 1 metsti septiembre xiuit 2014 peua mochiua ijkon: sejse tokniuj takalpanojkej kiita ika nejmachkayot nochi tein kuali tein kichiujtokej tokniuan akin tayekananij kimatiltiaj ke uelisya kinixtaliskej. Keman takalpanoua itech nechikol, kitemoua kinixmatis nejon tokniuan uan komo ueli, tekiti iniuan itech tanojnotsalis. Satepan ke kiita iniuan tayekananij itech nechikol nochi tein kuali tein kimatiltijkej, yejua tokniuj takalpanojkej moneki kinixtalis tayekananij uan tapaleuianij itech nechikolmej kampa takalpanoua. Nejin tapaleuia maj senkis mochiua kemej itech yekinika siglo.

Keman kiixtaliaj se tokniuj, ¿akonimej kiitaj nejon? Kemej ipa, “takeual takuaujtamach uan tamatkej” yekinika kinauatijtokej maj kintamaka tokniuan (Mat. 24:45-47, TNM). Ika inepaleuil yektikatsin espíritu, kitemoua itech Biblia tajkuilolmej tein kinextia keniuj moneki tekitis axkan inechikol Dios tein moajsi noyampa taltikpak, uan satepan kitematiltia keniuj motekitiltis. Takeual takuaujtamach no kinixtalia nochin tokniuan takalpanouanij uan Taixyekananij itech Sucursal. Uan satepan, itech sejse sucursal kimelauaj keniuj mochiuas tein kitematiltia takeual. Uan no, oloch tayekananij moneki kiitaskej ika nejmachkayot ox tokniuj akin kiitaj ke uelisya kiixtaliskej itech nechikol kichiujtokya tein Biblia tajtani. Uan satepan, sejse tokniuj takalpanojkej moneki kiitas ika netataujtil tein oloch tayekananij kimatiltiaj ke kichiujtok tokniuj, uan ompa kiixtalis akin kiitas ke uelisya.

Keman tikajsikamatij keniuj kinixtaliaj tokniuan, tikitaj ke yektikatsin espíritu tekiti keman mochiua nejon taman. Nejon techpaleuia maj okachi titakuaujtamatikan iniuan akin kinixtaliaj maj taixyekanakan itech nechikol uan maj okachi tikinpoujkaitakan (Heb. 13:7, 17).

Apocalipsis 11:3 ininka tajtoua ome taixpantinij akin tanojnotsaskiaj 1,260 tonalmej. Tajkuilol techiluia ke tapial tamouilil “kintamitanilis[kia] uan kinmiktis[kia]”. Sayoj ke “eyi tonal uan tajko” satepan, nejin ome taixpantinij oksepa nemiskiaj uan nochin tachianij kimoujkaitaskiaj (Apoc. 11:7, 11).

¿Akonimej nejon ome taixpantinij? Tein kimelaua tajkuilol techpaleuia maj tikmatikan akonimej. Yekinika, techiluia ke yejuan moixnextiaj “keme ome olivoskuouit [uan] [...] ome velajketsalonime [oso tauilketsalonimej]” (Apoc. 11:4). Nejin techelnamiktia tauilketsaloni uan ome olivojkouit tein achtook ika tajtojka Zacarías. Ompa moijtoua ke ome olivoskouit kinixnextiaj “ome taixpejpenalmej”: taixyekankej Zorobabel uan tayekankatiopixkat Josué, akin moijtoua ke “ijkatokej inakastan toTeko itech nochi taltikpak” (Zac. 4:1-3, 14). Ojpatika, moijtoua ke ome taixpantinij kichiuaj seki uejueyi taman kemej tein kichiujkej Moisés uan Elías (no xikonita Apocalipsis 11:5, 6 iuan Números 16:1-7, 28-35 uan 1 Reyes 17:1 uan 18:41-45).

¿Keniuj mouikaj tein achtook moijtoj itech Apocalipsis uan Zacarías? Itech sejse tajkuilol ika tajtoua taixpejpenalmej akin kiixyekankej ixolal Dios keman kipiakej tayejyekolis. Yejua ika, akin tanojnotskej eyi xiuit uan tajko ika “tiltik takemit” tachijchiuj ika tojmit, ijkon kemej moijtojka itech Apocalipsis capítulo 11, yejuan tokniuan taixpejpenalmej akin kiixyekanayaj ixolal Dios itech xiuit 1914 keman moixtalij iTekiuajyo Dios ne iluikak. *

Keman tamitanojnotskej ijkuak takentoyaj ika tojmit, nejon tokniuan taixpejpenalmej kemej yeskia kinmiktijkej keman kintsakkej amo miak tonalmej: eyi tonal uan tajko. Akin kitauelitaj ixolal Dios kinemilijkej ke senkis kitamitsakuilijkaj inintanojnotsalis, yejua ika semi yolpakiaj (Apoc. 11:8-10).

Sayoj ke ijkon kemej achtook moijtojka, keman tamik eyi tonal uan tajko, ome taixpantinij kemej yeskia oksepa kipiakej nemilis, porin kiskej kampa tsaktoyaj. Uan no, akin amo kikaujkej Dios, yejuatsin kinmakak okse tekit tein motelneki itechkopa Jesucristo. Itech xiuit 1919 kinixtalijkej kemej “takeual takuaujtamach uan tamatkej” tein kipaleuiskia ixolal Dios itech itaueyichiualis itamian tonalmej (Mat. 24:45-47; Apoc. 11:11, 12).

Se kimoujkaita maj Apocalipsis 11:1, 2 kinexti ke nejin tachiualismej mouikaj ika seki tonalmej keman kitamachiuaskiaj oso tachiaskiaj itech templo. Malaquías capítulo 3 no kijtoua ke tachiaskiaj kampa kemej yeskia templo uan satepan tachipauaskiaj (Mal. 3:1-4). ¿Kanachi uejkauak keman tachiatoj uan tachipauatoj? Nejon mochiuak itech xiuit 1914 hasta ipeujyan xiuit 1919. Itech nejin xiujmej mochiuak tein moijtojka itech Apocalipsis capítulo 11 ke panoskia itech 1,260 tonalmej (42 metsti) uan eyi tonal uan tajko.

Semi techyolpaktia maj Jiova kichipauani itaueyichiualis ixolal uan ijkon ueliskia kichiuas “kuali tachiualisme” (Tito 2:14.) Uan no, tiktasojkamatij kuali neskayot tein kikaujkej tokniuan taixpejpenalmej akin amo kikaujkej Dios uan kiixyekankej ixolal itech tonalmej keman kipiakej tayejyekolis uan ijkon tekitikej kemej ome taixpantinij akin ininka motajtoua itech Biblia. *