IDI Septiembre 6, 1926, maysa a Japanese a pilgrim (agdaldaliasat a manangaywan) nga agnanaed iti Estados Unidos ti nagsubli idiay Japan kas misionero. Agur-uray kenkuana ti kakaisuna nga agsussuskribir iti The Watch Tower a nangirugi iti maysa a grupo ti panagadal iti Biblia iti siudad ti Kobe. Naangay ti damo nga asamblea dagiti Estudiante ti Biblia iti dayta a siudad idi Enero 2, 1927. Adda 36 a timmabuno, ket 8 ti nabautisaran. Anian a nagsayaat a pangrugian! Ngem kasano a maikasaba daytoy bassit a grupo ti lawag ti kinapudno iti 60 milion nga agnanaed iti Japan?

Idi Mayo 1927, inrugi dagiti nareregta nga Estudiante ti Biblia ti mangasaba iti publiko ken inyawisda ti agsasaruno a lektiur a naibatay iti Biblia. Para iti umuna a palawag, a maangay iti Osaka, nangaramid dagiti kakabsat iti dadakkel a karatula kadagiti lansangan iti intero a siudad ken nangipatulodda iti 3,000 nga imbitasion kadagiti prominente a tattao. Nagibunongda iti 150,000 a polieto ken inyawisda ti palawag kadagiti kangrunaan a pagiwarnak ti Osaka ken iti 400,000 a tiket ti tren. Iti aldaw ti palawag, dua nga eroplano ti nagitinnag iti 100,000 a polieto iti intero a siudad. Agarup 2,300 ti dimngeg iti palawag a napauluan “Ti Pagarian ti Dios Asidegen.” Napusek ti Osaka Asahi Hall ket agarup 1,000 ti saanen a nakastrek ta awanen ti pagtugawanda. Kalpasan ti palawag, nasurok nga 600 ti nagbati para iti saludsod-ken-sungbat a paset. Iti simmaruno a bulbulan, adda dagiti naaramid a palawag publiko iti Kyoto ken dadduma pay a siudad iti makinlaud a Japan.

Idi Oktubre 1927, nangyurnos dagiti Estudiante ti Biblia kadagiti palawag idiay Tokyo. Nagiwarasda manen iti imbitasion kadagiti nalatak a tattao—pakairamanan ti primero ministro, dagiti miembro ti parliamento, ken dagiti lider ti relihion ken militar. Nagaramatda pay kadagiti poster, pagiwarnak, ken 710,000 a polieto. Agdagup iti 4,800 ti timmabuno kadagiti tallo a lektiur iti kabesera ti Japan.

Dakkel ti naaramidan dagiti colporteur (payunir) iti pannakaidanon ti mensahe ti Pagarian kadagiti pagtaengan. Ni Matsue Ishii, maysa kadagiti kaunaan a colporteur idiay Japan, ken ni Jizo a lakayna, winanasda ti agarup 75 a porsiento ti Japan, manipud Sapporo agingga iti Sendai, Tokyo, Yokohama, Nagoya, Osaka, Kyoto, Okayama, ken Tokushima. Nagkawes iti kimono ni Sister Ishii ken ti maysa a bakbaket a sister, ni Sakiko Tanaka, iti ibibisitada kadagiti nangato nga opisial ti gobierno. Maysa kadagidiay nga opisial ti nagkiddaw iti 300 a set ti libro a The Harp of God ken Deliverance para kadagiti libraria ti pagbaludan.

Inawat da Katsuo ken Hagino Miura dagiti libro nga inted ni Sister Ishii ket dagus a nabigbigda ti  kinapudno. Nabautisaranda idi 1931 ken nagbalinda a colporteur. Da Haruichi ken Tane Yamada, ken ti adu pay a kakabagianda, inawatda ti mensahe ti Pagarian sakbay ti 1930. Nagbalin a colporteur dagiti agassawa a Yamada, ken nagserbi met ti balasangda a ni Yukiko iti Bethel iti Tokyo.

Nakangingngina idi dagiti lugan ken narigat ti dalan. Isu a nagusar ni Kazumi Minoura ken ti dadduma pay nga agtutubo a colporteur kadagiti balay a lugan nga awan makinana. Pinanagananda dagitoy iti “Jehu,” ti napaspas ti panagpatarayna a kumakaruahe ken nagbalin nga ari iti Israel. (2 Ar. 10:15, 16) Adda tallo a Dakkel a Jehu a 2.2 metro (7.2 pie) ti kaatiddogna, 1.9 metro (6.2 pie) ti kaakabana, ken 1.9 metro (6.2 pie) ti kangatona ken makalaon iti innem a colporteur. Kasta met, adda 11 a Bassit a Jehu a naaramid iti Bethel iti Japan. Guyoden daytoy ti bisikleta ken makalaon laeng iti dua a tao. Kuna ni Kiichi Iwasaki a timmulong a nangaramid kadagiti Jehu: “Ti tunggal Jehu ket addaan iti tolda kasta met iti bateria ti lugan para iti silaw.” Isilsilnag dagiti colporteur ti lawag ti kinapudno iti intero a Japan nga idurduron ken guyguyodenda dagiti Jehu a sumang-at ken sumalog iti bambantay ken tantanap manipud Hokkaido iti amianan agingga iti Kyushu iti abagatan.

Kinuna ti colporteur a ni Ikumatsu Ota: “No makadanonkami iti maysa nga ili, ibatimi ti Jehu iti igid ti karayan wenno iti nawaya a lugar. Ti umuna a papananmi ket dagiti prominente a tattao, kas iti mayor, sa isarunomi a papanan dagiti pagtaengan tapno itukonmi dagiti literaturatayo. Kalpasanna, umakarkamin iti sumaruno nga ili.”

Ti immuna nga asamblea daydi bassit a grupo ti 36 nga Estudiante ti Biblia iti Kobe ket maysa nga “aldaw dagiti babassit a banag.” (Zac. 4:10) Lima laeng a tawen kalpasanna—idi 1932—103 a colporteur ken agibumbunannag iti Japan ti nangireport a nakaipaimada iti nasurok a 14,000 a libro. Ita, addan organisado a panangasaba kadagiti siudad ti Japan, ken gistay 220,000 nga agibumbunannag ti mangisilsilnag iti silawda iti intero a Pagilian a Pagsingisingan ti Init.—Manipud iti archives-tayo iti Japan.