Naa ni na khonani ya tsini ine na sa i ḓivhe dzina? Khamusi a zwo ngo ralo. Mufumakadzi wa ngei Bulgaria ane a pfi Irina o ri: “A zwi konadzei u vha tsini na Mudzimu arali ni sa ḓivhi dzina ḽawe.” Zwi takadzaho ndi uri samusi zwo sumbedzwa kha thero yo fhiraho, Mudzimu u ṱoḓa ni tshi sendela tsini nae. Nga zwenezwo, o shumisa Bivhili u itela u ḓiḓivhadza kha inwi nga amba uri: “Ndi Nṋe Yehova, ndi ḽone dzina ḽanga.”—Yesaya 42:8.

Naa ndi zwa ndeme kana a si zwa ndeme kha Yehova uri ni ḓivhe na u shumisa dzina ḽawe? Ṱhogomelani hezwi: Dzina ḽa Mudzimu ḽo ṅwalwaho nga themba dza Luheberu nṋa dzine dza vhidzwa Tetragrammaton, ḽi bvelela kha Maṅwalo a u thoma a Luheberu lu ṱoḓaho u vha 7 000. Ḽi bvelela lunzhi u fhira maṅwe madzina o bulwaho Bivhilini. Vhukuma zwenezwi zwi sumbedza uri Yehova u ṱoḓa ri tshi ḓivha na u shumisa dzina ḽawe. *

Naho zwo ralo, vhaṅwe vha nga vhona u nga samusi Mudzimu e mukhethwa nahone e ramaanḓaoṱhe, arali vha shumisa dzina ḽawe vha ḓo vha vha tshi khou mu nyadza. Vhukuma, zwo khakhea u vhidza dzina ḽa Mudzimu nga fhedzi, samusi ni nga si vhidze dzina ḽa khonani yaṋu ya tsini nga fhedzi. Naho zwo ralo, ndi lufuno lwa Yehova uri vhane vha mu funa, vha hulise dzina ḽawe na u ita uri ḽi ḓivhiwe. (Psalme ya 69:30, 31; 96:2, 8) Humbulani uri Yesu o funza vhatevheli vhawe u rabela nga uri: “Khotsi ashu wa ṱaḓulu, dzina ḽau nga ḽi itwe ḽikhethwa.” Ri nga vha na mukovhe wa u ita uri dzina ḽa Mudzimu ḽi itwe ḽikhethwa nga u ḽi ḓivhadza. U ita nga u ralo zwi ri sendedza tsini nae.—Mateo 6:9.

Bivhili i sumbedza uri Mudzimu u ṱhogomela vhukuma “vha sa hangwi dzina ḽawe.” (Maleaxi 3:16) Vhane vha ita nga u ralo, Yehova u fulufhedzisa uri: “Ndi ḓo mu khudisa ngauri u ḓivha dzina ḽanga. U khou mbidza; ndi ḓo mu aravha; ndi nae’ musi ó khakhelwa.” (Psalme ya 91:14, 15) U ḓivha na u shumisa dzina Yehova ndi zwa ndeme arali ri na lutamo lwa u ḓiphina nga vhushaka ha tsini nae.