KÖBÖ 6 septiembre kä 1926, ni peregrino (ni konkrekasion tuabitikä) käi Japón nämene nüne kä Estados Unidos abokän nikaninta Japón sribikäre misionero. Ni itibe käkwe ja kä biani ne kwe täräkwata La Torre del Vigía juandre kräke ye nie aibe nämene niara ngübare ngäbiti juta yete, ni ye nämene nitre braibe tötike Bibliabätä kä Kobe yekänti. Köbö 2 enero kä 1927 yete, Nitre ja Tötikaka Bibliabätä gätä kri nuainbare kena juta yekänti. Nitre 36 nükani gätä yebätä aune nitre ni kwä käkwe ja ngökani ñöte. Kenanbe, kukwe kwin jatani nemen bare, akwa ¿nitre braibe ye kukwe metre Bibliabätä ñotra kwrere mikadre gare ño nitre 60 millón nünanka juta yete ie?

Sö mayo kä 1927 yete, Nitre ja Tötikaka Bibliabätä kukwe ükaninte kukwe kädriei Bibliabätä jatäri mikakäre gare. Kä Osaka yete kukwe kädriebare kena ni jökrä kräke, aune ja mräkätre ye kukwe mikani gare juta ye jökrä te aune tärä okwä krikri tikani kwetre aune pancarta krikri yebiti nuainbare kwetre. Ne madakäre, täräkwata ni nübaikäre ye juani 3,000 nitre ütiäte krikri kräke aune mada döräibare kwetre 150,000. Kukwe kädriei ye mikani gare kwetre periódico bäri ütiäte yebätä, ¡bätä 400,000 boleto nänkäre trente yebätä kukwe ye mikani gare kwetre arato! Köbö te kukwe kädriebare ye näire avión kia kwitakabare kwinta juta yebiti ta aune täräkwata 100,000 ni nübaikäre ye kitani kuintubu kwe. ¿Ye köböire dre namani bare? Kä gätä nuainkäre Asahi yete ni nükani kwati krubäte. Nitre 2,300 nükani kukwe kädriebare ye kukwe nuakäre, kukwe kädriebare ye kädekani “Gobran Ngöbökwe käi nibira ja ken”. Nitre mada 1,000 namani jubäre... ¡kä ñaka namani kräketre kä teri! Kukwe kädriebare ünä ye bitikäre, nitre 600 ja mikaninte kukwe ngwantari namani aune mika namani gare ye kukwe nuakäre. Sö ja känenkäre yete, kukwe kädriebare kä Kioto yete aune juta mada mada nemenkä nedrinkri kä Japón yete arato.

Sö octubre kä 1927 yete, ja mräkätre kukwe ükaninte kukwe mada kädriekäre ketamä jire kä Tokio yete. Niaratre täräkwata ni nübaikäre juani nitre ütiäte kräke, ñodre ni gobranka aune nitre sribikä Parlamento, nitre ji ngwanka iglesiate aune nitre rükä kräke. Niaratre pancarta mikani tuare, kukwe mikani gare kwetre arato periódico yebätä aune täräkwata ni nübaikäre ye döräibare kwetre 710,000. Nitre nükani 4,800 kukwe kädriebare ye kukwe nuakäre.

Nitre colportor (prekursor) namani ütiäte kukwe driekäre ju ju te. Matsue Ishii sribi colportor nuainbare kena juta Japón yete aune muko kwe, Jizo, kukwe driebare ben kä keta kabre känti, kukwe driebare kwetre Sapporo, ye nemenkä ngwitärikri nememe kä Sendai, Tokio, Yokohama, Nagoya, Osaka, Kioto, Okayama aune Tokushima. Matsue aune meri mada umbre Testiko kädeka nämene Sakiko Tanaka, niaratre ye nitre sribikä gobranbe ütiäte kri tuaninbiti, aune ye nuainkäre nämenentre dän kimonos kwin kite jabätä. Bati, ni sribikä gobranbe käkwe tärä El Arpa de Dios aune Liberación käräbare 300 ja kräke, mikakäre biblioteca yete nitre nämene ngite yekänti.

 Matsue tärä biani Katsuo aune Hagino Miura yei, niaratre ñäkäbare tärä yebätä angwane, nükani gare niaratre ie kukwe metre kwani ietre. Kä 1931 yete niaratre ja ngökabare ñöte aune ja mikani kwetre sribikäre colportor. Haruichi aune Tane Yamada, aune niaratre ye mräkä kukwe metre kani ngäbiti siba kä 1930 känenkri. Niaratre ja mikani arato sribikäre colportor, aune ngängän kwe Yukiko, nikani sribire Betel juta Tokio yete.

Karo ütiä kabre krubäte aune carretera ñaka nämene kwin nänkäre, aisete Kazumi Minoura aune ja mräkätre mada mada bati bati sribikä colportor nämene niken ju sribebare abokänbätä llanta mikani yete. Niaratre nämene carreta ye kädeke “Jehús”, ñobätä ñan aune Jehús kädrieta Bibliabätä nämene carreta ngwen ño yebätä (2 Rey. 10:15, 16). Betel juta Japón yekänti carreta kädekani “Jehús” ye sribebare komä krikri, sribebare 2.2 metro (7.2 pie) ngare, aune 1.9 metro (6.2 pie) kwata kri kwärikwäri aune kunkwäre, nitre colportor ni ti kräke. Arato carreta kädekani “Jehús” ye sribebare 11 kwetre akwa bäri chi ni nibu aibe kräke, abokän bicicleta nämene jäke. Kiichi Iwasaki käkwe carreta ye sribebare ie törö: “Carreta kädeka nämene Jehú ye kwatire kwatirebiti jondron mikani jue mikara aune batería karokwe ye mikanibätä ñotra mikakäre”. Nitre sribikä colportor ye kukwe metre ñotra kwrere ye mikani gare juta Japón ye jökrä känti, niaratre nikani carreta kädekani “Jehús” ye ngwena kä Hokkaido ngwitärikri yete ngutuäbiti ta aune kä ruäre ñaka kiare yekänti ta nememe kä mötörikri Kyushu yekänti.

Ikumatsu Ota tä niere: “Nun nämä nemen jutate angwane nun nämä Jehú ye mikete ñö köräbätä o kä ngwarbe känti. Käne nun nämä nitre kädekani ütiäte tuinbiti, ñodre nun nämä niken alcalde känti, ye bitikäre nun nämä tärä o täräkwata driere ju ju te. Nun nämä kukwe driere juta ye jökrä te angwane, nun nämä niken juta mada kokwäre”.

Nitre braibe 36 ja Tötikaka Bibliabätä kä Kobe yete käkwe gätä kri nuainbare kena. Kä nikani kwärike ta ye bitikäre, kä 1932 yete mikani gare nitre 103 nämene sribire colportor aune kukwe driekäre. ¡Niaratre tärä biani 14,000 biti bäri nitre madai! Kä nengwane, nitre 220,000 tä kukwe driere aune tä kukwe metre ñotra kwrere mike trä ngitiekä juta Japón yete. (Kukwe kira mikata gare juta Japón yebätä.)