I асырда Павлус ресул Эфесдәки йыгнагың яшулуларына шейле дийди: «Өзүңизе ве Реб Худайың Өз ганы билен эдинен йыгнагыны бакмак үчин, Мукаддес Рухуң сизи ичинде гөзегчи эдип гоян тутуш сүрүсине гөз-гулак болуң» (Рес. иш. 20:28). Шу гүнлер йыгнакда яшулуларың ве гуллук хызматчыларының белленилмегинде мукаддес рухуң нәхили әхмиети бар?

Биринҗиден, Худайың Сөзүни язан адамлар мукаддес рух аркалы яшулулар ве гуллук хызматчылары үчин бирнәче талаплары яздылар. 1 Тимотеос 3:1—7-нҗи аятларда яшулулар үчин он алты саны талап бар. Титус 1:5—9-нҗы ве Якуп 3:17, 18-нҗи аятларда башга-да талаплар агзаляр. Гуллук хызматчыларындан эдилйән талаплар барада 1 Тимотеос 3:8—10, 12, 13-нҗи аятларда айдыляр. Икинҗиден, доганлары җогапкәрли борҗа теклип эдйән ве беллейән яшулулар доганың Мукаддес Язгылардакы талаплара етерлик дереҗеде лайык гелйәндигини аныкламак үчин, Ехова дога эдип, мукаддес рухуны дилейәрлер. Үчүнҗиден, теклип эдилйән доган хем дурмушында Худайың мукаддес рухуның мивесини гөркезмели (Гал. 5:22, 23). Гөршүмиз ялы, доган җогапкәрли борҗа беллениленде әхли ягдайда-да мукаддес рухуң улы әхмиети бар.

Эмма доганлары аслында ким беллейәр? Өңлер яшулы ве гуллук хызматчысы болмага теклип эдилйән доган барада филиала хат уградылярды. Ол ерде Ёлбашчылык маслахаты тарапындан белленилен доганлар гелен хата середип, доган талаба лайык гелйән болса, оны беллейәрдилер. Соңра филиал бу барада яшулулар маслахатына хабар берйәрди. Яшулулар хем өз гезегинде белленен доган билен геплешип, ондан җогапкәрли борҗы алмага тайындыгыны ве талаба лайык гелйәндигини сораярдылар. Иң соңунда болса, йыгнакда билдириш эдилйәрди.

I асырда кәвагт ресуллар доганлары айратын юмушлары ерине етирмәге беллейәрдилер. Мысал үчин, олар еди саны догана дул хатынлара гүнделик иймити пайламагы табшырдылар (Рес. иш. 6:1—6). Эмма бу юмуш табшырылмазындан өң, шол доганлар эййәм яшулы болуп гуллук эден болмалы. Онда I асырда яшулулар ве гуллук хызматчылары нәдип белленилйәрди?

Мукаддес Язгыларда оларың нәдип белленендиги җикме-җик айдылмаса-да, кәбир гөркезмелер берилйәр. Павлус билен Барнабас илкинҗи миссионер гуллугындан өйлерине гайдып гелйәркәлер, «хер йыгнакда олара ёлбашчылар  сайлап, оразалы дога эдип, олары иман эден Реблерине табшырдылар» (Рес. иш. 14:23). Бирнәче йылдан соң, Павлус ресул йыгнаклара биле айланан ёлдашы Титуса шейле язды: «Ыза галан ишлери дүзетмегиң, саңа буйрушым ялы, хер шәхерде яшулулар беллемегиң үчин, ине, шу себәпден мен сени Гиритде гоюп гайтдым» (Титус 1:5). Павлус ресул билен көп йыгнаклара айланан Тимотеоса хем шейле ыгтыяр берлипди (1 Тим. 5:22). Гөршүмиз ялы, доганлары Иерусалимдәки ресуллар ве яшулулар дәл-де, айланян гөзегчилер беллейәрди.

Ехованың Шаятларының Ёлбашчылык маслахаты Мукаддес Язгылардакы бу вакалары гөз өңүнде тутуп, доганлары яшулы я-да гуллук хызматчысы эдип беллемекде дүзедиш гиризди. 2014-нҗи йылың 1-нҗи сентябрындан башлап доганлар шу тертип боюнча белленилйәр: Хер бир айланян гөзегчи этрабында теклип эдилйән доган барадакы хата үнсли середйәр. Ол йыгнаклары идег эденде, бу доган билен якындан танышмак үчин, мүмкин болса, вагза чыкяр. Соңра ол йыгнагың яшулулар маслахаты билен теклип эдилйән доган барада хата середип, гүррүңдеш боляр. Диймек, айланян гөзегчиниң этрабындакы доганлары яшулы я-да гуллук хызматчысы эдип беллемек җогапкәрчилиги бар. Шейдип, җогапкәр доганлар I асырдакы ялы белленйәр.

Доганларың җогапкәрли борҗа белленмегине кимлер гатнашяр? Билшимиз ялы, «садык хем акыллы хызматкәриң» өйдәки хызматкәрлери рухы иймит билен үпҗүн этмек җогапкәрчилиги бар (Мат. 24:45—47). Мунуң үчин олар мукаддес рух аркалы Худайың Сөзүни чуңңур өзлешдирйәрлер. Шейдип, олар бүтин дүнйәдәки йыгнакларың гурамачылыклы болмагы үчин, Мукаддес Язгылара эсасланан пейдалы гөркезмелери берйәрлер. Шейле-де садык хызматкәр әхли этрап гөзегчилерини ве филиал комитетиниң агзаларыны беллейәр. Филиаллар хем берлен гөркезмелере нәдип говы эерип болҗакдыгы бабатда маслахат берйәрлер. Яшулулар маслахаты йыгнакда җогапкәрли борч алмага теклип эдйән доганларының Мукаддес Язгыларың талапларына лайык гелйәндигине говы гөз етирмәге борчлудыр. Этрап гөзегчилериниң ваҗып җогапкәрчилиги бар. Олар яшулулар тарапындан теклип эдилйән доган барада хата үнсли середип ве дога эдип, онуң талаба лайык гелйәндигине гөз етиренден соң беллемели.

Биз йыгнакда яшулуларың ве гуллук хызматчыларының нәдип белленйәндиги барада билип, мукаддес рухуң әхмиетине говы дүшүнйәрис. Шейле-де йыгнакда җогапкәрли борҗа белленен доганлара ынамымыз ве хорматымыз хас-да артяр (Евр. 13:7, 17).

Ылхам 11:3-де 1260 гүнләп пыгамберлик этҗек ики гүвә ве җанаварың «олары еңип өлдүрҗекдиги» барада айдыляр. Эмма үч ярым гүнден соң, шол ики гүвә дирелип, гөренлери хайран галдырмалыды (Ылх. 11:7, 11).

Бу ики гүвә кими аңладяр? Биз аятдакы кәбир айратынлыклара серетсек, оларың кимдигини аныклап билерис. Биринҗиден, оларың «ики зейтун агаҗыны, ики шемданы» аңладяндыгы айдыляр (Ылх. 11:4). Бу бизе Закаряның пыгамберлигинде агзалян шемданы ве ики зейтун агаҗыны ятладяр. Шол зейтун агачлары «месх эдилип, бүтин ер йүзүниң Таңрысына гуллук эдйән ики кишини», ягны Зерубабел хөкүмдары ве баш руханы Ешувы суратландырярды (Зак. 4:1—3, 14). Икинҗиден, ики гүвәниң Муса ве Ыляс пыгамбериңки ялы аламатлары гөркезҗекдиги айдыляр (Ылхам 11:5, 6-ны, Санлар 16:1—7, 28—35-и ве 1 Патышалар 17:1; 18:41—45-и деңешдириң).

Ылхам ве Закаря китабындакы сөзлериң нәхили багланышыгы бар? Бу вакаларың икисинде-де кын ягдайларда Худайың халкына ёлбашчылык эден месх эдиленлер барада агзаляр. Ылхам китабының 11-нҗи бабындакы сөзлер 1914-нҗи йылда гөкде Худайың Патышалыгы дикелдиленден соң, Худайың халкына ёлбашчылык эден месх эдилен доганлар үч ярым йыллап «җул гейнип» вагыз эденлеринде ерине етди *.

Месх эдилен месихчилер җул гейнип вагыз эденден соңра, олары гысга вагтлайын, ягны гөчме маныда айданыңда, үч ярым гүн түрмә басдылар. Шейдип, олар гөчме маныда өлдүлер. Шонда душманлар Худайың халкының вагыз ишини тогтадып билдик дийип, җуда бегендилер (Ылх. 11:8—10).

Эмма пыгамберлиге гөрә, бу ики гүвә үч ярым гүнден соң дирелмелиди. Шонда месх эдилен месихчилер диңе бир түрмеден бошадылман, эйсем, вепалы галандыгы үчин, Иса Месих аркалы Еховадан айратын юмуш алдылар. Олар 1919-нҗы йылда «садык хем акыллы хызматкәр» эдип белленилди. Бу месх эдиленлер соңкы гүнлерде Худайың халкына рухы иймити пайламалыды (Мат. 24:45—47; Ылх. 11:11, 12).

Бу вакалар Ылхам 11:1, 2-нҗи аятларда айдылян рухы ыбадатхананың өлченмеги билен багланышыклыды. Малаки китабының 3-нҗи бабында-да рухы ыбадатхананың барланҗакдыгы ве арассаланҗакдыгы айдылыпды (Мал. 3:1—4). Бу барлаг ве арассалайыш иши нәче вагт довам этди? Ол 1914-нҗи йылдан 1919-нҗы йылың башларына ченли довам этди. Бу аралык Ылхам китабының 11-нҗи бабында айдылян 1260 гүни (42 ай) ве гөчме маныдакы үч ярым гүни өз ичине аляр.

Биз Ехованың бу рухы арассалайыш ишине ёлбашчылык эдип, халкының ягшы ишлери этмеги үчин, олары тәмизләндигине өрән бегенйәрис! (Титус 2:14). Шейле-де биз месх эдилен месихчилериң барлаг дөврүнде Худая вепалы галып, аҗайып гөрелде гөркезендиги ве гөчме маныдакы ики гүвә болуп хызмат эдендиги үчин миннетдардырыс *.