Kxapulana siglo akxni xminita Jesús, apóstol Pablo kawanilh lakgkgolotsin xalak congregación nema xwi kʼÉfeso: “Nkuintaj kakatlawakantit, chu nkuintaj katlawatit xlipaks nkanajlanin antani kxlakgstipankan nkaliwilinitan spíritu santo napuxkunanikgoyatit xtamakgstokgnin nkimPuchinakan, wa nti lilakgmaxtulh xkgalhni” (Hech. 20:28). ¿La makgtayanan espíritu santo, akxni kalaksakkan lakgkgolotsin chu siervos ministeriales xalak congregación la uku?

Pulana, espíritu santo tlawalh pi xtsokgnanin Biblia xtsokgkgolh tuku xlitlawatkan tiku lakgkgolotsin chu siervos ministeriales litaxtuputunkgo. Anta 1 Timoteo 3:1-7, lichuwinan pulakkuchaxan tuku talakaskin xlakata kgolotsin nalitaxtukan. Atanu tuku talakaskin tatsokgnit kTito 1:5-9 chu kSantiago 3:17, 18. Chu tuku talakaskin xlakata siervos ministeriales nalitaxtukan, talichuwinan 1 Timoteo 3:8-10, 12, 13. Xlipulaktiy, tiku wankgo pi wi tiku kgolotsin nalitaxtu chu tiku kalakgayawa uma taskujut, skinikgo Jehová pi xʼespíritu santo kakapulalilh akxni akxilhkgo komo uma tala makgatsi tuku taskin kBiblia chuna la tlan makgantaxti. Xlipulaktutu, putum tiku kgolotsin chu siervo ministerial litaxtuputun xlimasiyat kxlatamat tayat nema masta xʼespíritu santo Dios (Gál. 5:22, 23). Chuna la akxilhaw, espíritu santo makgtayanan akxni wi tiku laksakkan xlakata wi tuku nalakgataya kcongregación.

¿Tiku laksaka la uku tiku kgolotsin chu siervo ministerial nalitaxtu? Nina makgas, xlakata chatum tala tlan wi tuku xlakgatayalh kcongregación, xmalakgachakan tatsokgni ksucursal niku xtapakgsi. Anta, natalan tiku xkalaksaknit Lakgkgolotsin tiku Pulalinkgo xTatayananin Jehová, xʼakxilhkgo uma tatsokgni chu xlaksakkgo tiku kgolotsin o siervo ministerial xlitaxtulh. Alistalh, sucursal xkamakatsini lakgkgolotsin xalak congregación. Chu lakgkgolotsin, xmakatsinikgo tiku kgolotsin o siervo ministerial lilaksakka chu xkgalhskinkgo komo xmakgamakglhtinanputun tuku xlakgayawamaka chu komo ni xʼanan tuku xtlawalh pi nila xmakgantaxtilh. Chu awatiya, xmakatsininankan kcongregación.

Pero ¿la xkalaksakkan lakgkgolotsin chu siervos ministeriales kxapulana siglo? Xmin kilhtamaku, apóstoles wa tiku xkalaksakkgo, la akxni kalaksakkgolh kgalhtujun lakchixkuwin xlakata xkuentajtlawakgolh la xkamakgpitsinimaka chali chali xliwatkan lakpuskatin tiku xninita xchixkukan (Hech. 6:1-6). Pero max kgolotsin xalak congregación xlitaxtukgoya akxni nina xkalakgayawakan uma taskujut.

Maski Biblia ni putum wan la xlaksakkan lakgkgolotsin chu siervos ministeriales, kinkawaniyan tsinu la xtlawakan. Wan pi akxni Pablo chu Bernabé kitaspitkgolh xlakata xapulana kilichuwinantapulikgolh Dios, «laksakkgolh makgapitsin lakkgolun lakimpi  wa napuxkunanikgoy wanti aya xlipawankgonit Jesús, chu akxni putum xkgalhxtakgnankgotlawakgolh oración, skinikgolh Dios pi wa kamakgtayakgolh kxtaskujutkan» (Hech. 14:23, Hua Xasasti Talaccaxlan, 1999). Titaxtulh akglhuwa kata, Pablo wanilh xcompañero Tito: «Wa xpalakata yuma ktilimakgaxtakgni kCreta lakimpi nalakkaxtlawaya wa ntu [nitlan TNM], chu namapuxkunikgoya lakkgolun nkakgatunu [kachikin] xtachuna lantla klimapakgsin» (Tito 1:5). Timoteo, tiku lhuwa talichuwinantapulilh Dios apóstol Pablo, max na lakgayawaka chuna natlawa (1 Tim. 5:22). Liwana tasiya pi superintendentes viajantes, wa tiku xkalaksakkgo tiku kgolotsin o siervo ministerial nalitaxtukgo, chu ni wa apóstoles nipara lakgkgolotsin tiku xwilakgo kJerusalén.

Lakgkgolotsin tiku Pulalinkgo xTatayananin Jehová, kikilhtiyakgonit tuku aku lichuwinaw nema tatsokgnit kBiblia, chu lakgpalikgolh la kalaksakkan tiku lakgkgolotsin chu siervos ministeriales nalitaxtukgo. Uma tuku tsukuka tlawakan 1 xla septiembre kata 2014: chatunu superintendente de circuito, liwana lakputsanani akxni lakgkgolotsin wankgo pi wi tiku tlan xlitaxtulh kgolotsin o siervo ministerial anta kcircuito nema lakgapaxialhnan. Akxni kalakgapaxialhnankgo congregaciones, liwana kalakgapaskgo umakgolh natalan chu akxtum katalichuwinankgo Dios komo tlan chuna tlawakgo. Alistalh, kalitachuwinankgo lakgkgolotsin xalak congregación xlakata uma tala, superintendente de circuito wa lakgchan nakalaksaka tiku lakgkgolotsin o siervos ministeriales nalitaxtukgo kcongregaciones nema tapakgsi kxcircuito. Chuna, uma talakkaxlan tlakg chuna la xtlawakan kxapulana siglo.

¿Tiku lakkaxwili la natatlawa pulakatunu uma? Chuna la putum kilhtamaku tlawakanit, «skujni xalipaw chu xaskgalala» wa tiku lakgchan nakamaxki liwat xaʼespiritual, amakgapitsi skujnin (Mat. 24:45-47, TMN). Xlakata xtamakgtay espíritu santo, lakputsakgo tuku wan Biblia xlakata la xlitalakkaxtawilat la uku xkachikin Dios xlikalanka katiyatni chu alistalh kamakatsinikgo natalan la namakgantaxtikgo uma. Skujni xalipaw, na wa kalaksaka putum tiku superintendentes de circuito nalitaxtukgo chu tiku namakgtapakgsikgo kComité de Sucursal. Chu sucursal na makgtayanan xlakata namakgantaxtikan uma tuku lakkaxwilikanit. Lakgkgolotsin tiku pulalinkgo congregación, kalakgchan liwana naʼakxilhkgo komo tala tiku lakpuwankgo pi tlan wi tuku xlakgatayalh kcongregación, makgantaxtima chuna la wan Biblia pi xlitlawat xlakata tlan wi tuku nalakgayawakan. Chatunu superintendente de circuito kgalhi lanka talakgatay pi liwana nalakputsanani chu natlawa lhuwa oración akxni akxilhma tuku wankgo lakgkgolotsin xlakata chatum tala chu alistalh nawan komo tlan wi tuku nalakgataya.

Akxni akgatekgsaw la kalaksakkan lakgkgolotsin chu siervos ministeriales, akxilhaw pi espíritu santo pulalin putum tuku tlawakan. Tlakg kalipawanaw chu kamaxkiyaw kakni tiku kalaksakkanit xlakata wi tuku nalakgatayakgo kcongregación xla kstalaninanin Cristo (Heb. 13:7, 17).

Apocalipsis 11:3 lichuwinan chatiy tatayananin tiku 1,260 kilhtamaku xʼamakgo lichuwinankgo tuku aku nala. Alistalh Biblia wan: “Wa animalh nakatlajay, na nakamakgniy”. Pero «[k]xliakgtutu kilhtamaku aitat», umakgolh tatayananin xʼamakgo lakastakwanankgo chu putum tiku xʼakxilhkgolh kaks xlilakawankgolh (Apoc. 11:7, 11).

¿Tiku umakgolh chatiy tatayananin? Tuku Biblia wampara kinkamakgtayayan nakatsiyaw. Pulana wan pi litaxtukgo «xtachuna akgatiy [...] olivo, xawa akgtuy pumakgskgo» o candelabro (Apoc. 11:4, Hua Xasasti Talaccaxlan, 1999). Uma kinkamalakapastakayan pumakgskgot chu akgatiy olivo nema lichuwinalh palakachuwina Zacarías. Anta wan pi umakgolh olivos kilhchanima «chatiy xatalaksakni»: mapakgsina Zorobabel chu xapuxku sacerdote Josué, «tiku yakgolh kxpaxtun Malana xlikalanka katiyatni» (Zac. 4:1-3, 14). Xlipulaktiy, wan pi umakgolh chatiy tatayananin tlawakgo milagros chuna la xtlawakgo Moisés chu Elías (katamalakxtupi Apocalipsis 11:5, 6 tuku wan Números 16:1-7, 28-35 chu 1 Reyes 17:1; 18:41-45).

¿Tuku watiya lichuwinankgo libro xla Apocalipsis chu Zacarías xlakata tuku aku xʼama la? Kpulaktiy libro talichuwinan lakchixkuwin tiku xkalaksakkanit chu pulalinkgolh xkachikin Dios akxni lu tuwa tuku xtitaxtumakgo. Wa xlakata, akxni kgantaxtulh capítulo 11 xla Apocalipsis, tiku lichuwinankgolh Dios akgtutu kata aitat chu xwilikgonit «lhakgat nema limasiya pi lipuwamakgolh», wa lakchixkuwin tiku kalaksakkanit naʼankgo kʼakgapun tiku xpulalinkgo xkachikin Dios kkata 1914, akxni lakkaxwilika Tamapakgsin kʼakgapun. *

Akxni maʼakgasputukgolh la xlichuwinamakgo Dios chu xwilikgonit «lhakgat nema limasiya pi lipuwamakgolh», tiku kalaksakkanit naʼankgo kʼakgapun xtachuna la nikgolh akxni katamaknuka kpulachin tlakg ni makgas: wankan pi akgtutu kilhtamaku aitat. Xtalamakgasitsin xkachikin Dios lu paxuwakgolh xlakata lakpuwankgolh pi xmasputukgonit xtaskujutkan (Apoc. 11:8-10).

Pero chuna la xwankanit pi nala, akxni akgasputli akgtutu kilhtamaku aitat, chatiy tatayananin lakastakwanankgolh: amakgolh xatalaksakni katamakxtuka kpulachin. Nachuna, Jehová limaklakaskilh Jesucristo xlakata kalakgayawalh tuku lu xlakaskinka tiku ni makgatsankgananikgolh. Kkata 1919, xlamakgolh tiku na litaxtukgolh «skujni xalipaw chu xaskgalala», nema xʼama kamaxki xkachikin Dios tuku xmaklakaskinkgolh kxtakanajlakan kxaʼawatiya kilhtamaku (Mat. 24:45-47; Apoc. 11:11, 12).

Apocalipsis 11:1, 2 limasiya pi akxni xkgantaxtulh tuku aku lichuwinawa na akxni xʼama laklhkawilikan templo xaʼespiritual. Malaquías capítulo 3 xtachuna lichuwinan la xʼamaka lakputsananikan templo xaʼespiritual, chu alistalh xʼamaka maskulunkikan (Mal. 3:1-4). ¿La xlilhuwa kilhtamaku lilakputsananika chu limaskulunkika? Tsukulh kkata 1914 asta kxkilhtsukut kata 1919. Uma kilhtamaku anta makgtanulh pulaktiy kilhtamaku nema talichuwinan kcapítulo 11 xla Apocalipsis: wa 1,260 kilhtamaku (42 papaʼ) chu akgtutu kilhtamaku aitat.

Lu lipaxuwayaw pi Jehová maskulunkilh kxtakanajlakan chu lakkaxwililh akgtum kachikin nema «natlawaputunkgoy wa ntu xatlan tatlaw» (Tito 2:14). Na paxtikatsiniyaw xatlan xliʼakxilhtitkan natalan tiku kalaksakkanit naʼankgo kʼakgapun chu pulalinkgolh xkachikin Dios akxni titaxtukgolh tuku tuwa, chu chuna tlawakgolh tuku xkalakgchan tiku xlitaxtukgo chatiy tatayananin. *