TARIK 6 dwe mar Septemba 1926, jarit-alwora (pilgrim) moro ma Ja-Japan to nodak Amerka nodok thurgi Japan ka en jamisonari. Ng’at ma ne rito rwake ne en jal moro ma ne ioronega gasede mag The Watch Tower, kendo ma nosechako puonjo jomoko Muma e boma mar Kobe e pinyno. Jopuonjre mag Muma nohango bedo gi chokruok mar alwora tarik 2 dwe mar Januar 1927 e bomano. Ji 36 ne odhi e chokruogno, kendo ji 8 ne obatisi. Ne gichako maber. Kata kamano, joma tin kamano ne nyalo lendo nade ne Jo-Japan milion 60 kendo ma ne dwarore ni ong’e ler mar adiera me Muma?

E dwe mar Mei 1927, Jopuonjre mag Muma nochako kampen mar lendo e lela ka gilando twege mag Muma mopogore opogore ma ne onego ogol. Ka girwako ji e twak mokwongo ma ne idhi gol Osaka, owete noketo signboard madongo gi matindo e boma mar Osaka duto ka gilandogo twagno, kendo ne gioro barupe 3,000 mag gwelo jotelo mopogore opogore e bomano. Ne gipogo otese 150,000 kendo ne gilando twagno e gasede ma ji somo ahinya e bomano kendo e tiket 400,000 mag gach reru. Chieng’ ma ne igolo twagno, ndeke ariyo nofuyo ka gikeyo otese 100,000 mag rwako ji. Ji 2,300 nopong’o Osaka Asahi Hall mondo owinj twak ma ne wiye wacho ni “Pinyruodh Nyasaye Okayo Machiegni.” Jomamoko ma dirom 1,000 ne onyis ni odogi nikech ne onge kama ne ginyalo betie. Bang’ twagno, ji mokalo 600 nodong’ mondo omigi dwoko mag penjo ma ne gin-go. E dweche ma ne oluwo, twege mag Muma ne igolo e boma mar Kyoto kod taonde mamoko man imbo mar Japan.

E dwe mar Oktoba 1927, Jopuonjre mag Muma nochano mondo gigol twege e boma mar Tokyo. Ne ogwel joma dongo dongo moriwo prime minister, jood bura, jotend din kod jotend lweny. Otese mimuono e bath ndara, lendo e gasede, kaachiel gi otese 710,000 mag gwelo ji notigo, kendo ji 4,800 nobiro e twege adek ma nogol e boma maduong’ mar piny Japan.

Jokolpota (jopainia) notimo mathoth ahinya e tij lando ote mar Pinyruoth e dala ka dala. Matsue Ishii, ma ne en achiel kuom jokolpota mokwongo Japan, kod Jizo chwore, nolendo chiegni e pinyno duto, chakre Sapporo man yo nyandwat malo, nyaka Sendai, Tokyo, Yokohama, Nagoya, Osaka, Kyoto, Okayama, kod Tokushima. Nyaminwa Ishii kaachiel gi nyaminwa machielo ma hike ng’eny miluongo ni Sakiko Tanaka, ne rwakoga lep Jo-Japan miluongo ni kimono sama ne gilimo jotend sirkal. Achiel kuom jotend sirkalgo nokwayo buge 300 mag The Harp of God kod bug Deliverance mondo ketgi e laibrari man e jela.

Dichwo moro miluongo ni Katsuo kod miyo moro miluongo ni Hagino Miura nokawo buge ma Nyaminwa Ishii nomiyogi kendo ne gifwenyo mapiyo ni  giseyudo adiera. Ne obatisgi 1931 mi gibedo jokolpota. Dichwo machielo miluongo ni Haruichi kod miyo machielo miluongo ni Tane Yamada, kod wedegi mathoth norwako ote mar Pinyruoth kapok ochopo higa mar 1930. Yamada gi jaode nobedo jokolpota kendo nyargi miluongo ni Yukiko nodhi tiyo e Bethel man Tokyo.

Kinde machon-go, nengo mtokni ne tek kendo nderni ne richo ahinya. Omiyo Kazumi Minoura kaachiel gi jokolpota mamoko ne jatiyo gi ot miywayo machalo mtoka maonge injin. Ne giluongo utego ni Jehu, nying ng’at moro ma ne riembo gach faras matek ma bang’e nobedo ruodh Israel. (2 Ruo. 10:15, 16) Ne nitie Jehu adek madongo ma moro ka moro kuomgi borne ne romo fut 7.2, lachne fut 6.2, kendo fut 6.2 ka dhi malo. Jehu achiel ne nyalo ting’o jopainia auchiel. E wi mano, ofis ma Japan noloso Jehu matindo 11 ma ne iluongo ni “Baby Jehu,” kendo ne iywayogi gi ndigni miriembo gi ji ariyo. Kiichi Iwasaki, ma ne okonyo e loso Jehugo, wacho kama: “Jehu ka Jehu ne nigi hema kod betri mar mtoka ma ne konyo e chiwo ler mar sitima.” Jokolpota ne lando ler mar adiera e piny Japan duto ka giywayo kendo gidhiro Jehu e gode kod kuonde ma ridore chakre Hokkaido yo nyandwat mar pinyno nyaka Kyushu ma ne ni yo milambo.

Kolpota miluongo ni Ikumatsu Ota nowacho niya: “Kane wadonjo e taon moro, ne wajachungo Jehu e tie aora kata e pap moro. Ne wakwongo limo jotelo e taondno, kaka meya, kae to bang’ mano ne walimo ji e mier ka waweyonegi bugewa. Bang’ lendo e taondno duto, ne wadhi e taon machielo.”

Kane Jopuonjre mag Muma 36 otimo chokruoggi mokwongo mar alwora, mano ne en mana chakruok mar “gik matindo.” (Zek. 4:10) Bang’ higini abich, ma tiende ni e higa mar 1932, jokolpota 103 kod jolendo mamoko e piny Japan nochiwo ripot manyiso ni ne giweyo ne ji buge mokalo 14,000. Gie sani, tij lendo itimo e yo mochanore e chuny taonde e piny Japan kendo chiegni jolendo 220,000 sani lando adiera mag Muma e piny Japan duto.—Moa e giwa machon e piny Japan.