Han siyahan nga siglo C.E., ginsidngan ni apostol Pablo an mga tigurang ha kongregasyon han Efeso: “Tagi hin atensyon an iyo kalugaringon ngan an bug-os nga panon, kay ginpili kamo han baraan nga espiritu sugad nga ira mga paramangno, basi atamanon an kongregasyon han Dios nga ginpalit niya pinaagi han dugo han iya Anak.” (Buh. 20:28) Ano an papel han baraan nga espiritu ha pagpili hin mga tigurang ngan ministeryal nga mga surugoon yana?

Siyahan, ginpagios han baraan nga espiritu an mga parasurat han Biblia nga irekord an mga kwalipikasyon para ha mga tigurang ngan ministeryal. An 16 nga kwalipikasyon para ha mga tigurang mababasa ha 1 Timoteo 3:1-7. An dugang pa hito makikita ha Tito 1:5-9 ngan Santiago 3:17, 18. An mga kwalipikasyon para ha ministeryal nga mga surugoon gin-uunabi ha 1 Timoteo 3:8-10, 12, 13. Ikaduha, adton nagrirekomendar ngan nagpipili espisipiko nga nag-aampo nga giyahan hira han espiritu ni Jehova samtang ira ginrirepaso kon naaabot ba han brother an Kasuratanhon nga mga kwalipikasyon ha makatadunganon nga paagi. Ikatulo, kinahanglan ipakita han iginrirekomendar an bunga han baraan nga espiritu ha iya pagkinabuhi. (Gal. 5:22, 23) Salit an espiritu han Dios may importante nga papel ha bug-os nga proseso han pagpili.

Pero hin-o an aktuwal nga nagpipili ha sugad nga mga brother? Han naglabay, an ngatanan nga rekomendasyon ha pagpili hin mga tigurang ngan ministeryal iginpapadara ha lokal nga sanga nga opisina. Didto, may mga brother nga gintokahan han Nagmamando nga Lawas ha pagrepaso hini nga mga rekomendasyon ngan ha paghimo hin angayan nga mga pagpili. Sunod, papahibaroon han sanga nga opisina an lawas han mga tigurang. Katapos, susumatan han mga tigurang an brother may kalabotan ha pagpili ha iya, ngan papakianhan kon andam ba hiya ngan igintutugot ba han iya kahimtang nga karawaton ito nga toka. Katapos, ipapahibaro ito ha kongregasyon.

Han siyahan nga siglo, usahay an mga apostol mismo an nagpipili, sugad han ira pagpili hin pito nga lalaki nga manginginano han adlaw-adlaw nga panhatag hin pagkaon ha mga balo. (Buh. 6:1-6) Kondi diri ini nagpapakita nga an mga apostol liwat an nagpili ha mga tigurang ngan ministeryal tungod kay ini nga kalalakin-an bangin mga tigurang na antes pa hira tagan hinin dugang nga toka. Kon sugad, paonan-o ginpili an mga tigurang ngan ministeryal nga mga surugoon ha siyahan nga siglo?

Bisan kon waray idetalye han Kasuratan kon paonan-o ginhimo an tagsa nga pagpili hadto, may makikita kita nga pipira nga impormasyon kon paonan-o ito ginhimo. An asoy nasiring nga han inuli hira Pablo ngan Bernabe tikang ha ira siyahan nga pagbiyahe sugad nga mga misyonero, “nagpili hira hin kalalakin-an  nga magigin mga tigurang ha tagsa nga kongregasyon. Nag-ampo hira ngan nagpuasa, ngan ira igintapod kan Jehova ini nga mga tigurang nga natoo ha iya.” (Buh. 14:23) Paglabay hin mga katuigan, hi Pablo nagsurat ha iya kaupod ha pagbiyahe nga hi Tito, hiya nagsiring: “Ginbilin ko ikaw ha Creta basi tadungon mo an mga butang nga may depekto ngan magpili ka hin katigurangan ha tagsa nga syudad, sugad han akon instruksyon ha imo.” (Tito 1:5) Hi Timoteo, nga agsob kaupod ni apostol Pablo ha pagbiyahe, baga hin gintagan liwat hin sugad nga awtoridad. (1 Tim. 5:22) Matin-aw nga ini nga mga pagpili ginhimo han nagbibiyahe nga mga paramangno, diri han mga apostol ngan han katigurangan ha Jerusalem.

Uyon hini nga susbaranan ha Biblia, may ginhimo nga pagbag-o an Nagmamando nga Lawas han mga Saksi ni Jehova ha proseso han pagpili hin mga tigurang ngan ministeryal nga mga surugoon. Tikang han Septyembre 1, 2014, an mga pagpili ginhihimo sumala ha masunod: Ginrirepaso hin maopay han tagsa nga paramangno han sirkito an mga rekomendasyon dida ha iya sirkito. Ha iya pagbisita ha mga kongregasyon, mangangalimbasog hiya nga makilala adton mga iginrekomendar, ngan kon posible makikig-upod hiya ha ira ha ministeryo. Katapos hisgotan kaupod han lokal nga lawas han mga tigurang an may kalabotan han mga rekomendasyon, hiya an magpipili hin mga tigurang ngan ministeryal ha mga kongregasyon ha iya sirkito. Ini nga kahikayan haros pariho han ginbuhat nga mga pagpili hadton siyahan nga siglo.

Hin-o an mga nahidadabi hini nga proseso han pagpili? Tikang pa hadto, “an matinumanon ngan maaramon nga uripon” an may nangunguna nga responsabilidad ha pagpakaon ha mga surugoon ha panimalay. (Mat. 24:45-47) Upod hini an pag-usisa hin maopay ha Kasuratan ha bulig han baraan nga espiritu basi makagtagana hin giya kon paonan-o iaaplikar an mga prinsipyo ha Biblia nga may kalabotan ha pag-organisar han mga kongregasyon ha bug-os nga kalibotan. An matinumanon nga uripon liwat an nagpipili han ngatanan nga paramangno han sirkito ngan han mga membro han Komite han Sanga. An tagsa nga sanga nga opisina naman nagtatagana hin praktikal nga bulig basi maimplementar an giya han matinumanon nga uripon. An tagsa nga lawas han mga tigurang may seryoso nga responsabilidad nga repasuhon hin maopay an Kasuratanhon nga mga kwalipikasyon han mga brother nga ira iginrirekomendar basi pilion ha kongregasyon han Dios. An tagsa nga paramangno han sirkito may seryoso nga responsabilidad nga mainampoon nga usisahon hin maopay an mga rekomendasyon han mga tigurang antes hiya magpili hin kwalipikado nga kalalakin-an.

Kon maaram kita kon paonan-o ginhihimo an pagpili, mas masasabtan naton an papel han baraan nga espiritu hini nga proseso. Salit magkakaada kita hin mas daku nga pagsarig ngan respeto ha mga pinili dida ha Kristiano nga kongregasyon.—Heb. 13:7, 17.

Ha Pahayag 11:3, gin-uunabi an duha nga saksi nga mananagna ha sulod hin 1,260 ka adlaw. An asoy nasiring nga “pipirdihon hira ngan papatayon” han mapintas nga hayop. Pero paglabay hin “tulo ngan tunga ka adlaw,” inin duha nga saksi babanhawon salit mahipapausa gud an ngatanan nga nakakita ha ira.—Pah. 11:7, 11.

Hin-o ini nga duha nga saksi? An mga detalye hini nga asoy nabulig ha aton basi makilala hira. Siyahan, gin-uunabi hito nga “ginsisimbolohan hira han duha nga kahoy nga olibo ngan han duha nga burutangan han lampara.” (Pah. 11:4) Nagpapahinumdom ini ha aton han kandelero ngan duha nga kahoy nga olibo nga iginhulagway ha tagna ni Sakarias. Ito nga mga kahoy han olibo nagsisimbolo ha “duha nga dinihogan,” nga hi Gobernador Serubabel ngan an Hitaas nga Saserdote nga hi Josue, nga “natindog ha hirani han Ginoo han bug-os nga tuna.” (Sak. 4:1-3, 14) Ikaduha, gin-uunabi nga an duha nga saksi naghihimo hin mga tigaman nga pariho han ginhimo nira Moises ngan Elias.—Itanding an Pahayag 11:5, 6 ha Numeros 16:1-7, 28-35 ngan 1 Hadi 17:1; 18:41-45.

Ano an kaparihoan han mga asoy ha Pahayag ngan ha Sakarias? Pariho ito nagtutudlok ha mga dinihogan han Dios, nga nanguna ha iya katawohan durante han makuri nga panahon han pagsari. Salit sugad nga katumanan han Pahayag kapitulo 11, an dinihogan nga kabugtoan nga nanguna ha panahon nga gin-establisar an Ginhadian ha langit hadton 1914 nagsangyaw nga nakasul-ot hin “sako nga panapton” ha sulod hin tulo ngan tunga ka tuig.

Ha kataposan han ira pagsangyaw nga nakasul-ot hin sako nga panapton, ini nga mga dinihogan simboliko nga ginpatay han ginpriso hira ha sulod hin halipot nga panahon, ha sulod hin simboliko nga tulo ngan tunga ka adlaw. Para ha mga kaaway han katawohan han Dios, ginpatay o bug-os nga ginpaundang na an pagsangyaw nga buruhaton ngan nalipay gud hira hito.—Pah. 11:8-10.

Pero sugad han igintagna, ha kataposan han tulo ngan tunga ka adlaw, ginbanhaw an duha nga saksi. Ini nga mga dinihogan ginpagawas ha prisohan, ngan adton nagpabilin nga matinumanon nakakarawat hin espesyal nga toka tikang ha Dios pinaagi ha ira Ginoo nga hi Jesu-Kristo. Han 1919, kaapi hira hadton ginpili sugad nga “matinumanon ngan maaramon nga uripon” basi atamanon an espirituwal nga panginahanglan han katawohan han Dios durante han kataposan nga mga adlaw.—Mat. 24:45-47; Pah. 11:11, 12.

Makapainteres, iginpapakita han Pahayag 11:1, 2 an koneksyon hini nga panhitabo ha panahon nga susuklon, o usisahon na, an espirituwal nga templo. An Malakias kapitulo 3 nag-uunabi han pariho nga pag-usisa ha espirituwal nga templo, nga ginsundan hin panahon han paglimpyo. (Mal. 3:1-4) Mationan-o kahilawig inin pag-usisa ngan paglimpyo? Nahitabo ini tikang han 1914 tubtob ha temprano nga mga bulan han 1919. Ini nga peryodo han panahon nagtutudlok ha 1,260 ka adlaw (42 ka bulan) ngan ha simboliko nga tulo ngan tunga ka adlaw nga gin-uunabi ha Pahayag kapitulo 11.

Mapasalamaton gud kita nga ginpahinabo ni Jehova inin espirituwal nga pagputli basi limpyohan an usa nga espesyal nga katawohan para ha mag-opay nga buhat! (Tito 2:14) Gin-aapresyar liwat naton an ehemplo han matinumanon nga mga dinihogan nga nanguna durante han panahon han pagsari ngan nag-alagad sugad nga an simboliko nga duha nga saksi. *