IHA loron 6 Novembru 1926, katuas área nian ida fila ba ninia rai Japaun husi Estadus Unidus hodi komesa halaʼo ninia knaar foun nuʼudar misionáriu. Tempu neʼebá, iha ema ida deʼit neʼebé hameno Livru Haklaken no mane neʼe mak bá hasoru katuas área nian hodi fó benvindu ba nia. Mane neʼe hahú ona grupu ida hodi estuda Bíblia iha sidade Kobe. Estudante Bíblia sira-neʼe halaʼo reuniaun boot primeiru iha loron 2 Janeiru 1927, ema naʼin-36 mak tuir no naʼin-8 mak hetan batizmu. Ho ema uitoan deʼit hanesan neʼe, oinsá mak naroman lia-loos nian bele habelar ba ema naʼin-60.000.000 iha rai-Japaun?

Iha fulan-Maiu 1927, Estudante Bíblia sira halo kampaña hodi konvida ema rona diskursu espesiál balu kona-ba Bíblia. Diskursu primeiru sei halaʼo iha sidade Osaka. Irmaun-irmán sira halo buat barak hodi fó sai kona-ba diskursu sira-neʼe. Sira taka avizu iha sidade laran, uza spanduk, no haruka konvite ba ema-boot naʼin-3.000. Sira fahe konvite 150.000 no sira mós tau avizu iha jornál sira no hakerek iha komboiu nia tiket 400.000. Iha loron atu hatoʼo diskursu neʼe, aviaun rua soe konvite 100.000 husi lalehan ba sidade Osaka. Ikusmai ema naʼin-2.300 halo nakonu salaun hodi rona diskursu “Maromak nia Ukun besik ona.” Ema naʼin-1.000 tan hakarak tuir maibé fatin la toʼo ona ba sira. Diskursu neʼe hotu tiha, ema naʼin-600 hela hodi tuir programa pergunta no resposta ida tan. Iha fulan balu tuirmai, Estudante Bíblia sira hatoʼo diskursu iha sidade Kyoto no sidade sira seluk iha Japaun parte oeste.

Iha fulan-Outubru 1927, Estudante Bíblia sira halo arranju atu hatoʼo diskursu sira iha sidade Tokyo. Dala ida tan, sira fahe konvite ba ema-boot sira hanesan primeiru ministru, deputadu sira, ulun-naʼin relijiaun sira no xefe ba forsa sira. Sira taka spanduk, tau avizu iha jornál no fahe konvite 710.000. Ema naʼin-4.800 mak tuir diskursu espesiál sira-neʼe iha Tokyo.

Pioneiru sira ajuda tebes hodi lori liafuan diʼak ba ema iha sira-nia uma. Irmán pioneiru ida naran Matsue Ishii no ninia laʼen, Jizo, sira haklaken haleʼu rai-Japaun toʼo porsentu 75, husi Sapporo iha parte norte toʼo Sendai, Tokyo, Yokohama, Nagoya, Osaka, Kyoto, Okayama, no Tokushima. Irmán Ishii no irmán seluk naran Sakiko Tanaka, sira hatais Japaun nia roupa tradisionál nian hodi bá vizita ema-boot sira iha governu. Ema-boot ida husu livru Maromak nia Arpa (The Harp of God) no Salvasaun (Deliverance) kópia 300 hodi tau iha komarka nia biblioteka sira.

Bainhira Katsuo no Hagino Miura simu livru sira husi irmán Ishii, sira hatene kedas sira hetan lia-loos. Sira hetan batizmu iha tinan 1931 no foti  pioneiru. Haruichi no Tane Yamada, hamutuk ho sira-nia família simu lia-loos antes tinan 1930. Sira mós foti pioneiru no ikusmai sira-nia oan-feto Yukiko serbí iha Betel iha Tokyo.

Iha tempu neʼebá, susar atu hola karreta tanba karun tebes no dalan sira mós la diʼak. Tan neʼe Kazumi Minoura no pioneiru sira seluk uza uma-karreta neʼebé la uza mákina. Sira hanaran karreta sira-neʼe Jeú, hodi tuir liurai ida nia naran neʼebé hodi kuda-karreta iha tempu Izraél antigu. (2 Reis [Raja-Raja] 10:15, 16) Jeú boot sira naruk toʼo metru 2,2 ho luan metru 1,9, no aas toʼo metru 1,9. Pioneiru naʼin-neen bele toba iha laran. Iha mós Jeú kiʼik sira neʼebé ema naʼin-rua bele toba iha laran no uza bisikleta hodi dada. Irmaun sira iha sukursál Japaun nian mak halo Jeú kiʼik sira 11. Irmaun Kiichi Iwasaki ajuda hodi halo uma-karreta Jeú sira-neʼe. Nia hatete: “Iha Jeú ida-idak sira lori mós tenda ho karreta nia bateria hodi halo lampu lakan.” Pioneiru sira lori Jeú sira-neʼe husi Hokkaido iha parte norte toʼo Kyushu iha parte súl. Sira serbisu makaʼas hodi halo naroman lia-loos nian nabilan iha rai-Japaun.

Pioneiru ida naran Ikumatsu Ota hatete: “Toʼo tiha iha suku ida, ami para ami-nia Jeú iha mota ninin ka iha fatin luan ida. Ulukliu, ami bá vizita ema-boot sira iha suku neʼe, depois ami bá vizita ema iha sira-nia uma hodi fahe livru ba sira. Haklaken tiha ba ema hotu, ami bá suku seluk tan.”

Lia-loos iha rai-Japaun komesa husi buat kiʼik deʼit bainhira estudante Bíblia sira naʼin-36 halaʼo reuniaun boot primeiru iha sidade Kobe iha tinan 1927. (Zacarias [Zakharia] 4:10) Tinan lima liutiha, iha 1932, iha haklaken-naʼin no pioneiru hamutuk naʼin-103. Sira fahe livru hamutuk 14.000 iha tinan neʼe. Ohin loron, iha haklaken-naʼin hamutuk 220.000 iha rai-Japaun, no sira uza dalan oioin atu haklaken iha fatin públiku iha sidade laran. Ho sira-nia hakaʼas-an, sira halo sira-nia naroman nabilan iha rai-Japaun.—Husi ita-nia arkivu iha Japaun.