He senetenari fakamua V.N., ne tala age he aposetolo ko Paulo ke he tau motua ne fekafekau he fakapotopotoaga i Efeso: “Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo leoleo, kia leveki e ekalesia he Atua ne fakafua e ia māna ke he hana toto ni.” (Gahua 20:28) Putoia fēfē e agaaga tapu ke he kotofaaga he tau motua mo e tau fekafekau lagomatai he vahā nei?

Fakamua, ne omoomoi he agaaga tapu e tau tagata ne tohia e Tohi Tapu ke fakamau hifo e tau tuaga kua lata ma e tau motua mo e tau fekafekau lagomatai. Hogofulu ma ono e poakiaga kehekehe ma e tau motua kua moua ia 1 Timoteo 3:1-7. Falu tuaga foki kua haia he tau kupu tohi tuga he Tito 1:5-9 mo e Iakopo 3:17, 18. Tau tuaga kua lata ma e tau fekafekau lagomatai kua fakakite ia 1 Timoteo 3:8-10, 12, 13. He tau kupu Tohi Tapu ne tū ai epikopo mo e tiakono, kua fakaaoga e mautolu e tau kupu leveki mo e fekafekau lagomatai ne fakavē ke he New World Translation. Uaaki, ko lautolu ne fifili mo e taute he tau kotofaaga pihia kua liogi pauaki ma e agaaga ha Iehova ke takitaki a lautolu he fakatutala kua felauaki mitaki nakai e matakainaga taane ke he tau tuaga faka-Tohi Tapu. Toluaki, ko e tagata ka fifili kua lata ke fakatātā e fua he agaaga tapu he Atua ke he moui ni haana. (Kala. 5:22, 23) Ti kua putoia e agaaga he Atua ke he tau faahi oti ne taute ke he tau kotofaaga.

Ka ko hai mooli ka kotofa e tau matakainaga taane ia? He tau tau kua mole, ko e tau fifiliaga oti ke kotofa e tau motua mo e tau fekafekau lagomatai kua fakafano ke he la ofisa he matakavi. I ai, ne kotofa he Kau Fakatufono e tau matakainaga ke fakatutala ke he tau fifiliaga nei mo e taute e tau kotofaaga kua latatonu. Ti fakailoa ai he la ofisa ke he kau he tau motua. Fakailoa mogoia he tau motua ke he tau tagata taane kua kotofa foou hagaao ke he kotofaaga ha lautolu, he hūhū ki a lautolu kua makai mo e latatonu mooli nakai a lautolu ke talia e kotofaaga. Fakahiku, ti fakailoa ai ke he fakapotopotoaga.

Ka e taute fēfē e tau kotofaaga pihia he senetenari fakamua? Falu mogo, ne taute he tau aposetolo e tau kotofaaga pauaki, tuga he kotofa e lautolu tokofitu e tagata taane ke leveki e tufatufaaga he tau mena kai he tau aho ke he tau fifine takape. (Gahua 6:1-6) Liga fitā he fekafekau e tau tagata taane ia ko e tau motua he mogo ne moua e matagahua nei.

Pete kua nakai fakamaama fakamatafeiga he tau Tohiaga Tapu e tau puhala takitaha ne taute e tau kotofaaga he vahā ia, kua kitia e tautolu e falu puhala ne taute ai. Ne tala mai ki a tautolu he magaaho  ne liliu mai ki kaina a Paulo mo Panapa he fenoga misionare fakamua ha laua, ne “kotofa e laua e tau patu [tau motua] ma lautolu ke he taha ekalesia, mo e taha ekalesia, kua liogi mo e fakakanopogi, ati tuku atu ai e laua a lautolu ke he Iki [Iehova] ne tua a lautolu ki ai.” (Gahua 14:23) Fai tau he mole, ne tohi a Paulo ke he hoa faifano haana ko Tito, he pehē: “Ko e mena hanai ne toka ai e au a koe i Kereta, kia fakahakohako e koe e tau mena ne toe, mo e kotofa e tau patu ke he taha māga mo e taha māga, tuga ne tala atu ai au kia koe.” (Tito 1:5) Pihia foki, ko Timoteo ne fano ke he tau matakavi loga mo e aposetolo ko Paulo, ne tuga kua tuku age ki a ia e pule pihia. (1 Timo. 5:22) Maaliali ai, ko e tau kotofaaga nei ne taute he tau leveki faifano, nakai he tau aposetolo mo e tau patu i Ierusalema.

He manamanatu ke he matapatu fakaakoaga nei he Tohi Tapu, ne hiki he Kau Fakatufono he Tau Fakamoli a Iehova e puhala ne taute e tau kotofaaga he tau motua mo e tau fekafekau lagomatai. Ia Sepetema 1, 2014, to taute ke he puhala nei e tau kotofaaga: Igatia e leveki takaiaga mo e onoono fakamitaki ke he tau fifiliaga kua taute he takaiaga haana. He ahiahi haana ke he tau fakapotopotoaga, to lali a ia ke iloa a lautolu ka fifili, he gahua fakalataha mo lautolu he fonua ka maeke. He mole e fakatutala mo e kau he tau motua hagaao ke he tau fifiliaga ia, ha ha he leveki takaiaga e matagahua ke kotofa e tau motua mo e tau fekafekau lagomatai he tau fakapotopotoaga he takaiaga haana. Ke he mena nei, kua muitua fakatata lahi e fakaholoaga ke he puhala he senetenari fakamua.

Ko hai ne taute e tau matagahua kehekehe he fakaholoaga nei? Tuga fa mahani, ko e “fekafekau fakamoli mo e loto matala” kua ha ha ai e matapatu matagahua ke fagai e tau fekafekau. (Mata. 24:45-47) Putoia ke he mena nei e kumikumi ke he tau Tohiaga Tapu, mo e lagomataiaga he agaaga tapu, ke moua e takitakiaga aoga ke fakagahua e tau matapatu fakaakoaga he Tohi Tapu ne lauia e puhala kua fakatokatoka e fakapotopotoaga he lalolagi katoa. Ne kotofa oti foki he fekafekau fakamoli e tau leveki takaiaga mo e tau tagata he La Komiti. Ko e mena ia, ne foaki he tau la ofisa takitaha e lagomatai aoga ke fakagahua e takitakiaga ne foaki. Igatia e kau he tau motua mo e matagahua uho lahi ke tutala fakamatafeiga ke he tau tuaga he Tohi Tapu he tau matakainaga taane ne fifili e lautolu ma e kotofaaga he fakapotopotoaga he Atua. Ko e tau leveki takaiaga takitaha kua moua e matagahua uho lahi ke manamanatu fakamitaki mo e liogi ke he tau fifiliaga ne taute he tau motua ti kotofa mogoia e tau tagata taane kua latatonu.

Ka maama e tautolu e puhala ne taute e tau kotofaaga, kua lahi e loto fakaaue ha tautolu ke he matagahua he agaaga tapu ke he fakaholoaga nei. Ti moua e tautolu e mauokafua lahi mo e fakalilifu ki a lautolu kua kotofa i loto he fakapotopotoaga Kerisiano.​—Hepe. 13:7, 17.

Kua fakatutala e Fakakiteaga 11:3 ke he tau tagata talahau mena ne tokoua ka perofeta ai ke he 1,260 e aho. Ti talahau he fakamauaga tala ko e manu favale “to kautu foki a ia kia laua, mo e kelipopo a laua.” Ka e he mole e “tolu a aho mo e maga he aho ne vevehe ua,” ko e tau tagata talahau mena nei ne tokoua ne liu momoui, kua ofomate e tau tagata oti ne kitekite.​—Fakakite. 11:7, 11.

Ko hai e tau tagata talahau mena tokoua nei? Ko e tau fakamaamaaga matafeiga he tala kua lagomatai a tautolu ke kitia a laua. Fakamua, kua tala mai ki a tautolu kua fakatai a laua “ko e tau akau olive ia ne ua, mo e tau tuāga lamepa ne ua.” (Fakakite. 11:4) Fakamanatu he mena nei ki a tautolu e tuaga lamepa mo e tau akau olive ne ua ne fakamaama he perofetaaga ha Sakaria. Ko e tau akau olive ne ua ia kua fakatai ke he “tau tagata kua fakauku a laua na,” ko laua ia ko e Kovana ko Serupapelu mo e Ekepoa ne Mua ko Iosua, “kua tutu ai ki mua he Iki he lalolagi oti.” (Saka. 4:1-3, 14) Uaaki, ko e tau tagata talahau mena ne tokoua kua fakamaama ai ne taute e tau fakamailoga tuga ne taute e Mose mo Elia.​—Fakatatai Fakakiteaga 11:5, 6 mo e Numera 16:1-7, 28-35 mo e 1 Tau Patuiki 17:1; 18:41-45.

Ko e heigoa e mena ne tatai he tau mena ua nei? He tau vala tala takitaha ia, hagaao e tala ki a lautolu kua fakauku he Atua ne takitaki he magahala kamatamata ne uka lahi. Ti ko e fakamooliaga he Fakakiteaga veveheaga 11, ko e tau matakainaga fakauku ne takitaki he magahala ne fakatū e Kautu he Atua he lagi he 1914 ne fakamatala he “ie talatala” ke he tolu mo e hafa e tau.

He matahiku he fakamatala ha lautolu he tapulu ke he ie talatala, ko lautolu nei ne fakauku kua kelipopo ke he puhala fakatai he mogo ne tuku a lautolu ke he fale puipui he magaaho kū, kua fakatai ke he tolu mo e hafa e aho. Ke he onoonoaga he tau fī he tau tagata he Atua, kua kelipopo po ke mate e gahua ha lautolu, ti fiafia lahi e tau fī.​—Fakakite. 11:8-10.

Ka e fakamooli e tau kupu he perofetaaga, he matahiku he tolu mo e hafa e aho, ne liu momoui e tau tagata talahau mena ne ua. Nakai ni fakatoka mai a lautolu nei ne fakauku he fale puipui ka ko lautolu ne tumau e fakamooli kua moua e kotofaaga pauaki mai he Atua he puhala he Iki ha lautolu ko Iesu Keriso. He 1919 kua fakalataha a lautolu mo lautolu ne kotofa ko e “fekafekau fakamoli mo e loto matala” ke leveki e tau manako fakaagaaga he tau tagata he Atua he magahala he tau aho fakahiku.​—Mata. 24:45-47; Fakakite. 11:11, 12.

Kua fakamatutaki he Fakakiteaga 11:1, 2 e tau mena tutupu nei ke he mogo ka fafati e faituga fakaagaaga. Ia Malaki veveheaga 3 kua talahau e tiviaga pihia he faituga fakaagaaga, ti mui mai e magaaho he fakameāaga. (Mala. 3:1-4) Fiha e leva he taute e tiviaga mo e fakameāaga nei? Tali mai he 1914 ke he kamataaga he 1919. Ko e magahala nei kua putoia e 1,260 e aho (42 e mahina) mo e ke he puhala fakatai tolu mo e hafa e aho ne hagaao ki ai ia Fakakiteaga veveheaga 11.

Fiafia mooli a tautolu ha kua fakatoka e Iehova e gahua hakahaka fakaagaaga nei ke fakameā ai e motu fifili ke he tau gahua mitaki! (Tito 2:14) Lafi ai, loto fakaaue a tautolu ke he fifitakiaga ne fakatoka e lautolu ne fakauku kua fakamooli ne takitaki he magaaho ia ne kamatamata ti eke he puhala fakatai mo tau tagata talahau mena ne tokoua. a