NEN Setyembre 6, 1926, walay Japanese ya pilgrim (ombiabiahen manangasikaso) ed United States ya pinmawil ed Japan bilang misionero. Sikatoy aalagaren la na saksakey ya subscriber na The Watch Tower, ya angigapoy grupon manaaral na Biblia ed Kobe. Say sankaunaan ya asemblea na Saray Estudyante na Biblia ed satan a syudad et nen Enero 2, 1927. Walay 36 ya inmatendi, tan 8 so abautismoan. Marakep itan ya gapoan, balet panon ya napulongan na sayan melag ya grupo so 60 milyon ya populasyon na Japan ya kaukolan a nasinagan na liwawa na katuaay Biblia?

Nen Mayo 1927, inggapo na maseseg iran Estudyante na Biblia so kampanyan public witnessing pian ipakabat so serye na saray paliwawa ed Biblia. Diad unonan paliwawa ya gawaen ed Osaka, saray agagi et nankarga na saray karatula tan angkabaleg ya billboard diad gilig na dalan ed interon syudad tan angipawit iray 3,000 ya imbitasyon ed kabkabat iran totoo. Angibunog iray 150,000 ya handbill tan in-advertise day paliwawa ed saray manunan dyaryo ed Osaka tan ed 400,000 ya tiket ed tren. Diad samay agew na paliwawa, walay duaran eroplano ya linmiber ed syudad pian mangisabuyag na 100,000 ya handbill. Manga 2,300 so linmad Osaka Asahi Hall pian ondengel ed paliwawan “Asingsingger La so Panarian na Dios.” Manga sanlibo so agla pinaloob ta anggapo lay nayurongan da. Kayari na paliwawa, manga 600 ya inmatendi so agni inmalis parad tepet tan ebat ya sesyon. Diad tinmumbok iran bulan, wala met iray ginawan publikon paliwawa diad Kyoto tan arum nin syudad ed western Japan.

Nen Oktubre 1927, angorganisa iray Estudyante na Biblia na saray paliwawa ed Tokyo. Inikdan lamet na imbitasyon iray kabkabat ya totoo—singa say prime minister, arum ya opisyal na gobierno, tan saray lider na relihyon tan militar. Impakabat day paliwawa panamegley na saray poster, advertisement ed dyaryo, tan 710,000 ya handbill. Walay 4,800 ya inmatendi diad kabisera na Japan.

Baleg so agawaan na saray colporteur (o payunir) diad impangipulong ed mensahe na Panarian ed saray kaabungan. Say sakey ed sikara et si Matsue Ishii, tan say asawa ton si Jizo. Pinulongan day 75 porsiento na bansa, manlapud Sapporo diad norte anggad Sendai, Tokyo, Yokohama, Nagoya, Osaka, Kyoto, Okayama, tan Tokushima. Si Sister Ishii tan sakey nin mas matatken ya sister ya si Sakiko Tanaka et mansusulong na pormal ya kimono no onla rad saray atagey ya opisyal na gobierno. Walay sakey ed sikara ya nan-request na 300 ya set na libron The Harp of God tan Deliverance pian ikargad saray libraryad prisoan.

 Si Katsuo tan Hagino Miura et naopresian nen Sister Ishii na saray libro tan inawat dan tampol so katuaan. Abautismoan ira nen 1931 tan nagmaliw iran colporteur. Si Haruichi tan Tane Yamada, tan dakel ed saray kakanayon da et angawat ed mensahe na Panarian antis na 1930. Nagmaliw ya colporteur so sanasawan Yamada, tan say anak dan bii ya si Yukiko et nanlingkor ed Bethel diad Tokyo.

Diad saman a panaon, mabmabli so luluganan tan aliwliwa ray karsada. Kanian si Kazumi Minoura tan arum nin kalangweran ya colporteur et angusar na saray trailer ya anggapoy makina to. Inngaran da iratan ed si Jehu ya maples ya manpabatik na karwahe a nagmaliw ya ari ed Israel. (2 Ara. 10:15, 16) Saramay taloran Baleg ya Jehu et 2.2 metro so karukey to, 1.9 metro so kalapar to, tan 1.9 metro so kaatagey to tan kada sakey et nakarga toy anggad anemiran payunir. Wala met so 11 ya Melag ya Jehu ya ginawad branch ed Japan ya impeket ed bisikleta. Oniay imbaga nen Kiichi Iwasaki ya tinmulong ed panggawa na Jehu: “Kada Jehu et walay tolda to tan baterya na kotse pian mansuplay na koryenti.” Insindag na saray colporteur so liwaway katuaan diad interon Japan, ya intutulak tan ingguguyor da ray Jehu diad saray kapalandeyan tan lawak manlapud Hokkaido diad norte anggad Kyushu diad abalaten.

Oniay imbaga na colporteur ya si Ikumatsu Ota: “No onsabi kamid sakey ya baley, itilak mi so Jehu mi diad asingger ed ilog odino alog. Say unonan bisitaen mi et saray kabkabat ed satan a baley, singa say mayor, tan kayari to et onla kami lad saray kaabungan pian iyopresi ray literatura tayo. No akobrian mi lay teritorya, onla kami lamet ed onsublay ya baley.”

Nibagan “melag a gapoan” imay sankaunaan ya asemblea ed Kobe ya inatendian na 36 ya Estudyante na Biblia. (Zac. 4:10, NW) Kalabas labat na limaran taon—nen 1932—103 ya colporteur tan publisher so manpupulong ed Japan, ya akapangiyopresi na masulok ya 14,000 a libro. Natan et walay organisadon public witnessing diad saray syudad ed Japan, tan ngalngali 220,000 ya publisher la so mangisisindag ed liwawa ra diad interon bansa.—Nanlapud daan iran koleksion mi ed Japan.