KA September 6, 1926, mosepedi wa bodumedi wa Mojapane (molebeledi wa mosepedi) kua United States o ile a boela Japane e le moromiwa. O be a letetšwe ke motho yo a itšego yo a bego a beeleditše Morokami, yo a bego a šetše a thomile sehlopha sa thuto ya Beibele kua Kobe. Ka January 2, 1927, Barutwana ba Beibele ba ile ba swara kopano ya bona ya mathomo motseng wo. Go ile gwa tla batho ba 36, gomme gwa kolobetšwa ba 8. E be e le mathomomayo a mabotse, eupša sehlopha se se senyenyane se be se tla fihlelela bjang batho ba Japane ba dimilione tše 60 bao ba bego ba swanetše go botšwa therešo ya Beibele?

Ka May 1927, Barutwana ba Beibele ba bohlale ba ile ba thoma lesolo la go nea bohlatse phatlalatša gore ba laletše batho go tlo theetša dipolelo tše di theilwego Beibeleng. Polelong ya mathomo yeo e bego e tlo newa kua Osaka, bana babo rena ba ile ba bea maswao ditsejaneng le dipampiri tša papatšo motseng ka moka gomme ba romela bahlomphegi ditaletšo tše 3 000. Ba ile ba sepediša ditaletšo tše 150 000 gomme ba tsebiša batho ka polelo yeo dikuranteng tša go tuma tša Osaka le ditheketheng tša terene tše 400 000. Letšatšing la polelo, difofane tše pedi di ile tša gašanya ditaletšo tše 100 000 motseng. Batho ba 2 300 ba ile ba tlala Holong ya Osaka Asahi go tlo theetša polelo yeo e nago le sehlogo seo se rego, “Mmušo wa Modimo o Kgauswi.” Batho ba bangwe ba e ka bago ba sekete ba ile ba swanelwa ke go gomišwa ka ge go be go se na madulo. Ka morago ga polelo, batheetši ba ka godimo ga ba 600 ba ile ba šala bakeng sa lenaneo la dipotšišo le dikarabo. Dikgweding tše di latetšego, dipolelo tša phatlalatša tšeo di theilwego Beibeleng di ile tša newa kua Kyoto le metseng e mengwe ya ka bodikela bja Japane.

Ka October 1927, Barutwana ba Beibele ba ile ba rulaganya gore go newe dipolelo kua Tokyo. Le lekgeng le, ba ile ba romela ditaletšo le go bahlomphegi—go akaretša tonakgolo, ditho tša palamente le go baetapele ba madumedi le ba mašole. Go ile gwa dirišwa dipampiri tša papatšo, dikuranta gotee le ditaletšo tše 710 000 gomme batho ba 4 800 ba ba gona dipolelong tše tharo kua motsengmošate wa Japane.

Babapatši ba dipuku tša bodumedi (babulamadibogo) ba ile ba kgatha tema ya bohlokwa kudu go iša molaetša wa Mmušo magaeng a batho. Matsue Ishii, e lego yo mongwe wa babapatši ba mathomo ba dipuku tša bodumedi kua Japane, le monna wa gagwe e lego Jizo, ba ile ba akaretša karolo e kgolo ya tšhemo nageng yeo, ba šoma go tloga Sapporo ka leboa la Sendai, Tokyo, Yokohama, Nagoya, Osaka, Kyoto, Okayama le Tokushima. Kgaetšedi Ishii le kgaetšedi yo mongwe wa motšofadi e lego Sakiko Tanaka, ba ile ba apara diaparo tša setšo sa moo tše di bitšwago dikimono gore ba etele bahlankedi ba phagamego ba mmušo. Yo mongwe wa bahlankedi bao o ile a kgopela dikopi tše 300 tša puku ya The Harp of God le tše 300 tša Deliverance gore a di bee makgobapukung a kgolegong.

Katsuo le Hagino Miura ba ile ba amogela dipuku tše di tšwago go Kgaetšedi Ishii gomme gateetee ba lemoga gore ba hweditše therešo. Ba ile ba kolobetšwa ka 1931 gomme ya ba babapatši ba dipuku tša bodumedi. Haruichi le Tane Yamada gotee le ba bantši ba metswalo ya bona ba ile ba amogela molaetša wa Mmušo pejana ga 1930. Haruichi le  Tane e ile ya ba babapatši ba dipuku tša bodumedi, gomme morwedi wa bona e lego Yukiko a yo hlankela Bethele kua Tokyo.

Mehleng yeo, dikoloi di be di tura gomme le ditsela di sa sepelege. Ka gona Kazumi Minoura le babapatši ba bangwe ba dipuku tša bodumedi ba banyenyane ba be ba diriša dikharabane. Ba ile ba di bitša Jehu, e lego leina la monna yo e ilego ya ba kgoši ya Isiraele yoo a ilego a kitimiša koloi ya gagwe ka lebelo. (2 Dikg. 10:15, 16) Dikharabane tše dikgolo tše tharo tšeo e nngwe le e nngwe e bego e le ya botelele bja dimithara tše 2,2, bophara bja dimithara tše 1,9, le bophagamo bja dimithara tše 1,9, di be di kgona go lekana babulamadibogo ba tshela. Go oketša moo, ofisi ya lekala la Japane e ile ya dira dikharabane tše dinyenyane tše 11 tšeo di bego di gogwa ke dipaesekela gomme di lekana batho ba babedi. Kiichi Iwasaki, yo a thušitšego go hlama dikharabane tše, o gopola ka gore: “Kharabane e nngwe le e nngwe e be e na le tente gotee le petiri ya koloi bakeng sa mabone.” Babapatši ba dipuku tša bodumedi ba be ba hlabiša seetša sa therešo nageng ka moka ya Japane, ba eya godimo le fase le dikharabane tša bona dithabeng le meeding, go tloga Hokkaido yeo e lego ka leboa go fihla Kyushu yeo e lego ka borwa.

Mmapatši yo mongwe wa dipuku tša bodumedi e lego Ikumatsu Ota o itše: “Ge re be re fihla torotswaneng le ge e le efe, re be re phaka dikharabane tša rena leribeng la noka goba lebaleng. Re be re thoma pele ka go etela banna ba ba hlomphegago ba torotswaneng yeo, ba bjalo ka ramotse, gomme ka morago ga moo re be re eya magaeng a batho gore re ba sepedišetše dikgatišo tša rena. Ge re akareditše tšhemo yeo, re be re fetela torotswaneng e nngwe.”

Ge sehlopha sela sa Barutwana ba Beibele ba 36 se be se swara kopano ya sona ya mathomo kua Kobe, e be e le “mehla ya dilo tše dinyenyane.” (Sak. 4:10) Ka morago ga nywaga e mehlano feela—ka 1932—babapatši ba dipuku tša bodumedi le bagoeledi ba bangwe ba 103 kua Japane ba ile ba bega modiro wa bona gomme ba sepediša dipuku tša ka godimo ga tše 14 000. Lehono go newa bohlatse bjo bo rulagantšwego gabotse ditoropong tše dikgolo tša kua Japane, gomme bagoeledi ba e ka bago ba 220 000 ba hlabiša seetša nageng ye.—Go tšwa bobolokelong bja rena kua Japane.