Uzye Mwamanya Izina Lyakwe Leza, Alino Uzye Mukaliomvya?
ILYASI LYAKUTANDIKILAKO | MUNGAPALAMA KULI LEZA
Uzye Mwamanya Izina Lyakwe Leza, Alino Uzye Mukaliomvya?
Uzye kwaya cuza winu umwi wino mutamanya izina? Kwene kufwile kutaaya. Umwanaci umwi uwizina lyakuti Ailina umwina Bugelya walanzile ukuti, “Utanga uye cuza wakwe Leza ndi cakuti utamanya izina lyakwe.” Icintu icisuma icakuti, Leza akalonda ukuti muye cuza wakwe, ndi vino ilyasi ilifumileko lilanzile. Fwandi, ukupitila muli Baibo, akaimanyisya kuli mwe-mwe lino akuti: ‘Nene indi Yeova, lilyo lili zina lyane.’—Ezaya 42:8.
Uzye Yeova akalola ukuti cacindama ukumanya izina lyakwe, nanti uzye akalola ukuti citacindama? Elenganyini pali cii: Izina lyakwe Leza, ilyalemvilwe ni vilembo vya ciYebulai 4 ivika-amwa ukuti Tetilagalamatoni, vikazanwa imiku apiipi na 7,000 umu Malembelo ya ciYebulai aatandikilepo ukulembwa. Fwandi lii lili zina ilikazanwa imiku iingi sana muli Baibo ukuluta amazina yonsi asyala aalumbulwamo. I cumicumi uu usininkizyo wakuti Yeova akaalonda tumanye izina lyakwe alino nu kuliomvya. *
Nomba, antu yamwi yangelenganya ukuti vino Leza u wamuzilo nupya u wa maka yonsi, cingaya ukukanaya nu mucinzi ukuomvya izina lyakwe. Kwene i cisinka citanga cizipe ukuomvya izina lyakwe Leza ukwaula umucinzi, wakwe vino mutanga mutemwe ukusaalula izina lyakwe cuza winu. Lelo, Yeova akaalonda ukuti yaayo amutemwa yaacindika izina lyakwe nu kunenako antu yauze apizina kwene lilyo ukuti nayo yalimanye. (Masamu 69:30, 31; 96:2, 8) Iusyini ukuti Yesu wanenyile asambi yakwe ukuti yaapepa yakuti: “Tata witu uwa mwiyulu, Izina lyako licindikwe.” Naswe tungaacindika izina lyakwe Leza ndi cakuti tukuneenako antu yauze apizina lii kuti nayo yalimanye. Kucita vivyo kukalenga ukuti tuye ya cuza yakwe Leza.—Mateo 6:9.
Baibo ikati Leza akasumbako sana amano kuli yaayo ‘aakacindika [nanti, “aatemwa sana”] izina lyakwe.’ (Malaki 3:16) Ukulozya uku yantu yaayo, Yeova walaya ukuti: “Nemo namatulanyanga yayo antemwa, nu kutaasya yayo amanya. Lino yene yalandaizya nemo ndayasuka, lino yaponelwa namalanda nemo namayanga nayo.” (Masamu 91:14, 15) Ukumanya nu kuomvya izina lyakwe Yeova cisi cintu citale ndi tukulonda ukuya pali ucuza nawe.
[Futunoti]
^ pala. 4 Icaulanda icakuti, umu Mabaibo aingi aasenulwa mutaaya izina lyakwe Leza, nanti icakuti izina lilyo likazanwa imiku iingi sana umu Malembelo ya ciYebulai, yano ilingi yaka-amwa ukuti Upangano wa Mpiti. Antu aasenulanga ama Baibo yaayo, yaafumizyemo izina lilyo nu kupyanikizyamo amazina ya mucinzi wakwe, “Mwene” nanti “Leza.” Pakuti muvwilepo ivyeo navyuze apilyasi lii, lolini amafwa 195-197 umwibuku lyakuti Uzye Baibo Ikasambilizya Ukuti Uli? ilyapangwa ni Inte Zyakwe Yeova.
[Cisinka icili umu vilembo vikulu apifwa 4]
Ukupitila muli Baibo, Leza akaimanyisya kuli mwemwe ati: ‘Nene indi Yeova, lilyo lili zina lyane.’—Ezaya 42:8
[Cikope api’fwa 4]
Ucuza pa yantu yaili ilingi ukatandika ndi antu yaayo yamanyana mazina. Uzye mwamanya izina lyakwe Leza?
